Makakayanan Niato an Ano Man na Pagbalo!

MAY inaatubang daw kamo ngonyan na sarong pagbalo sa saindong buhay? Kamo daw nawawaran na nin paglaom, na dai na nindo makayanan iyan? Kun minsan daw natatakot pa ngani kamo ta napapalaen an saindong problema asin ta mayo na iyan nin solusyon? Kun iyo, kosogi an saindong boot! Ano man na mga pagbalo an tibaad mapaatubang sa sato, inaasegurar kita kan Biblia na kayang papangyarihon nin Dios na makayanan niato iyan.

Inaadmitir kan Biblia na an mga lingkod nin Dios ‘mapapaatubang sa manlaenlaen na pagbalo.’ (Santiago 1:2) Mangnoha an tataramon na “manlaenlaen” (poi·kiʹlos sa Griego). Segun sa paggamit kaiyan kan suanoy, an orihinal na termino nangangahulogan nin “dakol” o “dakol an kolor” asin nagdodoon kan “pagkalaenlaen kan mga pagbalo.” Sa siring, an “manlaenlaen na pagbalo” mga pagbalo na dakol an kolor, sabi ngani. Minsan siring, inaalalayan kita ni Jehova tanganing makayanan niato an balang saro kaiyan. Taano ta nakakasegurado kita kaiyan?

“Dai na Kutana Maninigong Kabootan nin Dios na Ipinapahayag sa Manlaenlaen na Paagi”

Si apostol Pedro nagsabi na an mga Kristiano ‘nagmomondo sa manlaenlaen na pagbalo.’ (1 Pedro 1:6) Sa huri kan saiyang ipinasabong na surat, sinabi nia na ‘an dai na kutana maninigong kabootan nin Dios ipinapahayag sa manlaenlaen na paagi.’ (1 Pedro 4:10) An frase na “sa manlaenlaen na paagi” igwa nin porma kan iyo man sanang orihinal na termino sa Griego. Sa pagkomento dapit sa pananaram na ini, an sarong iskolar sa Biblia nagsabi: “Pambihirang ideya ini. . . . An pagsabi na an biyaya [o, dai na kutana maninigong kabootan] nin Dios poikilos nangangahulogan na mayo nin kolor sa situwasyon nin tawo na dai kayang ternohan kan biyaya nin Dios.” Sinabi pa nia: “Mayo nin masasabing mga kamugtakan, mayo nin masasabing krisis, emerhensia o apuradong pangangaipo na dai makakaya kan biyaya nin Dios, na dai kayang pangganahan kan biyaya nin Dios. Mayo nin situwasyon sa buhay na dai kakayanon kan biyaya nin Dios. An klarong terminong ini na poikilos malinaw na nagpapagirumdom sato kan dakol an kolor na biyaya nin Dios na igo na nanggad para sa gabos na bagay.”

Mga Pagbalo na Tinernohan nin Kabootan

Segun ki Pedro, an sarong paagi nin kapahayagan kan dai na kutana maninigong kabootan nin Dios iyo an manlaenlaen na miembro na minakompuesto kan Kristianong kongregasyon. (1 Pedro 4:11) An lambang lingkod nin Dios igwa nin espirituwal na mga balaog, o kakayahan, na puedeng paggikanan nin pagparigon sa boot para sa mga nag-aagi nin mga pagbalo. (Roma 12:6-8) Halimbawa, an nagkapirang miembro kan kongregasyon matibay magtokdo sa Biblia. An saindang may pakarorop na mga tataramon nag-iinspirar asin nagmomotibar sa iba na magtagal. (Nehemias 8:1-4, 8, 12) An iba regular na nagsosongko sa pagpastor sa harong kan mga nangangaipo nin pagsuportar. An siring na mga pagsongko mga okasyon para sa pagparigon sa boot, na ‘nakakaranga sa puso.’ (Colosas 2:2) Kun an mga paraataman naggigibo kan siring na nakakapakosog sa pagtubod na mga pagsongko, nagtatao  sinda nin sarong espirituwal na balaog. (Juan 21:16) An iba pa sa kongregasyon midbid na mainit makiiba, mapagmalasakit, asin mapagpadangat sa pagtratar sa mga kapagtubod na namomondo huli sa mga pagbalo. (Gibo 4:36; Roma 12:10; Colosas 3:10) An empatiya asin aktibong pagtabang na ipinapaheling kan siring na mamomoton na mga tugang na lalaki asin babae sarong makahulogan na kapahayagan, o “kolor,” kan dai na kutana maninigong kabootan nin Dios.​—Talinhaga 12:25; 17:17.

“An Dios nin Gabos na Karangahan”

Orog sa gabos, si Jehova nagtatao nin karangahan. Sia “an Dios nin gabos na karangahan, na minaranga sa sato sa gabos niatong kahorasaan.” (2 Corinto 1:​3, 4) An kadonongan na yaon sa ipinasabong na Tataramon nin Dios asin an kosog na itinatao kan saiyang banal na espiritu iyo an pangenot na mga paagi nin pagsimbag ni Jehova sa satong mga pamibi para sa tabang. (Isaias 30:​18, 21; Lucas 11:13; Juan 14:16) Mapapakosog an boot niato kan ipinasabong na panuga ni apostol Pablo. Sinabi nia: “Maimbod an Dios, asin dai nia itotogot na kamo masugotan nin labi sa saindong makakaya, kundi kaibahan kan sugot matao man sia nin luluwasan tanganing iyan matagalan nindo.”​—1 Corinto 10:13.

Iyo, ano man an “kolor,” o klase, kan mga pagbalo sa sato, pirmeng may materno dian na “kolor,” o kapahayagan, kan dai na kutana maninigong kabootan nin Dios. (Santiago 1:17) An napapanahon asin angay na suportang itinatao ni Jehova sa saiyang mga lingkod​—dawa tibaad sa ibong kan manlaenlaen nanggad na sugot o angat sa sainda​—saro sanang ebidensia kan “manlaenlaen na gayong kadonongan nin Dios.” (Efeso 3:10) Bako daw na minaoyon kamo?

[Mga Ritrato sa pahina 31]

Tinatabangan kita ni Jehova na makayanan an mga pagbalo sa sato