“Ipaheling Nindo na Kamo Nagpapasalamat”

“Togotan nindo na an katoninongan kan Cristo mamogol sa saindong puso . . . Asin ipaheling nindo na kamo nagpapasalamat.”​—COLOSAS 3:15.

1. Anong kalaenan an naheheling niato sa Kristianong kongregasyon asin sa kinaban na kontrolado ni Satanas?

SA 94,600 na kongregasyon kan Mga Saksi ni Jehova sa bilog na kinaban, maheheling niato an espiritu nin pagigin mapagpasalamat. An kada pagtiripon pinoponan asin tinatapos paagi sa pamibi na kaiba an mga kapahayagan nin pasasalamat ki Jehova. Parate niatong nadadangog an “salamat,” “daing ano man,” o kaagid na mga ekspresyon sa mga aki asin gurang saka sa bagohan asin haloy nang mga Saksi kun sinda nag-iiribahan sa pagsamba asin maogmang asosasyon. (Salmo 133:1) Laen nanggad ini sa kaimotan na nangingibabaw sa dakol na ‘dai nakamimidbid ki Jehova asin dai nagkukuyog kan maogmang bareta’! (2 Tesalonica 1:8) Nabubuhay kita sa sarong ingratong kinaban. Asin bako ining makangangalas kun iisipon niato kun siisay an dios kan kinaban na ini​—si Satanas na Diablo, an pinakadakulang parasuportar nin kapasloan, na an kapalangkawan asin espiritu nin pagrebelde nakakasagom sa sosyedad nin tawo!​—Juan 8:44; 2 Corinto 4:4; 1 Juan 5:19.

2. Anong patanid an kaipuhan niatong himateon, asin anong mga hapot an kokonsideraron niato?

² Huling napalilibotan kita kan kinaban ni Satanas, kaipuhan kitang mag-ingat na dai maraot kan mga aktitud kaiyan. Kan enot na siglo, pinagirumdom ni apostol Pablo an mga Kristiano sa Efeso: “Kamo kaidto naglakaw segun sa sistema nin mga bagay kan kinaban na ini, sono sa namamahala sa autoridad kan doros, an espiritu na naghihiro ngonyan sa mga aki nin kasumbikalan. Iyo, sa tahaw ninda kita gabos kaidto namuhay oyon sa mga mawot kan satong laman, na naggigibo kan mga bagay na binoot kan laman asin kan mga pag-isip, asin kita kaidto sa kanaturalan mga aki nin grabeng kaanggotan arog kan iba.” (Efeso 2:​2, 3) Totoo man  iyan sa dakol ngonyan. Kun siring, paano niato mapagdadanay an espiritu nin pagigin mapagpasalamat? Anong tabang an itinatao ni Jehova? Sa anong praktikal na mga paagi ikapaheheling niato na kita talagang mapagpasalamat?

Mga Dahelan na Magin Mapagpasalamat

3. Sa ano kita nagpapasalamat ki Jehova?

³ Ki Jehova Dios, na satong Kaglalang asin Paratao nin Buhay, kita may utang na boot, nangorogna kun iniisip niato an nagkapira sa abundang balaog na itinatao nia sa sato. (Santiago 1:17) Aroaldaw, nagpapasalamat kita ki Jehova na kita buhay. (Salmo 36:9) Sa palibot niato, namamasdan niato an kadakol na ebidensia kan mga gibo ni Jehova, arog kan saldang, bulan, asin mga bitoon. An yaon sa planeta niato na abundang tambobong nin mga mineral na nagsusustenir sa buhay, an marahayon na pagkabalanse nin manlaenlaen na mahalagang marhay na mga gas sa atmospera, asin an komplikadong mga siklo sa naturalesa gabos nagpapatotoo sa utang na boot niato sa satong mamomoton na langitnon na Ama. “Dakol na bagay an saimo mismong ginibo, O Jehova na sakong Dios,” an inawit ni Hadeng David, “an saimo nganing makangangalas na mga gibo asin an saimong mga paghorophorop sa samo; mayo nin ikakabaing sa saimo. Kun ako magmawot na isaysay asin itaram an mga iyan, an mga iyan dai ko na kayang isaysay huli sa kadakolan.”​—Salmo 40:5.

4. Taano ta maninigong pasalamatan niato si Jehova para sa maogmang pag-iribaiba niato sa satong mga kongregasyon?

⁴ Minsan ngani mayo kita sa sarong pisikal na paraiso, an mga lingkod ni Jehova ngonyan naoogmang mag-erok sa sarong espirituwal na paraiso. Sa satong mga Kingdom Hall saka sa satong mga kombension asin asamblea, naeeksperyensiahan niato na may epekto an bunga kan espiritu nin Dios sa satong mga kapagtubod. Sa katunayan, kun naghuhulit sa mga tawo na daing gayo o mayo nin inklinasyon sa relihion, an nagkapirang Saksi sinasambit an sinabi ni Pablo sa saiyang surat sa mga taga Galacia. Dinadara nguna ninda an atension sa “mga gibo kan laman” asin hinahapot an mga kaolay ninda kun ano an saindang naobserbaran. (Galacia 5:19-23) An kadaklan tolos na minaoyon na ini an maheheling sa sosyedad nin tawo ngonyan. Kun ipinaheheling an sinasabi manongod sa bunga kan espiritu nin Dios asin kun iniimbitaran sa lokal na Kingdom Hall tanganing maheling mismo an ebidensia kaini, dakol an tolos na minaadmitir: “An Dios tunay nanggad na yaon sa saindo.” (1 Corinto 14:25) Asin ini bako sanang manonompongan sa lokal na Kingdom Hall. Saen man kamo magduman, kun  manompongan nindo an siisay man sa labi sa anom na milyon na Saksi ni Jehova, maheheling nindo an iyo man sanang espiritu nin pagigin maogma asin magayagaya. Totoo nanggad, an nakapakokosog na pag-iribaibang ini dahelan tanganing pasalamatan si Jehova, an saro na nagtatao kan saiyang espiritu tanganing magin posible iyan.​—Sofonias 3:9; Efeso 3:​20, 21.

5, 6. Paano niato ikapaheheling na kita nagpapasalamat sa nakalalabi sa gabos na balaog nin Dios, an pantubos?

⁵ An nakalalabi sa gabos na balaog, an pinakasangkap na regalo na itinao ni Jehova, iyo an saiyang Aki, si Jesus, na iyong ginamit sa pagtao kan atang na pantubos. “Kun siring kaini an pagkamoot sa sato nin Dios,” an isinurat ni apostol Juan, “kun siring kita mismo nasa irarom nin obligasyon na magkaminorootmootan.” (1 Juan 4:11) Iyo, ipinaheheling niato na kita nagpapasalamat sa pantubos bako sanang paagi sa pagpahayag nin pagkamoot asin utang na boot ki Jehova kundi patin paagi sa pamumuhay na nagpapaheling nin pagkamoot sa iba.​—Mateo 22:37-39.

⁶ Dakol pa kitang manonodan manongod sa pagpaheling nin utang na boot paagi sa pagkonsiderar sa nagin pagtratar ni Jehova sa Israel kan suanoy. Paagi sa Ley, na itinao nia sa nasyon paagi ki Moises, tinokdoan ni Jehova nin dakol na leksion an banwaan. Paagi sa “kabilogan kan kaaraman asin kan katotoohan sa Ley,” dakol kitang manonodan na matabang sa sato na sunodon an hatol ni Pablo: “Ipaheling nindo na kamo nagpapasalamat.”​—Roma 2:20; Colosas 3:15.

Tolong Leksion sa Ley ni Moises

7. Paano an areglo na pagtao nin tinagba nagtao nin oportunidad sa mga Israelita na ipaheling an saindang pagpasalamat ki Jehova?

⁷ Sa Ley ni Moises, nagtao si Jehova nin tolong paagi na ikapaheheling kan mga Israelita an saindang tunay na pag-apresyar sa saiyang karahayan. Enot, yaon an tinagba. An ikasampulong kabtang kan ani kan daga, kaiba an “ikasampulong kabtang kan mga baka asin aripompon,” magigin “banal para ki Jehova.” (Levitico 27:30-32) Kan magkuyog an mga Israelita, abunda sindang binendisyonan ni Jehova. “‘Darahon nindo an gabos na ikasampulong kabtang sa tambobong, tanganing magkaigwa nin kakanon sa sakong harong; asin tabi baloa nindo ako sa bagay na ini,’ sabi ni Jehova nin mga hukbo, ‘kun baga dai ko bukasan sa saindo an mga gaha kan kalangitan asin ulaan ko kamo nin bendisyon sagkod na mayo na nin kulang.’”​—Malaquias 3:10.

8. Ano an kalaenan kan boluntad na mga dolot asin kan pagtao nin tinagba?

⁸ Ikaduwa, apuera sa kahagadan na pagtao nin tinagba, iinareglo ni Jehova na an mga Israelita magtao nin boluntad na mga kontribusyon. Pinagbotan nia si Moises na sabihan an mga Israelita: “Kun makalaog na kamo sa daga na dadarahan ko sa saindo, mangyayari man na kun kakanon nindo an arin man na tinapay kan daga, maninigo kamong magtao nin kontribusyon ki Jehova.” An nagkapira sa enot na mga bunga kan saindang “magaspang na harina bilang mga tinapay na bilog” itatao bilang “kontribusyon ki Jehova” sa gabos nindang kapag-arakian. Mangnoha na dai espesipikong sinabi kun gurano kadakol kan enot na mga bungang ini an hinahagad. (Bilang 15:18-21) Alagad kan an mga Israelita magtao nin kontribusyon bilang pagpasalamat,  nakaseseguro sinda nin bendisyon hale ki Jehova. Sarong kaagid na areglo an maheheling may koneksion sa templo sa bisyon ni Ezequiel. Mababasa niato: “An enot kan gabos na enot na hinog na bunga kan gabos na bagay asin an lambang kontribusyon kan gabos na bagay hale sa gabos nindong kontribusyon​—iyan mapapasa mga saserdote; asin an enot na mga bunga kan saindong magaspang na mga harina maninigo nindong itao sa saserdote, tanganing mabendisyonan an saimong harong.”​—Ezequiel 44:30.

9. Ano an itinokdo ni Jehova paagi sa probisyon na pag-arahit?

⁹ Ikatolo, iinareglo ni Jehova an pag-arahit. “Kun kamo mag-ani sa saindong daga,” an pagboot nin Dios, “dai nindo uboson na anihon an gilid kan saindong oma, asin dai nindo pagpuroton an tada sa saindong pag-ani. Siring man, dai mo pagtiponon an mga tada sa saimong ubasan, asin dai mo pagpuroton an nakawarak na mga ubas sa saimong ubasan. Maninigo mong itada iyan para sa nagsasakit nin makuri asin sa nakikihimanwa. Ako si Jehova na saindong Dios.” (Levitico 19:​9, 10) Sa giraray, dai sinabi nin espesipiko kun gurano kadakol an hinahagad. Nasa lambang Israelita na an desisyon kun gurano kadakol an itatada para sa mga daing sukat. Angay an paliwanag kan madonong na si Hadeng Salomon: “An nagpapaheling nin pabor sa hamak nagpapautang ki Jehova, asin an saiyang pagtratar Saiyang babayadan sa saiya.” (Talinhaga 19:17) Sa siring nagtokdo si Jehova nin pagkaludok asin konsiderasyon para sa mga daing sukat.

10. Ano an nagin resulta sa banwaan nin Israel kan dai ninda ikinapaheling na sinda nagpapasalamat?

¹⁰ Binendisyonan ni Jehova an mga Israelita kan sinda makinuyog na nagdadara kan mga tinagba, nagtatao nin boluntad na mga kontribusyon, asin nananao para sa mga dukha. Alagad kan dai ikinapaheling kan banwaan nin Israel na sinda nagpapasalamat, nawara ninda an pabor ni Jehova. Nagresulta ini sa kapahamakan asin sa kahurihurihi pagkadistiero. (2 Cronica 36:17-21) Kun siring, ano an mga leksion para sa sato?

An Satong mga Kapahayagan nin Pagpasalamat

11. Ano an pangenot na paagi na ikapaheheling niato an satong pagpasalamat ki Jehova?

¹¹ An pangenot na paagi na makatatao kita nin pag-omaw ki Jehova asin makapahahayag kan satong pagpasalamat may kalabot man na “dolot.” Totoo, bilang mga Kristiano, bako kitang sakop kan Ley ni Moises, na obligadong magdolot nin mga atang na hayop o inani. (Colosas 2:14) Minsan siring, sinadol ni apostol Pablo an mga Kristianong Hebreo: “Danay kitang magdolot sa Dios nin atang nin pag-omaw, na iyo, an bunga nin mga ngabil na nagpapahayag sa publiko kan saiyang ngaran.” (Hebreo 13:15) Paagi sa paggamit kan satong mga abilidad asin rekurso tanganing magdolot nin atang nin pag-omaw ki Jehova, baga man sa ministeryo sa publiko o sa tahaw kan “nagkakasararong mga kadaklan” nin mga kapwa Kristiano, ikakapahayag niato an odok sa pusong pagpasalamat sa satong mamomoton na langitnon na Ama, si Jehova Dios. (Salmo 26:12) Sa paggibo kaiyan, ano an manonodan niato sa mga paagi nin pagpahayag kan mga Israelita kan saindang pagpasalamat ki Jehova?

12. Kun mapadapit sa satong Kristianong paninimbagan, ano an manonodan niato sa areglo na pagtao nin tinagba?

¹² Enot sa gabos, siring sa pinag-olayan niato, an areglo na pagtao nin tinagba bakong opsional; an lambang Israelita igwa nin obligasyon sa bagay na ini. Bilang mga Kristiano, igwa kita nin paninimbagan na makikabtang sa ministeryo asin mag-atender sa Kristianong mga pagtiripon. An mga aktibidad na ini bakong opsional. Sa saiyang dakulang hula mapadapit sa panahon kan katapusan, deretsong sinabi ni Jesus: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 24:14; 28:​19, 20) Mapadapit sa Kristianong mga pagtiripon, si apostol Pablo pinasabngan na sumurat: “Konsideraron niato an lambang saro tanganing mandagka sa pagkamoot asin sa marahay na mga gibo, na dai pagpabayaan an satong pagtorotiripon, siring kan kaugalean nin nagkapira, kundi na magparinigonan nin boot, asin lalo na ta naheheling nindo na an aldaw harani na.” (Hebreo 10:​24, 25) Ipinaheheling niato an satong pagpasalamat ki Jehova kun may kagayagayahan na inaako niato an satong paninimbagan na maghulit asin magtokdo saka makiasosyar nin regular sa satong mga tugang sa mga pagtiripon kan kongregasyon, na minamansay iyan bilang sarong pribilehio asin onra.

13. Anong leksion an makukua sa mga areglo nin boluntad na mga kontribusyon asin pag-arahit?

¹³ Dugang pa, makikinabang kita sa pagkonsiderar sa duwa pang probisyon na paagi kaiyan  ikapaheheling kan mga Israelita an saindang apresasyon​—an boluntad na mga kontribusyon asin pag-arahit. Kabaliktaran sa pagtao nin tinagba, na sarong kahagadan na may klarong sinasabing kapanugaan, an boluntad na mga kontribusyon asin an areglo na pag-arahit mayo nin espesipikong sinasabi kun gurano kadakol an hinahagad. Imbes, nagtao iyan nin oportunidad tanganing an rarom nin apresasyon sa puso nin sarong lingkod ni Jehova an magtulod sa saiya na humiro. Sa kaagid na paagi, minsan ngani nasasabotan niato na an pakikikabtang sa ministeryo asin pag-atender sa Kristianong mga pagtiripon pundamental na paninimbagan nin lambang lingkod ni Jehova, kita daw nakikikabtang dian nin bilog na puso asin may espiritu nin pagigin gikan sa boot? Minamansay daw niato iyan bilang oportunidad tanganing ipahayag an satong odok sa pusong apresasyon sa gabos na ginibo ni Jehova para sa sato? Kita daw lubos na nakikikabtang sa mga aktibidad na ini, sagkod sa itinotogot kan satong indibiduwal na mga kamugtakan? O minamansay daw niato an gabos na ini bilang saro sanang obligasyon na dapat niatong otobon? Siempre, mga hapot ini na dapat niatong simbagon nin personal. Siring kaini an pagkasabi kaiyan ni apostol Pablo: “Patunayan nin lambang saro an saiyang gibo, dangan may dahelan na siang mag-ogma dapit sa saiya sana, asin bakong sa pagkomparar sa ibang tawo.”​—Galacia 6:4.

14. Ano an inaasahan sa sato ni Jehova sa paglilingkod niato sa saiya?

¹⁴ Aram na gayo ni Jehova Dios an satong mga kamugtakan. Aram nia an satong mga limitasyon. Pinahahalagahan nia an mga atang, dakula o sadit, na gikan sa boot na itinatao kan saiyang mga lingkod. Dai nia inaasahan na kita gabos matao nin parareho kadakol, asin dai man niato iyan magigibo. Kan ipinaliliwanag an pagtatao sa materyal na paagi, sinabihan ni apostol Pablo an mga Kristiano sa Corinto: “Kun an pagigin andam yaon na, iyan orog nang inaako sono sa kun ano an nasa tawo, bakong sono sa kun ano an mayo sa tawo.” (2 Corinto 8:12) An prinsipyong ini minaaplikar man sa satong paglilingkod sa Dios. An pagigin kawiliwili ki Jehova kan satong paglilingkod dinedeterminaran, bakong paagi sa kun gurano kadakol an satong ginigibo, kundi paagi sa kun paano niato iyan ginigibo​—may kagayagayahan asin bilog na puso.​—Salmo 100:1-5; Colosas 3:23.

Kultibaron Asin Papagdanayon an Espiritu nin Pagpapayunir

15, 16. (a) Ano an koneksion kan ministeryong pagpapayunir asin kan pagigin mapagpasalamat? (b) Paano makapaheheling nin espiritu nin pagpapayunir an mga mayo sa kamugtakan na magpayunir?

¹⁵ An sarong nakakokontentong paagi tanganing  ipaheling an satong pagpasalamat ki Jehova iyo an paglaog sa bilog na panahon na ministeryo. Huling namotibar nin pagkamoot ki Jehova asin nin pagpasalamat sa saiyang dai na kutana maninigong kabootan, dakol na nagdusay na Kristiano an naggibo nin dakulang mga pagliliwat sa saindang buhay tanganing matawan nin orog na panahon an paglilingkod ki Jehova. An nagkapira nakakapaglingkod bilang regular payunir, na naggagamit nin promedyong 70 oras kada bulan sa paghuhulit kan maogmang bareta asin pagtotokdo kan katotoohan sa mga tawo. An iba, na tibaad nalilimitaran nin laen-laen na mga sirkonstansia, sa panapanahon naggigibo nin areglo na gumamit nin 50 oras sa sarong bulan sa paghuhulit bilang auxiliary payunir.

¹⁶ Alagad kumusta man an dakol na lingkod ni Jehova na dai makapaglingkod bilang regular o auxiliary payunir? Ikapaheheling ninda an pagpasalamat paagi sa pagkultibar asin pagpapadanay nin espiritu nin pagpapayunir. Paano? Paagi sa pag-enkaminar sa mga puedeng magpayunir, paagi sa pagtadom sa saindang mga aki kan pagmawot na lumaog sa sarong karera nin bilog na panahon na paglilingkod, asin paagi sa mahigos na pakikikabtang sa paghuhulit segun sa saindang mga kamugtakan. An paghihingoang itinatao niato sa satong ministeryo nakadependeng marhay sa rarom kan apresasyon sa satong puso sa ginibo, ginigibo, asin gigibohon pa ni Jehova para sa sato.

Pagpaheling nin Pagigin Mapagpasalamat Paagi sa Satong “Mahahalagang Bagay”

17, 18. (a) Paano niato ikapaheheling an pagpasalamat paagi sa satong “mahahalagang bagay”? (b) Paano inebalwar ni Jesus an kontribusyon kan babaeng balo, asin taano?

¹⁷ “Tawan nin onra si Jehova paagi sa saimong mahahalagang bagay,” an sabi kan Talinhaga 3:​9, “asin paagi sa enot na mga bunga kan gabos mong inani.” An mga lingkod ni Jehova dai na kaipuhan na magtao nin tinagba. Imbes, nagsurat si Pablo sa kongregasyon sa Corinto: “Gumibo an lambang saro nin oyon sa napagdesisyonan nia sa saiyang puso, bakong sa maraot na boot o sa kapiritan, huli ta an Dios namomoot sa maogmang paratao.” (2 Corinto 9:7) An pagtao nin boluntad na mga kontribusyon tanganing suportaran an pambilog na kinaban na paghuhulit kan Kahadean nagpapaheling man kan satong pagpasalamat. An odok sa pusong pag-apresyar nagmomotibar sa sato na gibohon ini nin regular, na tibaad nagtatagama nin sarong kantidad serosemana, arog kan ginibo kan enot na mga Kristiano.​—1 Corinto 16:​1, 2.

¹⁸ Bakong an kantidad na ikinokontribwir niato an nagpapabanaag kan satong pagpasalamat ki Jehova. Imbes, iyan an espiritu nin pagtatao niato. Ini an naobserbaran ni Jesus kan pinagmamasdan nia an mga tawo na naghoholog kan saindang mga regalo sa kaha duman sa templo. Kan maheling ni Jesus an sarong dukhang babaeng balo na nagholog nin “duwang saradit na sinsilyo na kadikiton an halaga,” sia nagsabi: “Sa katotoohan sinasabi ko sa saindo, An babaeng balong ini, minsan ngani dukha, nagholog nin labi ki kan ihinolog ninda gabos. Huli ta an gabos na ini nagholog nin mga regalo gikan sa saindang kalabihan, alagad an babaeng ini nagholog gikan sa saiyang kadaihan kan gabos niang pagbuhay.”​—Lucas 21:1-4.

19. Taano ta marahay na siyasaton liwat an mga paagi nin pagpaheling niato kan satong utang na boot?

¹⁹ Logod na an pagrepasong ini sa kun paano niato ikapaheheling na kita nagpapasalamat magpahiro sa sato na siyasaton liwat an mga paagi nin pagpaheling niato kan satong utang na boot. Puede daw niatong dugangan an satong atang nin pag-omaw ki Jehova saka an satong pagsuportar sa pambilog na kinaban na gibohon sa materyal na paagi? Sa paggibo kaiyan sa abot kan satong makakaya, makasisierto kita na an satong buka an palad asin mamomoton na Ama, si Jehova, maoogmang gayo na ipinaheheling niato na kita nagpapasalamat.

Nagigirumdoman daw Nindo?

• Sa anong mga dahelan maninigo kitang magpasalamat ki Jehova?

• Anong mga leksion an manonodan niato sa pagtao nin tinagba, boluntad na mga kontribusyon, asin pag-arahit?

• Paano niato kinukultibar an espiritu nin pagpapayunir?

• Paano niato magagamit an satong “mahahalagang bagay” tanganing pasalamatan si Jehova?

[Mga Hapot Para sa Pag-adal]

[Mga Ritrato sa pahina 15]

“An lambang marahay na balaog asin lambang sangkap na regalo hale sa itaas”

[Mga Ritrato sa pahina 16]

Anong tolong leksion sa Ley an ipinaheheling digdi?

[Mga Ritrato sa pahina 18]

Anong mga atang an puede niatong itao?