Paghiwas Kun Saen Dating Maoswag an Enot na Kristianismo

AN Italia, an peninsula na korteng bota palaog sa Dagat Mediterraneo, iyo an lugar kaidto kun saen an mga pangyayari sa relihion asin kultura nakaimpluwensia sa kasaysayan kan kinaban. Minilyon na turista an naaakit sa gayon kan laen-laen na tanawon kaiyan, bantog na mga gibo nin arte kaiyan, asin masisiram na kakanon kaiyan. Ini man an nasyon kun saen maoswag an pagtotokdo sa Biblia.

An tunay na Kristianismo tibaad enot na nakaabot sa Roma​—kabisera kan kapangyarihan pankinaban kan panahon na idto​—kan magpuli hale sa Jerusalem an mga Judio asin proselito na nagin mga Kristiano kan Pentecostes 33 C.E. Kan mga 59 C.E. an primerong pagsongko ni apostol Pablo sa Italia. Sa Puteoli na nasa gilid nin dagat may ‘nanompongan siang mga tugang’ sa pagtubod.​—Gibo 2:5-11; 28:11-16.

Siring kan ihinula ni Jesus asin kan mga apostol, bago matapos an enot na siglo C.E., an apostatang mga elemento luway-luway na suminuhay sa tunay na Kristianismo. Minsan siring, bago matapos an maraot na sistemang ini nin mga bagay, pinangenotan kan tunay na mga disipulo ni Jesus an paghuhulit kan maogmang bareta sa bilog na kinaban​—kabale na an Italia.​—Mateo 13:36-43; Gibo 20:​29, 30; 2 Tesalonica 2:3-8; 2 Pedro 2:1-3.

Garo Daing Paglaom na Kapinonan

Kan 1891 an enot na beses na pagsongko ni Charles Taze Russell, na iyo an nangengenot sa pambilog na kinaban na paghuhulit kan Mga Estudyante sa Biblia (an apod kaidto sa Mga Saksi ni Jehova), sa nagkapirang siudad sa Italia. Inadmitir nia na an resulta kan saiyang ministeryo duman garo daing gayo nin paglaom: “Mayo kaming naheling na nagparigon samuya tanganing maglaom na may aanihon sa Italia.” Kan tigsoli nin 1910, nagbalik si Tugang na Russell sa Italia asin nagtao nin sarong diskurso sa Biblia sa sarong dyimnasium sa sentro nin Roma. Ano an resulta? “Sa kabilogan,” an irineport nia, “an pagtiripon medyo nakakadesganar.”

Sa katunayan, sa laog nin nagkapirang dekada maluway an pag-oswag kan paghuhulit kan maogmang bareta sa Italia, an sarong dahelan iyo an paglamag sa mga Saksi ni Jehova kan diktadurang Fascista. Durante kan peryodong iyan, mayo pang 150 an Saksi ni Jehova sa nasyon, na an mayoriya kaiyan nanodan an mga katotoohan sa Biblia sa saindang mga paryente o katood na nakaistar sa ibang nasyon.

Pambihirang Pag-oswag

Pakatapos kan Guerra Mundial II, dakol na misyonero an ipinadara sa Italia. Alagad siring sa ipinapaheling kan mga surat na yaon sa mga artsibo kan Estado, an mga haralangkaw an ranggo sa hirarkiya kan Batikano hinagad sa gobyerno na pahaleon an mga misyonero. Apuera sa pipira, an mga misyonero pinuersang humale sa nasyon.

Sa ibong kan mga olang, an mga kadaklan sa Italia nagpoon na magburunyog pasiring sa “bukid” nin pagsamba ki Jehova. (Isaias 2:2-4) Pambihira an pagdakol kan mga Saksi. Kan 2004 igwa nin pinakahalangkaw na kabilangan na 233,527 parahayag kan maogmang bareta, 1 sa kada 248 habitante, asin 433,242 an nag-atender sa Memorial kan kagadanan ni Cristo. Igwa nin 3,049 kongregasyon kan Mga Saksi ni Jehova  na nagtitiripon sa komportableng mga Kingdom Hall. Kan mga nakaagi pa sana, may nagkapirang grupo kan populasyon na partikularmenteng dakula an inoswag.

Paghuhulit sa Dakol na Lenguahe

Dakol na imigrante hale sa Aprika, Asia, asin Sirangan na Europa an nagduduman sa Italia tanganing maghanap nin trabaho o mas marahay na buhay o, sa nagkapirang kamugtakan, tanganing dulagan an makaturotristeng mga situwasyon. Paano daw matatabangan sa espirituwal na paagi an minilyon na ini?

Inako kan dakol na Saksi sa Italia an angat nin pag-adal nin depisil na mga lenguahe, arog baga kan Albaniano, Amharico, Arabe, Bengali, Intsik, Punjabi, Sinhala, asin Tagalog. Poon kan 2001, may mga kurso sa pag-adal nin lenguahe na ginibo tanganing tokdoan an andam na mga tugang na ini na magpatotoo sa ibang lenguahe. Durante kan nakaaging tolong taon, 3,711 Saksi an nag-atender sa 79 kurso na ginibo sa 17 laen-laen na lenguahe. Ini an nagpangyari na maorganisar asin mapakosog an 146 na kongregasyon asin 274 grupo sa 25 laen-laen na lenguahe. Sa siring dakol na sinserong tawo an nakadangog kan maogmang bareta asin nagpoon na mag-adal sa Biblia. Sa parate pambihira an mga resulta.

An sarong ministro kan Mga Saksi ni Jehova nakipag-olay manongod sa Biblia ki George, sarong lalaking taga India na Malayalam an tataramon. Sa ibong kan magabat na mga problema sa trabaho, maogmang inako ni George an pag-adal sa Biblia. Pakalihis nin pirang aldaw, an katood ni George na si Gil, sarong Bombay na Punjabi an tataramon, nag-atender sa Kingdom Hall, asin naponan siang adalan sa Biblia. Ipinamidbid ni Gil sa mga Saksi si David, sarong Bombay na Telugu an tataramon. Dai nahaloy nag-aadal na sa Biblia si David. Duwa pang Bombay, si Sonny asin Shubash, an nakaistar sa harong na iniistaran ni David. Sindang duwa nakiayon sa pag-adal sa Biblia.

Pakalihis nin nagkapirang semana, an mga Saksi nakaresibi nin apod sa telepono hale ki Dalip, sarong lalaki na Marati an tataramon. Sia nagsabi: “Katood ako ni George. Puede daw nindo akong tokdoan sa Biblia?” Dangan suminunod si Sumit, sarong lalaki na Tamil an tataramon. Sa katapustapusi, saro pa sa mga katood ni George an nag-apod sa telepono, na gustong magpatokdo sa Biblia. Dangan iiniba ni George sa Kingdom Hall an saro pang hoben na lalaki, si Max. Gusto man niang magpatokdo. Sa ngonyan, anom na pag-adal sa Biblia an ginigibo, asin may ginigibo pang mga areglo para sa apat pa. Ginigibo iyan sa Ingles, minsan ngani ginagamit man an mga publikasyon sa Hindi, Malayalam, Marati, Punjabi, Tamil, Telugu, asin Urdu.

“Nadadangog” kan mga Bungog an Maogmang Bareta

Igwa nin labing 90,000 na bungog sa Italia. Kaidtong mga 1975, pinonan kan mga Saksi na tawan nin atension an pagtotokdo sa sainda kan katotoohan sa Biblia. Sa primero, itinokdo kan nagkapirang bungog na Saksi an Italian Sign Language (ISL) sa mga kapwa ministro na andam na tumabang sa langtad na iyan. Dangan nagdakol nang nagdakol an mga bungog na nagpoon na magpaheling nin interes sa Biblia. Ngonyan, labing 1,400 na naggagamit kan ISL an nag-aatender sa Kristianong mga pagtiripon. Kinseng kongregasyon asin 52 na grupo an nagtitiripon na naggagamit kan ISL.

Sa primero, an paghuhulit sa mga bungog sa pangenot nakadepende sa inisyatiba nin indibiduwal na mga Saksi. Alagad kan 1978, pinonan kan sangang opisina kan Mga Saksi ni Jehova sa Italia na mag-organisar nin mga kombension para sa mga bungog. Kan Mayo kan taon na iyan, ipinaisi na sa maabot na internasyonal na kombension sa Milan, magkakaigwa nin mga sesyon para sa mga bungog. An enot na pansirkitong  asamblea para sa mga bungog ginibo sa Assembly Hall sa Milan kan Pebrero 1979.

Poon kaidto inasikasong marhay kan sangang opisina an espirituwal na kakanon kan mga bungog paagi sa pag-enkaminar sa nagdadakol na paraebanghelyo na paoswagon an saindang kakayahan sa lenguaheng ini. Poon kan 1995, may mga espesyal payunir (bilog na panahon na mga paraebanghelyo) na ipinadara sa nagkapirang grupo tanganing sanayon an bungog na mga Saksi sa ministeryo asin mag-organisar nin Kristianong mga pagtiripon. Tolong Assembly Hall an binugtakan nin pinakamodernong sistema sa video tanganing mas mapakarhay an pagdalan sa programa. Asin igwa nin mga videocassette kan Kristianong mga publikasyon tanganing matawan nin espirituwal na kakanon an mga bungog.

Nariparo nin mga nagmamasid na inaasikasong marhay kan mga Saksi an espirituwal na mga pangangaipo kan mga bungog. Kinotar kan P@role & Segni, sarong magasin na ipinupublikar kan Italian Deaf Society, an sarong surat na ipinadara nin sarong monsenyor na Katoliko: “Depisil an pagigin bungog huli ta an mga bungog nangangaipo nin dayaday na atension. Halimbawa, solo siang minaabot sa simbahan na dai nin ano man na kadepisilan, alagad kaipuhan nia an tabang nin sarong interprete tanganing masundan an gabos na binabasa, ipinapahayag, o inaawit durante kan mga seremonya.” Sinabi pa kan magasin na “inaadmitir kan prelado na an problema iyo na an iglesia bako pang andam na asikasohon an diperensiang iyan, asin sinasabi nia na an dakol na bungog mas naasikaso sa mga Kingdom Hall kan Mga Saksi ni Jehova kisa sa simbahan kan parokya.”

Ihinuhulit an Maogmang Bareta sa mga Preso

Puede daw na an saro magin talingkas pero yaon pa man giraray sa presohan? Iyo, huli ta an Tataramon nin Dios igwa nin kapangyarihan na ‘patalingkason’ an mga nag-aako kaiyan asin nag-aaplikar kaiyan sa saindang buhay. An mensaheng ibinalangibog ni Jesus “sa mga bihag” iyo an katalingkasan sa kasalan asin falsong  relihion. (Juan 8:32; Lucas 4:16-19) Sa Italia marahayon an mga resulta kan paghuhulit sa mga presohan. Haros 400 na ministro kan Mga Saksi ni Jehova an inautorisaran kan Estado na dumalaw sa mga preso tangani na magtao nin espirituwal na tabang. An Mga Saksi ni Jehova an enot na organisasyon na bakong Katoliko na naghagad asin nakakua kan siring na permiso.

An mensahe kan Biblia puedeng ikapalakop sa mga paagi na dai masabi an resulta. Ipinapakipag-olay kan mga preso sa mga kapwa preso an manongod sa pagtotokdo sa Biblia kan mga Saksi ni Jehova. Kaya an nagkapira sa mga presong iyan nakiolay na dalawon man nin ministrong Saksi. O an mga kapamilya na nagpoon nang mag-adal sa Biblia ineenkaminar an mga preso na makiolay na dalawon man kan mga Saksi. An nagkapirang preso na nasentensiahan nin bilog na buhay na pagkapreso huli sa paggadan o iba pang magabat na krimen nagsolsol asin naggibo nin dakulang pagbago sa saindang buhay. Inaandam sinda kaini para sa pagdusay ki Jehova Dios asin sa bautismo.

Sa dakol na presohan, may ginibong mga areglo na magtao nin pampublikong mga diskurso sa mga tema sa Biblia, magselebrar kan Memorial kan kagadanan ni Jesus, asin ipadalan an mga videocassette nin mga programa sa Biblia na ginibo kan Mga Saksi ni Jehova. Sa parate dakol na preso an nag-aatender sa mga pagtiripon na ini.

Tanganing tabangan an mga preso sa praktikal na mga paagi, an mga Saksi nagwaras nin dakol na magasin na nagtotokar nin mga tema na magigin kapakipakinabang para sa mga preso. An saro sa mga magasin na iyan iyo an Awake! na Mayo 8, 2001, na nagtokar kan temang “Can Prisoners Be Reformed?” An isyu kan Abril 8, 2003 igwa nin topiko na “Drug Abuse in the Family​—What Can You Do?” Rinibong kopya an ikinapasakamot sa mga preso. Bilang resulta, mananggatos na pag-adal sa Biblia an ginigibo. May nagkapirang guardia sa presohan na nagpaheling man nin interes sa mensahe kan Biblia.

Pakatapos na makakua nin espesyal na permiso sa mga autoridad, an sarong preso na an ngaran Costantino nabautismohan sa sarong Kingdom Hall sa San Remo, na may 138 lokal na Saksi an presente. “An pagmate ko pinarigosan ako nin kapadangatan,” an sabi ni Costantino, na risang-risang napahiro an boot pakabautismohi. Ibinareta nin sarong lokal na peryodiko an mga tataramon kan warden sa presohan: “May dakulang kagayagayahan . . . na itinao mi an permisong ini. Maninigo na konsideraron an gabos na bagay na makakapaoswag sa sosyal, personal, asin espirituwal na pagbabagong-buhay nin sarong preso.” An agom asin aking babae ni Costantino naghanga sa nagin epekto kan tamang kaaraman sa Biblia sa buhay ni Costantino: “Naoogma kaming marhay sa saiya huli sa mga pagbabagong ginibo nia. Sia nagin mapagpatoninong, asin padagos na nagrarahay an pagmakolog nia samo. Nagbalik an samong tiwala asin respeto sa saiya.” Sinda nagpoon man na mag-adal sa Biblia asin mag-atender sa Kristianong mga pagtiripon.

Si Sergio, na napatunayan na nagkasala nin paghabon, armadong paghabon, pagpalusot nin droga, asin paggadan, nasentensiahan na mapreso sagkod sa 2024. Pakatapos na siyasaton an Kasuratan sa laog nin tolong taon asin magbakle, si Sergio nagdesisyon na magpabautismo. Sia an ika-15 preso sa presohan nin Porto Azzurro, sa isla nin Elba, na nagpabautismo bilang saro sa Mga Saksi ni Jehova. Binautismohan sia sa sarong aroalsang pinagbabautismohan na ikinaag sa pinagkakarawatan na lugar sa presohan,  na may nagkapirang kapwa preso na nag-atender.

Si Leonardo, na nakapreso huli sa 20 taon na sentensia, nagkua nin espesyal na permiso na makapabautismo sa sarong Kingdom Hall sa Parma. Kan interbiohon kan lokal na peryodiko, sinabi ni Leonardo na gusto niang “linawon na sia nagdesisyon na magin saro sa Mga Saksi ni Jehova, bakong tangani na makaluwas sa kadikloman nin presohan, kundi tanganing panigoan an sarong grabeng namamatean na espirituwal na pangangaipo.” Si Leonardo nagsabi: “Napasala an buhay ko, alagad binayaan ko na iyan. Nagbago na ako, baga man bakong bigla. Kaipuhan kong magpadagos na magin tanos.”

Si Salvatore, na napatunayan na nagkasala nin paggadan, yaon sa presohan na pinakalubos an pagguardia duman sa Spoleto. Dakol an naghanga sa bautismo sa saiya, na ginibo sa laog kan presohan. An warden sa presohan duman nagsabi: “Maninigo na enkaminaron an sosyal na importansia nin sarong pagpili na nagbubunga nin mas marahay na paggawe sa gabos na tawo, para sa kapakinabangan kan komunidad sa presohan sagkod kan bilog na sosyedad.” Bilang resulta kan mga pagbabago ni Salvatore, an saiyang agom asin aking babae nag-aatender na ngonyan sa mga pagtiripon kan Mga Saksi ni Jehova. An sarong preso na napatotoohan ni Salvatore nabautismohan bilang nagdusay na lingkod ni Jehova.

Sa Italia nangyari an nagkapira sa paghiwas asin pag-oswag kan enot na Kristianismo. (Gibo 2:10; Roma 1:7) Sa panahon na ini nin pag-ani, an espirituwal na pag-oswag asin paghiwas nagpapadagos sa iyo man sanang mga lugar kun saen nagpagal si Pablo asin an mga kapwa nia Kristiano tanganing ihulit an maogmang bareta.​—Gibo 23:11; 28:14-16.

[Mapa sa pahina 13]

(Para sa aktuwal na format, hilingon an publikasyon)

ITALIA

Roma

[Mga Ritrato sa pahina 15]

An Assembly Hall sa Bitonto asin sarong kongregasyon sa “Italian Sign Language” sa Roma

[Mga Ritrato sa pahina 17]

An espirituwal na pag-oswag nagpapadagos kun saen dating maoswag an enot na Kristianismo