Ikaduwang Samuel 22:1-51
22 Kinanta ni David ki Jehova an kantang ini+ kan aldaw na ilinigtas siya ni Jehova sa kamot kan gabos niyang kalaban+ asin sa kamot ni Saul.+
2 Nagkanta siya:
“Si Jehova an sakong dakulang gapo saka an sakong masarig na depensa*+ asin an Saro na nagliligtas sa sakuya.+
3 An sakuyang Diyos iyo an sakong gapo,+ na sakong pinapailihan,An sakong kalasag+ asin an sakong sungay* nin kaligtasan,* an sakong ligtas na pailihan*+Asin an sakong lugar na madudulagan,+ siya an sakong paraligtas;+ ika an nagliligtas sako sa kadahasan.
4 Minaapod ako ki Jehova, na maninigong umawon,Asin maliligtas ako sa mga kalaban ko.
5 Napalibutan ako nin mga alon kan kagadanan;+Natakot akong marhay sa nagraragasang mga baha nin mga tawong daing kamanungdanan.+
6 Napuruputan ako kan mga lubid kan Lubungan;*+Nasabatan ko an mga siod nin kagadanan.+
7 Kan ako napupurisaw nag-apod ako ki Jehova,+Sa sakuyang Diyos padagos akong nag-apod.
Dangan hali sa saiyang templo nadangog niya an boses ko,Asin kan maghagad ako nin tabang nadangog niya ako.+
8 Nagyugo-yugo an daga asin natanyog;+Nagkunog-kunog an mga pundasyon kan kalangitan+Asin nagyugo-yugo iyan huli sa saiyang kaanggutan.+
9 Nag-itaas an aso hali sa saiyang dungo,Asin sarong kalayong minatumtom an nagluwas sa saiyang nguso;+Nag-arab-adab an mga baga hali sa saiya.
10 Pinakurba niya an kalangitan kan magbaba siya,+Asin an mahibog na kadikluman yaon sa irarom kan mga bitis niya.+
11 Nag-abot siyang naglalayog sakay nin sarong kerubin.+
Nahiling siyang nakasakay sa mga pakpak nin sarong espiritu.*+
12 Dangan ginibo niyang sirungan an kadikluman sa palibot niya,+An maitom asin mahibog na mga panganuron na may kikilat saka daguldol.
13 Huli sa kaliwanagan na nasa atubangan niya nag-arab-adab an nagkakalayong mga baga.
14 Dangan nagpadaguldol si Jehova hali sa langit;+Ipinadangog kan Kahuruhalangkawi an boses niya.+
15 Nagpalayog siya nin mga pana+ sa saiyang mga kaiwal asin nagdurulagan sinda;Nagpakikilat siya, asin nagkariribaraw sinda.+
16 Nahiling an pinakasalóg kan dagat;+Nabantad an mga pundasyon kan daga huli sa pagsaway ni Jehova,Huli sa makusugon na hinangos hali sa dungo niya.+
17 Iginawgaw niya an saiyang kamot hali sa kaitaasan;Kinaputan niya ako asin hinawas hali sa hararom na katubigan.+
18 Ilinigtas niya ako sa makusog na kalaban ko,+Sa mga nauungis sa sakuya, na mga mas makusog kisa sako.
19 Sinalakay ninda ako kan aldaw na ako nasa kapahamakan,+Alagad si Jehova an nagin sakuyang tabang.
20 Dinara niya ako sa lugar na harayo sa peligro;*+Ilinigtas niya ako huling nawiwilihan niya ako.+
21 Tinatawan ako ni Jehova nin balos sigun sa sakong katanusan;+Tinatawan niya ako nin balos sigun sa pagigin daing sála* kan sakong mga kamot.+
22 Huling sinunod ko an mga dalan ni Jehova,Asin dai ko ginibo an sarong bagay na maraot—an pagbaya sa sakuyang Diyos.
23 An gabos niyang ipinapautob na desisyon+ nasa atubangan ko;Dai ako masuway sa saiyang mga reglamento.+
24 Magdadanay akong daing katuyawan+ sa atubangan niya,Asin lilikayan ko an paggibo nin sala.+
25 Tawan lugod ako ni Jehova nin balos sigun sa sakong katanusan,+Sigun sa sakuyang pagigin daing sála sa saiyang atubangan.+
26 Sa tawong maimbod mapahiling ka nin kaimbudan;+Sa makusog na tawong daing katuyawan mahiro ka nin daing katuyawan;+
27 Sa tawong dalisay* ipinapahiling mong dalisay* ka,+Alagad sa tawong tuso ipinapahiling mong madunong ka.*+
28 Huling iliniligtas mo an mga mapakumbaba,+Alagad an saimong mga mata laban sa mga mapalangkaw, asin ibinababa mo sinda.+
29 Huli ta ika an sakuyang lampara, O Jehova;+Si Jehova an nagtataong liwanag sa madiklom kong palibot.+
30 Sa tabang mo, an sarong tropa nin mga parasamsam kaya kong salakayon;Paagi sa kapangyarihan nin Diyos, an sarong pader kaya kong sakaton.+
31 An dalan kan tunay na Diyos perpekto;+An tataramon ni Jehova dalisay.+
Kalasag siya sa gabos na nagpapaili sa saiya.+
32 May iba pa daw na Diyos apuwera ki Jehova?+
Asin may iba pa daw na gapo apuwera sa satuyang Diyos?+
33 An tunay na Diyos an sakuyang masarig na depensa,*+Asin gigibuhon niyang perpekto an dalan ko.+
34 An sakong mga bitis ginigibo niyang arog kan sa sarong usa;Pinapatindog niya ako sa haralangkaw na lugar.+
35 Sinasanay niya sa pakikilaban an mga kamot ko;Kayang kurbahon kan sakong mga takyag an* sarong busog na tanso.
36 Itinao mo sako an saimong kalasag nin kaligtasan,Asin nagigin bantog ako huli kan saimong kapakumbabaan.+
37 Pinahalakbang mo an agihan para sa mga lakad ko;Dai madadarinas an mga bitis* ko.+
38 Lalapagon ko an sakong mga kalaban asin pupuhuon sinda;Dai ako mabalik sagkod na dai sinda napapara.
39 Asin lalaglagon ko sinda asin rurunuton tanganing dai na sinda makabangon;+Magkakaturumba sinda sa irarom kan sakong mga bitis.
40 Tatawan mo ako nin kusog para sa pakikipaglaban;+Papabagsakon mo sa sakuyang atubangan an sakong mga kalaban.+
41 An sakong mga kalaban papaatrason mo parayo sa sako;*+An mga nauungis sa sako tatarapuson* ko.+
42 Naghahagad sinda nin tabang, alagad mayo sa sainda nin magliligtas;Nag-aapod pa ngani sinda ki Jehova, alagad dai niya sinda pigsisimbag.+
43 Dudukdukon ko sinda nin pino siring sa alpog kan daga;Pupulbuson ko sinda asin titimak-timakan siring sa laboy na nasa mga dalan.
44 Ililigtas mo ako sa panunuyaw kan sakong banwaan.+
Iingatan mo ako tanganing magin pamayo kan mga nasyon;+Maglilingkod sa sako an dai ko midbid na banwaan.+
45 An mga taga ibang nasyon madurulok sa sako na nakarukrok;+Huli sa mga nababaretaan ninda manungod sa sako, susunudon ninda ako.*
46 Mawawaran nin kusog nin buot* an mga taga ibang nasyon;Maruluwas sindang nagtatarakig hali sa saindang mga kuta.*
47 Buhay si Jehova! Pag-umawon an sakuyang Gapo!+
Pamurawayon lugod an sakuyang Diyos, an gapo nin sakong kaligtasan.+
48 Ibinabalos ako kan tunay na Diyos;+Ipinapasakop niya sa sako an mga banwaan;+
49 Iliniligtas niya ako sa sakong mga kalaban.
Iniitaas mo ako+ sa ibabaw kan mga minasalakay sa sako;Iliniligtas mo ako sa madahas na tawo.+
50 Kaya papasalamatan taka sa tahaw kan mga nasyon, O Jehova,+Asin makanta ako nin mga pag-umaw* sa saimong pangaran:+
51 Dakulang mga pagliligtas* an ginigibo niya para sa saiyang hadi;+Ipinapahiling niya an saiyang maimbod na pagkamuot sa saiyang linahidan,Ki David asin sa saiyang gikan* sagkod lamang.”+
Mga Nota
^ O “sakong kuta.”
^ O “asin an sakong makapangyarihan na paraligtas.”
^ O “ligtas na kalangkawan.”
^ O “kan duros.”
^ O “lugar na mahiwas.”
^ Sa literal, “pagigin malinig.”
^ O “sinsero.”
^ O “sinsero.”
^ O posibleng “minahiro kang siring sa bua.”
^ O “sakuyang kuta.”
^ O “Kayang ikabit kan sakong mga takyag an lubid sa.”
^ O “mga buko-buko.”
^ O “Itatao mo sako an mga likod kan sakong mga kalaban.”
^ Sa literal, “papasilensiyuhon.”
^ Sa literal, “Sa pagkadangog kan talinga, susunudon ninda ako.”
^ O “Mangruruluya.”
^ O “pinagtataguan; matibay na depensa.”
^ O “magibo ako nin musika para.”
^ O “kapangganahan.”
^ Sa literal, “banhi.”
