Surat ki Tito 2:1-15
2 Alagad ika, padagos kang magtaram kan mga bagay na kauyon kan marahay* na katukduan.+
2 An mga may edad nang lalaki dapat na balanse sa paggawi, seryoso, tultol an isip, makusog an pagtubod, pano nin pagkamuot, marigon na nagtatagal.
3 Kaagid kaiyan, an mga may edad nang babayi dapat gumawi sa paaging nagtataong onra sa Diyos, bakong parapakaraot, bakong parainom,* mga paratukdo nin karahayan,
4 tanganing makapagtao sinda nin sadol sa* mga hoben na babayi na mamutan an saindang agom, mamutan an saindang mga aki,
5 na magin tultol an isip, malinig an paggawi, mahigos sa harong,* marahay, mapagpasakop sa saindang agom,+ na sa siring an tataramon nin Diyos dai mataraman na may pang-iinsulto.
6 Siring man, padagos mong sadulon an mga hoben na lalaki na magin tultol an isip,+
7 na ipinapahiling sa sainda na ika sarong halimbawa sa marahay na mga gibo sa gabos na bagay. Itukdo mo kun ano an dalisay,* asin magin seryoso ka nanggad sa paggibo kaiyan,+
8 na ginagamit an marahay* na mga tataramon na dai matutuyaw,+ tanganing an mga nagkokontra mapasupog dahil mayo sinda nin masabing maraot* manungod sa sato.+
9 An mga uripon dapat na magpasakop sa mga kagsadiri sa sainda sa gabos na bagay,+ na hinihinguwang mapaugma an mga ini, dai nagsusurusimbag,
10 dai naghahabon* sa mga ini,+ kundi nagpapahiling na lubos sindang mapagkakatiwalaan, tanganing sa lambang paagi masamnuhan* ninda an katukduan kan satuyang Paraligtas, an Diyos.+
11 Huli ta an daing kapantay na kabuutan* nin Diyos nahayag na, na nagdadara nin kaligtasan sa gabos na klase nin tawo.+
12 Sinasanay kita kaiyan na isikwal an bakong diyosnon na paggawi saka kinabanon na mga pagmawot+ asin na mamuhay na may tultol na isip asin katanusan saka may debosyon sa Diyos sa tahaw kan presenteng sistemang ini nin mga bagay,*+
13 mantang hinahalat niyato an maugmang paglaom+ asin an mamuraway na paghahayag sa makapangyarihan na Diyos asin sa satuyang Paraligtas, si Jesu-Cristo,
14 na nagtao kan saiyang sadiri para sa sato+ tanganing patalingkason* kita+ sa gabos na klase nin karatan asin tanganing linigon an sarong banwaan na saiyang espesyal na pagsadiri, banwaan na maigot sa marahay na mga gibo.+
15 Padagos mong ipahayag an mga bagay na ini, asin padagos kang magsadol* saka magsaway, na ginigibo iyan gamit an bilog mong awtoridad.+ Dai mo pagpabayaan na menuson ka nin siisay man.
Mga Nota
^ O “nakakapakusog; kapaki-pakinabang.”
^ O “bakong uripon nin arak.”
^ O “maibalik ninda sa tultol na pag-iisip an; masanay ninda an.”
^ O “maasikaso sa saindang harong.”
^ O posibleng “Magtukdo ka na may kadalisayan.”
^ O “nakakapakusog; kapaki-pakinabang.”
^ O “negatibo.”
^ O “mapagayon.”
^ O “naghahabas.”
^ Sa literal, “tubuson; balukaton.”
^ O “magpakusog.”
