‘Padagos Kamong Magpogol sa Irarom nin Karatan’

“An oripon kan Kagurangnan dai kaipuhan na makiiwal, kundi kaipuhan na magin maboot sa gabos, . . . padagos na nagpopogol sa irarom nin karatan.”​—2 TIMOTEO 2:24.

1. Kun nakikikabtang sa Kristianong aktibidad, taano ta kun minsan nakakanupar kita nin mga tawo na makolog magtaram?

ANO an reaksion nindo kun kamo napapaatubang sa mga bakong magayon an pag-ako sa saindo o sa irinerepresentar nindo? Sa saiyang paglaladawan kan huring mga aldaw, ihinula ni apostol Pablo na an mga tawo magigin “mga paralanghad, . . . mga parapakaraot, mga mayong pagpopogol sa sadiri, mga maringis.” (2 Timoteo 3:1-5, 12) Tibaad makanupar kamo nin siring na mga indibiduwal sa saindong ministeryo o sa iba pang mga aktibidad.

2. Anong mga teksto an makakatabang sato na trataron nin may kadonongan an mga tawo na makolog magtaram sa sato?

² Bakong gabos na mapanlibak magtaram mayo nin ano man na interes sa kun ano an tama. An grabeng kasakitan o pagkadesganar tibaad magin dahelan tanganing anggotan kan mga tawo an siisay man na nasa palibot ninda. (Eclesiastes 7:7) An dakol minagawe nin siring kaini huli ta ordinaryo na sana an magaspang na pagtaram sa iniistaran asin pinagtatrabawohan ninda. Dai boot sabihon kaini na puede na para sa sato bilang mga Kristiano an siring na pagtaram, alagad tinatabangan nanggad kita kaiyan na masabotan kun taano ta siring kaiyan an pagtaram kan ibang mga tawo. Ano an maninigong magin reaksion niato sa makolog na mga tataramon? An Talinhaga 19:11 nagsasabi: “An pakarorop nin tawo nakakapogol nanggad sa saiyang kaanggotan.” Asin an Roma 12:​17, 18 nagsasadol sato: “Dai kamo magbalos nin maraot sa maraot sa kiisay man. . . . Kun mahihimo, sagkod na iyan nasa saindo, makipagkatoninongan sa gabos na tawo.”

3. Paano napapalabot an pagigin mapagpatoninong sa mensahe na ihinuhulit niato?

 ³ Kun kita talagang mapagpatoninong, magigin risang-risa ini sa espiritu na ipinapaheling niato. Mababanaag iyan sa sinasabi asin ginigibo niato, tibaad patin sa ekspresyon kan satong lalauogon asin sa tono kan satong boses. (Talinhaga 17:27) Kan sugoon an saiyang mga apostol na maghulit, si Jesus nagkonseho sa sainda: “Sa paglaog nindo sa harong, taratarahon nindo an pamilya [“taratarahon nin katoninongan an pamilya,” The New English Bible]; asin kun an harong maninigo, an katoninongan na minawot nindo dian pabayaan na dumatong dian; alagad kun iyan bakong maninigo, bumalik sa saindo an katoninongan gikan sa saindo.” (Mateo 10:​12, 13) Maogmang bareta an mensahe na dara niato. Inaapod iyan kan Biblia na “maogmang bareta nin katoninongan,” “maogmang bareta manongod sa dai na kutana maninigong kabootan nin Dios,” asin “an maogmang baretang ini kan kahadean.” (Efeso 6:15; Gibo 20:24; Mateo 24:14) An satong obheto, bakong tatsaran an mga paniniwala nin ibang tawo o makidiskutir sa saiya manongod sa saiyang mga punto de vista, kundi tanganing ihiras sa saiya an maogmang bareta hale sa Tataramon nin Dios.

4. Ano an puede nindong sabihon kun kamo sabihan na “Dai ako interesado” bago pa ngani kamo magkaoportunidad na sabihon an dahelan kan saindong pagdalaw?

⁴ Mantang dai talaga naghihinanyog, an sarong kagharong tibaad biglang magsabi, “Dai ako interesado.” Sa dakol na okasyon, posibleng sabihon, “Gusto ko sana kutang mabasa an sarong halipot na tekstong ini sa Biblia.” Tibaad dai man nia sayumahan iyan. Sa ibang mga okasyon, tibaad angay na sabihon: “Gusto ko kutang sabihon saindo an manongod sa sarong panahon na mayo na nin inhustisya asin an gabos na tawo makakanood na magkaminorootmootan.” Kun dai tolos sia magsabi na gusto nia nin paliwanag, puedeng idagdag nindo: “Alagad garo bako ini an kombenyenteng panahon para sa saindo.” Dawa kun bakong mapagpatoninong an reaksion kan kagharong, maninigo daw kitang magkonklusyon na sia “bakong maninigo”? Ano man an reaksion, girumdomon an konseho kan Biblia na magin “maboot sa gabos, . . . nagpopogol sa irarom nin karatan.”​—2 Timoteo 2:24.

Daing Galang Huling Natokdoan nin Sala

5, 6. Paano trinatar ni Saulo an mga parasunod ni Jesus, asin taano ta siring an iginawe nia?

⁵ Kan enot na siglo, an sarong lalaki na an ngaran Saulo midbid na marhay huli sa saiyang daing galang na pagtaram, huli sa saiyang madahas na ugale pa ngani. An Biblia nagsasabi na sia ‘nagtataram nin huma asin paggadan tumang sa mga disipulo  kan Kagurangnan.’ (Gibo 9:​1, 2) Kan huri inadmitir nia na sia dating “paralanghad asin paralamag patin daing galang.” (1 Timoteo 1:13) Minsan ngani an nagkapira sa saiyang mga paryente tibaad nagin mga Kristiano na, nagsabi sia manongod sa saiyang aktitud sa mga parasunod ni Cristo: “Mantang labi-labi an sakong kaanggotan sa sainda, pinaglamag ko pa ngani sinda minsan sa mga siudad na nasa luwas.” (Gibo 23:16; 26:11; Roma 16:​7, 11) Mayo nin ebidensia na hiningoa kan mga disipulo na makipagdebate ki Saulo sa publiko kan sia minagawe nin siring.

⁶ Taano ta guminawe nin siring si Saulo? Pakalihis nin dakol na taon, isinurat nia: “Ako daing pakaaram asin naghiro sa kakulangan nin pagtubod.” (1 Timoteo 1:13) Sia sarong Fariseo, na naedukar “sono sa pagigin estrikto kan Ley nin mga apoon.” (Gibo 22:3) Minsan ngani minalataw na medyo mapagsabot an paratokdo ni Saulo na si Gamaliel, panatiko an halangkaw na saserdoteng si Caifas, na nakaasosyar ni Saulo. Si Caifas an namoon kaidto sa pagpakana na suminagkod sa paggadan ki Jesu-Cristo. (Mateo 26:​3, 4, 63-66; Gibo 5:34-39) Pakatapos kaiyan, sinegurado ni Caifas na hampakon an mga apostol ni Jesus, asin estriktong pinagbotan nia sindang pumondo sa paghuhulit basado sa ngaran ni Jesus. Si Caifas an nangenot sa Sanhedrin na nagkaigwa nin emosyonal na marhay na sesyon na durante kaiyan ilinuwas si Esteban tanganing gapoon. (Gibo 5:​27, 28, 40; 7:1-60) Si Saulo nagdalan sa paggapo, asin inautorisaran sia ni Caifas na isagibo an dugang pang mga paghihingoa na olangon an mga parasunod ni Jesus paagi sa pag-arestar sa sainda sa Damasco. (Gibo 8:1; 9:​1, 2) Sa irarom kan impluwensiang ini, naghona si Saulo na an saiyang paggawe ebidensia nin kaigotan para sa Dios, alagad sa katunayan mayo sia nin tunay na pagtubod. (Gibo 22:3-5) Bilang resulta, dai naaraman kaidto ni Saulo na si Jesus an tunay na Mesiyas. Alagad nakapag-isip-isip si Saulo kan an binuhay liwat na si Jesus milagrosong nagtaram sa saiya sa tinampo na pasiring sa Damasco.​—Gibo 9:3-6.

7. Ano an nangyari ki Saulo bilang resulta kan pakaenkuentro nia ki Jesus sa tinampo na pasiring sa Damasco?

⁷ Dai nahaloy pakatapos kaini, isinugo an disipulong si Ananias tanganing magpatotoo ki Saulo. Kun kamo, galaga daw kamong maduman sa saiya? Si Ananias nahandal, alagad nagtaram sia ki Saulo sa maboot na paagi. Nagbago an aktitud ni Saulo bilang resulta kan milagrosong pakaenkuentro nia ki Jesus sa tinampo na pasiring sa Damasco. (Gibo 9:10-22) Namidbid sia bilang si apostol Pablo, sarong maigot na Kristianong misyonero.

Mahoyo Alagad Makosog an Boot

8. Paano ipinabanaag ni Jesus an aktitud kan saiyang Ama sa mga tawo na nakagibo nin maraot na mga bagay?

⁸ Si Jesus maigot na parabalangibog kan Kahadean na mahoyo alagad makosog an boot sa pagtratar sa mga tawo. (Mateo 11:29) Ipinabanaag nia an espiritu kan saiyang langitnon na Ama, na nagsasadol sa mga maraot na bayaan an saindang maraot na mga dalan. (Isaias 55:​6, 7) Sa pagtratar sa mga parakasala, rinirisa ni Jesus kun may ebidensia nin pagrahay, asin pinaparigon nia an boot kan siring na mga indibiduwal. (Lucas 7:37-50; 19:2-10) Imbes na hokoman an iba basado sa panluwas na itsura, inarog ni Jesus an kabootan, pagpopogol, asin pakatios kan saiyang Ama na naglalaom na magiyahan sinda na magsolsol. (Roma 2:4) Kabotan ni Jehova na an gabos na klase nin tawo magsolsol asin makaligtas.​—1 Timoteo 2:​3, 4.

9. Ano an manonodan niato sa pagkaotob ki Jesus kan Isaias 42:1-4?

⁹ Isinasabi an pagmansay ni Jehova ki Jesu-Cristo, kinotar kan kagsurat kan Ebanghelyo na si Mateo an makahulang mga tataramon na ini: “Uya! An sakong lingkod na sakong pinili, an sakong namomotan, na naooyonan kan sakong kalag! Ibubugtak ko an sakong espiritu sa saiya, asin kun ano an hustisya liliwanagon nia sa mga nasyon. Dai sia makikipag-iwal, ni makurahaw man, ni madadangog nin siisay man an saiyang tingog sa mahiwas na mga dalan. Mayong nalanog na gaho na saiyang roronoton, asin mayong nagbabagang linong mitsa na saiyang paparongon, sagkod na sia magpaluwas nin hustisya na may kapangganahan. An totoo, sa saiyang ngaran maglalaom an mga nasyon.” (Mateo 12:17-21; Isaias 42:1-4) Kaoyon kan makahulang mga tataramon na iyan, si Jesus dai napalabot sa maribok na diriskutiran. Dawa kan ginigipit, itinaram nia an katotoohan sa paagi na nakaakit sa mga sadiosan an puso.​—Juan 7:​32, 40, 45, 46.

10, 11. (a) Minsan ngani kabilang an mga Fariseo sa pinakaprangkang mga nagkokontra ki Jesus, taano ta nagpatotoo sia sa nagkapira sa sainda? (b) Anong klaseng mga simbag an kun beses itinatao ni Jesus sa mga nagkokontra, alagad ano an dai nia ginibo?

 ¹⁰ Durante kan saiyang ministeryo, si Jesus nagtaram sa dakol na Fariseo. Minsan ngani an nagkapira sa sainda naghingoang siodon sia paagi sa saiyang pagtaram, si Jesus dai nagkonklusyon na gabos sinda may maraot na motibo. Si Simon, sarong Fariseo na medyo may pagkakritiko, minalataw na gustong makarani ki Jesus asin inimbitaran siang kumakan. Inako ni Jesus an imbitasyon asin nagpatotoo sa mga presente. (Lucas 7:36-50) Sa saro pang okasyon, sarong prominenteng Fariseo na an ngaran Nicodemo an hilom na nagdolok ki Jesus sa banggi. Dai sia tinuyaw ni Jesus huli sa saiyang paghalat sagkod na dumiklom. Imbes, nagpatotoo sia ki Nicodemo manongod sa pagkamoot na ipinaheling nin Dios sa pagsugo sa saiyang Aki tanganing buksan an dalan nin kaligtasan para sa mga maturubod. Ipinaheling man ni Jesus sa maboot na paagi an importansia kan pagkuyog sa areglo nin Dios. (Juan 3:1-21) Kan huri si Nicodemo nagtaram para ki Jesus kan menoson kan ibang Fariseo an sarong paborableng bareta manongod ki Jesus.​—Juan 7:46-51.

¹¹ Si Jesus bakong buta sa pagsaginsagin kan mga naghihingoang siodon sia. Dai nia tinogotan an mga nagkokontra na mapalaog sia sa daing kamanungdanan na mga debate. Minsan siring, kun angay talagang nagtatao sia nin halipot asin mapuersang mga simbag paagi sa pagsabi nin prinsipyo, paggamit nin ilustrasyon, o pagkotar nin teksto. (Mateo 12:38-42; 15:1-9; 16:1-4) May beses na dai na sana minasimbag si Jesus kun malinaw na mayong marahay na ibubunga an paggibo kaiyan.​—Marcos 15:2-5; Lucas 22:67-70.

12. Minsan ngani sia kinukurahawan, paano natabangan ni Jesus an mga tawo?

¹² Kun minsan, si Jesus kinukurahawan kan mga tawo na kontrolado kan marompot na mga espiritu. Kun iyan nangyayari, sia nagpopogol asin ginagamit pa ngani an saiyang kapangyarihan na itinao nin Dios tanganing magtao nin kaginhawahan. (Marcos 1:23-28; 5:2-8, 15) Kun may mga tawong naaanggot asin kinukurahawan kita mantang kita nakikikabtang sa ministeryo, kaipuhan man kitang magpogol, asin maninigo kitang maghingoa na atubangon an siring na situwasyon sa maboot asin mataktikang paagi.​—Colosas 4:6.

Sa Laog kan Pamilya

13. Taano ta kun minsan may mga tawong kinokontra an sarong miembro nin pamilya na nagpopoon na makipag-adal sa Biblia sa mga Saksi ni Jehova?

¹³ An pangangaipong magpogol an mga parasunod ni Jesus sa parate nagigin risang marhay sa laog kan pamilya. An sarong tawo na an puso biyong napahiro kan katotoohan sa Biblia naghihimuyawot na an saiyang pamilya maghimate man. Alagad siring kan sabi ni Jesus, an mga miembro kan pamilya tibaad magkontra. (Mateo 10:32-37; Juan 15:​20, 21) May manlaenlaen na dahelan kaini. Halimbawa, minsan ngani an katokdoan kan Biblia puedeng tumabang sa sato na magin onesto, responsable, asin magalang, itinotokdo man kan Kasuratan na sa ano man na situwasyon nangongorog an satong paninimbagan sa satong Kaglalang. (Eclesiastes 12:​1, 13; Gibo 5:29) Tibaad makolgan an boot nin sarong miembro nin pamilya huli ta iniisip nia na minsan paano naiinaan an saiyang autoridad sa pamilya huli sa satong kaimbodan ki Jehova. Kun inaatubang an siring na situwasyon, importante nanggad na sunodon niato an halimbawa nin pagpaheling nin pagpopogol ni Jesus!​—1 Pedro 2:21-23; 3:​1, 2.

14-16. Ano an nakapabago sa nagkapira na dati nagkokontra sa saindang mga kapamilya?

 ¹⁴ An dakol na naglilingkod ngonyan ki Jehova may agom o iba pang kapamilya na dati nagkokontra sa mga pagbabago ninda kan sinda magpoon na mag-adal sa Biblia. An mga nagkokontra tibaad nakadangog nin negatibong mga komento manongod sa Mga Saksi ni Jehova, asin tibaad natatakot sinda na magkakaigwa nin bakong marahay na impluwensia sa pamilya. Ano an nakatabang sa sainda na mabago an saindang aktitud? Sa dakol na kamugtakan, an marahay na halimbawa may dakulang epekto. Huling marigon na iinaplikar kan may pagtubod an konseho kan Biblia​—regular na nag-aatender sa Kristianong mga pagtiripon asin nakikikabtang sa ministeryo mientras na inaasikaso man an mga paninimbagan sa pamilya asin nagpapaheling nin pagpopogol sa ibong nin ano man na berbal na pan-aabuso​—an pagkontra kan pamilya kun beses nagluluya.​—1 Pedro 2:12.

¹⁵ An sarong nagkokontra tibaad man habong maghinanyog sa ano man na paliwanag na hale sa Biblia huli sa daing binabasaran na pagkaanggot o kapalangkawan. Totoo iyan sa sarong lalaki sa Estados Unidos na nagsabi na sia patriotikong marhay. Sarong beses, kan an saiyang agom nasa kombension, kinua nia an gabos niang bado asin naglayas. Sarong beses pa, naghale sia sa harong na may darang badil asin nagpatakot na sia mahugot. Binasol nia an relihion kan saiyang agom sa ano man na bakong makatanosan na paggawe nia. Alagad an agom na babae naghingoang padagos na iaplikar an konseho kan Biblia. Beinteng taon pakalihis na sia magin saro sa Mga Saksi ni Jehova, an lalaki nagin Saksi na man. Sa Albania naanggot an sarong babae huli ta an saiyang aking babae nakipag-adal sa Biblia sa mga Saksi ni Jehova dangan nagpabautismo. Doseng beses na rinaot kan ina an kopya nin Biblia kan saiyang aking babae. Dangan sarong aldaw binuksan nia an sarong bagong Biblia na iwinalat kan saiyang aking babae sa lamesa. Nagkanorongod na iyan nabuksan sa Mateo 10:​36, asin narealisar kan ina na aplikado saiya an sinasabi dian. Minsan siring, huling nagmamalasakit sa kapakanan kan saiyang aking babae, ihinatod kan ina an saiyang aking babae sa barko kan ini pahale kaiba kan ibang mga Saksi na pasiring sa sarong kombension sa Italia. Kan maheling kan ina an pagkamoot, kurugosan, asin mga huyom kan grupo asin madangog an saindang maogmang ngirisihan, nagpoon na mabago an saiyang saboot. Dai nahaloy pakatapos kaini, nag-oyon siang mag-adal sa Biblia. Ngonyan hinihingoa niang tabangan an iba na sa primero nagkokontra.

¹⁶ Sarong beses, an sarong agom na lalaki na may kapot na kutsilyo kinomprontar an saiyang agom, na pigpaparataraman ini nin makokolog na sahot mantang ini padangadang sa Kingdom Hall. An agom na babae maboot na nagsimbag: “Dumagos ka sa Kingdom Hall tanganing maheling mo mismo.” Nagdagos sia, asin pag-abot nin panahon sia nagin sarong Kristianong magurang sa kongregasyon.

17. Kun magin mainit kun beses an situwasyon sa sarong Kristianong pamilya, anong konseho kan Kasuratan an makakatabang?

¹⁷ Dawa kun an gabos sa saindong pamilya Kristiano, tibaad may mga panahon na nagigin mainit an situwasyon sa pamilya asin nagigin makolog pa ngani an mga tataramon huli sa pagkabakong sangkap nin tawo. Mahalagang mangnohon na an mga Kristiano sa suanoy na Efeso tinawan nin konseho: “Magkaharale na sa saindo an gabos na maraot an kamawotan na kapaitan asin kaanggotan asin grabeng kaanggotan asin sirilyakan patin mapanlibak na pagtaram kaiba an gabos na karatan.” (Efeso 4:31) Minalataw na an kamugtakan na nakapalibot  sa mga Kristiano sa Efeso, an sadiri nindang pagkabakong sangkap asin, sa nagkapirang kamugtakan, an dati nindang pamumuhay nakaimpluwensia sa sainda. Ano an makakatabang sa sainda na magbago? Kaipuhan nindang “magin bago sa puersa na nagpapahiro sa [saindang] isip.” (Efeso 4:23) Mientras na sinda nag-aadal sa Tataramon nin Dios, naghohorophorop sa kun paano iyan maninigong makaimpluwensia sa saindang buhay, nakikiasosyar sa mga kapwa Kristiano, asin odok na namimibi, an mga bunga kan espiritu nin Dios mas lubos na maheheling sa saindang buhay. Makakanood sinda na “magin maboot sa lambang saro, mapagmalasakit sa mamomoton na paagi, na sueltong nagpapatarawadtawadan siring na an Dios man sueltong nagpatawad sa [sainda] paagi ki Cristo.” (Efeso 4:32) Ano man an tibaad gibohon kan iba, kaipuhan niatong magpogol, magin maboot, mapagmalasakit, mapagpatawad. Tunay nanggad, dapat na kita “dai . . . magbalos nin maraot sa maraot sa kiisay man.” (Roma 12:​17, 18) An pagpaheling nin tunay na pagkamoot bilang pag-arog sa Dios iyo an pirmeng tamang gibohon.​—1 Juan 4:8.

Konseho Para sa Gabos na Kristiano

18. Taano an konseho na yaon sa 2 Timoteo 2:24 ta angay para sa sarong magurang sa kongregasyon sa suanoy na Efeso, asin paano makikinabang dian an gabos na Kristiano?

¹⁸ Aplikado sa gabos na Kristiano an konseho na padagos kitang ‘magpogol sa irarom nin karatan.’ (2 Timoteo 2:24) Alagad iyan enot na sinabi ki Timoteo, na nangaipo kaiyan kan sia naglilingkod bilang sarong magurang sa kongregasyon sa Efeso. May nagkapira sa kongregasyon na prangka sa pagpahayag ninda kan saindang mga punto de vista asin nagtotokdo nin salang doktrina. Huling dai ninda lubos na namansayan an obheto kan Ley ni Moises, dai ninda nasabotan an halaga nin pagtubod, pagkamoot, asin marahay na konsensia. An kapalangkawan nagbunga nin iriwal mientras na nagdederebatehan sinda sa mga tataramon, asin dai ninda nasabotan an pundamental na ideya kan katokdoan ni Cristo asin an halaga kan diosnon na debosyon. Tanganing maresolberan an situwasyon na ini, si Timoteo dapat na magin marigon para sa katotoohan sa Kasuratan pero maboot sa pagtratar sa saiyang mga tugang. Siring kan kamagurangan sa presenteng aldaw, aram nia na bako niang sadiri an aripompon asin na kaipuhan niang trataron an iba sa paagi na mapaoswag sa Kristianong pagkamoot asin pagkasararo.​—Efeso 4:1-3; 1 Timoteo 1:3-11; 5:​1, 2; 6:3-5.

19. Taano ta mahalaga para sa sato gabos na ‘hanapon an kahoyoan’?

¹⁹ Sinasadol nin Dios an saiyang banwaan na ‘hanapon an kahoyoan.’ (Sofonias 2:3) An termino sa Hebreo para sa “kahoyoan” nangangahulogan nin disposisyon na nagpapangyari sa sarong tawo na tioson nin may pagpapasensia an danyos, na dai naiiritar asin dai nagbabalos. Logod na odok niatong ipakimaherak ki Jehova na tabangan kita tangani na kita makapagpogol asin ikarepresentar sia nin angay, dawa sa masakit na mga kamugtakan.

Ano an Nanodan Nindo?

• Kun kamo napapaatubang sa daing galang na pagtaram, anong mga teksto an makakatabang sa saindo?

• Taano ta guminawe nin daing galang si Saulo?

• Paano makakatabang sa sato an halimbawa ni Jesus na trataron nin tama an gabos na klase nin tawo?

• Anong mga pakinabang an tibaad ibunga kan pagpopogol sa satong pagtaram sa laog kan pamilya?

[Mga Hapot Para sa Pag-adal]

[Ritrato sa pahina 26]

Apisar kan reputasyon ni Saulo, trinatar sia ni Ananias sa maboot na paagi

[Ritrato sa pahina 29]

An maimbod na pag-asikaso nin sarong Kristiano sa mga paninimbagan puedeng magpaluya sa pagkontra kan pamilya

[Ritrato sa pahina 30]

Pinapaoswag kan mga Kristiano an pagkamoot asin pagkasararo