David jwakwete yaka 23 jwasasile kuti, “Panakulaga nalagasikaga mnope ni ndamo jakwakumbila achalume achimjangu. Myoyo naganisyaga kuti pachinjikula yichichenga nambo apano ngulagape ni ndamoji.”

 David ali Mklistu jwakusasaka kutenda yindu yakumsangalasya Mlungu. Nambo ana mpaka akombole kumsangalasya Mlungu kwineku ali mkwakumbila achalume achimjakwe? Ana Mlungu akusapikana wuli pakwawona ŵandu ŵakusatenda ndamo ja kugonana kwa achalumepe kapena achakongwepe?

•  Ana Baibulo jikusasala yamtuli?

•  Ana yeleyi yikugopolela kuti . . . ?

•  Nambi wuli naga . . . ?

 Ŵandu akusalekangana nganisyo pangani ja kugonana kwa achalume kapena achakongwepe, mwakamulanasoni ni ndamo kapena yilambo yakusatyochela. Nambosoni mwakusajiwonela nganiji anyamata ni ŵachikulile yikusalekangana. Aklistu ŵangakuya yine yakwe ligongo lyakuti ŵajinji akuganisya myoyo kapena ‘kujigalwa ni mbungo jilijose ja yakwiganya.’ (Aefeso 4:​14) Mmalo mwakwe, jemanjaji akusajiwona ngani jilijose kupwatikapo ngani ja kugonana kwa achalumepe kapena achakongwepe, mwakamulana ni mfundo sya m’Baibulo.

 Pakwamba ya ndamo jeleji, Baibulo jikusasala mwakupikanika chenene kuti:

•  “Mundu jwamlume akagona ni mundu jwamlume mjakwe mpela mwakusagonela ni mundu jwamkongwe.”​—Lefitiko 18:22.

•  “Mlungu ŵalesile jemanjajo kuti atendeje yakusakala yiyasakaga mitima jawo, . . . atamose achakongwe, ŵalesile kutenda yindu ya mu ulombela muyikusosechela kuŵela mu ulombela.”​—Aloma 1:​24, 26.

•  “Mkalilambusya, ŵandu ŵalilama, ŵakulambila milungu jine, ŵachikululu, ŵakusagonana achalumepe, ŵakusajiŵa, ŵa umbombo, ŵakolelwa, ŵakwasinjilila ŵane, kapena ŵali ŵawiyi ngisapochela Uchimwene wa Mlungu.”​—1 Akolinto 6:​9, 10.

 Maloŵe gaŵasasile Mlunguga gali gakusosekwa kwa mundu jwalijose. Chinga mundu jwine akusagonana ni jwamlume kapena jwamkongwe mjakwe, kapena akusagonana ni mundu jwakuti nganalombana najo, wosopewo akusasosekwa kukuya yeleyi. Mfundo jekulungwa jili jakuti, jwalijose akusasosekwa kulilekasya kuti akakumbilaga kutenda yindu yakusaŵengana nayo Mlungu.​—Akolose 3:5.

 Ana yeleyi yikugopolela kuti Baibulo jikusalimbikasya kuti twaŵenjeje ŵandu ŵakusagonana ni achalume kapena achakongwe achimjawo?

 Iyayi. Baibulo jangalimbikasya yakuŵengana ni mundu jwalijose, chinga akusagonana achalumepe kapena achakongwepe. Nambo jikusalimbikasya ya “kutama ni mtendele ni ŵandu wosope” mwangajigalila ndamo ja ŵanduwo. (Ahebeli 12:14) Myoyo kuli kulemwa kwaputa, kwanyosya kapena kwatendela ngasa ŵandu ŵakusagonana ni achalume kapena achakongwe achimjawo.

 Ana yeleyi yikugopolela kuti Aklistu asisyeje malamusi gagakusajitichisya ulombela wa achalume kapena achakongwepe?

 Baibulo jikusalosya kuti Mlungu jwalinganyisye kuti ulombela uŵeje wa jwamlume jumo ni jwamkongwe jumo. (Mateyu 19:​4-6) Nambope, kambilana ya malamusi ga boma pangani jakwamba ulombela wa achalume kapena achakongwepe, kukusakamulana ni ngani sya ndale ngaŵaga kulimbikasya ndamo syambone. Baibulo jikusalimbikasya Aklistu kuti akajinjililaga nawo mungani sya ndale. (Yohane 18:36) Myoyo, Aklistu ŵangalimbikasya kapena kusisya malamusi ga boma gagakusasala yakwamba ulombela wa achalume kapena achakongwe, soni kugonana kwa achalume kapena achakongwepe.

 Nambi wuli naga mundu jwine akusagonana ni jwamlume kapena jwamkongwe mjakwe, ana mundu jweleju mpaka achenje?

 Elo. Ŵandu ŵane mundaŵi ja ŵandumetume ŵatendagasoni yakulandanayi. Tukusala yeleyi ligongo lyakuti Baibulo jili jisasile yakuti ŵandu ŵakusagonana ni achalume kapena achakongwe achimjawo ngasapochela Uchimwene wa Mlungu, jasasilesoni kuti, “Ŵane mwa jemanja mwaliji myiyi kala.”​—1 Akolinto 6:​11.

 Ana yeleyi yikugopolela kuti ŵandu ŵaŵalesile ndamoji ŵangakumbilasoni kugonana ni achalume kapena achakongwe achimjawo? Iyayi. Baibulo jikusati: ‘M’wale umi wasambano. Umi welewu Mlungu jwenu akuwukolosya mwangalechesya kuti chimummanyilile kusyesyene.” (Akolose 3:​10) Kuchenga kwangamala soni kukusajigala ndaŵi.

 Nambi wuli naga mundu jwakusaka kutenda yakusasaka Mlungu, akulimbanape ni ndamo jakumbila kugonana ni jwamlume kapena jwamkongwe mjakwe?

 Mpela mwayikusaŵela ni kumbila chindu chilichose, mundu akusasagula kutenda yakukumbilayo kapena kwamba kuyileka. Ana mpaka atende chamtuli yeleyi? Baibulo jikusati, ‘Mkunde kuti msimu weswela umlongoleleje. Naga mkutenda myoyo, ngasimtendasoni yindu yele yajikusasaka ndamo jenu jakunonyela yakusakala.’​—Agalatiya 5:​16.

 Ayiweni, lilembali ngalikuŵecheta kuti mundujo ngasakolasoni ndamo jakunonyela yakusakala. Nambo likulosya kuti mpaka akombole kulimbana ni ndamo jakunonyela yakusakala. Mpaka akombole kutenda yeleyi naga akwete ndandanda jakulijiganya Baibulo soni kupopela.

 David, jwatumkolasile kundanda kwa nganiji nombe ŵajitichisye yeleyi. Jwalakwe jwasasile kuti jwakombwele kumalana ni ndamoji paŵaŵendile achinangolo ŵakwe ŵalisoni Aklistu kuti amkamuchisye. Jwalakwe jwatite, “Ngusapikana mpela natusile chindu chakusitopa mnope. Mwamti ngusayiwona kuti yindu yikanjendele chenene yikaŵe kuti nasalile mwachitema achinangolo ŵangu ya ndamoji.”

 Yindu yikusatujendela chenene patukulingalinga kupikanila malamusi ga Yehofa. Tukusayiwona kuti malamusi gakwe gali “gagoloka, gakusengwasya mtima” nambosoni ‘jwakugasunga akusapochela mbote jekulungwa.’​—Salimo 19:​8, 11.