Cit atir i jami ma tye

Cit atir ka ma nyuto lok ma tye iye

 DUL ME APAR WIYE ABICEL

Mok Tammi me Woro Lubanga i Yo Matir

Mok Tammi me Woro Lubanga i Yo Matir

1, 2. Lapeny ango ma myero ipenye kwede, dok pingo pire tek?

I KWANNI me Baibul, dong ipwonyo ni dano mapol ma giwaco ni giworo Lubanga kara gipwonyo nyo gitimo jami ma Lubanga dag. (2 Jo Korint 6:17) Man oweko Jehovah cikowa me a woko ki i dini goba, ma kilwongo ni “Babilon Madit.” (Niyabo 18:2, 4) Ngo ma ibitimone? Ngat acel acel myero omok tamme, dok omyero wapenye kekenwa ni, ‘An mono amito woro Lubanga i yo ma en mito, nyo amito medde ki yo ma abedo ka woro en kwede con?’

2 Ka dong ia woko nyo ingolo nyingi woko ki i dini goba, meno ber. Ento ki i cwinyi, romo bedo ni tye tim nyo kwer mogo me dini goba ma in pud imaro. Kong dong wanyamu tim ki kit kwer magi dok waniang pingo pire tek adada ni wanengi kit ma Jehovah nenogi kwede.

WORO CAL APAYA KI ABILA PA KWARO

3. (a) Pingo jo mukene ginongo ni tek me juko tic ki cal apaya i worogi? (b) Ngo ma Baibul waco i kom tic ki cal apaya me woro Lubanga?

3 Jo mukene dong gutiyo ki cal apaya nyo abila pa kwaro i pacigi me woro Lubanga pi mwaki mapol. Ka meno gin ma otimme i komi, iromo tamo ni woro Lubanga labongo jami magi obedo gin me ur mada. Ento wi opo ni Jehovah pwonyowa kit ma myero wawore  kwede. Dok Baibul tito botwa ka maleng ni Jehovah pe mito ni wati ki cal apaya me woro en.Kwan Nia 20:4, 5; Jabuli 115:4-8; Icaya 42:8; 1 Jon 5:21.

4. (a) Pingo omyero pe wawor kwariwa ma dong guto woko? (b) Pingo Jehovah owaco bot jone ni pe gutem lok ki jo muto?

4 Jo mukene gitiyo ki cawa kacel ki kero madwong i yellegi me kweyo cwiny kwarigi ma guto. Giromo bene woro kwarigi ma guto. Ento dong wapwonyo ni jo muto pe gitwero konyowa nyo wanowa. Pe gitye kwo ka mukene. Tye ni, temo kubbe kwedgi obedo gin marac pien kwena mo ma kitamo ni oa ki bot watwa ma oto nongo i adane oa ki bot jogi. Meno aye gin mumiyo Jehovah ociko jo Icrael ni pe gutem lok ki jo muto nyo gudony i tim jok jok mo keken.Nwoyo Cik 18:10-12; nen Lok me Giko Buk Man me 26 and 31.

5. Ngo ma twero konyi me juko woro abila pa kwaro nyo tic ki cal apaya pi woro Lubanga?

5 Ngo ma twero konyi me juko woro abila pa kwaro nyo tic ki cal apaya pi woro Lubanga? Myero ikwan Baibul ci itam matut i kom kit ma Jehovah neno kwede jami magi. Jehovah neno jami magi calo “gin me kwer” nyo gin malik. (Nwoyo Cik 27:15) Leg bot Jehovah nino ducu wek okonyi me neno jami kit ma en neno kwede ki me woro en i yo ma en cwako. (Icaya 55:9) Itwero bedo ki gen ni Jehovah bimini teko ma mitte me kwero gin mo keken ma kubbe ki woro me goba.

TIKA OMYERO WAKWER KARAMA?

6. Pingo kiyero nino dwe 25 me Decemba ni obedo nino me nywalo Yecu?

6 Karama tye i kin kwer ma dong kikwero loyo i  twok lobo-ni ducu, dok pol pa dano gitamo ni obedo kwero nino me nywalo Yecu. Ento i ada, Karama kubbe ki woro me goba. Buk mo acel tito ni lukampiri me Roma onongo gikwero nino nywal pa ceng i Decemba 25. Ludito me kanica i kare meno onongo gimito ni lukampiri gudok Lukricitayo. Dong kadi bed pe kinywalo Yecu i nino dwe 25 me Decemba, gin guyero me kwero nino nywalle pa Yecu i nino meno. (Luka 2:8-12) Lupwonye pa Yecu onongo pe gikwero Karama. Buk acel me kwedo lok tito ni pi mwaka 200 i nge nywalo Yecu, “pe tye ngat mo ma onongo ngeyo nino nywalle, dok jo manok keken aye onongo giparo nino ma kinywale iye.” Kwero Karama ocakke cokcok mwaki 300 i nge kwo pa Yecu i lobo.

7. Pingo Lukricitayo me ada pe gikwero Karama?

7 Dano mapol gingeyo ni lwit kwer me Karama ki jami mogo ma kitimo iye calo, cam ki mat matek kacel ki miyo mic oa ki i tim pa lukamfiri. Me labolle, i lobo Ulaya ki kabedo mogo i Amerika, tye kare mo ma kong kijuko kwero Karama woko pien kiniang ni lwite tye i tim pa lukamfiri. Ngat mo keken ma okwero Karama onongo kimiye pwod. Ento i nge kare manok dano dok gucako kwero Karama. Pingo Lukricitayo me ada pe gikwero Karama? Pe gikwero pien ni gimito yomo cwiny Lubanga i jami ducu ma gitimo.

TIKA OMYERO WAKWER NINO ME NYWAL?

8, 9. Pingo Lukricitayo me kare macon onongo pe gikwero nino me nywal?

8 Kwer mukene ma pire ngene mada obedo kwero nino me nywal. Lukricitayo mono myero gukwer nino me nywal? Nino me nywal ma kitito pigi i Baibul, jo  ma gukwero gubedo jo ma pe giworo Jehovah. (Acakki 40:20; Marako 6:21) Kwer me nywal onongo i adane obedo kwer me woro jogi. Meno aye gin mumiyo Lukricitayo me kare macon “onongo gineno kwero nino me nywal calo kwer pa lukamfiri.”The World Book Encyclopedia.

9 Luroma ki Lugrik mapol me kare macon onongo gitamo ni gin mo ma obedo cwiny bedo tye i kare me nywal pa dano acel acel ka medde ki gwoko ngat meno i kare me kwone ducu. Lukamfiri me kare meno onongo gikwero nino me nywal pien gitamo ni man weko lubangegi gwoko ngat ma kinywalo i nino meno.

10. Pingo Lukricitayo me kareni myero pe gukwer nino me nywal?

10 Tika itamo ni Jehovah cwako kwer mogo ma kubbe ki dini goba? (Icaya 65:11, 12) En pe cwako. Meno aye tyen lok mumiyo pe wakwero nino me nywal nyo nino madito mogo ma kubbe ki dini goba.

KA MA NINO MADONGO OCAKKE IYE MONO PIRE TEK?

11. Jo mogo gikwero nino madito pi tyen lok ango? Ngo ma omyero waket iye cwinywa loyo?

11 Jo mukene gingeyo ni Karama ki nino madongo mukene-ni gucakke ki i tim pa lukamfiri, ento pud gimedde ki kwerone. Gitamo ni nino madito miyogi kare maber me bedo ki jo me odigi. Meno mono kit ma in iwinyo kwede? Miti me bedo kacel ki jo me odi pe rac. Jehovah aye ocako te yub me ot, dok en mito ni wabed ki wat maber ki lupacowa. (Jo Epeco 3:14, 15) Ento, myero waketu cwinywa i kom bedo ki wat maber ki Jehovah ma ka yomo cwiny wadiwa ki nywako i kwer mogo me nino madito pa dini goba. Pi tyen lok  man lakwena Paulo owacci: “Wutem pwonyo gin ma yomo cwiny Rwot.”Jo Epeco 5:10.

12. Ngo ma miyo Jehovah pe cwako kwer moni?

12 Jo mapol gitamo ni ka ma lwit nino madongo ocakke ki iye pire pe tek ento Jehovah pe tamo kit meno. En pe cwako kwer ma a ki i dini goba, nyo ma keto deyo i kom dano nyo lobo moni. Me labolle, jo Ejipt onongo gitye ki kwer mapol pi lubangegi me goba. I kare ma jo Icrael guweko lobo Ejipt, gin guporo kwer acel pa jo Ejipt ci gulwongo ni “nino madit bot [Jehovah].” Ento Jehovah opwodogi pi kwero kwer meno. (Nia 32:2-10) Kit macalo lanebi Icaya owaco kwede, pe myero ‘wagud gin mo ma kome ki keni.’Kwan Icaya 52:11.

NYUT KICA I KIT MA ITERO KWEDE JO MUKENE

13. Lapeny ango ma itwero bedo kwede ka imoko tammi pe me kwero nino madongo?

13 Ka imoko tammi pe me kwero nino madongo, itwero bedo ki lapeny mapol. Me labolle: Ngo ma myero atit ki lutic luwota ka gupenya pingo pe akwero Karama kacel kwedgi? Ngo ma myero atim ka ngat mo omiya mic me Karama? Ngo ma myero atim ka cwara nyo dakona mito ni akwer nino man kacel kwede? Ngo ma atwero timone me konyo lutinona wek pe guwiny ni gitye ka keng kwero nino madongo nyo nino nywalgi?

14, 15. Ngo ma iromo timone ka ce ngat mo omoti ki mot me nino madito nyo omini mic?

14 Pire tek ni wati ki ryeko me ngeyo gin me awaca ki me atima bot ngat acel acel. Me labolle, ka dano omoti ki mot me nino madito, pe myero ipor odinga. Itwero  waco mere ni, “Apwoyo.” Ento ka ngat meno mito ngeyo lok mukene, iromo tito bote pingo in pe ikwero nino meno. Kare ducu, lok ki dano i yo me ki kica dok ki woro. Baibul wacci: “Lok ma wuloko myero obed lok mamit ma kado oromo maber, wek omi wunge kit ma myero wudok kwede i peny pa ngat acel acel.” (Jo Kolocai 4:6) Gwok nyo iromo tito ni imaro kwo kacel ki dano dok imaro bene miyo mic ento iyero pe me timo jami meno i nino madito.

15 Ngo ma omyero itim ka ngati mo omini mic? Baibul pe oryeyo cik mapol me aluba i lok man, ento waco ni omyero wawek cwiny ma ngoliwa kop-pi obed maleng. (1 Temceo 1:18, 19) Oromo bedo ni ngat ma tye ka miyo mic-ci pe ngeyo ni in pe inywako i kwer mogo me nino madito. Onyo, en oromo wacci “Angeyo ni in pe ikwero nino madit man, ento pud amito miyo mic man boti.” Iromo moko tammi me jolo mic meno nyo kwerone woko. Ento, pe iwek tam ma imoko oyel cwiny ma ngoli kop. Pe wamito ni watim gin mo ma twero balo watwa ki Jehovah.

IN KI JO ME OT-TI

Jo ma gitiyo pi Jehovah gibedo ki yomcwiny

16. Ngo ma myero itim ka jo me otti mito ni inywak kwedgi i kwero nino madito?

16 Ngo ma myero itim ka jo me ot-ti gimito kwero nino madito? Pe omyero ilar lok kwedgi. Wi opo ni, gitye ki twero me yero gin ma gimito timone. Bed lakica dok iwor tam ma gumoko, kit ma in bene imito ni guwor tam ma imoko. (Kwan Matayo 7:12.) Ento ka jo me otti mito ni ibed kacel kwedgi i nino madit man, ngo ma myero itim? Ma peya imoko ngo ma myero itim, leg bot Jehovah wek okonyi me moko tam matir.  Tam kong matut i lok man, ka dok ikwed lok iye. Wi myero opo ni imito yomo cwiny Jehovah kare ducu.

17. Ngo ma itwero timone me konyo lutinoni wek pe guwiny marac ka gineno jo mukene gitye ka kwero nino madongo?

17 Ngo ma itwero timone me konyo lutinoni ka gineno jo mukene gitye ka kwero nino madongo? Kare ki kare, itwero yubo yub mo mupore pigi. Itwero bene miyogi mic i cawa mo keken. Dok mic acel madit ma itwero miyone ki lutinoni aye obedo cwalo kare kwedgi ki dong nyuto mar botgi.

LUB WORO ME ADA

18. Pingo omyero wabed tye i cokke pa Lukricitayo?

18 Ka wamito yomo cwiny Jehovah, omyero wakwer dini goba kacel ki yub me tekwaro ki nino madito ma kubbe kwede. Ento bene omyero walub woro me ada keken. I yo ango? Yo acel aye me bedo tye i cokke pa Lukricitayo kare ki kare. (Kwan Jo Ibru 10:24, 25.) Yub me cokke obedo but worowa ma pire tek adada. (Jabuli 22:22; 122:1) Waromo cuko cwinywa kekenwa ka wacokke kacel.Jo Roma 1:12.

19. Pingo pire tek me tito bot jo mukene lok ada ma ipwonyo ki i Baibul?

19 Lubo woro me ada bene kwako tito lok ma ipwonyo ki i Baibul bot jo mukene. Dano mapol gitye ki tur cwiny pi jami maraco ma tye ka timme i lobo-ni. (Ejekiel 9:4) Twero bedo ni ingeyo jo mogo ma giwinyo kumeno. Tit botgi pi gen ma mwonya ma tye i anyim. Ka ibedo tye i cokke pa Lukricitayo dok itito bot jo mukene lok ada ma ipwonyo ki i Baibul, ci pe dong ibibedo ki miti me lubo dini goba ki kwerre. Itwero bedo labongo akalakala ni Jehovah bigoyo laane i tuteni me wore i yo matir.Malaki 3:10.