ENUKPLAKPLA 17

Mi ŋmɛ Yesu nyiɔ?

Xui

Mi ŋmɛ Yesu nyiɔ?

Nɔ mìkpla nu so enyɔ ciwo Yesu nu koɖo ŋciwo yí ewa le nyigban ji nuɔ, mìvajenɔshi yi dɛn nywiwo yí wodɔ mìjinɔ mɔ mìanyi xlɔ koɖi yí agbenyi xlɔ koɖo Dalɔ Yehowa. Yi dɛn nywi lɔwo ɖewo ɖe? Yí lé mìawɛ aɖyi Yesu le mìwo gbenɔnɔ mɛɔ?

1.Lé Yesu le shigbe Dalɔ nɛ doɔ?

Hwenu Yesu le jeŋkwimɛɔ, éle ŋkuvi do Dalɔ amɛlɔntɔ lɔ nu yí kpla nu sugbɔ so nu na nɔ exwe miliya nɛniɖewo. Ecɛ wɛ mɔ, yɛ can vakpɔnɔ nuwo yí gbewanɔ nuwo shigbe Dalɔ nɛ. Yí lé nuwo wanɔ do lanmɛ nɔ Dalɔɔ, ahanke ewanɔ nɔ yɛ can nɛ. (Hlɛn Ʒan 5:19.) Nɔ mìanuiɔ, Yesu ɖyi Dalɔ keke yiŋtɔ vanu mɔ: “Amɛ ci yí kpɔ Ŋ ɔ, é kpɔ Eda.” (Ʒan 14:9) Nɔ èkplakɔ nu yí jejeɛshi mɛ ci Yesu nyiɔ, àvajeshi Yehowa ɖɛ nywiɖe sɔwu. Le kpɔwɛ mɛ, lé Yesu lenɔ bu nɔ amɛwo do dadasɛ lé Yehowa lenɔ bu nɔ eo sugbɔ do.

2.Lé Yesu dasɛ do mɔ yelɔn Yehowaɔ?

Yesu nu mɔ: “Xexe lɔ ɖo a nya mɔ Ŋ lɔn Eda, yi wanɔ shigbe le É dɔ Ŋ do ɛnɛ.” (Ʒan 14:31) Hwenu Yesu le nyigban jiɔ, ése tonu nɔ Dalɔ yí sɔ dasɛ mɔ yelɔn ye Daye sugbɔ nɔ yi wawa gbɔnnu ni hweɖewonu can. Nuxuxoxo so Dalɔ nu gbejɔnɔ ji ni yí ejinɔ mɔ yeakpedo mɛbuwo nu nɔ wowo can avanyi xlɔ koɖi.—Ʒan 14:23.

3.Lé Yesu dasɛ do mɔ yelɔn amɛwoɔ?

Bibla nu mɔ Yesu lɔn agbetɔviwo koŋ. Édo ŋsɛn amɛwo yí sɔ amɛɖekitɔmajimaji kpedo wo nu yí sɔ dasɛ mɔ yelɔn wo. Denyi ŋsɛn ci eɖo ɖekɛ yí enujiŋ ciwo ewa dasɛ o, vɔ éwa wo ɖo amɛ nu wanɔ ŋshishi ni. (Maki 1:40-42) Éwanɔ xomɛvu nɔ mɛshiamɛ yí detranɔ amɛ mɛ o. Yesu nyɔwo fa akɔn nɔ mɛ ciwo yí se wo yí gbena mɔkpɔkpɔ wo. Lɔnlɔn ci Yesu ɖo nɔ agbetɔwo dɔ elɔn faa yí kpe fun keŋ yí ku do ta nɔ wo. Vɔ mɛ ciwo yí wanɔ do yi nukplamuwo ji yí elɔnnɔ koŋ.—Hlɛn Ʒan 15:13, 14.

JI DWI NI KPƆ DOJI

Kpla nubuwo doji so mɛ ci Yesu nyi nu yí agbekpɔ lé eɔ can àwɛ alɔnnɔ amɛwo yí awanɔ xomɛvu nɔ wo shigbe yɛ hannɛ.

4.Yesu lɔn Dalɔ

Lé Yesu wa nu do kpla mì lé mìadasɛ nɔ Mawu do mɔ mìluin. Hlɛn Luiki 6:12 koɖo Ʒan 15:10; 17:26. Nɔ èhlɛn kpukpui ɖe ɖegbɔɔ, gbeje biɔse cɛ mɛ:

Lé mìaɖyi Yesu do yí asɔ dasɛ mɔ mìlɔn Yehowaɔ?

Yesu lɔn Dalɔ ci yí le jeŋkwimɛ yí xonɔ nuxu ni le gbedodoɖa mɛ blaŋblaŋ

5.Yesu lenɔ bu nɔ mɛ ciwo yí le ʒan mɛ

Mɛbuwo ʒanwo bianɔ ŋkuvi nɔ Yesu sɔwu yiŋtɔ tɔwo. Ci enu cikɔ ni can ɔ, ézan yi gamɛ koɖo yi ŋsɛn yí sɔ kpedo mɛbuwo nu. Hlɛn Maki 6:30-44, keŋ agbeje biɔse cɛwo mɛ:

Le kpukpui cɛwo mɛ ɖe, lé Yesu dasɛ mɔ yebunɔ mɛbuwo tɔ kpɔ doɔ?—Kpɔ kpukpui 31, 34, 41, koɖo 42.
Nyi yí taɖo Yesu kpenɔdo amɛwo nuɔ?—Kpɔ kpukpui 34.
Ci enyi Yehowa nɔnɔmɛwo yí Yesu dasɛ ɖe, nyi nɔnɔmɛ ŋtɔ́wo pleŋ kpla eo so Yehowa ŋtɔ nuɔ?
Ŋciwo mɛ mìatɛnŋ asran Yesu le yí abunɔ mɛbuwo tɔ kpɔ ɖewo ɖe?

6. Yesu nyi xomɛvunɔ

Ci enu keke ɖe dele Yesu shi can ɔ, éwanɔ xomɛvu yí nu nɔ mì mɔ mìwo le wanɔ xomɛvu hɛnnɛ. Hlɛn Edɔwawawo 20:35, keŋ agbeje biɔse cɛ mɛ:

Nyi Yesu mɔ mìwo le wa yí ji ajɔnɔ mìɔ?

Xo VIDEO lɔ, yi goduɔ, gbeje biɔse ci yí gbɔgbɔ mɛ.

VIDEO: “Jijɔkpɔkpɔ le enunanamɛ sɔwu”—Akpaxwe kleŋ (4:00)

Nɔ mìdewa nu sugbɔ ɖɛ can ɖe, ŋciwo mìatɛnŋ awa asɔ nanɔ nu amɛ ɖewo ɖe?

Ènyaa?

Bibla kpla mì mɔ mìwo le donɔ gbe ɖaɖa nɔ Yehowa le Yesu ŋkɔ mɛ. (Hlɛn Ʒan 16:23, 24.) Nɔ mìdonɔ gbe ɖaɖa le Yesu ŋkɔ mɛɔ, mìdadasɛ mɔ enu ci ewa keŋ nɔ mìatɛnŋ avanyi xlɔ koɖo Yehowa jeŋ nɔ mì.

MƐÐEWO NUNƆ MƆ: “Ci mìkpekpeɛ fun ɔ, Mawu desɔkɔ ɖe le ji nɔ mì o.”