Mga Hapot Hale sa mga Parabasa

Paano maninigong mansayon nin sarong Kristiano an pangangayam asin paninira?

Dai kinokondenar kan Biblia an pangangayam o paninira. (Deuteronomio 14:4, 5, 9, 20; Mateo 17:27; Juan 21:6) Pero, kaipuhan na pag-isipan nin mga Kristianong nangangayam o naninira an nagkapirang prinsipyo sa Kasuratan.

Tinogotan nin Dios si Noe asin an mga henerasyon na gikan sa saiya na magbuno asin magkakan nin mga hayop, sa kondisyon na bago ninda kakanon an mga hayop papaboloson nguna an dugo kaiyan. (Genesis 9:3, 4) Idinoon kan pagboot na ini na maninigong igalang an buhay nin hayop huling naggikan iyan sa Dios. Sa siring, dai ginagadan kan mga Kristiano an mga hayop para sana sa isport o pag-aling-aling asin dai ninda ginigibo an daing herak na pagbasangbasang sa buhay kaiyan.—Talinhaga 12:10.

May dugang pang aspekto na kalabot an satong saboot. An mga apostol na parasira posibleng marhay na nakontento huli sa pakadakop nin dakol na sira. Pero, mayong nagpaparisa na ipinaghambog ninda an saindang abilidad sa paninira o pangangayam o na sinda nanira o nangayam tanganing makikompetensia sa iba, tanganing patunayan an saindang pagkalalaki, o tanganing ikaogmang marhay an paglapag, pakikilaban, o paggadan.—Salmo 11:5; Galacia 5:26.

Sa siring, puede niatong hapoton an satong sadiri: ‘Ako daw sarong halimbawa sa pagpaheling nin paggalang sa pagmansay ni Jehova sa buhay? An pangangayam o paninira daw nagdodominar sa sakong kaisipan asin pakikipag-olay? An sako daw na paagi nin pamumuhay nagpapaheling na naoogma akong marhay sa pangangayam o paninira, o ipinapaheling daw kaiyan na ako ministro nin Dios? Huli daw sa pangangayam o paninira nagigin dayupot kong kairiba an mga daing pagtubod o napapabayaan ko an sakong pamilya?’—Lucas 6:45.

Sa nagkapirang nasyon, may mga panahon na itinotogot kan ley an pangangayam o paninira. An nagkapirang nangangayam o naninira para sa kakanon tibaad magsaboot na may katanosan sindang pabayaan an espirituwal na mga bagay durante kan mga panahon na ini. Minsan siring, ipinapaheling niato an pagtubod asin pagtitiwala sa Dios kun dai niato tinotogotan an ano man na bagay na maenot sa saiyang intereses. (Mateo 6:33) Apuera kaini, kinukuyog nin mga Kristiano an gabos na ley ni “Cesar” mapadapit sa pangangayam asin paninira, baga man ipinapaotob iyan o dai kan mga autoridad.—Mateo 22:21; Roma 13:1.

Tanganing makasunod sa pagmansay ni Jehova sa pangangayam asin paninira, tibaad kaipuhan nin nagkapira na liwaton an saindang kaisipan mapadapit sa saiyang mga pamantayan. (Efeso 4:22-24) Sa ibong na lado, kaipuhan niatong igalang an sono sa konsensiang mga desisyon nin iba. Angay sa kamugtakan na ini an hatol ni apostol Pablo: “Dai na kita magpahorokomhokoman, kundi imbes gibohon ining saindong desisyon, na dai magbugtak nin singkogan . . . sa atubangan nin tugang.” (Roma 14:13) An pagpaheling kan siring na daing kaimotan na pagkamoot asin paggalang nagbubunga nin katoninongan sa kongregasyon asin nagpapaogma sa satong Kaggibo, an Gikanan nin gabos na buhay.—1 Corinto 8:13. *

[Nota sa Ibaba]