Ngani sya Mateyu 4:1-25
4 Msimu weswela wamlongolele Yesu kwawula ku chipululu, kaneko Satana+ ŵayiche kukumlinga+ jwalakwejo.
2 Paŵalijimile kulya kwa masiku 40 musi ni chilo, jwalakwe jamkwete sala.
3 Myoyo Jwakulingajo+ jwayiche ni kumsalila kuti, “Naga wawojo ali mwanache jwa Mlungu agasalile magangaga kuti gaŵe mikate.”*
4 Nambo jwalakwe jwajanjile kuti, “Malemba gakusati, ‘Mundu ngaŵa mkutama ni umi ni yakulyape, nambo ni maloŵe galigose gakutyochela mkamwa mwa Yehofa.’”*+
5 Kaneko Satana jwamjigele jwalakwe ni kwawula najo mu msinda weswela,+ ni ŵamkwesisye pamalo gakwela mnope ga panyumba ja Mlungu.+
6 Ni ŵamsalile kuti, “Naga mmwejo mli mwanache jwa Mlungu mligwisye pasi, pakuŵa Malemba gakusati, ‘Jwalakwe chachigalamula malayika gakwe pakwamba ya mmwejo,’ soni, ‘Malayikago gachimjangata mmwejo mmyala mwawo, kuti mkaliputisya sajo* syenu pa liganga.’”+
7 Pelepo Yesu ŵamjanjile jwalakwejo kuti, “Malemba gakusasalasoni kuti, ‘Mkamlinga Yehofa* Mlungu jwenu.’”+
8 Kaneko Satana ŵamjigele jwalakwe ni kwawula najo pa litumbi lyelewu mnope, ni ŵamlosisye maumwenye gosope ga pachilambo chapasi soni uchimbichimbi wakwe.+
9 Ni ŵamsalile jwalakwe kuti, “Yindu yosopeyi chinampe naga mkulambila une kamope basi.”
10 Kaneko Yesu ŵamjanjile jwalakwe kuti, “Mtyoche Satana! Pakuŵa Malemba gakusati, ‘Yehofa* Mlungu jwenu ni jwamkusosekwa kumlambila+ soni jwalakwe jika ni jwamkusosekwa kumtumichila.’”+
11 Pelepo Satana jwamlesile,+ kaneko gayiche malayika ni kutanda kumtumichila.+
12 Sambano Yesu paŵapikene kuti Yohane amtaŵile,+ jwatyosile kweleko ni kwawula ku Galileya.+
13 Nambosoni, paŵatyosile ku Nasaleti jwayiche ni kutamaga ku Kapelenawo,+ mungulugulu nyasa, mu chigawo* cha Sebuloni soni Nafitali,
14 pakwanilisya yaŵaŵechete Mlungu kupitila mwa jwakulochesya Yesaya kuti,
15 “Jemanja ŵandu ŵakutama ku dela ja Sebuloni soni ja Nafitali, mumbali mwa msewu wa kunyasa, lisi line lya Yolodani, ku chigawo cha Galileya kwakutama ŵandu ŵamitundu jine!
16 Ŵandu ŵakutama m’chipi ŵaliweni lilanguka lyekulungwa mnope, soni ŵandu ŵakutama mu m’bulili wa chiwa, lilanguka+ lyaŵalile jemanjajo.”+
17 Kutandila pandaŵi jelejo, Yesu ŵatandite kulalichila ni kuŵechetaga kuti, “Agalawuche mitima, pakuŵa Umwenye wakwinani uŵandichile.”+
18 Paŵajendaga mungulugulu Nyasa ja Galileya, Yesu ŵaweni achalume ŵaŵili ŵapaulongo ali mkuponya likoka lyawo m’nyasa, pakuŵa ŵaliji ŵakuwulaga somba.+ Mena gawo galiji Simoni jwakolanjidwa Petulo+ soni Andileya.
19 Jwalakwe ŵasalile jemanjajo kuti, “Myiche, munguyeje une, chinamtende kuŵa ŵakusosasosa ŵandu mmalo mwakuwulaga somba.”+
20 Ndaŵi jijojo, jemanjajo ŵalesile makoka gawo ni kutanda kumkuya.+
21 Ali agambile kutyoka pelepo, ŵaweni achalume ŵanesoni ŵaŵili ŵapaulongo, Yakobo ni Yohane ŵaŵaliji ŵanache ŵa Sebedayo.+ Jemanjaji ŵaliji mwiboti ni Sebedayo, ŵaŵaliji baba ŵawo, ali mkutota makoka gawo, ni jwalakwe ŵaŵilasile.+
22 Ndaŵi jijojo, jemanjaji ŵalesile liboti lila soni ŵalesile baba ŵawo ŵala ni kutanda kumkuya Yesu.
23 Kaneko ŵajesile mu Galileya mosope+ ali mkwiganya m’masunagoge* gawo+ ni kulalichilaga ngani syambone sya Umwenye soni kwaposya ŵandu yilwele ya mtundu uliwose soni yakusawusya yosope ya m’chilu.+
24 Myoyo mbili jakwamba jwalakwe jawandile ku Siliya kosope, soni ŵandu ŵayikaga kwa jwalakwe ni ŵandu ŵakulwala yilwele soni yakupweteka yakulekanganalekangana.+ Ŵayikaga nawosoni ŵandu ŵaŵakwete yiŵanda,+ ŵa mjilinjili*+ soni ŵakuwa yiŵalo, mwamti ŵaposisye wosopewo.
25 Myoyo ŵandu ŵajinji ŵakutyochela ku Galileya, ku Dekapoli,* ku Yelusalemu, ku Yudeya soni ŵakutyochela ku lisi line lya Yolodani ŵatandite kumkuya.
Maloŵe Gamwiŵanda
^ Mikate jakala ŵajipanganyaga ni utandi wa tiligu kapena balele.
^ Alole Yakumbesi A5.
^ Ŵane akusati “makawu.”
^ Alole Yakumbesi A5.
^ Alole Yakumbesi A5.
^ Ŵane akusati “província.”
^ Alole mbali jakuti, Kugopolela kwa Maloŵe.
^ Kapena kuti “ulwele wakugwa.”
^ Kapena kuti “Chigawo cha Misinda 10.”
