Cit atir i jami ma tye

Cit atir ka ma nyuto lok ma tye iye

 DUL ME ACEL

Lubanga En Anga?

Lubanga En Anga?

1, 2. Lapeny ango ma dano pol kare gipenyo?

LUTINO gipenyo lapeny mapol. Iromo tito gin mo botgi ento pol kare pud gimedde ki penyo ni, ‘Pingo?’ Dok kadi item miyogi lagam, pud giromo penyi ni, ‘Ento pingo?’

2 Kadi bed wan lutino nyo ludito, wan ducu watye ki lapeny. Waromo bedo ki lapeny i kom ngo ma wabicamo, ruko nyo wilone. Nyo watwero bedo ki lapeny ma pigi tego i kom kwo ki dong anyimwa. Ento ka pe wanongo lagam ma ocwiny pi lapeny magi, ci waromo giko yenyo lagamgi woko.

3. Pingo jo mapol gitamo ni pe gitwero nongo lagam me lapenygi ma pigi tego?

3 Baibul tika tye ki lagam me lapeny ma pigi tego ma wapenyo? Jo mogo gitamo kit meno, ento ginongo ni niang lok ma i Baibul tek tutwal. Giromo tamo ni lupwonye dini nyo padi keken aye gitye ki lagam me lapeny magi. Dok jo mukene lewic makogi me ye ni pe gingeyo lagamme. In kono itamo ningo?

4, 5. Lapeny ma pigi tego ango ma itye kwede? Pingo omyero imedde ki yenyo lagamgi?

4 Gwok nyo imito nongo lagam me lapeny macalo: Kwona tika tye ki tyen lok? Ngo ma bitimme i koma ka ato? Lubanga mono tye nining? Yecu, Lapwony muywek adada owacci: “Wulegi, ci gibimiyo botwu; wuyeny, ci wubinongo; wudwong doggola ci gibiyabo botwu.” (Matayo 7:7) Pe iil cingi woko wang ma inongo lagam ma igeno.

 5 Ada, ka imedde ki ‘yenyo’ ci ibinongo lagam ki i Baibul. (Carolok 2:1-5) Pe tek tutwal me niang lagam magi. Lagam ma ibinongone bimedo yomcwiny i kwoni kombeddi dok bimiyo boti gen mamwonya pi kwo me anyim. Kong dong wanyamu lapeny acel ma onyweno wi dano mapol.

LUBANGA TIKA PARO PIWA, CE NYO CWINYE COL?

6. Pingo jo mukene gitamo ni Lubanga pe paro pi pekki ma gitye ka limone?

6 Jo mapol gitamo ni Lubanga pe paro piwa. Gitamo ni ka Lubanga ada paro piwa, kono onongo lobo-ni pat adada. Waneno lweny, adegadega, ki cwercwiny ka weng. Dano gitwo, gideno can, dok gito. Jo mukene gipenye ni, ‘Ka Lubanga paro piwa, pingo en pe giko pekki ducu?’

7. (a) I yo ma nining ma lutela dini dong gupwonyo dano ni Lubanga cwinye col? (b) Pingo waromo bedo ki gen ni Lubanga aye pe miyo jami maraco timme?

7 Lutela dini i kine mukene giweko dano gitamo ni Lubanga cwinye col. Ka gin mo marac adada otimme, giwacci meno obedo yub pa Lubanga. Giwacci en omito ni gin meno otimme. Ka guwaco kumeno, nongo i ada gitye ka koko i kom Lubanga. Ento Baibul pwonyo ni Lubanga pe kelo jami maraco. Yakobo 1:13 wacciwa ni Lubanga pe temo ngat mo ki jami maraco. Waco ni: “Ka gibito ngat mo, en pe myero owacci, ‘Lubanga aye ma bita’, pien Lubanga pe gibito ki tiyo gin marac, en bene pe bito ngat mo.” Man te lokke ni kadi bed ni Lubanga pe ojuko timme pa jami maraco, en aye pe miyo jami maraco timme. (Kwan Yubu 34:10-12.) Me niang iye maber, kong wanenu labol acel.

8, 9. Pingo pe bedo ber ki wan me kok i kom Lubanga pi pekkiwa? Mi labol.

 8 Go kong ni awobi mo ma dong dit pud bedo gang ki lunyodone. Wonne marre adada dok opwonye kit me moko tam maber. Ento, awobi man ojemo i kom wonne ci oa woko ki gang. En otimo jami maraco ci opoto i peko. Tika ibikok i kom won awobi-ni pi gin mutimme pien en pe ojuko wode i kare ma oa ki gang? Pe wacel! (Luka 15:11-13) Lubanga rom aroma ki wego-ni pien en pe ojuko dano i kare ma gumoko tamgi me jemo ki timo gin marac. Pi meno, ka gin mo marac otimme, omyero wiwa opo ni Lubanga aye pe omiyo otimme. Pe ber me kok i kom Lubanga.

9 Lubanga tye ki tyen lok maber ma omiyo peya ojuko timme pa jami maraco. I Dul me 11, ibipwonyo gin ma Baibul waco i lok man. Ento bed ki gen ni Lubanga marowa dok myero pe wakok i kome pi pekkiwa. Ki lok ada, En keken aye twero cobo pekkiwa.Icaya 33:2.

10. Pingo watwero bedo ki gen ni Lubanga biyubo jami ducu ma dano gubalo?

10 Lubanga leng. (Icaya 6:3) Jami ducu ma en timo pe ki cilo mo keken dok ber. Pi meno watwero genne. Dano adana pe gitye kit meno. I kare mukene gitimo jami maraco. Kadi wa laloc ma genne adada pe ki teko me yubo jami ducu maraco ma dano gitimo. Pe tye dano mo ma tye ki teko calo Lubanga. En twero yubo jami ducu ma dano gubalo, dok bitimone. En bikwanyo tim maraco ducu woko matwal.Kwan Jabuli 37:9-11.

LUBANGA WINYO NINING KA DANO DENO CAN?

11. Lubanga mono winyo nining i kom can ma itye ka denone?

11 Lubanga winyo nining ka oneno jami ma tye ka timme i lobo nyo i kwoni? Baibul pwonyowa ni Lubanga  “maro ngolo kop atir.” (Jabuli 37:28) Pi meno, jami matir ki maraco ma timme i lobo-ni gudo cwinye adada. En dag neno ka dano deno can. Baibul waco ni cwiny Lubanga ‘ocwer matek’ ma oneno ni bal opongo lobo woko i kare mukato angec. (Acakki 6:5, 6) Lubanga peya olokke. (Malaki 3:6) Baibul waco ni Lubanga paro piri mada.Kwan 1 Petero 5:7.

Baibul pwonyo ni Jehovah aye Lacwe polo ki lobo dok en lamar

12, 13. (a) Pingo wamaro dok waparo pi jo mukene, dok wawinyo nining i kom pekki ma tye i lobo-ni? (b) Pingo waromo bedo ki gen ni Lubanga bikwanyo pekki ki tim me ngolo kop alenga ducu?

12 Baibul bene waco ni Lubanga ocweyowa i calle. (Acakki 1:26) Man te lokke ni Lubanga ocweyowa ki kit mabeco ma en tye kwede. Pi meno, ka cwinyi cwer pi neno ni dano ma balgi pe gitye ka deno can, ci myero inge ni Lubanga dong winyo malit loyo! Wangeyo man nining?

13 Baibul pwonyowa ni “Lubanga aye mar.” (1 Jon 4:8) Mar aye tugo cwiny Lubanga me timo jami ducu. Dong, wanyuto mar pien Lubanga nyuto mar. Tam kong i lok man: Ka onongo nene itye ki teko, tika onongo ibijuko deno can ki tim maraco ma i lobo-ni? Ngene kene ni ibitimone, pien imaro dano. Lubanga kono? Kit ma en tye ki teko dok en marowa-ni, en bikwanyo pekki ki tim me ngolo kop alenga ducu. Itwero bedo ki gen ni cikke pa Lubanga ducu ma kitito pigi i acakki buk man bicobbe labongo akalakala mo! Ento wek ibed ki gen i cikke magi, myero kong inong ngec mapol i kom Lubanga.

LUBANGA MITO NI INGE EN

Ka imito doko larem ngat mo, icako ki wacce nyingi. Lubanga otitiwa nyinge i Baibul

14. Lubanga nyinge anga, dok wangeyo nining ni omyero wati ki nying meno?

14 Ka imito ni ngat mo obed laremi, pol kare kong  icako ki titte ngo? Icako ki titte nyingi. Lubanga tika tye ki nyinge? Dini mapol giwaco ni nyinge Lubanga nyo Rwot, ento magi pe gubedo nying. Gubedo mere nying me dog tic calo “kabaka” nyo “preciden.” Lubanga owacciwa ni nyinge Jehovah. Jabuli 83:18 (NW) waco ni: “Wek gunge ni, in keni aye ma nyingi Jehovah, in aye Ngat Mamalo Twal ma loyo wi lobo-ni ducu.” Baibul mogo gigonyo nying Lubanga ni Yawe. (Nen Nia 3:15, coc ma tye i tere piny.) Baibul mukene calo New World Translation gigonyo ni Jehovah. Luco Baibul gutiyo ki nying Lubanga tyen alip mapol. Jehovah mito ni inge nyinge dok iti kwede. En otitti nyinge wek idok lareme.

15. Nying Jehovah tyen lokke ngo?

15 Nying Lubanga, Jehovah, tye ki tyen lok ma pire tek. Te lokke ni Lubanga twero cobo cikkene mo keken ma ociko dok twero cobo yubbe mo keken. Pe tye gin mo keken ma twero jukke. Jehovah keken aye twero bedo ki nying man. *

16, 17. Ngo ma waromo pwonyone ki i kom nying dog tic magi (a) “Won Twer Ducu”? (b) “Kabaka ma loyo kare ducu”? (c) “Lacwec”?

 16 Kit ma wakwano-ni, Jabuli 83:18 oloko i kom Jehovah ni ‘In keni aye Ngat Mamalo Twal.’ Niyabo 15:3 bene waco ni: “Ticci ducu ma itiyo bedo me aura, dok gidito, ai Rwot [Jehovah] Lubanga Won Twer Ducu! Kitti ducu tye atir dok me ada, in Kabaka ma iloyo rok ducu!” Nying dog tic ni “Won Twer Ducu” te lokke  ngo? Te lokke ni Jehovah aye ngat matek loyo i polo ki i lobo. Dok i 1 Temceo 1:17, kilwongo Jehovah ni “Kabaka ma loyo kare ducu.” Nying dog tic me “Kabaka ma loyo kare ducu” nyuto ni en acakkine pe. Jabuli 90:2 tito ni en bedo tye nakanaka. Man kelo twon ur madit atika!

17 Jehovah kene aye Lacwec. Niyabo 4:11 wacci: “Rwotwa [Jehovah] ki Lubangawa, in imyero me nongo deyo ki woro ki teko, pien in aye ma yam iketo jami ducu, dok bene pi mitti omiyo gubedo tye, meno aye gin mumiyo yam giketogi.” Ada, cakke ki i malaika ma gitye i polo me o wa i kom lakalatwe ma gupong i dan polo nio kwede i kom yadi ma nyako nyig-gi wa rec ma kwang i nam madongo—Jehovah aye ocweyo jami ducu!

 IN MONO ITWERO BEDO LAREM JEHOVAH?

18. Pingo jo mukene gitamo ni pe gitwero bedo lurem Lubanga? Baibul kono waco gin ango i kom lok man?

18 Ka jo mogo gukwano lok i kom kit pa Jehovah me aura, man miyo gibedo ki lworo kun gitamo ni, ‘Lubanga tek adada, en dit tutwal, dok bor kweda, ma nyutti en pe paro pira.’ Ento Lubanga mono mito ni watam kit meno i kome? Pe. Jehovah mito bedo cok kwedwa. Baibul waco ni Lubanga “pe tye cen ka mabor ki bot ngat acel acel i kinwa.” (Tic pa Lukwena 17:27) Lubanga mito ni inyik cok bote dok en cikke ni ‘en bene binyiko cok boti.’Yakobo 4:8.

19. (a) Itwero doko larem Lubanga nining? (b) Kit pa Jehovah mene ma in imaro loyo?

19 In itwero doko larem Lubanga nining? Yecu owacci: “Man en kwo ma pe tum, ni ginge in Lubanga acel me ada, ki Yecu Kricito ma yam ioro.” (Jon 17:3) Medde ki nongo pwony, ci ibingeyo Jehovah gin ki Yecu. Dok itwero nongo kwo ma pe tum. Me labolle, dong wapwonyo ni “Lubanga aye mar.” (1 Jon 4:16) En bene tye ki kite mukene mabeco. Baibul wacciwa ni Jehovah “lakica dok maro dano, kiniga pe make oyot, marre ma pe lokke dwong, en lagen mada.” (Nia 34:6) Jehovah ‘ber dok weko bal pa dano.’ (Jabuli 86:5) Lubanga diyo cwinye dok lagen. (2 Petero 3:9, Jabuli 18:25) Ka imedde ki kwano Baibul, ci ibipwonyo lok mapol i kom kite mamwonya.

20-22. (a) Kit ma pe watwero neno Lubanga-ni, watwero nyiko cok bote nining? (b) Ngo ma myero itim ka jo mukene gimito ni ijuk kwano Baibul woko?

20 Kit ma pe itwero neno Lubanga-ni, itwero nyiko  cok bote nining? (Jon 1:18; 4:24; 1 Temceo 1:17) Ka ikwano lok i kom Jehovah ki i Baibul, ci ibingeyo en calo Ngat ma tye ada. (Jabuli 27:4; Jo Roma 1:20) Ka imedde ki pwonyo lok i kom Jehovah, marri pi en bidongo dok ibinyike cok bote.

Wego maro lutinone, ento Wonwa me polo marowa makato

21 Ibiniang ni Jehovah aye Wonwa. (Matayo 6:9) En aye omiyowa kwo, dok bene en mito ni wabed ki kwo ma pud dong ber loyo. Meno aye gin ma wego ma lamar mito pi lutinone. (Jabuli 36:9) Adada, Baibul pwonyo ni itwero bedo larem Jehovah. (Yakobo 2:23) Tam kong. Jehovah, Lacwe polo ki lobo mito ni ibed lareme!

22 Jo mukene giromo cuko cwinyi me juko kwano Baibul woko. Giromo bedo ki lworo ni ibiloko dinini woko. Ento pe iwek ngat mo ojuki ki i doko larem Jehovah. En aye larem ma pud dong ber loyo ma itwero bedo kwede.

23, 24. (a) Pingo myero imedde ki penyo lapeny? (b) Ngo ma wabinyamone i dul ma lubo man?

23 Ka itye ka kwano Baibul, ibinongo jami mogo ma pe iniang iye. Ento pe iwek lewic omaki me penyo pi kony. Yecu owacci omyero wabed jo mamwol calo lutino matino. (Matayo 18:2-4) Lutino gipenyo lapeny mapol. Lubanga mito ni inong lagamme. Pi meno kwan Baibul kun ingiyo maber wek imok ka jami ma itye ka pwonyone-ni tye ada.Kwan Tic pa Lukwena 17:11.

24 Yo maber loyo me pwonyo lok i kom Jehovah aye kwano Baibul. I dul ma lubo man, wabiniang gin mumiyo Baibul dok pat adada ki bukke mukene-ni ducu.

^ para. 15 Ka Baibulli pe tye ki nying Jehovah nyo ka imito nongo ngec mukene i kom tyen lok me nying man, ki kit ma kilwongo kwede, tim ber inen Lok me Giko Buk Man me 1.