Makamate nin Pagkakontento Paagi sa Pag-aplikar kan mga Prinsipyo sa Biblia

DAING duwa-duwa na nakaheling na kamo nin sarong ikos na nakabulukon asin nagngingiyaw nin maluya—sarong paglaladawan nin risang-risang pagkakontento. Marahayon nanggad kun kita garo nakabulukon man asin nakakamate kan kaparehong pagkakontento! Minsan siring, para sa dakol, an pagkakontento depisil makua, asin iyan madaling mawara. Taano ta arog kaiyan?

Huling parate kitang nasasala ta kita bakong sangkap, asin kaipuhan na tioson niato an mga pagkukulang kan iba. Apuera kaini, nabubuhay kita sa panahon na inaapod kan Biblia na “huring mga aldaw,” na namimidbid paagi sa “delikadong mga panahon na masakit pakibagayan.” (2 Timoteo 3:1-5) Dawa kun igwa kitang nakakaogmang mga ginigirumdom na pagkakontento kan panahon na kita aki pa, namamatean kan kadaklan sa sato ngonyan an biyong epekto kan “delikadong mga panahon” na ini. Posible daw na makamate nin pagkakontento sa satong kaaldawan?

Mangnohon na an Kasuratan nagsasabi na an delikadong mga panahon na ini magigin, bakong imposible, kundi masakit pakibagayan. Maaatubang niato iyan paagi sa pag-aplikar kan mga prinsipyo sa Biblia. Tibaad dai niato pirmeng nareresolberan an satong mga problema, alagad makakamate kita minsan paano nin pagkakontento. Siyasaton niato an tolong siring kaiyan na prinsipyo.

Papagdanayon an Realistikong Pagmansay

Tanganing makamate nin pagkakontento, kaipuhan na papagdanayon niato an realistikong pagmansay sa mismong mga limitasyon niato asin kan iba. Sa saiyang surat sa mga taga Roma, idinoon ni apostol Pablo: “An gabos nagkasala asin nagkulang sa kamurawayan nin Dios.” (Roma 3:23) Dakol na aspekto kan kamurawayan ni Jehova an dai nanggad niato masabotan. An sarong halimbawa iyo an simpleng katotoohan na sinasabi sa Genesis 1:31: “Naheling nin Dios an gabos niang ginibo asin, uya! idto marahayon.” Noarin man booton ni Jehova na salingoyon an ginibo nia, pirme niang masasabi na “idto marahayon.” Mayo nin tawo na pirmeng makakapagsabi nin arog kaiyan. An pagrekonoser sa satong mga limitasyon iyo an enot na lakdang tanganing makamate nin pagkakontento. Minsan siring, orog pa dian an kaipuhan. Kaipuhan na saboton asin akoon niato an pagmansay ni Jehova sa mga bagay-bagay.

An termino sa Griego na trinadusir na “kasalan” hale sa orihinal na termino na nangangahulogan “sumalto sa marka.” (Roma 3:9, nota sa ibaba) Sa pag-ilustrar: Imahinara an saro na nag-aasang manggana nin premyo paagi sa pagpatama nin sarong pana sa target. Igwa sia nin tolong pana na magagamit nia. Ginamit nia an enot kaiyan asin suminalto nin sarong metro. Ipinunteriya niang marhay an ikaduwang pana alagad suminalto pa man giraray iyan nin 30 sentimetros. Nagkonsentrar sia nin lubos asin binutasan an huring pana asin suminalto sana nin duwang sentimetro. Haranihon na iyan, alagad salto pa man giraray iyan.

Kita gabos kapareho kan desganadong parapana na iyan. Kun beses garo baga harayoon an satong ‘pagsalto sa marka.’ May beses na haranihon na iyan alagad salto pa man giraray kita sa marka. Desganado kita huling nagmaigot kitang marhay, alagad  kulang pa man giraray iyan. Ngonyan, isipon ta giraray an parapana.

Sia luway-luway na huminale, nanluluyang marhay an boot huli ta talagang gusto niang makua an premyo. Bigla na sana, inapod sia kan namamahala sa kompetisyon asin tinawan sia nin premyo, na nagsasabi: “Gusto kong itao ini sa saimo huli ta nasusunoan taka, asin naheling ko kun gurano an pagmamaigot mo.” An parapana ogmahon!

Ogmahon! Arog kaini an mamamatean kan gabos na makakaresibi hale sa Dios kan “regalo” na buhay na daing katapusan sa pagkasangkap. (Roma 6:23) Pakatapos kaiyan, magigin marahay an gabos na gigibohon ninda—dai na sinda noarin man masalto giraray sa marka. Magigin lubos an saindang pagkakontento. Mientras tanto, kun ini an pirmeng pagmansay niato, magigin mas marahay an pagmate niato sa satong sadiri asin sa mga nasa palibot niato.

Rekonoseron na an Gabos na Bagay Nangangaipo nin Panahon

Totoo na an gabos na bagay nangangaipo nin panahon. Pero, narisa daw nindo kun gurano kadepisil na magdanay na kontento kun an sarong bagay na hinahalat nindo garo baga haloyon umabot kisa sa inaasahan nindo o kun an sarong dai nakakaogmang situwasyon garo baga naglalawig kisa sa inaantisipar nindo? Pero, napagdanay kan nagkapira an pagkakontento sa siring na mga situwasyon. Isipon an halimbawa ni Jesus.

Bago magpasiring sa daga, si Jesus sarong arogan nin pagkuyog sa langit. Minsan siring, digdi sa daga sia “nakanood nin pagkuyog.” Paano? “Hale sa mga bagay na saiyang tinios.” Nakaheling na sia kaidto nin pagdusa alagad dai nia noarin man naeksperyensiahan mismo iyan. Kan sia yaon sa daga, espesyalmente poon kan mabautismohan sia sa Jordan sagkod na magadan sia sa Golgota, sia uminagi nin dakol na kasakitan. Dai niato aram an gabos na detalye kun paano si Jesus “ginibong sangkap” mapadapit digdi, alagad aram niato na an prosesong iyan nangaipo nin panahon.—Hebreo 5:8, 9.

Nagin mapanggana si Jesus huli ta hinorophorop nia an “kagayagayahan na ibinugtak sa atubangan nia,” an balos sa saiyang kaimbodan. (Hebreo 12:2) Minsan siring, kun beses sia “nagdolot nin mga pagngayongayo patin nin mga kahagadan man . . . na may makosog na mga pagtangis asin luha.” (Hebreo 5:7) Tibaad kun beses kita namimibi sa kaparehong paagi. Ano daw an pagmansay digdi ni Jehova? Ipinapaheling kan iyo man sanang bersikulo na “may pabor” na dinangog ni Jehova si Jesus. Siring man kaiyan an gigibohon nin Dios sa sato. Taano man?

Huli ta aram ni Jehova an satong mga limitasyon, asin tinatabangan nia kita. An lambang tawo igwa nin mga limitasyon kun sagkod saen an kaya niang tioson. May kasabihan an mga taga Benin, Aprika: “An sobrang tubig sa kahurihurihi makakalamos dawa sa mga talapang.” Mas aram ni Jehova kisa sa sato kun madali na niatong maabot an satong mga limitasyon. Mamomoton siang nagtatao nin “pagkaherak asin . . . dai na kutana maninigong kabootan na makakatabang sa tamang panahon.” (Hebreo 4:16) Ginibo nia ini para ki Jesus, asin ginibo nia iyan sa dai mabilang na iba pa. Estudyare kun paano ini naeksperyensiahan ni Monika.

Si Monika nagdakula na mayong pinaghahaditan asin maogmang tawo na may masinggayang disposisyon. Kan 1968, mantang sia labing 20 anyos pa sana, nabigla sia kan maaraman nia na sia igwa nin multiple sclerosis, sarong helang na sa  parate nagreresulta sa parsial na paralisis. Nabago kaini nin biyo an saiyang buhay asin nangaipo ini nin darakulang pagliliwat sa saiyang bilog na panahon na ministeryo. Aram ni Monika na iyan magigin halawig asin sunod-sunod na proseso. Pakalihis nin 16 na taon, sia nagsabi: “An sakong helang dai pa man giraray nabobolong asin tibaad magdanay pa sagkod na bagohon kan bagong sistema nin mga bagay nin Dios an gabos na bagay.” Inadmitir nia na dai nagin pasil iyan: “Minsan ngani sinasabi kan sakong mga katood na napagdanay ko an sakong masinggayang disposisyon asin na ako maogma siring sa dati, . . . aram kan sakong pinakadayupot na mga katood na kun beses daing ontok na minabolos an sakong luha.”

Minsan siring, sia nagkokomento: “Nakanood akong magin mapasensia asin maggayagaya sa pinakasadit na senyal nin pagrahay. An sakong personal na relasyon ki Jehova napakosog kan pakaheling ko kun gurano kadaing maginibo an tawo sa saiyang pakikipaglaban sa helang. Si Jehova sana an makakatao nin lubos na pagpaomay.” Sa tabang ni Jehova, napagdanay ni Monika an pagkakontento asin makakasalingoy na ngonyan sa labing 40 taon nin bilog na panahon na paglilingkod.

Totoo, bakong pasil an situwasyon na arog kan ki Monika. Alagad siertong mas makokontento kamo kun rerekonoseron nindo na may mga bagay na nangangaipo nin mas dakol na panahon kisa sa inaantisipar nindo. Arog ni Monika, makakasierto man kamo kan ‘tabang ni Jehova sa tamang panahon.’

Dai Magkomparar—Magbugtak nin Rasonableng mga Pasohan

Kamo sarong indibiduwal. Mayo nin siisay man na eksaktong kapareho nindo. Simpleng ipinapahayag nin sarong kasabihan sa lenguaheng Gun sa Aprika an katotoohan na ini: “An mga moro bakong parareho an laba.” Kabalisngagan na ikomparar an arin man na moro sa ibang moro. Dai nindo gugustohon na ikomparar kamo ni Jehova sa ibang tawo, asin dai nia noarin man gigibohon iyan. Minsan siring, lakop sa tahaw nin mga tawo an tendensia na magkomparar asin iyan puedeng makahale kan pagkakontento nin mga tawo. Mangnohon kun paano mapuersang iinilustrar ini ni Jesus, na mababasa niato sa Mateo 20:1-16.

Si Jesus nagtaram manongod sa sarong “kagurangnan” na nangangaipo nin mga trabahador sa saiyang ubasan. Nakakua sia nin nagkapirang lalaki na mayo nin trabaho asin pinatrabaho sinda nin “amay pagkaaga,” alas 6:00 nin aga gayod. Uminoyon sinda sa ordinaryong tangdan sa sarong aldaw kan panahon na idto, sarong denario para sa 12 oras na pagtrabaho. Daing duwa-duwa na naogma an mga lalaki na nakakua sinda nin trabaho asin sa pinagkatodan na tangdan pa. Paghaloyhaloy, an kagurangnan nakakua nin iba pang mga grupo nin mga lalaki na mayo nin trabaho asin pinatrabaho sinda—nin alas 9:00 nin aga, alas 12:00 nin udto, alas 3:00 nin hapon, asin alas 5:00 nin hapon pa ngani. Mayo sa mga grupong ini an matrabaho nin bilog na aldaw na pagtrabaho. Para sa tangdan, an kagurangnan nanuga sa sainda nin “ano man na maninigo,” asin uminoyon an mga trabahador.

Sa katapusan kan aldaw, pinagbotan kan kagurangnan an saiyang pinaniniwalaan na itao an mga tangdan. Sinabi nia na apodon an mga trabahador asin enot na bayadan an mga huring kinua. An mga ini nagtrabaho sana nin sarong oras, alagad makangangalas na nakaresibi sinda nin tangdan para sa bilog na aldaw. Maiimahinar niato an mainit na diskusyon na suminunod. An mga nagtrabaho nin bilog na 12 oras nag-isip na mas dakula an makukua ninda. Minsan siring, nakaresibi man sinda nin kaparehong kantidad.

Ano an saindang reaksion? “Pakaako kaiyan sinda nagpoon na maggumodgumod tumang sa kagharong asin nagsabi, ‘Ining mga huri nagtrabaho nin sarong oras; pero ipinantay mo sinda sa samo na nagtios kan pasan sa bilog na aldaw asin kan nakakapasong init!’”

Minsan siring, iba an pagmansay kan kagurangnan. Sinabi nia na an naresibi ninda iyo an napagkaoyonan ninda, daing kulang. Para sa iba, nagdesisyon siang magtao sa sainda nin bilog na aldaw na tangdan, daing duda na labi kisa sa linalaoman ninda. An totoo mayo nin siisay man na nakaresibi nin kulang sa napagkaoyonan; sa katunayan, dakol an nakaresibi nin labi sa inaantisipar ninda. Kaya, bilang konklusyon, an kagurangnan naghapot: “Bako daw sono sa ley na gibohon ko an boot ko sa sakong mga sadiri?”

Ngonyan imahinara kun enot na binayadan kan pinaniniwalaan an enot na grupo asin an mga ini  tolos na huminale. Sinda kontento na kutana. Luminataw sana an pagkadiskontento kan maheling ninda na an iba nakaresibi nin kaparehong tangdan sa mas dikit na trabaho. Ini an ikinaanggot ninda, sagkod pa ngani sa punto na maggumodgumod sinda tumang sa kagurangnan, an saro na sa kapoonpooni pinasalamatan kutana nindang marhay huli ta kinua nia sindang magtrabaho.

Malinaw na iiniilustrar kaini kun ano an nangyayari kun kita nagkokomparar. Kun hinohorophorop nindo an saindong personal na relasyon ki Jehova asin pinapasalamatan an mga bendisyon nia sa saindo, kamo magigin kontento. Dai nindo ikomparar an saindong situwasyon sa iba. Kun garo baga nagdesisyon si Jehova na maggibo nin dagdag para sa iba, mag-ogma para sainda asin makiogma sa sainda.

Minsan siring, si Jehova may inaasahan sa saindo. Ano daw iyan? An Galacia 6:4 nagsabi: “Patunayan nin lambang saro an saiyang gibo, dangan may dahelan na siang mag-ogma dapit sa saiya sana.” Sa ibang pagtaram, magbugtak nin rasonableng mga pasohan para sa sadiri nindo. Planohon kun ano an realistikong magigibo nindo, asin hamanon iyan. Kun an pasohan rasonable asin nahaman nindo iyan, ‘may dahelan na kamong mag-ogma.’ Makakaeksperyensia kamo nin pagkakontento.

Maabot an mga Balos

An tolong prinsipyo na inestudyaran niato nagpapaheling na an pag-aplikar kan mga prinsipyo sa Biblia puede nanggad na magbunga nin pakamate nin pagkakontento dawa sa huring mga aldaw na ini asin sa ibong nin pagkabakong sangkap. Durante kan saindong aroaldaw na pagbasa nin Biblia, taano ta dai nindo hanapon an siring na mga prinsipyo, magsalang sayod o ipinaparisa sa mga estorya asin ilustrasyon?

Kun sa pagmate nindo naiinaan na an saindong pagkakontento, maghingoang aramon kun ano an tunay na dahelan. Dangan hanapon an mga prinsipyo na puede nindong iaplikar tanganing itama an situwasyon. Halimbawa, puede nindong helingon an pahina 110-11 kan librong “All Scripture Is Inspired of God and Beneficial.” * Tinotokar dian an libro kan Talinhaga, asin manonompongan nindo an dakol na mapagpipilian na mga prinsipyo asin hatol na nakalista sa irarom nin 12 titulo. An The Watch Tower Publications Index * asin Watchtower Library sa CD-ROM * marahayon na gikanan nin impormasyon. Paagi sa parateng paggamit kan mga iyan, matutuod kamo sa paghanap nin mga prinsipyo na puedeng iaplikar.

Maabot an panahon na itatao ni Jehova sa mga maninigo an buhay na daing katapusan sa pagkasangkap sa sarong paraisong daga. Lubos na mapapano nin pagkakontento an saindang buhay.

[Mga Nota sa Ibaba]

[Blurb sa pahina 12]

“An gabos nagkasala asin nagkulang sa kamurawayan nin Dios.”—Roma 3:23

[Blurb sa pahina 13]

Si Jesus “nakanood nin pagkuyog hale sa mga bagay na saiyang tinios.”—Hebreo 5:8, 9

[Blurb sa pahina 15]

“May dahelan na siang mag-ogma dapit sa saiya sana, asin bakong sa pagkomparar sa ibang tawo.”—Galacia 6:4