Cit atir i jami ma tye

Cit atir ka ma nyuto lok ma tye iye

 DUL ME APAR WIYE ADEK

Bed ki Pwoc pi Mic me Kwo

Bed ki Pwoc pi Mic me Kwo

1. Anga ma omiyowa kwo?

JEHOVAH aye “Lubanga makwo.” (Jeremia 10:10) En Lacwecwa, dok en aye omiyowa kwo. Baibul wacci: “In aye ma yam iketo jami ducu, dok bene pi mitti omiyo gubedo tye, meno aye gin mumiyo yam giketogi.” (Niyabo 4:11) Adada, Jehovah mito ni wabed makwo. Kwo obedo mic ma pire tek mada ma oa ki bote.Kwan Jabuli 36:9.

2. Ngo ma omyero watim wek kwowa obed maber?

2 Jehovah miyowa jami ducu ma wamito wek wabed kwo, calo cam ki pii. (Tic pa Lukwena 17:28) Ento makato meno, en mito ni wanong mit pa kwo. (Tic pa Lukwena 14:15-17) Wek kwowa obed maber, mitte ni walub cik pa Lubanga.Icaya 48:17, 18.

KIT MA LUBANGA NENO KWEDE KWO

3. Ngo ma Jehovah otimo i kare ma Kain oneko Abel?

3 Baibul pwonyowa ni kwowa ki kwo pa jo mukene obedo gin ma pire tek bot Jehovah. Me labolle, i kare ma Kain—latin pa Adam ki Kawa—iye owang mada i kom ominne matidi Abel, Jehovah ociko Kain ni myero okwe kinigane. Ento Kain pe owinyo, dok akemone omedde ameda nio ka “ocako lweny i kom ominne Abel, ci oneko woko.” (Acakki 4:3-8) Jehovah opwodo Kain pi neko ominne Abel. (Acakki 4:9-11) Pi man, kiniga ki adage gubedo jami maraco pien miyo wadoko jo mager. Dano ma kit meno pe  twero nongo kwo ma pe tum. (Kwan 1 Jon 3:15.) Ka wamito yomo cwiny Jehovah, myero wapwonye me maro dano ducu.1 Jon 3:11, 12.

4. Cik acel ma Lubanga omiyo bot jo Icrael pwonyowa ngo i kom mic me kwo?

4 I nge mwaki alip mapol ata, Jehovah onyuto ni en pud tero kwo calo gin ma pire tek i kare ma omiyo Cik Apar bot Moses. Cik acel i kin magi waco ni: “Pe ineki.” (Nwoyo Cik 5:17) Ka ngat mo oneko lawote akaka, en bene myero kineke woko.

5. Lubanga mono winyo nining i kom onyo ic?

5 Lubanga mono winyo nining i kom onyo ic? Kadi wa kwo pa latin ma peya kinywalo pire tek bot Jehovah. I Cik ma Jehovah omiyo bot jo Icrael, en owacci ka dano mo owano dako ma iye tye ci latin oto woko, dano meno myero kineke woko. (Kwan Nia 21:22, 23; Jabuli 127:3.) Man pwonyowa ni onyo ic obedo gin marac.—Nen Lok me Giko Buk Man me 28.

6, 7. Wanyuto bot Jehovah nining ni watero kwo calo gin ma pire tek?

6 I yo ma nining ma watwero nyuto bot Jehovah ni waneno kwowa ki kwo pa jo mukene calo gin ma pire tek? Pe watimo gin mo keken ma keto kwowa nyo kwo pa jo mukene ka mading. Pi meno, pe wamato taa, wanyamo marungi nyo watiyo ki yadi calo jayigi-ni, pien giwanowa dok gitwero nekowa.

7 Lubanga omiyowa kwo kacel ki komwa, dong omyero wati kwedgi i yo ma en mito. Pi meno omyero wagwok komwa maber. Ka pe wagwoko komwa, wadoko jo macilo i wang Lubanga. (Jo Roma 6:19; 12:1; 2 Jo Korint 7:1) Kit macalo Jehovah aye lami kwo, pe watwero wore ka pe watero kwo calo gin ma pire tek.  Kadi bed ni juko kit maraco twero bedo tek adada, Jehovah bikonyowa ka watute matek pien ni waneno kwo calo gin ma pire tek.

8. Ngo ma myero watim wek pe waket kwowa ki kwo pa jo mukene ka mading?

8 Dong wapwonyo ni kwo obedo mic ma pire tek. Jehovah geno ni wabitute pe me keto kwowa nyo kwo pa jo mukene ka mading. Watimo man i kit ma wadwoyo kwede mutoka, wangweco kwede ki pikipiki nyo gin wot mukene. Myero wagwokke ki tuko mogo me gero nyo ma keto kwowa ka mading. (Jabuli 11:5) Myero bene watute me yubo gangiwa wek pe okel awano i kom dano. Jehovah ociko jo Icrael ni: “Ka ce igero ot manyen, ibigoyo wi ot meri irumo woko, wek pe ikel bal me oyo remo i odi, ma nongo ngat mo obut opoto piny ki i wiye.”Nwoyo Cik 22:8.

9. Omyero water lee nining?

9 Kadi wa yo ma watero kwede lee pire tek i wang Jehovah. En ye ni wanek lee me acama nyo pi ginaruka, dok en ominiwa twero me neko lee ka ce oketo kwowa ka mading. (Acakki 3:21; 9:3; Nia 21:28) Ento pe watwero tero lee i yo me gero nyo nekogi mere me galowang.Carolok 12:10.

NYUT WORO PI KWO MACALO GIN MALENG

10. Wangeyo nining ni remo cung pi kwo?

10 Remo obedo gin maleng bot Jehovah pien remo cung pi kwo. I kare ma Kain oneko Abel, Jehovah ociko Kain ni: “Remo pa omeru tye ka koko i nyima, winnye a ki i ngom.” (Acakki 4:10) Remo pa Abel onongo cung pi kwone, dok Jehovah omiyo pwod ki Kain pi  neko Abel. I nge Pii Aluka me kare pa Nua, Jehovah dok aye onyuto ni remo cung pi kwo. Jehovah omiyo bot Nua ki jo me ode twero me camo ringo pa lee. En owacci: “Gin ducu ma woto, ma kwo, gibibedo cam mewu; kit ma yam amiyowu pot dek-ki, dong amiyowu jami ducu.” Ento, tye gin acel keken ma Jehovah ociko ni pe kicam: “Pe wubicamo ringo kacel ki kwone, ma en aye remone.”Acakki 1:29; 9:3, 4.

11. Jehovah omiyo cik ango i kom remo bot rok me Icrael?

11 I kine ka mwaka 800 ma Jehovah otito bot Nua ni pe gucam remo, en dok onwoyo cik bot jone ni: “Dano mo bene ki i kin jo Icrael, nyo ki i kin lubedo ma bedo i kingi, ma omako lee nyo winyo mo ma gicamo, ka en owoto ka dwar, bionyo remone woko piny i ngom, ci umo woko ki lobo.” En dok owacci: “Pe wucam remo pa gin mo.” (Lulevi 17:13, 14) Jehovah onongo pud mito ni jone gunen remo calo gin maleng. Onongo gitwero camo ringo ento pe remo. Ka guneko lee me acama, onongo myero guony remone woko piny i ngom.

12. Lukricitayo gineno remo nining?

12 Mwaki mogo i nge to pa Yecu, lukwena ki ludongo me kacokke me Jerucalem gucokke kacel me moko tam i kom Cik mogo ma Lukricitayo myero gulubi. (Kwan Tic pa Lukwena 15:28, 29; 21:25.) Jehovah okonyogi me niang ni remo pud obedo gin ma pire tek bote dok omyero gunen calo gin maleng. Lukricitayo me kare macon onongo pe myero gucam nyo gumat remo, nyo gucam ringo ma pe kionyo remo ki iye maber. Ka gutimo kit meno, onongo rac ma rom aroma ki woro cal jogi nyo timo tim tarwang.  Nicakke ki i kare meno, Lukricitayo me ada pe giye camo nyo mato remo. I kare-ni kono? Jehovah pud mito ni wanen remo calo gin maleng.

13. Pingo Lukricitayo pe giye ni kimed remo i komgi

13 Man mono te lokke ni Lukricitayo myero pe guye ni kimed remo i komgi? Kakare, tye kit meno. Jehovah ocikowa pe me mato nyo camo remo. Ka daktar owacci ni pe imat kongo, tika ibiweko kituco kongo atuca i komi? Ngene kene ni pe! I yo acel-lu, cik ma kimiyo pe me camo nyo mato remo tyen lokke ni pe omyero wawek kimed remo i komwa.—Nen Lok me Giko Buk Man me 29.

14, 15. Lukricitayo gineno kwo nining? Tika gituro cik pa Lubanga wek gimedde ki kwo pi kare mo? Tit kong.

14 Ka daktar owacci ni ka pe kimedo remo i komi ci ibito woko kono? Ngat acel acel myero omok tamme i kom lubo cik pa Lubanga madok i kom remo. Macalo Lukricitayo watye ki pwoc i kom mic me kwo ma oa ki bot Lubanga, dok wabiyenyo yo me cango mukene wek wabed kwo, ento pe wabiye ni kimed remo i komwa.

15 Watemme ki tekowa ducu me gwoko yoto komwa, ento pien kwo pire tek bot Lubanga, pe waye ni kimed remo i komwa. Ento bedo lawiny bot Jehovah pire tek loyo kwero winye pi miti me medo kwowa pi kare mo. Yecu owacci: “Dano ma mito laro kwone birwenyone arwenya, ento dano mo ma rwenyo kwone pira aye binongone.” (Matayo 16:25) Wamito winyo dog Jehovah pien ni wamare. En ngeyo gin maber loyo piwa dok waneno kwo calo gin ma pire tek dok maleng i wang Jehovah.Jo Ibru 11:6.

16. Pingo lutic pa Lubanga giwinyo lokke?

 16 Lutic pa Lubanga ma lugen dong gumoko tamgi me lubo cikke i kom remo. Pe gicamo nyo gimato remo, dok pe giye ni kimed remo i komgi. * Ento, giye yo mukene me cango wek gilar kwogi. Gitye ki niye ni ngat ma Ocweyo kwo ki remo ngeyo gin maber loyo pigi. Tika iye ni en ngeyo gin maber loyo piri?

YO ACEL KEKEN ME TIC KI REMO MA JEHOVAH OYE

17. I kare pa Luicrael, yo acel keken me tic ki remo ma Jehovah oye onongo obedo me timo ngo?

17 I Cik ma Lubanga omiyo bot Moses, Jehovah owaco bot jo Icrael ni: ‘Kwo pa ringo tye i remo; an dong atyeko miyone botwu i wi keno tyer pi kwanyo bal ki i komwu, pien remo aye gin ma kwanyo bal, pi kwo ma tye iye-ni.’ (Lulevi 17:11) Ka Luicrael gutimo bal, onongo gitwero lego pi kica pa Jehovah ki tyero lee me gitum wek lalamdog oony remone i keno tyer i ot pa Lubanga. Man yo acel keken ma Jehovah oye ni Luicrael guti kwede ki remo.

18. Gin ango ma watwero nongone pi tyer pa Yecu?

18 Cik ma kwako tyero lee ogik i kare ma Yecu obino i lobo ci omiyo kwone, nyo remone, wek kiwek balwa. (Matayo 20:28; Jo Ibru 10:1) Kwo pa Yecu onongo pire tek adada mumiyo i kare ma Jehovah ocere me dok i polo, Jehovah oyabo yo bot dano ducu me nongo kwo ma pe tum.Jon 3:16; Jo Ibru 9:11, 12; 1 Petero 1:18, 19.

In itwero nyuto woro i kom kwo ki remo nining?

19. Ngo ma myero watim wek ‘alii me remo pe obed i wiwa?’

 19 Wapwoyo Jehovah pi mic madit me kwo ma en ominiwa! Dok wamito titone bot dano ni ka gitye ki niye i kom Yecu, ci gibinongo kwo ma pe tum. Wamaro dano, dok wamito timo gin ducu ma watwero me pwonyogi kit ma gitwero nongo kwede kwo meno. (Ejekiel 3:17-21) Calo lakwena Paulo, wabiwacci: “Ka kwo pa ngat mo i kinwu orwenyo, aliine pe tye i wiya, pien pe anguny adok ki ngeya aweko tuco botwu gin ducu ma Lubanga oyubo.” (Tic pa Lukwena 20:26, 27) Adada, wanyuto ni watye ki pwoc madit pi remo ka watito bot dano lok i kom Jehovah ki kit ma remo pire tek kwede i wange.

^ para. 16 Pi ngec mukene ma kwako medo remo i kom, nen pot karatac 77-79 i buk me ‘Wubed i Mar pa Lubanga’ ma Lucaden pa Jehovah aye gugoyo.