Chakwawula kwa Agalatiya 5:1-26
5 M’weji tukwete ufulu* welewu ligongo Klistu ni juŵatugopwele ku ukapolo wa Chilamusi. Myoyo jemanja mŵeje ŵakulimbangana,+ soni mkakunda kuti mŵesoni achikapolo.+
2 Mpikane jemanja, une Paulo ngumsalila kuti naga mkuwumbala nikuti yatesile Klistu kwa jemanja yichiŵa yangali masengo.+
3 Ngusaka namkumbusye jwalijose kuti naga mundu akuwumbala jwalakwejo akusosekwa kukuya yosope yayili m’Chilamusi.+
4 Jemanja ŵamkusaka kuŵa ŵakulungama ligongo lyakukuya chilamusi+ mli ŵakutalikangana ni Klistu. Nambosoni nganimŵa ŵakuŵajilwa kupochela umbone mtima wakwe wekulungwa.
5 Nambo kwa m’weji, msimu weswela ukutukamuchisya kwembecheya mwakusachilila yakuyichisya yakulungama kwetu yayichiyika ligongo lya chikulupi.
6 Kwa ŵakumkuya ŵa Klistu Yesu, chinga mundu ali jwamwumbale kapena jwangawumbala, yeleyo yangali masengo.+ Nambo chakusosekwa mnope chili kola chikulupi chachikusakamula masengo ligongo lya chinonyelo.
7 Jemanja mwaliji mkuwutuka chenene.+ Ana ŵani ŵamsokonasisye kuti mleche kupikanila yayili yisyesyene?
8 Yeleyitu nganiyiŵa yakutyochela kwa Mlungu juŵamŵilasile jemanja.
9 Yakusasaŵisya yamnono yikusasasaŵisya mtanda wosope.+
10 Ngukulupilila kuti jemanja ŵamli ŵakamulana ni Ambuje+ mkwitichisya yanguŵechetayi. Nambo mundu jwakutandisya yakumsokonasyayi,+ chinga ali mundu jwamtuli, chachipochela chilango* chakumŵajila.
11 Achalongo achimjangu, yikaŵe kuti ngupitilisya kulalichila ngani ja kuwumbala, ana ŵandu akapitilisye kundagasya? Yikaŵe kuti ngulalichilape ngani ja kuwumbala nikutitu chitela chakulagasichila*+ ngamkanichiŵasoni chakwakuŵasya ŵandu.
12 Une nganonyele kuti ŵandu ŵakulinga kumsokonasyawo agambe kulichela* achimsyene.*
13 Achalongo achimjangu, jemanja mwaŵilanjidwe kuti mŵe ŵaufulu. Nambotu mkakamulichisyaga masengo ufulu welewu pakusaka kutenda yakumbila ya chilu.+ Mmalomwakwe mtumichilaneje mwachinonyelo mpela achikapolo.+
14 Pakuŵa Chilamusi chosope chikusakwanilichikwa mu lilamusi limo lyakuti, “Mumnonyeleje mjenu mpela yamkusati pakulinonyela mwasyene.”+
15 Nambo naga mkutanda kulumana soni kutawunana,+ msamale kogopela kuti chimwulasyane.+
16 Une ngumsalila kuti, mpitilisye kwenda mwakulongoleledwa ni msimu weswela.+ Naga mkutenda myoyo, ngasimkuya yakumbila ya chilu.+
17 Pakuŵa yakumbila ya chilu yikusalimbana ni msimu weswela, soni msimu weswela ukusalimbana ni chilu. Yindu yeleyi yikusatamila kulimbana mwamti jemanja mkusalepela kutenda yindu yamkusaka.+
18 Konjechesya pelepa, naga msimu weswela ukumlongolela jemanja, nikuti nganimŵasoni pasi pa chilamusi.
19 Sambano masengo ga chilu gakusawonechela chenene. Masengo gakwe ni aga: chikululu,*+ yausakwa, ndamo jakulijasilila,*+
20 kulambila milungu jakusepa, kutenda yamisimu,*+ uŵengani, ukangani, jelasi,* kupya mtima, ungapikanganana, kugaŵikangana, kutandisya magulu gakwimuchila,
21 kumbila ya ŵane mwakulemwecheka, kukolelwa,+ kutenda mapwando gangalondeka,* soni yindu yine yakulandana ni yeleyi.+ Mpela munatendele pakumkalamusya pandanda pala kuti msamale, ngumkalamusyasoni jemanja pakwamba yindu yeleyi kuti wosope ŵakusatenda yindu yeleyi ngasapochela Umwenye wa Mlungu.+
22 Nambo ndamo syawukusakoposya msimu weswela* ni asi: chinonyelo, chisangalalo, mtendele, kuwusimana mtima, umbone mtima, umbone,+ chikulupi,
23 kufasa,* soni kulilekasya.+ Pangali lilamusi lililyose lyakulekasya yindu yeleyi.
24 Nambosoni ŵele ŵali ŵakwe ŵa Klistu Yesu ŵachikomele pachitela chilu chawo pampepe ni yakusaka yawo soni yakumbila ya mitima jawo.+
25 Naga tukutama mwakulongoleledwa ni msimu weswela, kwende tupitilisye kwenda chenene mwakamulana ni msimuwo.+
26 Tukaŵa ŵakulikwesya,+ tukatandisyaga ukangani,+ soni tukatendelanaga jelasi.
Maloŵe Gamwiŵanda
^ Pelepa akugopolela kuti nganaŵa achikapolo.
^ Ŵane akusati “chamuko.”
^ Alole mbali jakuti, Kugopolela kwa Maloŵe.
^ Alole mbali jakuti, Kugopolela kwa Maloŵe.
^ Kulichela ni chakulinga chakuti aŵe ŵangaŵajilwa kutenda yindu ya m’chilamusi yaŵachisyaga ŵandu ŵane kuti ayitendeje.
^ Mu Chigiliki akusati, por·nei′a. Alole mbali jakuti, Kugopolela kwa Maloŵe.
^ Kapena kuti “ndamo jakutesya sooni; ndamo jangalilekasya; ndamo jakulilechelela.” Mu Chigiliki akusati, a·sel′gei·a. Alole mbali jakuti, Kugopolela kwa Maloŵe.
^ Kapena kuti “yamasenga.” Maloŵe ga Chigiliki ga pelepa mpaka gagopolelesoni kukamulichisya masengo mitela jakusokonasya mtwe.
^ Ŵane akusati “dumbo.”
^ Kapena kuti “yindimba yangalondeka.” Gelega gali mapwando gele ŵandu akusatendaga yindu mwangalilekasya.
^ Mu Chigiliki ŵatiga, “chisogosi cha msimu weswela.”
^ Ŵane akusati “kulijinichila.”
