Chakwawula kwa Aefeso 4:1-32
4 Myoyo, une jwandili mundende+ ligongo lya Ambuje, ngumchondelela jemanja kuti mjendeje mwakamulana+ ni kuŵilanjidwa kwenu.
2 Mjendeje mwakulinandiya,+ mwakufasa,* mwakuwusimana mtima+ soni mkundililaneje mwachinonyelo.+
3 Mlinjelinjeje kuŵa ŵakamulana mwakusunga mtendele wamkwete wawuli mpela chindu chakumkamulanya. Mtendele welewu mwawupatile ni chikamuchisyo cha msimu weswela.+
4 Pana chilu chimpepe+ soni msimu umpepe,+ mwakamulana ni yaŵatite pakumŵilanga kuti mkole chembecheyo chimpepe.+
5 Panasoni Ambuje ŵamo,+ chikulupi chimo soni ubatiso umo.
6 Panasoni Mlungu jumo jwali Atati ŵa wosope. Jwalakwe ali jwamkulungwa kupunda jwalijose, soni akusakamula masengo kupitila mwa wosopewe, nambosoni machili gakwe gakusakamula masengo palipose.
7 Sambano jwalijose jwetuwe ŵapochele mtuka walulele+ wa umbone mtima wekulungwa mwakamulana ni yaŵatite Klistu pakumlinjila jwalijose.
8 Pakuŵa Malemba gakusati, “Jwalakwe paŵakwesile kumalo gakwela mnope, ŵajigele achikapolo, ni kwapeleka ŵandu ŵeleŵa mpela mituka ja achalume.”+
9 Sambano ana maloŵe gakuti “ŵakwesile” gakugopolela chichi? Gakugopolela kuti pandanda ŵatulwiche pasi, pachilambo chapasi.
10 Jwele juŵatulwichejo ni jujojo juŵakwesile+ ni kwawula kwinani mnope kwakupunda kwinani kosope,+ ni chakulinga chakuti kupitila mwa jwalakwejo yindu yosope yiŵe yakwanila chenene.
11 Pa mituka jaŵapeleche jila ŵane ŵaliji ŵandumetume,+ ŵane ŵakulochesya,+ ŵane ŵakulalichila,*+ ŵane abusa* soni ŵakwiganya.+
12 Ŵatesile yeleyi kuti ŵajongolele* ŵaswelawo, kuti akamule masengo gakutumichila, soni kuti ataŵe chilu cha Klistu,+
13 mpaka wosopewe patuchiŵa ŵakamulana pachikulupi soni pakummanyilila chenene Mwanache jwa Mlungu, ni kwika pamsingu wa mundu jwamkulungwa+ mpela msingu waŵayiche Klistu.
14 Myoyo tukaŵasoni ŵanache, ŵakujigalika mpela kuti tukututidwa ni matumbela, nambosoni tukaŵa ŵakujigalika aku nakuku ni chijiganyo cha mtundu uliwose+ chakutyochela kwa ŵandu ŵaunami ŵakusiŵasokonasya ŵane ligongo lya kukalamuka kwawo.
15 Nambo kwende tuŵecheteje yisyesyene, soni ligongo lya chinonyelo, kwende tukule mu yindu yosope mwakamulana ni Klistu, jwali mtwe wa mpingo.+
16 Kupitila mwa jwalakwejo yiŵalo yosope ya chilu+ yikusalumbikana chenene soni chilucho chikusaŵa chakamulana chenene ni mbindi jilijose jajikusapeleka yakusosechela ya chilu. Naga chiŵalo chilichose chikukamula masengo gakwe chenene, chilucho chikusakula ni kuŵa chakulimbangana m’chinonyelo.+
17 Myoyo ngumkalamusya jemanja pameso pa Ambuje kuti, mleche kutenda yindu mpela mwakusatendela ŵandu ŵamitundu jine,+ pakuŵa jemanjaji akusatenda yindu mwakuya nganisyo syawo syangali mate.*+
18 Ŵandu ŵeleŵa nganisyo syawo sili mu chipi soni ali ŵakutalikangana ni umi wakusapeleka Mlungu. Yeleyi yili myoyo ligongo lya ujinga wawuli mwa jemanjajo, soni ligongo lya kumula kwa mitima jawo.
19 Ligongo lyakuti jemanjaji ngakumanyililasoni ndamo syambone, ŵajinjilile mu ndamo jakulijasilila*+ kuti atendeje yakunyalaya ya mtundu uliwose mwangalilekasya.
20 Nambo jemanja mwalijiganyisye mwamti apano mkumanyilila kuti Klistu nganaŵa myoyo.
21 Yesu ŵamjiganyisye jemanja yayili yisyesyene, soni naga mwampikene ni kulijiganya kutyochela kwa jwalakwejo, nikuti yeleyi mkuyimanyilila chenene.
22 Jemanja mwalijiganyisye kuti mtyosye umundu wenu wakala+ wawukusakamulana ni umi wenu wakala. Umundu welewu ukupitilisya kuŵa wakusakala ligongo lya yakumbila ya mitima jenu yayikusamlambusya jemanja.+
23 Mpitilisye kuchenga kuti machili gakwendechesya nganisyo syenu gaŵe gasambano.+
24 Nambosoni m’wale umundu wasambano+ wawapanganyidwe mwakamulana ni yakusasaka Mlungu. Umundu welewu ukusamtendekasya mundu kuŵa jwakulungama yisyesyene soni kuŵa jwakulupichika.
25 Pakuŵa sambano mlesile yaunami, jwalijose mwa jemanja aŵecheteje yisyesyene kwa mjakwe,+ ligongo tuli yiŵalo ya chilu chimpepe.+
26 Naga mtumbile, mlolechesye kuti mkalemwa.+ Mkakunda kuti lyuŵa likapile mli chitumbilile.+
27 Mkasimumpa upile Satana.*+
28 Jwalijose jwawiyi aleche wiyiwo. Mmalomwakwe akamuleje masengo mwakulimbichila. Akamuleje masengo gambone ni makono gakwe,+ ni chakulinga chakuti apate yindu yampaka agaŵane ni ŵakulaga.+
29 Mkakunda kuti maloŵe galigose gewole gakopoche pakamwa penu,+ nambo mŵecheteje yayili yambonepe kuti yalimbikasye ŵane mpela mwayikusosechela, soni kuti yimkamuchisye jwakupikanajo.+
30 Nambosoni mkawutesyaga chanasa* msimu weswela wa Mlungu.+ Mlungu ŵamdindile+ jemanja ni msimuwo* kuti chimgopoledwe pa lisiku lya chikulupusyo kupitila mu mbopesi jakutuwombola.+
31 Mtyosye mwa jemanja uŵengani,+ kutumbila, kupya mtima, kukalipa soni maloŵe gachipongwe.+ Nambosoni mtyosye chindu chine chilichose chakusakala.+
32 Nambo mwatendeleje ŵane yambone, mŵeje ŵakutendelana chanasa,+ soni ŵakululuchilana ni mtima wosope mpela mwele Mlungu ŵamkululuchile jemanja kupitila mwa Klistu.+
Maloŵe Gamwiŵanda
^ Ŵane akusati “mwakulijinichila.”
^ Kapena kuti “ŵakulalichila ngani syambone.”
^ Ŵane akusati “ŵakuchinga.”
^ Kapena kuti “kuti ŵajiganye.”
^ Kapena kuti “syangakamuchisya.”
^ Kapena kuti “ndamo jakutesya sooni; ndamo jangalilekasya; ndamo jakulilechelela.” Mu Chigiliki akusati, a·sel′gei·a. Alole mbali jakuti, Kugopolela kwa Maloŵe.
^ Mu Chigiliki ŵatiga, “Jwakulambusya.”
^ Kapena kuti “mkawudandawulisyaga.”
^ Kapena kuti “chidindo.”
