Malakaw Kita sa Satong Integridad!
Malakaw Kita sa Satong Integridad!
“Kun para sa sako, malakaw ako sa sakong integridad.”—SAL. 26:11.
1, 2. Ano an sinabi ni Job manongod sa integridad nia, asin ano an ipinaparisa kan Job kapitulo 31 mapadapit sa saiya?
KAIDTONG suanoy na mga panahon, an mga bagay na ipinapabakal parateng ginagamitan nin timbangan. Sa pangkagabsan, iyan may nakabalagbag na pidaso nin metal na an tahaw na kabtang nakakabit sa sarong taldok. May nakabitin na tigsarong bandehado sa mag-ibong-ibong kan metal. An bagay na tinitimbang ilinalaag sa sarong bandehado asin an pantimbang nakalaag sa ibong. An banwaan nin Dios dapat na maggamit nin tamang timbangan asin pantimbang.—Tal. 11:1
2 Kan an diosnon na si Job sinasalakay ni Satanas, sia nagsabi: “Titimbangon [ako ni Jehova] sa eksaktong timbangan asin maaaraman nin Dios an sakuyang integridad.” (Job 31:6) Mapadapit dian, nagsambit si Job nin dakol na situwasyon na puedeng bumalo sa saro na nagdadanay na may integridad. Alagad si Job talagang mapangganang nakapasar sa pagbalo, arog kan ipinaparisa kan sinabi nia sa Job kapitulo 31. An marahay na halimbawa nia puedeng magmotibar nanggad sa sato na humiro sa kaagid na paagi asin marigon na magsabi, arog kan salmistang si David: “Kun para sa sako, malakaw ako sa sakong integridad.”—Sal. 26:11.
3. Taano ta mahalaga na magin maimbod sa Dios, sa darakula man o saradit na bagay?
3 Minsan ngani grabe an pagbalo ki Job, sia nagdanay na maimbod sa Dios. Tibaad sabihon pa ngani nin nagkapira na pambihira nanggad an halimbawa ni Job huli sa grabeng pagbalo sa saiya asin sa marigon na integridad nia. Bako man eksaktong arog ki Job an pagsakit niato. Minsan siring, dapat kitang magin maimbod sa Dios, sa darakula man o saradit na bagay, kun gusto niatong pakosogon an satong determinasyon bilang nagdadanay na may integridad asin parasuportar kan saiyang soberaniya.—Basahon an Lucas 16:10.
Mahalagang Marhay an Integridad sa Moral
4, 5. Bilang nagdadanay na may integridad, anong paggawe an linikayan ni Job?
4 Tanganing mapagdanay an satong integridad ki Jehova, dapat tang sunodon an saiyang pamantayan sa moral, arog nanggad ki Job. Sia nagsabi: “Nakipagtipan ako sa sakuyang mga mata. Kaya paano ako makakapaheling nin atension sa sarong birhen? . . . Kun an sakong puso naakit sa sarong babae, asin pirme akong nag-aabang sa mismong puertahan kan sakong kaibaiba, ipaggiling kan sakong agom na babae an ibang lalaki, asin magluhod sa ibabaw nia an ibang mga lalaki.”—Job 31:1, 9, 10.
5 Huling determinado na magdanay na may integridad sa Dios, linikayan ni Job na magparaheling na may seksuwal na pagmawot sa sarong babae. Bilang may agom, dai sia nakigitilan sa sarong babae na daing agom o nagkagusto sa agom nin ibang lalaki. Sa Sermon sa Bukid, may mapuersang sinabi si Jesus mapadapit sa seksuwal na moralidad—sarong punto nanggad na kaipuhan tandaan nin mga nagdadanay na may integridad.—Basahon an Mateo 5:27, 28.
Nungkang Gumamit nin Tusong mga Paagi
6, 7. (a) Arog ki Job, ano an ginagamit nin Dios tanganing aramon an satong integridad? (b) Taano ta kita dai dapat na magin tuso o mapandaya?
6 Dai kita puedeng gumamit nin tusong mga paagi kun gusto tang mapabilang sa mga nagdadanay na may integridad. (Basahon an Talinhaga 3:31-33.) Sinabi ni Job: “Kun ako naglakaw kaiba nin mga tawong putikon, asin an sakong bitis naghihidali pasiring sa pangloloko, titimbangon [ako ni Jehova] sa eksaktong timbangan asin maaaraman nin Dios an sakong integridad.” (Job 31:5, 6) Tinitimbang ni Jehova an bilog na katawohan sa “eksaktong timbangan.” Arog ki Job, ginagamit nin Dios an saiyang sangkap na pamantayan nin hustisya tanganing aramon an satong integridad bilang dusay na mga lingkod nia.
7 Kun kita magigin tuso o mapandaya, dai niato mapagdadanay an satong integridad sa Dios. An mga nagdadanay na may integridad ‘nagsikwal na kan patagong mga bagay na maninigong ikasupog’ asin “dai naglalakaw na may katusohan.” (2 Cor. 4:1, 2) Alagad paano kun kita tuso sa tataramon o gibo, na huli kaiyan naghahagad na nin tabang sa Dios an sarong kapagtubod? Kun siring, herak man sa sato! “Nag-apod ako ki Jehova kan ako napupurisaw, asin sinimbag nia ako,” an awit kan salmista. “O Jehova, iligtas mo an sakong kalag sa putikon na mga ngabil, sa madayang dila.” (Sal. 120:1, 2) Mahalagang girumdomon na kayang siyasaton nin Dios an satong kalaoglaoging pagkatawo, na ‘binabalo an puso asin mga bato’ tanganing maaraman kun baga kita tunay na nagdadanay na may integridad.—Sal. 7:8, 9.
Magin Arogan sa Pagtratar sa Iba
8. Paano trinatar ni Job an iba?
8 Tanganing mapagdanay an satong integridad, kaipuhan kitang magin arog ki Job, na makatanosan, mapakumbaba, asin makonsiderasyon sa iba. Sia nagsabi: “Kun sinasayumahan ko kaidto na matawan nin hustisya an sakong oripon na lalaki o babae sa asunto ninda laban sa sako, kun siring ano an magigibo ko kun tumindog na an Dios? Asin kun sia makipagkuenta na, ano an ikakasimbag ko sa saiya? Bako daw na an Saro na naggibo sa sako sa tulak iyo man an naggibo sa saiya, asin bako daw na Saro sana an nag-andam sa samo sa matris?”—Job 31:13-15.
9. Anong mga kualidad an ipinaheling ni Job sa pagtratar sa mga surugoon nia, asin paano kita maninigong humiro dapit digdi?
9 Minalataw na bakong komplikado an pagbista sa mga kaso-legal kan panahon ni Job. An mga kaso binibista sa aregladong paagi, asin bukas an mga korte dawa sa mga oripon. Si Job makatanosan asin maheherakon sa pagtratar sa mga surugoon nia. Tanganing kita makalakaw sa satong integridad, dapat tang ipaheling an siring na mga kualidad, nangorogna kun kita magurang sa kongregasyon.
Magin Matinao, Bakong Maaraon
10, 11. (a) Paano niato naaraman na si Job matinao asin matinabang? (b) Anong mas huring hatol sono sa Kasuratan an puedeng ipagirumdom sa sato kan Job 31:16-25?
10 Si Job matinao asin matinabang, bakong maimot asin bakong maaraon. Sia nagsabi: “Kun . . . pinapaluya ko an mga mata kan babaeng balo, asin ako sana an nagkakakan kaidto kan sakong kakanon, mantang dai nakakakan kaiyan an aking lalaki na ilo sa ama . . . Kun naheheling ko kaidto an siisay man na nagagadan huling mayo nin gubing . . . Kun iwinasiwas ko an sakong kamot tumang sa aking lalaki na ilo sa ama, kun naheheling kong kaipuhan an tabang ko sa may tata, mahulog logod an sakong baliwang sa abaga kaiyan, asin matangkas logod an sakong takyag sa tolang kaiyan sa itaas.” Asin dai kutana napagdanay ni Job an saiyang integridad kun sinabi nia sa bulawan: “Ika an sakong sinasarigan!”—Job 31:16-25.
11 Puedeng ipagirumdom sa sato kan siring na poetikong mga tataramon an sinabing ini ni disipulo Santiago: “An klase nin pagsamba na malinig asin daing ramog sa pagheling kan satong Dios asin Ama iyo ini: an pag-ataman sa mga ilo asin babaeng balo sa saindang kasakitan, asin an pagpadanay sa sadiri na daing digta kan kinaban.” (Sant. 1:27) Puede man na magirumdoman niato an patanid ni Jesus: “Magpuka kamo asin magmaan kamo sa gabos na klase nin kaaraan, huli ta dawa kun an sarong tawo abunda, an saiyang buhay dai minagikan sa mga bagay na sadiri nia.” Dangan, si Jesus nagtao nin ilustrasyon manongod sa maaraon na tawong mayaman na nagadan na “bakong mayaman sa pagheling nin Dios.” (Luc. 12:15-21) Tanganing magdanay na may integridad, kita dai dapat magpadaog sa pagkaara o kahanaban. An pagkaara sarong klase nin idolatriya, huli ta an atension na para ki Jehova itinatao nin mahanab na tawo sa sarong bagay na minamawot nia, asin sa siring nagigin idolo iyan. (Col. 3:5) Dai nanggad puedeng magkaibanan an integridad asin kahanaban!
Mangapot nin Marigon sa Tunay na Pagsamba
12, 13. Anong halimbawa an itinao ni Job sa paglikay sa idolatriya?
12 An mga nagdadanay na may integridad dai minasuway sa dalisay na pagsamba. Si Job dai naggibo nin siring, huling sinabi nia: “Kun hineheling ko kaidto an liwanag kun iyan minakilyab, o an mahalagang marhay na bulan na nag-aagi, asin an sakong puso naakit sa hilom asin an sakong kamot huminadok sa sakong ngoso, iyan pagkakasala man na dapat asikasohon kan mga hokom, huli ta pignegaran ko kutana an tunay na Dios sa itaas.”—Job 31:26-28.
13 Si Job dai nagsamba sa mga bagay na mayong buhay. Kun an saiyang puso naakit sa hilom sa pagmasid sa mga bagay sa kalangitan, arog baga kan bulan, asin kun ‘an saiyang kamot huminadok sa saiyang ngoso,’ na ginigibo iyan bilang idolatrosong akto, sia magigin parasamba sa idolo na pignegaran an Dios. (Deut. 4:15, 19) Tanganing mapagdanay an satong integridad sa Dios, dapat tang likayan an gabos na klase nin idolatriya.—Basahon an 1 Juan 5:21.
Dai Magin Mapamalos o Mapagsaginsagin
14. Taano ta masasabi niato na si Job dai nag-isip nin maraot sa iba?
14 Si Job dai nag-isip nin maraot sa iba asin bakong maringis. Aram nia na an siring na mga ugale pagpaheling nin kawaran nin integridad, huling sinabi nia: “Kun naggagayagaya ako kaidto sa pagkapoho nin saro na grabe an pagkaongis sa sako, o naogma ako huling may nangyaring maraot sa saiya . . . , dai ko tinogotan na magkasala an sakong ngaragngag paagi sa paghagad nin sumpa tumang sa kalag nia.”—Job 31:29, 30.
15. Taano ta sala na maggayagaya kun may mangyaring kapahamakan sa saro na naoongis sa sato?
15 An tanos na si Job nungkang naggayagaya kun may nangyaring kapahamakan sa saro na naoongis sa saiya. Sarong talinhaga na isinurat kan huri an nagpatanid: “Kun mapukan an saimong kaiwal, dai ka maggayagaya; asin kun sia masingkog, dai logod maggayagaya an saimong puso, tanganing dai maheling ni Jehova asin magin maraot iyan sa pagheling nia asin haleon nia nanggad an kaanggotan nia sa saiya.” (Tal. 24:17, 18) Huling nababasa ni Jehova an puso, aram nia kun kita hilom na naggagayagaya sa kapahamakan nin iba asin iyan siertong dai nia inooyonan. (Tal. 17:5) Kun gigibohon niato iyan, papaninimbagon kita nin Dios huling sinabi nia: “Sako an pagbalos, asin an pagpadusa.”—Deut. 32:35.
16. Dawa kun kita bakong mayaman, paano kita magigin mapag-istimar?
16 Si Job mapag-istimar. (Job 31:31, 32) Minsan ngani kita bakong mayaman, puede tang ‘sundan an dalan nin pagkamapag-istimar.’ (Roma 12:13) Puede kitang maghanda nin simpleng kakanon para sa iba, na ginigirumdom na “mas marahay an kakanon na gulay na may pagkamoot kisa sa torong pinataba sa sabsaban na may kaibang pagkaongis.” (Tal. 15:17) Kun may pagkamoot mantang kita nagkakakan kaiba nin saro na nagdadanay na may integridad, dawa an simpleng kakanon puedeng magin nakakagayagaya asin siertong magigin kapakipakinabang sa satong espirituwalidad.
17. Taano ta dai niato maninigong probaran na itago an grabeng kasalan?
17 Siertong nakakapakosog nanggad sa espirituwal na maistimar ni Job, huling sia bakong mapagsaginsagin. Sia bakong arog kan mga bakong diosnon na hilom na nakalaog sa kongregasyon kan enot na siglo asin “naghahanga sa mga tawo para sa sadiri nindang kapakinabangan.” (Jud. 3, 4, 16) Dai man tinahoban ni Job an saiyang paglapas o ‘itinago an saiyang sala sa bulsa kan gubing nia,’ na natatakot na tuyaon kun maaraman iyan nin iba. Sia andam na siyasaton nin Dios, na puede niang tugaan nin ano man. (Job 31:33-37) Kun kita magkasala nin grabe, dai niato pagprobaran na itago iyan tangani sanang dai mapasupog. Paano niato ikakapaheling na kita nagmamaigot na magdanay na may integridad? Paagi sa pag-ako kan satong sala, pagsolsol, paghagad nin espirituwal na tabang, asin lubos na paghihingoa na gumibo nin mga pagbabago.—Tal. 28:13; Sant. 5:13-15.
Pagbista sa Saro na Nagdadanay na May Integridad
18, 19. (a) Taano ta masasabi na nungkang inaprobetsaran ni Job an siisay man? (b) Ano an andam na gibohon ni Job kun sia nagkasala?
18 Si Job onesto asin makatanosan. Kun siring, nasabi nia: “Kun tumang sa sako mag-agrangay para sa tabang an sadiri kong daga, asin iribang magtangis an mga kali-kali kaiyan; kun an bunga kaiyan kinakan ko na mayong kuarta, asin pinaagagha ko an kalag kan mga kagsadiri kaiyan, pabayaan na tumubo an matunok na doot imbes na trigo, asin an mababatang doot imbes na sebada.” (Job 31:38-40) Nungkang kinamkam ni Job an daga nin iba, asin dai nia inaprobetsaran an mga trabahador. Arog nia, kaipuhan tang magdanay na may integridad ki Jehova, sa darakula man o saradit na bagay.
19 Sa atubangan kan tolo niang kaibaiba saka kan hoben na si Eliu, inestorya ni Job an manongod sa nagin pamumuhay nia. Sa ‘pinirmahan’ niang rekord kan bilog na buhay nia, dinagka ni Job an may legal na akusasyon sa saiya na magsangat nin kaso. Kun si Job mapatunayan na nagkasala, andam siang padusahan. Kaya isinumitir nia an saiyang kaso asin hinalat an paghokom kan korte nin Dios. Paagi kaini, “an mga tataramon ni Job natapos na.”—Job 31:35, 40.
Puede Kang Magdanay na May Integridad
20, 21. (a) Taano ta si Job nakapagdanay na may integridad? (b) Paano kita makakapatalubo nin pagkamoot sa Dios?
20 Napagdanay ni Job an saiyang integridad huli ta namotan nia an Dios, asin sia namotan asin tinabangan ni Jehova. Si Job nagsabi: “Tinawan mo [ni Jehova] ako nin buhay asin mamomoton na kabootan [“maimbod na pagkamoot,” nota sa ibaba]; asin an sakong espiritu binantayan kan saimo mismong pag-ataman.” (Job 10:12) Dugang pa, si Job nagpaheling nin pagkamoot sa iba, na nakakaaram na an siisay man na dai nagpapaheling nin maimbod na pagkamoot sa kapwa mayo nin reberensial na pagkatakot sa Makakamhan sa Gabos. (Job 6:14) An mga nagdadanay na may integridad namomoot sa Dios asin sa kapwa.—Mat. 22:37-40.
21 Makakapatalubo kita nin pagkamoot sa Dios paagi sa aroaldaw na pagbasa sa saiyang Tataramon asin paghorophorop sa ihinahayag kaiyan manongod sa saiya. Paagi sa odok sa pusong pamimibi, maoomaw asin mapapasalamatan niato si Jehova huli sa karahayan nia sa sato. (Fil. 4:6, 7) Kita makakaawit ki Jehova asin makikinabang sa regular na pakikiasosyar sa saiyang banwaan. (Heb. 10:23-25) Dangan, matalubo man an satong pagkamoot sa Dios mantang kita nakikikabtang sa ministeryo asin nagpapahayag kan “maogmang bareta kan saiyang pagliligtas.” (Sal. 96:1-3) Paagi kaiyan, kita makapagdadanay na may integridad, arog kan salmista na nag-awit: “An pagrani sa Dios marahay para sa sako. An Soberanong Kagurangnan na Jehova an ginibo kong pailihan ko.”—Sal. 73:28.
22, 23. Bilang mga nagsusuportar sa soberaniya ni Jehova, paano an mga aktibidad niato nakakaagid sa mga nagdanay na may integridad kaidto?
22 Sa nakaaging mga siglo, tinawan ni Jehova nin manlaenlaen na asignasyon an mga nagdanay na may integridad. Si Noe nagtogdok nin arka asin nagin “parahulit nin katanosan.” (2 Ped. 2:5) Si Josue an nangenot sa mga Israelita pasiring sa Dagang Panuga, alagad sia nagin sanang mapanggana huli ta binasa nia an ‘libro kan ley aldaw asin banggi’ saka huminiro oyon dian. (Jos. 1:7, 8) An mga Kristiano kan enot na siglo naggibo nin mga disipulo asin regular na nagtiripon tanganing pag-adalan an Kasuratan.—Mat. 28:19, 20.
23 Sinusuportaran niato an soberaniya ni Jehova asin pinagdadanay an satong integridad paagi sa paghuhulit nin katanosan, paggibo nin mga disipulo, pag-aplikar kan hatol na sono sa Kasuratan, asin pakikiiba sa mga kapagtubod sa mga pagtiripon, asamblea, asin kombension. An siring na mga aktibidad nakakatabang sa sato na magin makosog an boot, marigon sa espirituwal, asin mapanggana sa paggibo kan kabotan nin Dios. Bako ining depisilon para sa sato huli ta igwa kitang suporta kan satong langitnon na Ama asin kan Aki nia. (Deut. 30:11-14; 1 Ha. 8:57) Dugang pa, sinusuportaran man kita kan “bilog na kasararoan nin mga tugang,” na naglalakaw man na may integridad asin nagtataong onra ki Jehova bilang Soberanong Kagurangnan ninda.—1 Ped. 2:17.
Ano an Isisimbag Nindo?
• Paano niato maninigong mansayon an mga pamantayan ni Jehova sa moral?
• Anong mga kualidad ni Job an nangorognang gusto mo?
• Arog kan ipinaheling sa Job 31:29-37, paano guminawe si Job?
• Taano ta posible para sa sato na mapagdanay an satong integridad sa Dios?
[Mga Hapot Para sa Pag-adal]
[Ritrato sa pahina 29]
Napagdanay ni Job an saiyang integridad ki Jehova. Magigibo man niato iyan!
[Ritrato sa pahina 32]
Mapagdadanay niato an satong integridad!