Cit atir i jami ma tye

Cit atir ka ma nyuto lok ma tye iye

 DUL ME APAR WIYE ABIC

Yo Matir me Woro Lubanga

Yo Matir me Woro Lubanga

1. Anga ma myero otitiwa yo matir me woro Lubanga?

DINI mapol giwaco ni gipwonyo lok ada i kom Lubanga. Ento meno pe lok ada pien dini magi gipwonyo jami ma pe rwatte i kom nga ma Lubanga obedo ki kit ma myero wawore kwede. Dong wangeyo nining ka watye ka woro Lubanga i yo matir? Jehovah keken aye twero tittiwa kit ma myero wawore kwede.

2. Itwero pwonyo yo matir me woro Lubanga nining?

2 Jehovah omiyo botwa Baibul wek wapwony kit me wore i yo matir. Pi man, myero ikwan Baibul ci Jehovah bikonyi me nongo adwogi maber pien en paro piri mada.Icaya 48:17.

3. Ngo ma Lubanga mito ni watim?

3 Jo mogo giwaco ni Lubanga cwako dini ducu, ento meno pe gin ma Yecu opwonyowa. En owacci: “Pe dano ducu ma gilwonga ni, ‘Rwot, Rwot’ aye gibidonyo i ker me polo, ento ngat ma tiyo gin ma Wora ma i polo mito.” Pi meno, mitte ni omyero wapwony miti pa Lubanga ki dong watim bene. Man pe obedo lok tuko pien Yecu oporo jo ma pe giwinyo Lubanga ki lutur cik, nyo “lutim gin maraco.”Matayo 7:21-23.

4. Ngo ma Yecu owaco i kom timo miti pa Lubanga?

4 Yecu ocikowa ni ka wamito timo miti pa Lubanga, wabirwatte ki ariya mapol. En owacci: “Wudony ki i  doggola mading, pien doggola ma tero dano i to lac, dok yone gipiro maber, dok jo ma donyo ki iye pol. Pien doggola ma tero dano i kwo ding, ki yone bene rac, dok jo ma nongo yo meno ginok.” (Matayo 7:13, 14) Yo mading, nyo yo matir me woro Lubanga tero dano i kwo ma pe tum. Ento yo malac, nyo yo ma pe atir me woro Lubanga tero dano i to. Ento Jehovah pe mito ni dano mo oto. En miyo bot dano ducu kare me pwonyo lok i kome.2 Petero 3:9.

YO MATIR ME WORO LUBANGA

5. Itwero ngeyo jo ma giworo Lubanga i yo matir nining?

5 Yecu owaco ni watwero ngeyo jo ma giworo Lubanga i yo matir. Watwero timo man ki ngiyo gin ma giye iye ki gin ma gitimo. Yecu otito ni: “Wubingeyogi i kom kitgi.” Ka dok omedde ni: “Yat maber nyako nyige mabeco.” (Matayo 7:16, 17) Man pe te lokke ni jo ma giworo Lubanga gubedo jo ma gipe ki roc. Ento lutic pa Lubanga gitute me timo gin matir kare ducu. Kombeddi kong dong wanenu gin ma bikonyowa me ngeyo jo ma giworo Lubanga i yo matir.

6, 7. Pingo woro me ada jenge i kom Baibul? Lanen pa Yecu pwonyowa gin ango?

6 Worowa myero ojenge i kom Baibul. Baibul waco ni: “Ginacoya ducu ma yam gicoyo, gicoyo pi teko pa cwiny pa Lubanga. Konyo me pwony, me juko dano, me tiro kit pa dano, me nyebo dano wek gulub kit ma atir, wek dano pa Lubanga obed muteggi, ma bene oyubbe i yo ducu, ma romo tiyo kit tic mo maber ducu.” (2 Temceo 3:16, 17) Lakwena Paulo ocoyo bot Lukricitayo ni: “Cakke ma wugamo lok pa  Lubanga ma wuwinyo ki botwa, pe wugamo macalo lok pa dano, ento macalo lok pa Lubanga.” (1 Jo Tecalonika 2:13) Woro me ada jenge i Baibul. Ento pe jenge i kom tam pa dano adana, tekwaro, nyo gin mukene.

7 Jami ducu ma Yecu opwonyo onongo jenge i Lok pa Lubanga. (Kwan Jon 17:17.) Pol kare, en onongo tiyo ki wang Ginacoya. (Matayo 4:4, 7, 10) Lutic pa Lubanga bene gilubo lanen pa Yecu dok gijengo pwonygi ducu i Baibul.

8. Ngo ma Yecu opwonyowa i kom kit ma myero wawor kwede Jehovah?

8 Myero wawor Jehovah keken. Jabuli 83:18 (NW) wacci: “In aye ma nyingi Jehovah, in keni aye Ngat Mamalo Twal ma loyo wi lobo-ni ducu.” Yecu onongo mito ni dano gunge nga ma obedo Lubanga me ada, dok en opwonyogi ki nying Lubanga. (Kwan Jon 17:6.) Yecu owacci: “Wor Rwot [Jehovah] Lubangani, dok bene iti pire keken.” (Matayo 4:10) Pi man, wan macalo lutic pa Lubanga walubo lanen pa Yecu. Waworo Jehovah keken, watiyo ki nyinge, dok wapwonyo dano ki nying meno ki ngo ma en bitimo piwa.

9, 10. Wanyuto mar i kinwa kekenwa nining?

9 Myero wanyut mar me ada pi jo mukene. Yecu opwonyo lulub kore me bedo ki mar i kingi. (Kwan Jon 13:35.) Pe myero wapar pi ka ma waa ki iye, tekwarowa, nyo kadi wabedo lulonyo nyo lucan. Mar ma watye kwede i kinwa myero oribwa macalo omege ki lumege. (Jo Kolocai 3:14) Pi meno, pe wacito i lweny dok pe waneko dano. Baibul wacci: “Man aye gin ma bimiyo gineno jo ma gin litino pa Lubanga ki  jo ma gin litino pa Catan: ngat ma pe timo gin ma tye atir pe latin pa Lubanga, kadi wa ngat ma pe maro ominne bene.” Ka dok medde ni: “Myero wamarre kekenwa. Pe wabed calo Kain ma yam obedo latin pa Larac, ci oneko ominne woko.”1 Jon 3:10-12; 4:20, 21.

10 Watiyo ki cawawa, kerowa ki jami ma watye kwede me konyo ki cuko cwiny omegiwa ki lumegiwa. (Jo Ibru 10:24, 25) “Myero watiyu gin maber bot dano ducu.”Jo Galatia 6:10.

11. Pingo waye ni Yecu obedo yo me o bot Lubanga?

11 Myero wawiny Yecu pien en aye yo me o bot Lubanga. Baibul waco ni: “Pe tye larre mo i ngat mukene, pien pe tye nying mo mukene i wi lobo man ma gimiyo ki wan dano ma myero walarre iye.” (Tic pa Lukwena 4:12) I Dul me 5 i buk man, wapwonyo ni Jehovah ocwalo Yecu me miyo kwone macalo ginkok me laro jo ma luwiny. (Matayo 20:28) Jehovah bene oyero Yecu me loyo lobo-ni ducu macalo Kabaka. Pi tyen lok man, Baibul tito botwa ni omyero wawiny dog Yecu ka wamito kwo me labed naka.Kwan Jon 3:36.

12. Pingo pe wadonyo i lok me wibye?

12 Pe myero wadony i lok me wibye. Yecu pe orwako wiye i lok me wibye. I kare ma kitye ka pido i kome, en owaco bot Pilato, ma obedo laloc me Roma ni: “Kerra pe me lobo man.” (Kwan Jon 18:36.) Calo Yecu, wan bene wacwako Ker pa Lubanga, dok pi tyen lok man pe wadonyo i lok me wibye ka mo keken ma wabedo iye. Ento, Baibul ocikowa ni myero wawiny ‘luloc ma giloyowa’ nyo gamente. (Jo Roma  13:1) Pi meno walubo cik me lobo ma wabedo iye. Ngene kene ni, ka cik moni pe rwatte ki cik pa Lubanga, walubo lanen pa lukwena, ma guwacci: “Myero wawiny Lubanga makato dano.”Tic pa Lukwena 5:29; Marako 12:17.

13. Kwena ango ma watito i kom Ker pa Lubanga?

13 Waye ni Ker pa Lubanga keken aye bicobo pekki ma i lobo-ni ducu. Yecu owaco ni “lok man me kwena maber me ker pa Lubanga” gibitito i wi lobo ducu. (Kwan Matayo 24:14.) Pe tye gamente pa dano mo ma twero timo gin ma Ker pa Lubanga bitimo piwa. (Jabuli 146:3) Yecu opwonyowa me lega pi Ker pa Lubanga i kare ma en owaco ni: “Ker meri obin; giti gin ma imito i lobo kit ma gitiyo i polo.” (Matayo 6:10) Baibul tittiwa ni Ker pa Lubanga bityeko gamente pa dano ci “en aye dong bicung bedo matwal.”Daniel 2:44.

14. Angagi ma itamo ni giworo Lubanga i yo matir?

14 I nge kwano lok man, penye kekeni ni: ‘Jo mene ma gijengo pwonygi i Baibul? Angagi ma gitito bot jo mukene nying Lubanga? Angagi ma ginyuto mar me ada i kingi dok giye ni Lubanga ocwalo Yecu me larowa? Angagi ma pe gidonyo i lok me wibye? Angagi ma gitito ni Ker pa Lubanga keken aye twero cobo pekkiwa ducu?’ Lucaden pa Jehovah keken.Icaya 43:10-12.

NGO MA IBITIMONE?

15. Ngo ma myero watim ka wamito ni Lubanga ojol worowa?

15 Pe romo me ye ayea keken ni Lubanga tye. Kadi wa jogi bene giye ni Lubanga tye, ento pe giwinyo  lokke. (Yakobo 2:19) Ka wamito ni Lubanga ojol worowa, ci pe omyero waye ayea keken ni en tye, ento bene omyero watim gin ma en waco.

16. Pingo omyero wakwer dini goba?

16 Wek Lubanga ojol worowa, omyero wakwer dini goba. Lanebi Icaya ocoyo ni: “Wua woko ki kunnu, wek wucit wulonnye.” (Icaya 52:11; 2 Jo Korint 6:17) Man aye gin mumiyo omyero wakwer gin mo keken ma kubbe ki woro me goba.

17, 18. “Babilon Madit” obedo ngo dok pingo mitte ni waa woko ki iye pi oyot?

17 Dini goba obedo gin ango? Obedo dini mo keken ma pwonyowa me woro Lubanga i yo ma pe rwatte ki Baibul. Baibul lwongo dini goba ducu ni “Babilon Madit.” (Niyabo 17:5) Pingo? I nge Pii Aluka me kare pa Nua, pwony goba mapol ocakke i boma me Babilon. Pwony goba magi onya oromo lobo ducu. Me labolle, jo ma onongo gibedo i Babilon onongo giworo lubange adek. I kareni bene, dini mapol gipwonyo ni Lubanga tye adek i acel, ento Baibul waco atir ka maleng ni Lubanga tye acel keken ma nyinge Jehovah, dok Wode aye Yecu. (Jon 17:3) Jo ma gubedo i Babilon onongo bene giye ni dul kom dano moni medde ki kwo ka ngat meno dong oto woko dok dul kome meno twero deno can i mac me kapiny. Meno pe lok ada.—Nen Lok me Giko Buk Man me 14, 17, ki 18.

18 Lubanga otito ni cokcok-ki kibijwero dini goba ducu. (Niyabo 18:8) Tika iniang gin mumiyo pire tek me a woko ki i dini goba pi oyot? Jehovah mito ni itim meno ma kare pud tye.Niyabo 18:4.

Tic pi Jehovah kacel ki jone weko inongo lurem mapol i wi lobo ducu

19. Ka imoko tammi me tic pi Jehovah, en bigwoki nining?

 19 Ka imoko tammi me weko dini goba wek iti pi Jehovah, luremi mukene nyo lupaconi pe gibiniang tam ma imoko dok gitwero miyo kwo bedo matek piri. Ento Jehovah pe biweki. Ibidonyo i dul pa dano milion mapol ata ma gitye calo jo me ot acel ma gitye ki mar me ada i kingi, dok ibibedo ki gen me kwo pi naka i lobo manyen pa Lubanga. (Marako 10:28-30) Luremi ki lupaconi mogo ma onongo gukwero ni pe iti pi Jehovah lacen giromo loko tamgi me cako kwano Baibul.

20. Pingo pire tek me woro Lubanga i yo matir?

20 Cokcok-ki, Lubanga bityeko jo maraco ducu ci Kerre aye biloyo lobo. (2 Petero 3:9, 13) Meno pud dong bibedo kare me yomcwiny ya! Dano ducu biworo Jehovah i yo ma en mito. Pi meno, pire tek ni imok tammi kombeddi me woro Lubanga i yo matir.