1, 2. Pingo itamo ni lega obedo mot ma pire tek, dok pingo myero wange gin ma Baibul pwonyo i kom lega?

BOT Jehovah, “en muketo polo ki lobo” dano ma i rok ducu rom ki pii ma oton kicel ki i agulu. (Jabuli 115:15; Icaya 40:15) Kadi bed wan dano watidi mada ka kiporowa ki polo ki lobo, Jabuli 145:18, 19 wacci: “[Jehovah] tye cok bot jo ducu ma kok bote, ma gikok bote ki ada. En miyo jami ducu ma mitte bot jo ma lwore, dok winyo kokogi, ci larogi bene.” Pud dong watye ki twon mot madit ya! Jehovah, Lacwec ma tye ki twero ducu, mito ni wabed cok kwede, dok en mito winyo legawa. Ada, lega obedo mot ma pire tek ma Jehovah omiyo bot wan ducu.

² Ento Jehovah tero ite me winyowa keken ka watye ka lok bote i yo ma en mito. Watwero timo man nining? Kong dong wanenu gin ma Baibul loko i kom lega.

3. Pingo myero ileg bot Jehovah?

³ Jehovah mito ni ileg, nyo ilok bote. Wangeyo man nining? Tim ber ikwan Jo Pilipi 4:6, 7. Tam kong pi lwongo man. Laloc me polo ki lobo tye ki miti madit i komi dok mito ni itit bote pekoni ki kit ma iwinyo kwede.

4. I yo ma nining ma lega bot Jehovah kare ki kare jingo watti kwede?

 ⁴ Lega konyowa me bedo ki wat macok ki Jehovah. Ka lurem ginywako tam, par, ki kit ma giwinyo kwede kare ki kare, liremgi bedo matek. Man bene rom aroma ki legawa bot Jehovah. I Baibul, en onywako tamme kwedi, dok en otito boti gin ma ebitimo i kare me anyim. In bene iromo nywako ki Lubanga kadi wa tammi matut loyo ka iloko bote kare ducu. Ka itimo man, liremwu ki Jehovah bidongo bedo matek.—Yakobo 4:8.

5. Wangeyo nining ni Jehovah pe winyo lega ducu?

⁵ Jehovah mono winyo lega ducu? Pe tye kit meno. I kare pa lanebi Icaya, Jehovah owaco bot jo Icrael ni: “Kadi bed wulega tyen mapol ata, pe abiwinyo legawu wacel; pien cingwu obedo remo keken.” (Icaya  1:15) Dong ka pe wagwokke, watwero timo jami ma Jehovah dag, ci en pe bijolo legawa.

6. Pingo niye pire tek mada? Inyuto nining ni itye ki niye?

⁶ Ka wamito ni Jehovah owiny legawa, omyero wabed ki niye i kome. (Marako 11:24) Lakwena Paulo otito ni: “Labongo niye pe twerre me yomo cwinye, pien ngat ma mito nyiko cok bot Lubanga myero oye ni en tye ada, dok bene ni en miyo bakacic bot jo ma yenye.” (Jo Ibru 11:6) Ento, waco awaca keken ni watye ki niye pe romo. Myero wanyut niyewa ki winyo Jehovah nino ducu.—Kwan Yakobo 2:26.

7. (a) Pingo myero wabed mwol dok wanyut woro ka watye ka lega bot Jehovah? (b) Watwero nyutone nining ni watye ki cwiny matir ka watye ka lega?

⁷ Omyero wabed jo mamwol dok ma wor ka watye ka lega bot Jehovah. Pingo? Ka wabiloko bot ladit lobo nyo kabaka, waloko ki woro madit. Dong, kit ma Jehovah aye Lubanga Won Twer Ducu-ni, pore piwa me nyuto twon woro ki mwolo madit ka watye ka lok kwede, pe kumeno? (Acakki 17:1; Jabuli 138:6) Omyero bene waleg bot Jehovah ki cwiny matir kun waloko lok ma a ki i cwinywa, ento pe wanwoyo lok acel moni-ni ma wamako i wiwa.—Matayo 6:7, 8.

8. Medo i kom lega pi gin moni, ngo mukene ma omyero watim?

⁸ Me agikkine, ka walego pi gin moni, myero watute me tic pi gin ma walego pire. Me labolle, ka walego Jehovah pi jami ma mitte me nino ducu, myero pe wabed luwac kom kun watamo ni Jehovah biminiwa amiya ma pe watimo tic mo. Omyero wati matek dok waye tic mo keken ma watwero timone. (Matayo 6:11; 2 Jo Tecalonika 3:10) Nyo ka walego bot Jehovah pi  kony me juko timo gin marac moni, myero wagwokke ki gin mo keken ma twero ketowa i atematema. (Jo Kolocai 3:5) Kong dong wanenu lapeny mogo ma dano maro penyo i kom lega.

9. Myero waleg bot anga? Gin ango ma Jon 14:6 pwonyowa i kom lega?

⁹ Omyero waleg bot anga? Yecu opwonyo lulub kore me lega bot “Wonwa ma tye i polo.” (Matayo 6:9) En bene owaco ni: “An a yo, ki ada, ki kwo: pe tye ngat mo ma bino bot Won, kono ki i an keken.” (Jon 14:6) Pi man, omyero waleg bot Jehovah keken kun wawok i nying Yecu. Lega bot Lubanga kun wawok ki bot Yecu tyen lokke ngo? Wek Jehovah owiny legawa, myero wanyut woro pi rwom ma en omiyo bot Yecu. Kit ma wapwonyo kwede, Yecu obino i lobo ka laro dano ki i bal ki to. (Jon 3:16; Jo Roma 5:12) Jehovah bene ocimo Yecu me bedo Lalamdog Madit ki Langolkop.—Jon 5:22; Jo Ibru 6:20.

10. Tika omyero wabed i yo mo ma dok pat ka watye ka lega? Tit kong.

¹⁰ Tye yo mo ma mitte ni myero wabed kwede calo gungogi-ni ka watye ka lega? Pe, Jehovah pe ociko ni myero wagung piny nyo wabed piny nyo wacung acunga ka watye ka lega. Baibul pwonyo ni myero walok bot Jehovah i yo mo keken ma nyuto woro ci otum. (1 Luker 8:22 1 Tekwaro 17:16; Nekemia 8:6; Daniel 6:10) Gin ma pire tek bot Jehovah aye ni myero waleg bote ki cwiny matir, pe kit ma wabedo kwede ka watye ka lega. Watwero lega ki dwan malongo nyo laling ling ki ka mo keken ma watye iye dok i cawa mo  keken dyeceng nyo dyewor. Ka walego bot Jehovah, watwero bedo ki gen ni en biwinyowa kadi bed jo mukene pe giwinyo.—Nekemia 2:1-6.

11. Jami macalo mene ma waromo titone bot Jehovah i lega?

¹¹ Watwero lega pi jami ango? Waromo lega pi gin mo keken ma rwatte ki miti pa Jehovah. Baibul waco ni: “Ka walegge gin mo kun walubo gin ma en mito, ci en winyo legawa.” (1 Jon 5:14) Tika watwero lego pi jami ma kwako kwowa? Eyo. Lega bot Jehovah myero bed calo lok bot laremi macok. Waromo tito bot Jehovah gin mo keken ma tye i tamwa nyo i cwinywa. (Jabuli 62:8) Watwero lega bote ni ominiwa cwiny mere maleng wek okonywa me timo gin matir. (Luka 11:13) Watwero bene penyo Jehovah pi ryeko me moko tam maber, dok watwero lega pi teko me lweny ki peko. (Yakobo 1:5) Myero wakwa Jehovah ni owek balwa. (Jo Epeco 1:3, 7) Myero bene waleg pi jo mukene, kadiwa jo me odiwa ki omegiwa ki lumegiwa me kacokke.—Tic pa Lukwena 12:5; Jo Kolocai 4:12.

12. Ngo ma myero obed gin ma pire tek loyo i legawa?

¹² Ngo ma myero obed gin ma pire tek loyo i legawa? Jehovah ki mitine. Myero bene wapwoye ki cwinywa ducu pi jami mabeco ma en timo piwa. (1 Tekwaro 29:10-13) Wangeyo man pien i kare ma Yecu onongo tye i lobo, en opwonyo lupwonyene kit me lega. (Kwan Matayo 6:9-13.) En owacci myero kong guleg pi nying Lubanga wek obed me awora, nyo wek kiter calo gin maleng. I nge meno, Yecu owacci myero waleg pi Ker pa Lubanga wek obin ki bene pi miti pa Jehovah wek ocobbe i lobo ducu. I nge lega pi jami magi ma pigi tego-ni aye Yecu dong owaco ni waromo  lega pi jami ma wamitogi pi kwowa. Ka waketo Jehovah ki mitine bedo mukwongo i legawa, nongo dong wanyuto gin ma pire tek loyo i kwowa.

13. Legawa myero obed bor lakwene?

¹³ Legawa myero obed bor lakwene? Baibul pe wacciwa. Legawa twero bedo macek nyo mabor, ma lubbe ki gin ma tye i cwinywa. Me labolle, waromo lego lega macek ma nongo peya wacako cam nyo lega  mabor ka watye ka tito pekowa bot Jehovah nyo miyo pwoc bote. (1 Camuel 1:12, 15) Pe wamito lego lega mabor mere pi nyutte i nyim dano kit ma jo mukene gutimo kwede i kare pa Yecu. (Luka 20:46, 47) Lega macalo meno pe yomo cwiny Jehovah. Gin ma pire tek bote aye ka walego ki cwinywa ducu. (Luka 20:46, 47).

14. Omyero waleg tyen adi, dok man pwonyowa gin ango i kom Jehovah?

¹⁴ Omyero waleg tyen adi? Jehovah kwayowa me lok kwede kare ki kare. Baibul waco ni omyero ‘wamine kenwa i lego Lubanga,’ ‘waleg Lubanga ma pe wakeng,’ ki dong ‘waleg Lubanga dyeceng ki dyewor.’ (Jo Roma 12:12; 1 Jo Tecalonika 5:17; 1 Temceo 5:5) Jehovah  tye atera me winyowa kare ducu. Myero wapwoye nino ducu pi bedo Lubanga ma lamar ki dok ngat ma cinge yot. Watwero bene kwaye pi tira, teko, ki dong kwe cwiny. Ka ada watero mot me lega calo gin ma pire tek, ci wabitiyo ki kare mo keken me lok kwede.

15. Pingo omyero wagam ni “amen” i agikki me lega?

¹⁵ Pingo myero wagam ni “amen” i agikki me lega? Nyig lok ni “amen” gonye ni “ada,” nyo ni “wek ocobbe kit ma iwaco-ni.” Man obedo yo me moko gin ma wawaco i legawa, nyo me nyutone ni watye ki cwiny matir. (Jabuli 41:13) Baibul pwonyowa ni ber me gamo ni “amen,” laling ling nyo ki dwan malongo i agikki me lega ma kiwaco i dye lwak, me nyuto ni waye gin ma kiwaco.—1 Tekwaro 16:36; 1 Jo Korint 14:16.

16. Jehovah tika ada gamo legawa? Tit kong.

¹⁶ Jehovah tika ada gamo legawa? Ada, en gamo. Baibul wacci en ‘winyo’ legawa. (Jabuli 66:19) Jehovah winyo dok gamo lega ma dano milion mapol ata gilego ki cwiny matir, dok en timo man i yo mapat pat.

17. I yo ma nining ma Jehovah tiyo ki lumalaika kacel ki luticce ma gitye i lobo me gamo legawa?

¹⁷ Jehovah tiyo ki lumalaika kacel ki luticce ma gitye i lobo me gamo legawa. (Jo Ibru 1:13, 14) Me labolle, jo mapol gulego pi kony me niang Baibul ci ingeye cutcut Lacaden pa Jehovah mo olimogi. Baibul nyuto ni lumalaika ginywako i tito pi “kwena maber” i twok lobo lung. (Kwan Niyabo 14:6.) I kare mukene wan bene walego bot Jehovah pi peko ma watye ka wot ki  iye ci Jehovah ogamo legawa kun tiyo ki omego nyo lamego mo.—Carolok 12:25; Yakobo 2:16.

18. I yo ango ma Jehovah tiyo ki cwiny mere maleng kacel ki Baibul me gamo legawa?

¹⁸ Jehovah tiyo ki cwiny mere maleng me gamo legawa. Ka walego pi kony me ciro peko moni, en romo tic ki cwiny mere maleng me tirowa ki miniwa teko. (2 Jo Korint 4:7) Jehovah bene tiyo ki Baibul me gamo legawa ki me konyowa me moko tam me ryeko. Ka wakwano Baibul, watwero nongo ginacoya ma romo bedo me kony botwa. Jehovah bene twero cuko cwiny ngat mo ma tye ka miyo lagamme i cokke me loko gin ma gudo cwinywa nyo laelda mo me nywako pwony me Baibul kacel kwedwa.—Jo Galatia 6:1.

19. Pingo waromo tamo ni Jehovah peya ogamo legawa?

¹⁹ Ento i kare mukene wabedo ka penye kekenwa ni, ‘Pingo Jehovah peya ogamo legana?’ Wi opo ni, en ngeyo awene ki kit ma myero egam kwede legawa. En ngeyo gin ma mitte piwa. Oromo bedo ni omyero wamedde ki lega pi kare mo me nyuto ka ada wamito gin ma walego pire dok watye ki niye i kome. (Luka 11:5-10) I kare mukene Jehovah gamo legawa i yo ma nongo pe nen ka maleng botwa. Me labolle, waromo lega pi peko mo ma watye kwede, ento me kaka kwanyo peko meno woko, en twero miniwa kero me cirone.—Kwan Icaya 40:29.

20. Pingo omyero waleg bot Jehovah kare ducu?

²⁰ Pud dong watye ki twon mot madit me lega bot Jehovah ya! Watwero bedo ki gen ni Jehovah biwinyo legawa. (Jabuli 145:18) Ka walego bot Jehovah kare ki kare, ci wat i kin wan ki en bidongo doko matek.