Apocalipsis 4:1-11
4 Ukatjja alajjpachan llawirat mä punkwa nayajj uñjta, nayrïr aru istʼarakta, uka arojj trompetan tuktʼasitapjamänwa, akham sarakitänwa: “Akar makatanim, kunanakatï paskani ukanakwa uñachtʼayäma” sasa.
2 Ukatjja ukspachaw Diosan espiritupajj nayjjar jutäna, ukatsti alajjpachan mä trono uñjta, uka trononjja mayniw qontʼatäskarakïna.+
3 Khititejj tronon qontʼatäskäna ukajja, jaspe*+ ukhamarak sardio* qalanakar uñtataw kʼajtäna, uka trono muytpachanjja mä kurmiw utjäna, uka kurmejj esmeraldar* uñtasitänwa.+
4 Trono muytpachanjja 24 trononakaw utjäna, uka trononakanjja 24 ancianonakaruw*+ qontʼat uñjarakta, jupanakajj janqʼo isinakamp isthapitäpjjänwa, pʼeqenakaparusa qori coronanakampi asjjatatäpjjarakïnwa.
5 Uka tronotsti lliju llijunakampi,+ arunakampi, qʼejjo qʼejjonakampiw+ mistunïna, paqallqo lamparanakarakiw trono nayraqatan nakhaskarakïna, uka lamparanakajj Diosan paqallqo espiritunakapawa.+
6 Trono nayraqatanjja, vidrio lamar qotjamaw+ utjäna, ukajj cristalar uñtasitänwa.
Kawkjankkäntejj tronojj uka taypinsa, trono muytpachansa, pusi querubín angelanakaw+ utjäna, uka angelanakajja nayräjjatsa qhepäjjatsa nayranakamp phoqantatäpjjänwa.
7 Nayrïr querubín angelajja mä leonar uñtasitänwa,+ payïr querubín angelajja mä toror* uñtasitänwa,+ kimsïr querubín angelajja jaqe ajanunïnwa,+ pusïr querubín angelajja+ jalaskir pakar uñtasitarakïnwa.+
8 Uka pusi querubín angelanakajj sapa mayniw sojjta chheqanakanïna, uka chheqanakapajj patjjatsa manqhatsa nayranakampi phoqantatänwa.+ Uruy arumaw jupanakajj akham sapjjäna: “Khititejj jakaski, nayras jakaskarakïna, jichhas jutaskaraki uka Taqe Chʼamani Jehová* Diosajja,+ santo, santo, santo Diosawa”+ sasa.
9 Kunapachatï uka querubín angelanakajj tronon qontʼatäki, wiñayans wiñayatak jakirïkaraki uka Diosarojj jachʼañchapki, honra churapki, yuspärapki ukhajja,+
10 tronon qontʼatäki uka Dios nayraqatanwa 24 ancianonakajj+ qonqortʼasipjje, wiñayans wiñayatak jakirïki uka Diosaruw adorapjje.* Coronanakap trono nayraqatar uchasasti akham sapjjewa:
11 “Nanakan Jehová* Diosaja, jumaw jachʼañchäwi,+ honra+ katoqañatakisa, chʼamanïñatakisa*+ derechonïtajja. Jumaw taqe kunsa lurtajja,+ juman munañamatwa taqe kunas utji, munañamat luratarakiwa” sasa.
Notanaka
^ Ukajja, vidrior uñtat suma qalawa. “Suma qalanaka” siski uk glosarion liytʼäta.
^ Ukajja, wila color suma qalawa.
^ Ukajja, llijkir chʼojjña suma qalawa.
^ Jan ukajja, “jilïr irpirinakaruw”.
^ Griego arunjja, “torillor”.
^ Apéndice A5 liytʼäta.
^ Jan ukajja, “yupaychapjje”.
^ Apéndice A5 liytʼäta.
^ Griego arunjja, “chʼama katoqañatakisa”.
