Ngani sya Mateyu 6:1-34
6 “Msamale kuti mkalosyaga chilungamo chenu pameso pa ŵandu ni chakulinga chakuti amwoneje.+ Naga mkutenda yeleyi ngasimpochela chilichose kutyochela kwa Atati ŵenu ŵali kwinani.
2 Myoyo pamkwapa ŵandu ŵakulaga mituka jakulosya chanasa,* mkagombaga lipenga mpela mwakusatendela ŵandu ŵachinyengo m’masunagoge soni m’misewu, ni chakulinga chakuti ŵandu ŵalapilileje. Nditu ngumsalichisya, jemanjaji apochele kala mbote* jawo josope.
3 Nambo mmwejo, pamkwapa ŵandu ŵakulaga mituka jakulosya chanasa, mkono wenu wamchiji ukamanyilila yawukutenda mkono wenu wamlyo,
4 kuti yambone yamkutendayo yiŵe yangawonechela kwa ŵandu. Pamtesile yeleyo Atati ŵenu ŵakusalola ali kwangawonechela, chachimwuchisya.+
5 “Nambosoni jemanja pamkusaka kupopela mkatendaga yindu mpela ŵachinyengo ŵala,+ pakuŵa jemanjaji akusanonyela kwima m’masunagoge soni m’malekano ga misewu jekulungwa ni kupopelaga kuti ŵandu ŵawone.+ Nditu ngumsalichisya, jemanjaji apochele kala mbote jawo josope.
6 Nambo mmwejo pamkusaka kupopela, mjinjileje m’chipinda chenu, ni kuwugala litanga, kaneko mpopeleje kwa Atati ŵenu ŵali kwangawonechela.+ Pamtesile yeleyo Atati ŵenu ŵakusalola ali kwangawonechela, chachimpa upile.
7 Pamkupopela, mkasalaga yindu yimopeyo mwakuwilisyawilisya mpela mwakusatendela ŵandu ŵamitundu jine, pakuŵa jemanjaji akusaganisya kuti Mlungu chiŵapikane naga akuŵecheta yindu yejinji mnope.
8 Myoyo mkaŵa mpela jemanjaji, ligongo Atati ŵenu akusamanyilila yamkusaka+ jemanja mkanimwaŵende.
9 “Nambo jemanja mpopeleje chamti myi:+
“‘Atati ŵetu ŵakwinani, lina+ lyawo lichimbichikwe.*+
10 Umwenye wawo+ uyiche. Yakusaka yawo+ yitendekwe pachilambo chapasi, mpela mwayikutendechela kwinani.+
11 Atupe yakulya yalelo,*+
12 soni atukululuchile yakulemwa yetu,* mpela mwatutendele m’weji pakwakululuchila ŵatulemwechesye.*+
13 Akatujinjisya mu kulinjidwa,+ nambo atukulupusye* kwa jwakusakalajo.’+
14 “Naga jemanja mkwakululuchila ŵandu yakulemwa yawo, Atati ŵenu ŵakwinani chachimkululuchilasoni yakulemwa yenu.+
15 Nambo naga ngamkwakululuchila ŵandu yakulemwa yawo, Atati ŵenu ngasamkululuchilasoni yakulemwa yenu.+
16 “Pamkulijima kulya,+ mleche kulosya ngope jachanasa mpela mwakusatendela ŵachinyengo ŵala, pakuŵa jemanjaji akusasakasya ngope syawo* kuti awoneche kwa ŵandu kuti akulijima kulya.+ Nditu ngumsalichisya, jemanjaji apochele kala mbote jawo josope.
17 Nambo mmwejo pamkulijima kulya, mpakaleje mawuta mumtwe mwenu soni msukusuleje ngope jenu,
18 kuti mkawoneka kwa ŵandu kuti mkulijima kulya nambo kwa Atati ŵenupe ŵali kwangawonechela. Kaneko Atati ŵenu ŵakusalola ali kwangawonechela, chachimpa upile.
19 “Mleche kuliwunjichila chipanje pachilambo chapasi,+ pele yijosolo* soni mkuwo mpaka yijonanje soni pele ŵawiyi mpaka ajinjile ni kwiŵa.
20 Nambo mliwunjichileje chipanje chenu kwinani+ kwele yijosolo kapena mkuwo nganiyiŵa yijonasile,+ soni kwele ŵawiyi nganaŵa ajinjile ni kwiŵa.
21 Pakuŵa kwachili chipanje chenu, mtima wenu ukusaŵasoni kukoko.
22 “Nyali ja chilu jili liso.+ Myoyo, naga liso lyenu likulola pa chindu chimo, chilu chenu chosope chichiŵa mu lilanguka.
23 Naga liso lyenu lili lyakusakala,*+ chilu chenu chosope chichiŵa m’chipi. Nambo naga lilanguka lyalili mwa mmwejo lili chipi, nikuti chipi chakwecho chili chakogoya mnope!
24 “Kapolo ngaŵa mkwatumichila achambuje ŵaŵili, pakuŵa tachiŵengana ni jumo ni kumnonyela jwine,+ kapena tachilipeleka kwa jumo ni kumnyosya jwinejo. Nganimŵa mtumichile Mlungu ni Chipanje ndaŵi jimo.+
25 “Pa ligongo lyeleli, ngumsalila jemanja kuti, mleche kudandawula ya umi wenu+ kuti chimchilya chichi kapena chimchimwa chichi, soni kuti chimchiwala chichi.+ Ana umi nganiwuŵa wakupunda chakulya soni yakuwala?+
26 Mlolechesye yijuni yamwinani,+ yangapanda mbeju kapena kugowola kapena kututila mu ngokwe, nambo Atati ŵenu ŵakwinani akusayilisya. Ana jemanja nganimŵa ŵakusosekwa kupunda yijuni?
27 Ana ŵani mwa jemanja jwampaka alewuye panandipe* umi wakwe ligongo lya kudandawula?+
28 Nambosoni, ligongo chichi mkudandawula pangani ja yakuwala? Mlijiganye mwagakusakulila maluŵa gamwitinji; gangakamula masengo kapena kulitotela yakuwala.
29 Nambo ngumsalichisya kuti atamose Solomoni+ mu uchimbichimbi wakwe wosope nganawala yakusalala mpela limo mwa maluŵa gelega.
30 Sambano naga Mlungu akusayiwecha chamti myiyi yakumela yamwitinji yayikusatama lelope, malaŵi ni kuyiponya pamoto, ana jwalakwe ngasam’wecha jemanja kupunda pelepa, jemanja ŵachikulupi chapanandimwe?
31 Myoyo mkadandawulaga+ ni kuŵechetaga kuti, ‘Ana chitulye chichi?’ kapena, ‘Ana chitumwe chichi?’ kapena, ‘Ana chituwale chichi?’+
32 Pakuŵa ŵandu ŵamitundu jine ni ŵakulimbichila mnope kusosasosa yindu yeleyi. Nambo Atati ŵenu ŵakwinani akusamanyilila kuti jemanja mkusosechela yindu yosopeyi.
33 “Mpitilisye kusosasosa chandanda Umwenye ni chilungamo chakwe, ni kaneko jwalakwe chachimpa jemanja yindu yine yosopeyi.+
34 Myoyo, mkadandawulaga ya lisiku lyakuyichisya,+ pakuŵa lisiku lyakuyichisya lichikolasoni yakudandawulisya yakwe. Yakusawusya ya lisiku lililyose yili yakwanila pa lisikulyo.
Maloŵe Gamwiŵanda
^ Ŵane akusati “mboto.”
^ Kapena kuti “pamkupeleka mituka kwa ŵakulaga.” Alole mbali jakuti, Kugopolela kwa Maloŵe.
^ Kapena kuti “liswejesyedwe; liŵe lyeswela.”
^ Mu Chigiliki ŵatiga, “mkate wetu walelo.”
^ Mu Chigiliki ŵatiga, “ngongole jetu.”
^ Mu Chigiliki ŵatiga, “ŵangongole.”
^ Kapena kuti “atujokole.”
^ Kapena kuti “akusalijasilila pa kawoneche.”
^ Maloŵe gatugopolele kuti yijosolo, gakusala ya mtundu wa tulombo twaguluka twatukusalya yakuwala.
^ Kapena kuti “lyawiwu.”
^ Mu Chigiliki ŵatiga, “alewuye ni mkono umo.” Alole Yakumbesi B14.
