Cit atir i jami ma tye

Cit atir ka ma nyuto lok ma tye iye

 DUL ME ABORO

Ker pa Lubanga Obedo Gin Ango?

Ker pa Lubanga Obedo Gin Ango?

1. Lega mene ma ngene tutwal ma wabingiyone?

DANO milion mapol gingeyo lega ma kilwongo ni Wonwa ma Tye i Polo, nyo Lega pa Rwotwa. Yecu otiyo ki lega man me pwonyo lukwenane kit ma myero guleg kwede. Gin ango ma en olego pire? Dok pingo lega man pire tek botwa i kare-ni?

2. Jami adek mene ma pigi tego ma Yecu opwonyowa me lega pigi?

2 Yecu owaco ni: “Dong wuleg kit man ni, ‘Wonwa ma tye i polo, giwor nyingi maleng. Ker meri obin; giti gin ma imito i lobo kit ma gitiyo i polo.’” (Kwan Matayo 6:9-13.) Pingo Yecu opwonyowa me lega pi jami adek magi?—Nen Lok me Giko Buk Man me 20.

3. Ngo ma myero wange ma dok i kom Ker pa Lubanga?

3 Dong watyeko pwonyo ni nying Lubanga kilwongo ni Jehovah. Dok bene wanyamo lok i kom yub pa Lubanga pi dano ki pi lobo. Ento, ngo kono ma Yecu onongo tye ka lok iye i kare ma owaco ni: “Ker meri obin”? Wabipwonyo gin ma Ker pa Lubanga obedo, gin ma ker meno bitimone, ki dong kit ma ker meno bilonyo kwede nying Lubanga wek obed maleng.

KER PA LUBANGA OBEDO GIN ANGO?

4. Ker pa Lubanga obedo gin ango, dok anga ma obedo Kabakane?

4 Jehovah oketo gamente i polo dok otyeko yero Yecu me bedo Kabakane. Baibul lwongo gamente  man ni Ker pa Lubanga. Yecu aye “Rwot pa rwodi, ki Kabaka ma loyo luker ducu.” (Niyabo 17:14) Yecu twero timo jami mabeco makato laloc mo keken, dok en tye ki teko madwong makato luloc ducu kadi guribbe kacel.

5. Ker pa Lubanga loyo loc ki kwene? Dok biloyo ngo?

5 I nge nino pyera angwen ma kicero Yecu, en odok cen i polo. Lacen, Jehovah oketo en macalo Kabaka me ker-re. (Tic pa Lukwena 2:33) Gamente pa Lubanga biloyo lobo ki i polo. (Niyabo 11:15) Meno aye gin mumiyo Baibul lwongo Ker pa Lubanga ni “kerre me polo.”2 Temceo 4:18.

6, 7. Ngo ma omiyo Yecu ber loyo kabaka mo keken ma dano?

6 Baibul wacci Yecu dit loyo kabaka mo keken ma dano pien en “pe doki bito.” (Jo Roma 6:9) Luloc ma dano ducu gito woko, ento Yecu pe bito matwal. Dong jami ducu mabeco ma Yecu bitimo piwa birii pi naka.

7 Lok pa lanebi mo me Baibul waco ni Yecu bibedo Kabaka ma lakica dok ngolo kop atir: “Cwiny pa Rwot [Jehovah] bibedo i kome, cwiny me ryeko ki me niang, cwiny me poro lok ki me tek, cwiny me ngec ki me lworo Rwot. Cwinye bibedo yom i lworo Rwot. En pe bingolo kop pi gin ma en neno anena ki wange, nyo kadi ki ngolo kop pi lok ma en winyo awinya ki ite; ento en bingolo kop pa lucan atir.” (Icaya 11:2-4) Tika imito bedo ki kabaka ma kit meno?

8. Wangeyo nining ni Yecu pe biloc kene?

8 Lubanga oyero dano mogo me loc kacel ki Yecu i gamentene me polo. Me labolle, lakwena Paulo owaco  bot Temceo ni: “Ka waciro can, wabibedo ka loc kacel kwede.” (2 Temceo 2:12) Jo adi ma gibiloc kacel ki Yecu?

9. Dano adi ma gibiloc kacel ki Yecu? Lubanga ocako yerogi awene?

9 Kit ma wapwonyo kwede i Dul me 7, kimiyo ginanyuta bot lakwena Jon, ci en oneno Kabaka Yecu i polo kacel ki jo 144,000 ma gibiloc kwede. Angagi ma gubedo jo 144,000? Jon otito ni “gicoyo nyinge [Yecu] ki nying Wonne woko i tur nyimgi.” Dok en omedo ni: “Gin jo ma lubo Latin romo ka ma en woto iye ducu. Jo magi aye gin jo ma gikokogi ki i kin dano ducu.” (Kwan Niyabo 14:1, 4.) Jo 144,000 magi gubedo Lukricitayo ma lugen ma Lubanga oyero me ‘loyo lobo’ kacel ki Yecu. Ka guto, ci kicerogi me kwo i polo. (Niyabo 5:10) Nicakke wa i kare pa lukwena, Jehovah obedo ka yero Lukricitayo ma lugen wek gubed i kin luker 144,000 magi.

10. Pingo obedo yub me mar ni Jehovah oyero Yecu kacel ki jo 144,000 me loyo dano?

10 Jehovah paro piwa tutwal, mumiyo en oketo yub ni dano mogo gubed luloc kacel ki Yecu. Yecu bibedo laloc maber pien en ngeyowa maber. En ngeyo ngo ma bedo dano ki deno can obedo. Paulo owaco ni Yecu paro piwa, en “winyo arem kacel kwedwa pi gorowa,” dok “bene Catan yam obite i yo ducu calo wan.” (Jo Ibru 4:15; 5:8) Jo 144,000 bene gingeyo ngo ma kwo calo dano obedo. Gin bene gucanne ki roc kacel ki two. Pi man, watwero bedo labongo akalakala ni Yecu kacel ki jo 144,000 gibiniang kit ma wan dano wawinyo kwede ki pekki mapol ma watye ka kanyone.

 NGO MA KER PA LUBANGA BITIMONE?

11. Pingo Yecu opwonyo lupwonyene me lega pi miti pa Lubanga wek otimme i polo?

11 Yecu opwonyo lukwenane me lega pi miti pa Lubanga wek otimme i polo. Pingo? Wapwonyo i Dul me 3 ni, Catan Larac-ci ojemo i kom Jehovah. I nge jemo pa Catan, Jehovah oweko Catan ki lumalaika ma pe lugen nyo jogi, me bedo i wi polo kong pi kare mo. Man te lokke ni pe lumalaika ducu ma gitye i polo onongo gitimo miti pa Lubanga. I Dul me 10, wabipwonyo lok i kom Catan ki jogine.

12. Jami aryo mene ma pigi tego ma otimme ma kitito pigi i Niyabo 12:10?

12 Baibul tito ni cutcut ma kiketo Yecu macalo Kabaka me Ker pa Lubanga, en onongo bicito ka lweny i kom Catan. (Kwan Niyabo 12:7-10.) Tyeng me 10 tito jami aryo ma pigi tego ma otimme. Ker pa Lubanga i te loc pa Yecu Kricito ocako loc, ci kibolo Catan woko ki i polo wa piny i lobo. Kit ma wabipwonyo kwede, jami magi dong gutimme woko.

13. Gin ango ma otimme i polo i kare ma kibolo Catan woko?

13 Baibul tito yomcwiny pa lumalaika ma lugen i kare ma dong kibolo Catan ki jogine woko ki i polo. Wakwano ni: “Bed ki yomcwiny, in polo, ki wun bene ma wubedo iye!” (Niyabo 12:12) Polo dong tye ki kuc ki ribbe kombeddi-ni pien jo ducu ma gitye kunnu gitimo miti pa Lubanga.

Peko omedde i wi lobo nicakke ma kibolo Catan ki jogine woko ki i polo. Pekki magi dong cok gik

14. Ngo ma tye ka timme i lobo pien ni kibolo Catan woko ki i polo?

14 Ento kwo i lobo kany dok pat mada. Jami maraco mapol tye ka timme i kom dano “pien Ladot dong  olor obino woko piny” dok en “tye ki akemo madwong, pien ngeyo ni karene tye manok!” (Niyabo 12:12) Catan tye mager atika. Kityeko bolle woko ki i polo, dok ngeyo ni kicok jwero en woko. En tye ka timo jami maraco me kelo ayelayela, arem, ki deno can i wi lobo ducu.

15. Lubanga tye ki yub ango pi lobo-ni?

15 Ento yub pa Lubanga pi lobo peya olokke. En pud mito ni dano ma pe ki roc gukwo i paradic i lobo pi naka. (Jabuli 37:29) Dong, Ker pa Lubanga bitimo man nining?

16, 17. Daniel 2:44 tittiwa gin ango i kom Ker pa Lubanga?

16 Lok pa lanebi ma tye i Daniel 2:44 waco ni: “Dok i kare pa luker meno Lubanga me polo biketo Ker mukene ma ri nakanaka ma pe gitwero balone, kadi dit me locce bene pe gibiweko i cing rok mukene. Ker meno manyen-ni bituro ker magi ducu ngido woko matitino, ci tyekogi woko ducu, en aye dong bicung bedo matwal.” Ngo ma lok pa lanebi man pwonyowa i kom Ker pa Lubanga?

17 Mukwongo, tittiwa ni Ker pa Lubanga onongo bicako loc “i kare pa luker meno.” Man te lokke ni Ker pa Lubanga onongo bicako loc ma gamente pa dano pud gitye ka loyo lobo. Me aryone, tito botwa ni Ker pa Lubanga birii pi naka dok pe kibilokone ki gamente mukene. Me adekke, lweny bitimme i kin Ker pa Lubanga ki gamente me lobo man. Ker pa Lubanga biloyo lweny ci dong bibedo gamente acel keken ma loyo lobo ducu. Ka dong, dano bibedo i te gamente maber pud dong loyo.

18. Lweny me agikki ma bibedo tye i kin Ker pa Lubanga ki gamente me lobo-ni kilwongo ningo?

 18 Ker pa Lubanga bicako loyo lobo nining? Ma peya lweny me agikki ma kilwongo ni Armagedon ocakke, jogi gibibwolo ‘luker me wi lobo ducu, me cokogi kacel pi mony i nino madit pa Lubanga Won Twer Ducu.’ Ada, lweny bibedo tye i kin gamente pa dano ki Ker pa Lubanga, ento Ker pa Lubanga aye biloyone.Niyabo 16:14, 16; nen Lok me Giko Buk Man me 10.

19, 20. Pingo wamito ni Ker pa Lubanga aye olo lobo-ni?

19 Pingo wamito Ker pa Lubanga? Wamito Ker pa Lubanga olo pi tyen lok adek. Me acel, wan wabedo dano ma luroc, pi man watwo dok wato. Ento Baibul tito ni i te loc pa Lubanga, dano bikwo pi naka. I adane, Jon 3:16 waco ni: “Lubanga con omaro lobo kumeno, omiyo iye Wode acel keken, wek dano ducu ma ye en owek to, ento obed ki kwo ma pe tum.”

20 Tyen lok me aryo mumiyo wamito Ker pa Lubanga en aye ni, jo maraco gitye ma gurumowa dyere. Jo mapol giloko lok goba, gikwalo kwo, dok bene gitimo tim tarwang. Wan pe watye ki kero me kwanyogi woko, ento Lubanga bitimone. Jo ma gitimo jami maraco kibijwerogi woko i lweny me Armagedon. (Kwan Jabuli 37:10.) Tyen lok me adek mumiyo wamito Ker pa Lubanga aye ni gamente pa dano goro, ger, dok opong ki camucana. Gamente magi pe gitye ki miti me konyo dano wek gulub cik pa Lubanga. Baibul waco ni “dano ma tye ki twero loyo jo mukene ki tek.”Latitlok 8:9.

21. Ker pa Lubanga bimiyo miti pa Lubanga cobbe i lobo nining?

 21 I nge lweny me Armagedon, Ker pa Lubanga bimiyo miti pa Lubanga cobbe i lobo. Me labolle, bijwero Catan ki jogine woko ducu. (Niyabo 20:1-3) Motmot, dano ducu bibedo ki yotkom dok to bibedo pe. Pi ginkok-ki, dano ducu ma lugen gibikwo i Paradic pi naka. (Niyabo 22:1-3) Ker-ri biweko kilonyo nying Lubanga. Man tyen lokke ngo? Tyen lokke ni ka gamente pa Lubanga ocako loyo lobo, dano ducu biworo nying Jehovah.—Nen Lok me Giko Buk Man me 21.

YECU ODOKO KABAKA AWENE?

22. Wangeyo nining ni Yecu pe odoko Kabaka i kare ma en tye i lobo nyo cutcut ma en ocito i polo?

22 Yecu opwonyo lulub kore me lega ni: “Ker meri obin.” Man onyuto atir ka maleng ni gamente pa Lubanga onongo bibino i anyim. Jehovah onongo kong biketo gamentene ka dong keto Yecu macalo Kabaka. Mono Yecu odoko Kabaka cutcut i nge cito i polo? Pe, en onongo myero kong okur. I nge kare mo ma Yecu ocer, Petero gin ki Paulo gunyuto man ka maleng i  kare ma gutito ni lok pa lanebi ma nonge i Jabuli 110:1 ocobbe i kom Yecu. I lok pa lanebi man, Jehovah owaco ni: “Bed i ngeta tung acuc i kabedo me deyo, nio ka abimiyo lukworri doko kom laten tyeni.” (Tic pa Lukwena 2:32-35; Jo Ibru 10:12, 13) Yecu onongo bikuro pi kare ma rom mene ma peya Jehovah okete macalo Kabaka?

Ker pa Lubanga bimiyo miti pa Lubanga cobbe i lobo

23. (a) Awene ma Yecu ocako loc macalo Kabaka me gamente pa Lubanga? (b) Wabinyamo gin ango i dul ma lubo man?

23 Pi mwaki mapol ma peya mwaka 1914 oromo, gurup pa Lukricitayo mo manok guniang ni mwaka meno bibedo mwaka ma pire tek ma lubbe ki lok pa lunebi me Baibul. Jami ma obedo ka timme i lobo cakke i 1914 omoko ni lokgi-ni onongo tye kakare. Yecu ocako loc macalo Kabaka i mwaka meno. (Jabuli 110:2) Cutcut i ngeye, kibolo Catan woko i lobo, dok kombeddi “karene tye manok.” (Niyabo 12:12) I dul ma lubo man, wabineno jami ma nyuto ni watye ka kwo i kare meno. Wabipwonyo bene ni cokcok-ki Ker pa Lubanga bimiyo miti pa Lubanga cobbe i lobo.—Nen Lok me Giko Buk Man me 22.