Ngani sya Mateyu 22:1-46
22 Yesu ŵasalilesoni jemanjajo chiwanichisyo chine kuti,
2 “Umwenye wakwinani mpaka tuwulandanye ni mwenye juŵalinganyisye pwando* ja ulombela+ wa mwanache jwakwe jwamlume.
3 Mwenyewo ŵatumisye achikapolo ŵakwe kuti akasalile ŵandu ŵaŵaŵilasile ku pwandojo kuti ayiche, nambo ŵanduwo nganasaka kwika.+
4 Jwalakwe ŵatumisyesoni achikapolo ŵane, ni kwasalila kuti, ‘Mkasalile ŵakuŵilanjidwawo kuti, “Jamani, une linganyisye kala yakulya yaligulo, soni mbuleje ng’ombe ni yinyama yakwimbala, mwamti yosope yili chilepe. Ayiche ku pwando ja ulombela.”’
5 Nambo ŵanduwo nganayikosya, mwamti ŵatyosile, jwine jwapite kumgunda wakwe, jwine kumalonda.+
6 Soni ŵakuŵilanjidwa ŵanewo, ŵakamwile achikapolowo ni kwatendela yangalwe* kaneko ŵawuleje.
7 “Mwenyewo ŵatumbile mnope, mwamti ŵatumisye asilikali ŵakwe kukwawulaga ŵandu ŵaŵawuleje achikapolo ŵala soni ŵawujochile moto msinda wawo.+
8 Kaneko ŵasalile achikapolo ŵakwe kuti, ‘Pwando ja ulombela jili chilepe, nambo ŵandu ŵatwaŵilasile ŵala ŵaliji ŵangaŵajilwa.+
9 Myoyo, mjawule kumisewu jakopoka mumsinda, soni mkamŵilanjile ku pwando ja ulombela mundu jwalijose jwachimkamsimane.’+
10 Achikapolowo ŵatesile yaŵasalileyi. Ŵapite kumisewujo ni kuja kwasonganganya ŵandu wosope ŵaŵasimene, ŵakusakala ni ŵambone ŵakwe, mwamti chipinda chakutendela pwando ja ulombela chagumbele ni ŵanduwo soni ŵaliji mkulya.
11 “Mwenyewo paŵajinjile kuti ŵalole achalendowo, ŵam’weni mundu jwine jwele nganawala chakuwala chakuŵajilana ni pwandojo.
12 Myoyo ŵamwusisye mundujo kuti, ‘Bwanawe, mkusimanikwa uli amuno mli nganim’wala chakuwala chakuŵajilwa?’ Mundujo jwasoŵile chakwanga.
13 Kaneko mwenyewo ŵasalile ŵakutumichila ŵakwe kuti, ‘Amtaŵe munduju makono soni ngongolo ni akamponye kusa kuchipi. Kweleko ni chakalile soni kulumanya meno.’
14 “Pakuŵa ŵakuŵilanjidwa ali ŵajinji, nambo ŵakusagulidwa ali ŵakuŵalanjika.”
15 Kaneko Afalisi ŵapite kukulangana yakuti ampatile magongo Yesu pamaloŵe gakwe.+
16 Myoyo ŵatumisye ŵakulijiganya ŵawo kwa jwalakwe pampepe ni ŵachipani cha Helodi,+ ni jemanjaji ŵamsalile jwalakwe kuti, “Mwalimu, m’we tukumanyilila kuti wawo akusaŵecheta yisyesyene soni akusajiganya litala lya Mlungu mwakuya yisyesyene, nambosoni ŵangatenda yindu pakusaka kwasangalasya ŵandu, ligongo wawo ŵangajigalika ni kawoneche ka ŵanduwo.
17 Atusalile nganisyo syawo. Ana yili yakuŵajilwa kuti tukomeje msongo kwa Kaisala kapena iyayi?”
18 Nambo Yesu pakumanyilila kusakala kwawo, ŵatite, “Ligongo chichi mkulinga une, jemanja ŵachinyengo?
19 Mundosye mbiya jakomela msongojo.” Jemanjajo ŵampele mbiya ja dinali.*
20 Ni jwalakwe ŵawusisye kuti, “Ana ngopeji soni maloŵe gakwega yili ya ŵani?”
21 Jemanjajo ŵamjanjile kuti, “Yili ya Kaisala.” Kaneko jwalakwe ŵasalile kuti, “Sambano, mpelecheje yindu ya Kaisala kwa Kaisala, nambo yindu ya Mlungu kwa Mlungu.”+
22 Jemanjajo paŵagambile kupikana yeleyi, ŵasimonjile mnope, kaneko ŵawutandite ulendo ni kumleka jwalakwejo.
23 Pa lisiku lilili, Asaduki ŵakusati ŵawe ngasajimuka,+ ŵayiche kwa jwalakwejo ni kumwusya kuti,+
24 “Mwalimu, Mose jwatite, ‘Naga jwamlume alombele, nambo awile mkanamŵelechele ŵanache jwamkongwejo, mlongomjakwe jwa jwamlumejo akusosekwa kumjigala jwamkongwejo ni kumŵelechela mwanache mlongomjakwe jula.’+
25 Sambano twakwete achalume 7 ŵapaulongo. Jwandanda jwalombele nambo jwawile mkanamŵelechele ŵanache jwamkongwejo, kaneko mlongomjakwe jwamjigele jwamkongwejo.
26 Jwelejusoni jwawile mkanamŵelechele ŵanache, mwamti yeleyi yatendekwesoni ni jwatatu, mpaka wosope 7 ŵala.
27 Pambesi pakwe, nombenajo jwamkongwejo jwawile.
28 Ŵawe pachachijimukaga, ana jwamkongweju chachiŵa jwa ŵani pa achalume 7 ŵala, pakuŵa wosope ŵamlombile?”
29 Yesu ŵajanjile kuti, “Jemanja mkulemwesya, ligongo ngamkumanyilila Malemba soni machili ga Mlungu.+
30 Pakuŵa ŵandu pachachijimuka ku chiwa achalume ngasalombela soni achakongwe ngasalombedwa, nambo chachiŵa mpela malayika gakwinani.+
31 Nambo pakwamba ya kwimuka kwa ŵandu ŵawe, ana nganimŵalanjeje yaŵaŵechete Mlungu kwa jemanja? Jwalakwe jwatite,
32 ‘Une ndili Mlungu jwa Abulahamu, Mlungu jwa Isaki soni Mlungu jwa Yakobo.’+ Jwalakwe ali Mlungu jwa ŵandu ŵaumi ngaŵaga ŵawe.”+
33 Gulu ja ŵandu pajapikene yeleyi, jasimonjile mnope ni kajiganye kakwe.+
34 Afalisi paŵapikene yakuti Yesu ŵamasisye lunda Asaduki, ŵajigalene kagulu ni kwika kwa jwalakwejo.
35 Pakusaka kumlinga jwalakwe, Mfalisi jwine jwakumanyilila Chilamusi jwamwusisye kuti,
36 “Mwalimu, ana mu Chilamusi chosope, lilamusi lyekulungwa ni lyapi?”+
37 Yesu ŵamjanjile jwalakwejo kuti, “‘Mumnonyeleje Yehofa* Mlungu jwenu ni mtima wenu wosope, ni umi wenu wosope soni ni nganisyo syenu syosope.’+
38 Lyeleli lili lilamusi lyekulungwa soni lyandanda.
39 Lyaŵili lyakulandana nalyo lili lyakuti, ‘Mumnonyeleje mjenu mpela yamkusati pakulinonyela mwasyene.’+
40 Chilamusi chosope soni yakulemba ya ŵakulochesya yigonile pa malamusi gaŵili gelega.”+
41 Sambano Afalisiwo ali papopo, Yesu ŵawusisye kuti,+
42 “Ana jemanja mkuganisya uli pakwamba ya Klistu? Ana jwalakwejo ali mwanache jwa ŵani?” Jemanjajo ŵamjanjile kuti, “Ali mwanache jwa Daudi.”+
43 Jwalakwe ŵawusisye jemanjajo kuti, “Nambi ligongo chichi Daudi mwakulongoleledwa ni Mlungu+ ŵamkolasile jwalakwejo kuti Ambuje? Jwalakwe jwatite,
44 ‘Yehofa* ŵasalile Ambuje ŵangu kuti, “Mtame kumkono wangu wamlyo mpaka pachinjaŵika adani* ŵenu kusi kwa sajo* syenu.”’+
45 Sambano naga Daudi ŵamkolasile jwalakwejo kuti Ambuje, ana yikukomboleka uli kuŵasoni mwanache jwakwe?”+
46 Pangali mundu juŵapakombwele kumjanga, soni kutandila pa lisiku lyeleli, pangali jwalijose juŵalimbile mtima kumwusyasoni yiwusyo jwalakwejo.
Maloŵe Gamwiŵanda
^ Ŵane akusati “chindimba.”
^ Ŵane akusati “yangasa.”
^ Alole Yakumbesi B14.
^ Alole Yakumbesi A5.
^ Alole Yakumbesi A5.
^ Ŵane akusati “achimmagongo.”
^ Ŵane akusati “makawu.”
