Ezekiel 25:1-17
25 Nag-abot giraray sako an tataramon ni Jehova, na sinasabi:
2 “Aki nin tawo, umatubang ka sa direksiyon kan mga Ammonita,+ asin magpropesiya ka laban sa sainda.+
3 Sabihon mo manungod sa mga Ammonita, ‘Danguga an mensahe kan Soberanong Kagurangnan na Jehova. Ini an sinabi kan Soberanong Kagurangnan na Jehova: “Huling mapagtuya-tuya kang nagsabing ‘Aha!’ laban sa sakuyang santuwaryo kan lapastanganon iyan, asin laban sa daga nin Israel kan magin tiwangwang iyan, asin laban sa banwaan* nin Juda kan puwersahan sindang darahon sa ibang nasyon,
4 itatao taka sa mga taga Sirangan bilang saindang pagsadiri. Mabugtak sinda nin mga kampo* sa laog mo asin ititindog ninda an saindang mga tolda sa saimo. Kakakanon ninda an saimong mga bunga, asin iinumon ninda an gatas mo.
5 Gigibuhon kong pasabsaban nin mga kamelyo an Raba,+ asin lukuhan nin mga karnero an daga kan mga Ammonita; asin mamimidbid nanggad nindo na ako si Jehova.”’”
6 “Huli ta ini an sinabi kan Soberanong Kagurangnan na Jehova: ‘Huling nagpalakpak ka+ asin ipinadag-padag mo an saimong bitis saka nag-ugma ka* dahil sa nangyari sa daga nin Israel asin grabe an saimong pagtuya-tuya,+
7 uunaton ko an sakuyang kamot laban sa saimo para itao ka sa mga nasyon para samsaman. Paparaon taka sa mga banwaan asin lalaglagon sa mga kadagaan.+ Pupuhuon taka, asin mamimidbid mo nanggad na ako si Jehova.’
8 “Ini an sinabi kan Soberanong Kagurangnan na Jehova: ‘Huling an Moab+ saka an Seir+ nagsabi, “Hilinga! An nasyon nin Juda kapareho kan gabos na iba pang nasyon,”
9 ilalantad ko an mga siyudad kan Moab na nasa may linderos kaiyan, idtong mga nasa bakilid* kaiyan, an kagayunan* kan saiyang daga—an Bet-jesimot, Baal-meon, asin sagkod sa Kiriataim.+
10 Itatao ko iyan, kaiba an mga Ammonita, sa mga taga Sirangan bilang saindang pagsadiri,+ tanganing an mga Ammonita dai na magirumduman sa mga nasyon.+
11 Asin huhukuman ko an Moab,+ asin mamimidbid nanggad ninda na ako si Jehova.’
12 “Ini an sinabi kan Soberanong Kagurangnan na Jehova: ‘Nagbalos an Edom sa nasyon nin Juda asin nagkasala nin grabe sa ginibo nindang pagbalos sa sainda;+
13 kaya ini an sinabi kan Soberanong Kagurangnan na Jehova: “Uunaton ko man an sakuyang kamot laban sa Edom asin pupuhuon ko diyan an mga tawo saka an mga hayop, asin gigibuhon ko iyan na tiwangwang.+ Puon sa Teman sagkod sa Dedan, mabagsak sinda paagi sa espada.+
14 ‘Babaluson ko an Edom paagi sa kamot kan sakuyang banwaan na Israel.+ Ipapasapar ninda sa Edom an sakuyang kaanggutan asin kabangisan, tanganing manamitan ninda an pagbalos ko,’+ an sabi kan Soberanong Kagurangnan na Jehova.”’
15 “Ini an sinabi kan Soberanong Kagurangnan na Jehova: ‘Huli sa saindang dai nawawarang pagkaungis sa Israel, an mga Filisteo naghanap nin paagi para makabalos asin makapanglaglag.+
16 Kaya ini an sinabi kan Soberanong Kagurangnan na Jehova: “Uya, uunaton ko an sakuyang kamot laban sa mga Filisteo,+ asin pupuhuon ko an mga Keretita+ asin lalaglagon an mga nagkatarada na nakaistar sa may baybayon.+
17 Ipapasapar ko sa sainda an grabeng pagbalos na may matinding mga padusa, asin mamimidbid nanggad ninda na ako si Jehova pag binalos ko na sinda.”’”
