Ana ngaŵa mkwiticisya kuti naga ŵandu akusatenda katangale nikuti boma jajikwalamulila ŵanduwo mpaka jitendejesoni katangale? Naga yili m’yoyo, nikuti boma jangali katangale ngaŵa mkutyocela pasikati pa ŵandu. Baibulo jikusasala ya boma jangali katangaleji. Bomaji jili Ucimwene wa Mlungu wele Yesu ŵajiganyisye ŵakumkuya ŵakwe kuti awupopeleleje.—Matayo 6:9, 10.

Ucimwene wa Mlungu uli boma jisyesyene jakwinani. Bomaji jicijinjila m’malo mwa maboma gosope ga ŵandu. (Salimo 2:8, 9; Ciunukuko 16:14; 19:19-21) Gane mwa majali gacacipata ŵandu kutyocela ku Ucimwenewu gali kumasya katangale jwa m’boma. Alole yindu msano ni cimo yayikulosya kuti Ucimwenewu ucikwanilisya kumasya katangale.

CAKUSAWUSYA CACIPALI: Ŵandu ni ŵakusapeleka mbiya syakwendecesya maboma kupitila m’misongo. Yeleyi yikusatendesya kuti acakulungwakulungwa ŵane ajiŵeje mbiyasyo. Acakulungwakulungwa ŵane akusapocela katangale kwa ŵandu kuti ŵatulucisye misongo kapena yindu yakusaka kulipila ku boma. Yakuyicisya yakwe, boma jikusakwesya misongo kuti jiwucisye yajilusile. Nambo yeleyi yikusajonjecesyasoni katangale. M’cilambo cati m’yiyi, ŵandu ŵacilungamo ni ŵakusalaga mnope.

KUMASYA KWAKWE: Macili ga Ucimwene wa Mlungu gakusatyocela kwa Mlungu jwamacili gose, Yehofa. * (Ciunukuko 11:15) Kuti ujende cenene wangasosekwa kuti ŵandu apeleceje misongo. Nambo, ligongo lya ‘macili’ ga Mlungu, soni koloŵa makono kwakwe tukusasimicisya kuti Ucimwenewu ucakamucisya ŵandu kupata yosope yakusalajila.—Yesaya 40:26; Salimo 145:16.

CAKUSAWUSYA CACIPALI: Susan Rose-Ackerman, jwatumsasile mungani jandanda jila ŵasasilesoni kuti, katangale mpaka amale “naga acakulungwakulungwa ŵaboma ali alesile katangalejo.” Ŵandu ŵangakulupilila kuti boma mpaka jimasye katangale naga jikwamba kulimbicila kumasya katangale jwa ŵapolisi kapena jwa ŵakulola yakwinjila ni yakopoka m’cilambo nambo acakulungwakulungwawo ali mkutendape mtetowu. Soni atamose jwakulamulila jwambone ali jwangali umlama. Baibulo jasasile kuti “pangali mundu jwakulungama pacilambo capasi jwakusatenda yambone ndaŵi syosope.”—Mlaliki 7:20.

KUMASYA KWAKWE: Mwakulekangana ni ŵandu ŵangali umlama, Yesu Klistu jwaŵasagulidwe ni Mlungu kuŵa Jwakulamulila jwa Ucimwene wakwe, ngaŵa mkutenda yindu yakulemweceka. Yesu ŵalosisye yeleyi paŵakanile kupocela katangale jwamkulungwa mnope. Satana ŵamsalile Yesu kuti campe “ucimwene wosope wapasi pano ni ukulungwa wakwe.” Jwakulamulila jwa cilamboju ŵatite cacimpa Yesu yosopeyo naga akumlambila. (Matayo 4:8-10; Yohane 14:30) Atamose pandaŵi jele Yesu ŵamlagasyaga mpaka kuwa, ŵaliji jwagoloka mwati ŵakanile kumwa mtela wawukamkamucisye kuti akapikana kupweteka mnope, nambo ukamtendekasisye kuti mtwe wakwe ukakamula. (Matayo 27:34) Pakuŵa Mlungu ŵamjimwisye ni kwawula kwinani, Yesu alosisye kuti ali jwakuŵajilwa kulamulila Ucimwenewo.—Afilipi 2:8-11.

CAKUSAWUSYA CACIPALI: Yilambo yejinji yikusatenda yisagula mwakutamilicika. Ŵandu akusaganisya kuti yisagula yikusakamucisya kuti atyosye acakulungwakulungwa ŵakatangale. Nambo yisyesyene yakwe yili yakuti kunyenjelela ŵandu kutenda yisagula kukusalimbikasya katangale, atamose mu yilambo yakusicila.  Pakwanyenjelela ŵandu, ŵasicile mpaka atendekasye kuti ŵandu asagule mundu jwine jwakwe pa yisagula.

John Paul Stevens jwakulamula magambo ku Luŵala Lwekulungwa lwa Magambo ŵalembile kuti yeleyi yikusajogoya “ngaŵaga ulamusipe wa Boma, nambo yikusatendekasyasoni kuti ŵandu alece kujikulupilila bomajo.” Ni ligongo lyakwe yili yangasimonjesya kuti ŵandu ŵajinji pacilambo cosope akusaganisya kuti makuga ga ndale ni gagakusatenda katangale mnope.

KUMASYA KWAKWE: Ucimwene wa Mlungu ucityosya yakusawusya yosope yayikusayika ligongo lya kunyenjelela ŵandu kapena yisagula, ligongo ŵakulamulila ŵa Ucimwenewo ngasacenga. (Danieli 7:13, 14) Pakuŵa Mlungu ni juŵamsagwile Jwakulamulila jwakwe, ngasipasosekwa kutenda yisagula kapena kumtyosya jwakulamulilajo. Kulimba kwa Ucimwene kweleku kucikamucisya kuti Ucimwenewo ukamucisyeje mnope ŵandu mpaka kalakala.

CAKUSAWUSYA CACIPALI: Mpaka aganisye kuti kutamilikasya malamusi gasambano mpaka kukamucisye kuti yindu yijendeje cenene. Nambope, acinamatetule ayiweni kuti ndaŵi syejinji konjecesya malamusi kukusatendekasya kuti ŵandu apatilepo upile wakutenda katangale. Konjecesya pelepa, kutamilikasya malamusi gakulekasya mteto wa katangale kukusasaka yejinji nambo gangakamucisya mnope.

KUMASYA KWAKWE: Malamusi ga mu Ucimwene wa Mlungu gali gapenani kupunda ga maboma ga ŵandu. Mwambone, m’malo mwakwamba kwasalila ŵandu yakusosekwa ni yangakusosekwa kutenda, Yesu ŵagambile kupeleka lilamusi lyalikusakolanjidwa kuti Lilamusi lya Ndamilo. Jwalakwe ŵatite: “Mwatendeleje ŵandu ŵane mpela mumkusacila kuti ŵane amtendeleje jemanja.” (Matayo 7:12) Cakusosekwa mnope ni malamusi ga mu Ucimwenewu cili cakuti gakusakamucisya ŵandu pa yakuganisya, soni yakutenda. Yesu ŵatite, “Mumnonyeleje mjenu mpela mwamkusalinonyelela m’mwe mwasyene.” (Matayo 22:39) Mlungu jwakusamanyilila yayili mumtima, ni jwampaka jutamilikasye malamusiga.—1 Samueli 16:7.

CAKUSAWUSYA CACIPALI: Ŵandu akusatenda katangale ligongo lyakutunduka, soni kulinonyela. Acakulungwakulungwa ŵaboma, soni ŵandu akusalosya ndamo syakusakalasi. Pangani ja nyumba jajagwile ku  Seoul jatujikolasile mu ngani jandanda jila, acakulungwakulungwa ŵaboma ŵapocele katangale kutyocela kwa ŵakutaŵawo ŵaŵamanyililaga kuti kupeleka katangale mpaka kuŵe kwangakatala mnope kulekangana ni kamulicisya masengo yida yakulimba, soni kuya malamusi gakataŵe.

Kuti katangale amale, ŵandu akusosekwa kwajiganya yampaka atende pakumasya yakulinga yakusakala yayatamilicice m’mitima mwawo, yayili kutunduka ni kulinonyela. Nambope, maboma ga ŵandu gali gangasacilila kwajiganya ŵandu yeleyi, soni gangali macili gakutendela yeleyi.

KUMASYA KWAKWE: Ucimwene wa Mlungu ukusakamucisya ŵandu kumasya katangale pakwajiganya mwampaka aŵambalile yakulinga yakusakala yayikusatandisya mtetowu. * Majiganyoga gakusakamucisya kuti ‘acenje mitima ni nganisyo syawo kuŵa syasambano.’ (Aefeso 4: 23) Akusalijiganya kuŵa ŵakwikutila ni ŵakwanonyela ŵane mmalo mwakuŵa ŵakutunduka, soni ŵakulinonyela.—Afilipi 2:4; 1 Timoteo 6:6.

CAKUSAWUSYA CACIPALI: Atamose m’cilambo cambone, soni cakwajiganya ŵandu ŵakwe ndamo syambone, nambope ŵane akusasagula kuŵa ŵangakulupicika, soni ŵakatangale. Acinamatetule akusati ali ni ligongo lyakwe maboma ngaŵa mkumasya katangale. Nambo mabomaga gakusati mpaka ganandiye katangale, soni yakusajonanga ŵandu ligongo lya mtetowu.

KUMASYA KWAKWE: Ciwanja cakulimbana ni katangale pacilambo cosope casasile kuti, kuti boma jikombole kulimbana ni katangale jikusosekwa kwalimbikasya ŵandu kuti aŵe “ŵakulupicika, ŵakuwona mtima, soni ŵakusamala yindu.” Atamose kuti yeleyi yili yakulinga yambone, Ucimwene wa Mlungu ngawukusagamba kulimbikasya ndamosi, nambo ukusasaka kuti ŵandu ŵakwe atendeje yeleyi. Baibulo jikusasala kuti “ŵaumbombo” ni “ŵawunami” ngasajinjila mu Ucimwene.—1 Akolinto 6:9-11; Ciunukuko 21:8.

Ŵandu mpaka alijiganye kuti akuye ndamo syambonesi mpela mwaŵatendele Aklistu ŵandanda. Mwambone, ndumetume jwine lina lyakwe Simoni ŵasakaga kwapa mbiya ŵandumetume ŵane kuti amgaŵile macili ga msimu weswela. Nambo ŵandumetumewo ŵakanile katangalejo ni ŵamsalile kuti: “Mpitikuce mtima sambano mlece ungalumbana wenu.” Paŵamanyilile kogoya kwa nganisyo syakwe syakulemwecekasyo, jwalakwe ŵaŵendile ŵandumetumewo kuti ampopelele kuti akakolasoni mtima welewo.—Masengo 8:18-24.

Cinga wawojo akusatyocela m’cilambo capi, nambo akwete upile wakwinjila mu Ucimwene wa Mlungu. (Masengo 10:34, 35) Majiganyo gawukusapeleka Ucimwenewu, gagakusimanikwa pacilambo cosope mpaka gakamucisye kumanyilila yampaka atende kuti akajinjile mu Ucimwenewu. Ŵamboni sya Yehofa caciŵa ŵakusangalala kwalosya mwakusatendela lijiganyo lya Baibulo lyalulele. Lijiganyoli mpaka litendekwe kwa maminisi 10, kapena kupunda cijuma cilicose. Yine yampaka alijiganye yili yakwamba “ngani syambone syakwamba ya Ucimwene wa Mlungu,” soni yawucitenda Ucimwenewu pakumasya katangale jwa m’boma. (Luka 4:43) Tukwaŵenda kuti aŵecetane ni Ŵamboni ŵa mumkuli wawo kapena ajawule pa Webusayiti jetu ja jw.org/yao.