Lefitiko 18:1-30
18 Yehofa ŵapitilisye kuŵecheta ni Mose kuti,
2 “Mŵechete kwa Ayisalayeli ni mwasalile jemanjajo kuti, ‘Une ndili Yehofa Mlungu jwenu.+
3 Mkatendaga yindu mpela yakusatenda ŵandu ŵa m’chilambo cha Iguputo, chilambo chamwatamaga jemanja. Mkatendagasoni yindu mpela yakusatenda ŵandu ŵa m’chilambo cha Kanani, chilambo chele changumpa jemanja,+ nambosoni mkakuyaga ndamo syawo.
4 Mkuyeje yangumlamula jemanja soni msunjeje malamusi gangu nambosoni mpikanileje yeleyi.+ Une ndili Yehofa Mlungu jwenu.
5 Mkuyeje malamusi gangu soni mpikanileje yangumlamulayi. Jwalijose jwakutenda yeleyi+ chachipitilisya kutama ni umi. Une ndili Yehofa Mlungu jwenu.
6 “‘Mundu jwalijose akamŵandichilaga jwachibale* jwakwe kuti agone najo.*+ Une ndili Yehofa Mlungu jwenu.
7 Ngamkusosekwa kugona ni baba ŵenu nambosoni ngamkusosekwa kugona ni mama ŵenu. Ŵelewo ali mama ŵenu, myoyo ngamkusosekwa kugona nawo.
8 “‘Ngamkusosekwasoni kugona ni ŵakongwe ŵa baba ŵenu.+ Kweleko kuli kwatesya sooni baba ŵenu.*
9 “‘Mkagona ni alumbuŵenu, chinga alumbuŵenu ŵa baba ŵenu ŵane kapena alumbuŵenu ŵa mama ŵenu ŵane, chinga alumbuŵenuwo apagwile m’liŵasa lyamkutama mmwejo kapena line.+
10 “‘Ngamkusosekwa kugona ni mwanache jwamkongwe jwali chisukulu chenu, chinga chisukulucho chakuŵeleka mwanache jwenu jwamlume kapena chakuŵeleka mwanache jwenu jwamkongwe, ligongo kutenda yeleyo kuli kulitesya sooni mwasyene.*
11 “‘Ngamkusosekwa kugona ni mwanache jwamkongwe jwa ŵakongwe ŵa baba ŵenu, jwali mwanache jwa baba ŵenu, ligongo ŵelewo ali alumbuŵenu.
12 “‘Ngamkusosekwa kugona ni baba ŵenu ŵakongwe, ligongo ŵelewo ali myasi jimo ni baba ŵenu.+
13 “‘Ngamkusosekwa kugona ni mama ŵenu ŵanandi kapena ŵakulungwa, ligongo ŵelewo ali myasi jimo ni mama ŵenu.
14 “‘Mkatesya sooni akuluŵawo baba ŵenu kapena apwawo* mwakugona ni ŵamkwawo, ligongo ŵelewo ali alongo ajenu.+
15 “‘Ngamkusosekwa kugona ni ŵamkwawo mwanache jwenu jwamlume.+ Ŵelewo ali akwegwe ŵenu, myoyo ngamkusosekwa kugona nawo.
16 “‘Ngamkusosekwa kugona ni ŵamkwawo achimwene ŵenu kapena ŵamkwawo apwenu,+ ligongo kweleko kuli kwatesya sooni achimwene ŵenu kapena apwenuwo.*
17 “‘Pamlombele ŵakongwe, ngamkusosekwa kugonasoni ni mwanache jwawo jwamkongwe.+ Ngamkusosekwasoni kugona ni chisukulu cha ŵamkwenuwo, chinga chisukulucho chakuŵeleka mwanache jwawo jwamlume kapena mwanache jwawo jwamkongwe, ligongo jemanjaji ali alongo achimjawo ŵa ŵamkwenuwo. Jeleji jili ndamo jakutesya sooni.
18 “‘Ngamkusosekwa kujigala akuluŵawo ŵamkwenu kapena apwawo kuti aŵe ŵamkwenu ŵaŵili+ ni kugonaga nawo, ŵamkwenuwo ali chiŵela umi.
19 “‘Mkaŵandichila ŵakongwe kuti mgone nawo+ pandaŵi jakoga.*
20 “‘Mkagonaga ni ŵakongwe ŵa ajenu ni kulitendekasya kuŵa ŵangaswejela.+
21 “‘Ngamkusosekwa kukunda kuti mwanache jwenu jwalijose ampeleche kwa Moleki.+ Mkalisakasya lina lya Mlungu jwenu m’litala lyelelyo.+ Une ndili Yehofa Mlungu jwenu.
22 “‘Ngamkusosekwa kugona ni jwamlume mpela yamkusati pagona ni jwamkongwe.+ Jeleji jili ndamo jakunyalaya.
23 “‘Jwamlume ngakusosekwa kugona ni chinyama ni kulitendekasya kuŵa jwangaswejela. Nambosoni jwamkongwe ngakusosekwa kulipeleka kwa chinyama kuti agone nacho.+ Jeleji jili ndamo jakutindana ni chipago.
24 “‘Mkalitendekasya kuŵa ŵangaswejela ni ndamo syelesi. Pakuŵa ŵandu ŵa mitundu jine ŵangwatopola pameso penu alisakesye ni ndamo syosope syenesi ni kuŵa ŵangaswejela.+
25 Ni ligongo lyakwe chilambocho chili changaswejela. Unejo chinjipeleka chilango* kwa ŵandu ŵa m’chilambomo ligongo lya yakulemwa yawo, mwamti chilambocho chichajasa ŵandu ŵakutama mwelemo.+
26 Nambo jemanja mkuyeje malamusi gangu soni mpikanileje yangumlamulayi.+ Ngamkusosekwa kutenda chine chilichose mwa yindu yakunyalaya yeleyi, chinga mundujo jwa Chiyisalayeli kapena mundu jwamtundu wine jwakutama pasikati penu.+
27 Pakuŵa yindu yakunyalaya yosopeyi ni yaŵele ali mkutenda ŵandu ŵaŵele ali mkutama m’chilambo chamkwawula jemanjacho,+ mwamti chilambocho sambano chili changaswejela.
28 Myoyo jemanja mkaja kuchisakasya chilambocho pakogopela kuti mpaka chimjase mpela yachichijile pakwajasa ŵandu ŵa mitundu jine ŵaŵele ali mkutama m’chilambomo jemanja mkanimŵe kwawula.
29 Naga mundu jwalijose akutenda chimo mwa yindu yakunyalaya yeleyi, mkusosekwa kumwulaga mundu jwelejo kuti akasimanikwasoni pasikati pa ŵandu ŵakwe.
30 Mpikanileje yosope yangumlamulayi mwakuŵambala kutenda ndamo syakusakala syaŵele ali mkutenda ŵandu ŵa m’chilambomo jemanja mkanimŵe kwawula.+ Mŵambale ndamosi kuti mkalisakasya nasyo. Une ndili Yehofa Mlungu jwenu.’”
Maloŵe Gamwiŵanda
^ Chibale chakwamba m’chaputala chelechi chili chakuŵandikana mnope.
^ Mu Chihebeli ŵatiga, “kuti amwule.” Yeleyi yikupwatikasoni ndime sine mu chaputalachi pagakusimanikwa maloŵe gakuti “kugonana.”
^ Mu Chihebeli ŵatiga, “kuli kwawula baba ŵetu.”
^ Mu Chihebeli ŵatiga, “ligongo kutenda yeleyo kuli kuliwula mwasyene.”
^ Mu Chihebeli ŵatiga, “Mkawula baba ŵenu ŵanandi kapena ŵakulungwa.”
^ Mu Chihebeli ŵatiga, “kweleko kuli kwawula achimwene ŵenu kapena apwenu.”
^ Ŵane akusati “kumwesi; magono.”
^ Ŵane akusati “chamuko.”
