Kwa’ Ndem mè lé pôô jouô tseum. A pou té nzii wè, A ping té fou wè nzôkô. (Psaume 90:2) Ménkeu mbông émi nteu Biible fhô mbou Yi. (1 Timothée 1:11) Mpè pôngtè lé gheumtè yi nda’, mela’mi Yi mè lé pôô yimpè.​—Tông-ô Révélation 4:11.

Tsôô gning laa Ndem jiô, mela’mi a si ngô jwakné. Ndôkô ndeuè nguè A pou fang ntôkô jouô tseum; mbeunèt zi ping ngô zi mè ghô lé jiô, mbing lé pfeung. (Jean 1:18; 4:24) Mpè ghô ké njiô méntsi mi anè ajoumi a lé gheu. Mpè pè éfœu’: mè ghô fhô anè ntsi-ntsi méntaa-theu, ngheu méflawa, njiô nguè Ndem wè nkông-né pô léghi té mô’. Ntsi zi ngông ntseum lôk fang poup, é tsui yimpè nguè, a wuè mia pawa té ndhœuè.​—Tông-ô Romains 1:20.

Mpè nông ntông-ô Biible, a zi’nè yimpè mô’ méntsi Ndem tè zaa. Poup tè, Biible shoung-ô yimpè ajoumi Ndem kông, mbô zi a té kông. A zeung shoung pa’ a jiô épouô ménông poup, mbô pa’ ménou ntsi-ntsi pou ntshiè mvhô yi, a gheu poup.​—Tông-ô Psaume 103:7-10.

Yésso lé leu nguè: “Mô’ô weuk yi theuè lepwhou, nguè lézeung tchou é ghô ndaané-laané.” (Matthieu 6:9) Ndem wè mézeung wou’té émi mè lôk ntông-ô yi tè zaané, téta’, a ké mbing ngwè kwa’ lézeung tsi, é tsi pô gning-è té ghap. Aziè shoung-né ala’ lè, a wè kwa’ lézeung Ndem. Anè Yemba mè sènè lè “Joovah.” Émô’ pouô ping ntông lè “Yahweh.”​—Tông-ô Psaume 83:18.

Mè lé fôk kwa’ lézeung Ndem a nteu mébiible tè zaa, mbing neung mézeung-è wou’té pa’ Ndi mbô Ndem. Téta’, mè lé la’ ngué tii mvhô Biible, lézeung Ndem ghô wou té ntôk ngueô  7000. Yésso lé zèè ndoo sitsa’, nzi’nè épouô lé zhè lézeung Ndem.​—Tông-ô Jean 17:26.

Jiô vidéo Tè Ndem wè lézeung?

Tè ménou tépông émi ndoo sitsa’ ntseum, é si ntsuitè nguè Joovah Ndem, a té yimpè taa nteu yi wè? Émô’ épouô leu nguè, a gheu mpè jiô ngueô’ ndôk ntaatè  yimpè. Téta’, a pou té anouneuè.​—Tông-ô Jacques 1:13.

Ndem lé pôô yimpè anè ntsi zi mpè ngnwèt mè ghô kia lé gheuè lékông yi. Tè a té pông-ô yimpè tè’ lé zhè nguè, mpè ngnwèt mè ghô kia lé jou’ ntchou Ndem-è? (Josué 24:15) Émô’ épouô kang-a wôp lé gheu ménou tépông a mbou pimô’, mela’poup tè ngueô’ pou njheu ngông ntseum. A pou nzang-a Joovah tè’ a lé jiô ménou tépông mèt.​—Tông-ô Genèse 6:5, 6.

Joovah Ndem, éyi wuè yimpè a taa nteu yi, a si nkông-ô nguè mpè nang mé lékak. Nkwa pia a pou mbik ngueô’ ntseum, mbô épouô tépông épi gheuè mè jiô ngueô’. Biible kè’té shoung-ô ajoumi tshounè Ndem, a lé tshi neung nguè mpè jiô ngueô’ té ntshi tsétsông-ô. Mpè shi’ jiô ajoumi tshounè Yi lé gheu poup anè azi’né 8.​—Tông-ô 2 Pierre 2:9; 3:7, 13.

Joovah yè yimpè éshheu a lé tsia anè priya ntshouté nèt mbaatè yi. A tswhi ntchiitè awuè-wuè éyi lé pôô. (Psaume 65:2; 145:18) A kông-ô yi lé tchoussi méfaa. Mbô pa’ mpè mô’ fœu’ mpè té anè amô’ azou kou’, a jiô pa’ mpè fôk mbœu’ ndôk ngheuè lékông yi poup. Anouneu nguè mpè si ngô méghang méfaa, téta’, mpè ghô kwa’ ntchi’ méssoo Ndem.​—Tông-ô Psaume 103:12-14; Jacques 4:8.

Pa’ Joovah mè lé pôô yimpè la, a zèté nguè mpè kông-ô yi tè mbô mè laa mô’ gning poup kông-ô. (Marc 12:30) O nông ku’nè zi’nè lé zhè Joovah mbông-ô, tè zii wou lé gheuè ajoumi a kông, é ku’né kông-ô yi, é ping zeung tswhi tshouté nèt paatè yi.​—Tông-ô 1 Timothée 2:4; 1 Jean 5:3.