1. Ana chichi chachikusakamuchisya ŵakutumichila ŵa Yehofa kupitilisya kumtumichila jwalakwe atamose ali mkusimana ni yakusawusya?

 BAIBULO jikusasala kuti tukutama mu “ndaŵi jakusawusya soni jakogoya.” (2 Tim. 3:1) Ŵakutumichila ŵa Yehofawe tukusasimana ni yakusawusya mpela mwayikuŵela ni jwine jwalijose m’chilambo cha Satanachi. Nambosoni akusatulagasya soni kutusisya ligongo lyakuti tukusamtumichila Yehofa. Ana ni chichi chachikusatukamuchisya kupitilisya kumtumichila Yehofa atamose kuti tukusasimana ni yakusawusyayi? Chindu chekulungwa mnope chili kumanyilila kuti Yehofa ali “Mlungu jwachijumi.”—Yel. 10:10; 2 Tim. 1:12.

2. Ana Yehofa ali Mlungu jwachijumi mmatala gapi?

² Yehofa akusayiwona yakusawusya yiliyose yatukusasimana nayo mwamti akusaŵa jwakusachilila kuti atukamuchisye. (2 Mbi. 16:9; Sal. 23:4) Patukumanyilila kuti Mlungu akusasamala ya m’weji soni kuti ndaŵi syosope akusaŵa jwakoseka kutukamuchisya, yikusatukamuchisya kuti tupilileje yakusawusya. Kwende tulole yayamtendechele Mwenye Daudi pangani jeleji.

3. Ana Daudi jwagopolelaga chichi pajwaŵechete kuti “AMBUJE ali ŵachijumi”?

³ Daudi jwammanyililaga chenene Yehofa soni jwamdalilaga jwalakwe. Pandaŵi jine Mwenye Sauli soni ŵandu ŵane paŵasakaga kumwulaga jwalakwe, Daudi jwapopesile kwa Yehofa kuti amkamuchisye. (Sal. 18:6) Panyuma pakuti Mlungu ajanjile lipopelo lyakwe soni kumkulupusya, jwalakwe jwasasile kuti, “AMBUJE ali ŵachijumi!” (Sal. 18:46) Ana pelepa Daudi jwagopolelaga chichi? Buku jine jasasile kuti Daudi jwagombelechesyaga kuti Yehofa ali Mlungu jusyesyene jwakusiŵakamuchisya ŵakutumichila ŵakwe ndaŵi syosope. Yindu yaŵasimene nayo Daudi yamkamuchisye kumanyilila kuti Mlungu ali jwachijumi soni kuti jwaliji jwakusachilila kumkamuchisya.—Sal. 18:​28, 29, 49.

4. Ana tukusapata maumbone gapi patukumwona Yehofa kuŵa Mlungu jwachijumi?

⁴ Naga tukumwona Yehofa kuti ali Mlungu jwachijumi mpaka  yitukamuchisye kuti tumtumichileje jwalakwe mwakusachilila. Tuchikola machili gakutukamuchisya kupilila yakusawusya soni tuchikola machili gampaka gatukamuchisye kuti tumtumichileje jwalakwe. Tuchiŵasoni ŵakusachilila kuŵa paunasi wambone ni Yehofa.

YEHOFA CHACHAPA MACHILI

5. Ana chichi champaka chitukamuchisye patusimene ni yakusawusya? (Afilipi 4:13)

⁵ Naga tukukumbuchila kuti Yehofa ali Mlungu jwachijumi soni kuti ali jwakoseka kutukamuchisya, tuchikombola kupilila chakusawusya chilichose. Mwamti pangali chakusawusya champaka tusimane nacho champaka chimleme jwalakwe. Yehofa ali jwamachili soni mpaka atupe machili gakwega kuti tukombole kupilila. (Aŵalanje Afilipi 4:13.) Yeleyitu yikusatulimbikasya kuti tumdalileje mnope Yehofa patukusimana ni yakusawusya. Myoyo, patukuyiwona kuti Yehofa akutukamuchisya payakusawusya yamwana, yikusatupasoni umboni wakuti jwalakwe chachitukamuchisya payakusawusya yekulungwa.

6. Ana Daudi jwasimene ni yindu yamti uli pajwaliji jwachinyamata yayamkamuchisye kuti amkulupilileje mnope Yehofa?

⁶ Kwende tukambilane yindu yiŵili yayamtendechele Daudi yayamkamuchisye kuti amdalileje mnope Yehofa. Daudi pajwaliji mnyamata, lisiku line ali mkulanga ngondolo sya baba ŵakwe kwayiche lisimba ni kukamula ngondolo jimo, lisiku line kwayichesoni chimbalangondo ni kukamula ngondolo jimo. Nambo mwakulimba mtima Daudi jwakulupwisye ngondolosyo muyakutendekwa yosopeyi. Nambo jwalakwe nganalipikana kuti akombwele kutenda yeleyi mwajika jakwe. Jwamanyililaga kuti Yehofa ni juŵampele machili kuti akombole kutenda yeleyo. (1 Sam. 17:​34-37) Mwamti Daudi nganayiliŵalilaga yindu yeleyi. Kusala yisyene, kuganichisya yeleyi mwakusokoka kwamkamuchisye Daudi kukulupilila kuti Mlungu jwachijumi chachimkamuchisyasoni msogolo.

7. Ana kola nganisyo syakuŵajilwa kwamkamuchisye chamti uli Daudi kuti alimbane ni Goliyati?

⁷ Lisiku line Daudi ali chiŵela mnyamata, ŵapite ku malo gakuputila ngondo ga Ayisalayeli. Ali ayiche kweleku ŵasimene asilikali ŵa Chiyisalayeli uli wakamwile woga. Yaliji myoyo ligongo lyakuti chimundu chamachili cha ku Filisiti lina lyakwe Goliyati chayiche ni ‘kwanyosyaga Ayisalayeli ŵaŵajimi pamalo gakuputila ngondo.’ (1 Sam. 17:​10, 11) Asilikaliŵa ŵatendaga woga ligongo lyaganichisya mnope muŵawonechelaga Goliyati soni maloŵe gakunyosya gajwaŵechetaga. (1 Sam. 17:​24, 25) Nambotu Daudi nganayiwonaga myoyo. Jwalakwe jwamanyililaga kuti Goliyati nganiŵanyosyaga asilikali ŵa Chiyisalayeli nambo kuti ‘ŵanyosyaga asilikali ŵa Mlungu jwaumi.’ (1 Sam. 17:26) Pandaŵiji, Daudi jwaganichisyaga mnope yakwamba Yehofa. Daudi jwakulupililaga kuti Mlungu juŵamkulupwisye jwalakwe pandaŵi jiŵalangaga ngondolo ni jwakamkulupwisyesoni pandaŵiji. Mwamti Mlungu jwamkamuchisye Daudi kuti amgomeche Goliyati.—1 Sam. 17:​45-51.

8. Ana chichi champaka chitukamuchisye kuti tumdalileje mnope Yehofa patusimene ni yakusawusya? (Alole chiwulili.)

⁸ M’wejisoni patukukumbuchila kuti Mlungu jwachijumi ali jwakoseka kutukamuchisya mpaka tukombole kulimbana ni yakusawusya. (Sal. 118:6) Kuganichisya yindu yajwatutendele jwalakwe munyuma mpaka kutukamuchisye kuti tumdalileje mnope. Chindu chine champaka chitukamuchisye chili kuŵalanga ngani sya m’Baibulo syakusala yaŵatite Yehofa pakwakulupusya ŵakutumichila ŵakwe munyumamu. (Yes. 37:​17, 33-37) Tuganichisyejesoni ngani syasikusasimanikwa pa webusayiti jetu ja jw.org syakulosya yatesile Yehofa pakwakamuchisya abale ni alongo ŵetu masiku agano. Konjechesya pelepa, aganichisyejesoni yatesile Yehofa pakwakamuchisya wawojo. Komboleka mpaka ayiwoneje kuti Yehofa nganiŵatendeleje yakusimonjesya yayili mpela kwakulupusya mkamwa mwa lisimba kapena mwa chimbalangondo. Nambo yisyesyene yakwe yili  yakuti Yehofa aŵele ali mkwakulupusya mu yindu yejinji. Nambosoni jwakamuchisye kuti aŵe najo paunasi wambone. (Yoh. 6:44) Kupwatika pelepa, Yehofa ni jwakwakamuchisya wawojo kuti akombole kupitilisya kumtumichila. Kusala yisyene, mpaka atende chenene kumŵenda jwalakwe kuti jwakamuchisye kumbuchila ndaŵi jaŵajanjile lipopelo lyawo, paŵapele yindu yaŵasosechelaga pandaŵi jakwe, kapena kwakamuchisya pandaŵi jakusawusya. Kuganichisya yindu yeleyi kuchakamuchisya kukukulupilila kuti Yehofa chachipitilisya kwakamuchisya.

9. Ana mpaka tuyiwoneje chamtuli yakusawusya yetu? (Misyungu 27:11)

⁹ Naga tukumwona Yehofa kuŵa Mlungu jwachijumi, yichitukamuchisya kuti tuyiwoneje mwakuŵajilwa yakusawusya yetu. Ana yeleyi mpaka yikomboleche chamti uli? Yakusawusya yetu mpaka yitukamuchisye kuswejesya lina lya Yehofa. Satana akusasala kuti naga tukusimana ni yakusawusya, mpaka tuleche kumtumichila Yehofa. (Yob. 1:​10, 11; aŵalanje Misyungu 27:11.) Nambo patukupitilisya kuŵa ŵakulupichika kwa Yehofa atamose patukusimana ni yakusawusya, tukusalosya kuti tukusamnonyela Yehofa soni kuti Satana ali jwaunami. Ana wawojo akulagasidwa ni boma, akulaga ligongo lya kusoŵa kwa mbiya, mwine atengwiche ligongo lyakuti ŵandu ŵa mudela jawo ŵangapikanilaga pakwalalichila, kapena akulaga ni yindu yine? Naga yili myoyo, akusosekwa kukumbuchila kuti yakusawusya yawo yikusiyapaga upile wakumtendekasya Yehofa kuŵa jwakusangalala. Akumbuchilejesoni kuti jwalakwe ngasakunda kuti wawojo alinjidwe mpaka kwika pakuti nganaŵa akombwele kupilila. (1 Akoli. 10:13) Mwamti jwalakwe chachapa machili gakuti akombole kupilila.

MLUNGU JWACHIJUMI CHACHAPA UPILE

10. Ana Mlungu jwachijumi chachatendela yamti uli ŵandu ŵakusamtumichila jwalakwe?

¹⁰ Yehofa akusiŵapaga upile ŵakutumichila ŵakwe. (Aheb. 11:6) Jwalakwe akusatukamuchisya kuti tuŵeje ŵakwikutila soni kuti tukoleje mtendele wamumtima soni chachitupa umi wangamala kusogolo. Mwamti tukakayichilaga yakuti Yehofa chachitupa upile, ligongo lyakuti jwalakwe akwete machili soni ali jwakusachilila kutenda yeleyi. Chikulupi chelechi, chikusatutendekasya  kuti tulipelecheje mnope pakumtumichila Yehofa mpela muŵatendelaga ŵakutumichila ŵakwe ŵakala. Mwamti yeleyi ni yaŵatesile Timoteyo.—Aheb. 6:​10-12.

11. Ana chichi chachamkamuchisye Timoteyo kuti akamuleje masengo mwakulimbichila mumpingo? (1 Timoteyo 4:10)

¹¹ Aŵalanje 1 Timoteyo 4:10. Timoteyo ŵamkulupililaga mnope Mlungu jwachijumi. Yeleyi yamtendekasisye kuti alipelecheje mnope pakumtumichila jwalakwe. Ana jwatesile chamti uli yeleyi? Ndumetume Paulo ŵamlimbikasisye jwalakwe kuti apitilisye kulipeleka pakuŵalanga soni pakwajiganya ŵandu. Ŵamsalilesoni kuti akusosekwa kuŵa chisyasyo chambone kwa ŵakulupilila achimjakwe. Konjechesya pelepa, Timoteyo jwakamulagasoni masengo gakusawusya, gagapwatikagapo kwajamuka ŵane mwangapita mumbali nambo mwachinonyelo. (1 Tim. 4:​11-16; 2 Tim. 4:​1-5) Timoteyo jwasosekwaga kulupilila kuti Yehofa chachimpa upile atamose yili mkuti ŵandu ŵane ngakuyamichila masengo gakwe.—Alo. 2:​6, 7.

12. Ligongo chichi achakulungwa ŵa mumpingo akusakamula masengo mwakulimbichila pakwakamuchisya Aklistu achimjawo? (Alole chiwulili.)

¹² Masiku aganosoni, achakulungwa ŵa mumpingo akusasosekwa kulupilila yakuti Yehofa akusayamichila masengo gakusakamula. Jemanjaji akusakamula masengo gakwasamalila Aklistu achimjawo, kwiganya soni kulalichila. Nambosoni achakulungwa ŵajinji akusakamuchisya pamasengo ga yakutaŵataŵa soni pasitendekwe ngosi syachilengedwe. Achakulungwa ŵane akusatumichila mu Komiti Jakuŵechetana ni Ŵachipatala, kapena m’magulu gakwajendela ŵakulwala. Achakulungwa ŵakusalipeleka pamasengo gelega akusayiwona kuti mpingo wa Chiklistu uli wa Yehofa ngaŵaga wa mundu. Yakuyichisya yakwe, jemanjaji akusalipeleka mnope pa mautumiki gawo mwamti akusakulupilila kuti Mlungu chachapa upile pa masengo gawo.—Akolo. 3:​23, 24.

13. Ana Yehofa akusapikana uli patukulimbichila kumtumichila jwalakwe?

¹³ Nganiyiŵa yikomboleche kuti ŵandu wosope aŵe achakulungwa ŵa mumpingo. Nambo jwalijose akwete chindu champaka amtendele Yehofa.  Mlungu jwetu akusayamichila patukutenda yampaka tukombole pakumtumichila jwalakwe. Mwamti atamose mbiya syamnono syatukusapeleka syakamuchisya pamasengo gapachilambo chosope akusasiwona kuŵa syakusosekwa mnope. Kupwatika pelepa, jwalakwe akusasangalala mnope patujimiche mkono wetu kuti tujanje pamisongano, nambosoni patukulimbichila kuti tumalane ni sooni. Konjechesya pelepa, Yehofa akusasangalalasoni patukwakululuchila ŵane patulemwechesye. Atamose wawojo pakuyiwona kuti akulepela kutenda yejinji pakumtumichila Yehofa, akusosekwa kumanyilila kuti jwalakwe akusayamichila yakusakombola kutenda wawojo, mwamti chachapa upile.—Luk. 21:​1-4.

APITILISYE KUŴA PAUNASI WAMBONE NI MLUNGU JWACHIJUMI

14. Ligongo chichi kuŵa paunasi wambone ni Yehofa mpaka kutukamuchisye kuŵa ŵakulupichika? (Alole chiwulili.)

¹⁴ Naga tuli paunasi wambone ni Yehofa, yichiŵa yangasawusya kuŵa ŵakulupichika kwa jwalakwe. Yeleyi ni yayamtendechele Yosefe. Jwalakwe jwakanile kugona ni ŵamkwakwe Potifala. Jwatesile yeleyi, ligongo lyakuti jwaliji paunasi wambone ni Yehofa soni nganasaka kutenda chindu chakumtumbilikasya. (Gen. 39:9) Kuti tuŵe paunasi wambone ni Yehofa, tukusasosekwa kupata ndaŵi jakupopela soni kulijiganya Maloŵe gakwe. Patukutenda yeleyi, unasi wetu ni jwalakwe uchiŵa wakulimba mnope. Mwamti naga m’weji tuli paunasi wakulimba ni Yehofa mpela muyaŵelele ni Yosefe, tuchiŵambala kutenda chilichose champaka chimtumbilikasye jwalakwe.—Yak. 4:8.

15. Ana mpaka tulijiganye chichi pa yindu yayatendechele Ayisalayeli m’chipululu? (Ahebeli 3:12)

¹⁵ Ŵandu ŵalesile kumkulupilila Yehofa yikusaŵa yangasawusya kutenda yindu yangakulupichika. Aganichisye yayatendechele Ayisalayeli pandaŵi jaŵajendaga m’chipululu. Jemanjaji ŵamanyililaga kuti Yehofa apali, nambo kaneko ŵatandite kukayichila naga Yehofa mpaka ŵape yakusosechela yawo. Mwamti ŵayikene pakuwusya kuti, “Ana Yehofa ali pasikati petu kapena iyayi?” (Eks. 17:​2, 7) Yeleyi yatendekasisye kuti Ayisalayeliŵa amjimuchile Mlungu. Kusala yisyene, m’weji tukusosekwa kuŵambala yaŵatesile jemanjaji.—Aŵalanje Ahebeli 3:12.

16. Ana chichi champaka chilinje chikulupi chetu?

 ¹⁶ Yakutendekwa ya mchilambochi yikusatutendekasya kuti tuyiwoneje kuŵa yakusawusya kuŵa paunasi wambone ni Yehofa. Mwamti ŵandu ŵajinji ngakusakulupilila yakuti Mlungu apali. Nambosoni ŵandu ŵakusakana kupikanila malamusi ga Mlungu yikusawoneka kuti yindu yikwajendela chenene. Patukuyiwona yeleyi, chikulupi chetu mpaka chilinjidwe. Myoyo, atamose kuti tukusajitichisya yakuti Mlungu apali, nambope komboleka ndaŵi sine mpaka tukayichileje yakuti jwalakwe mpaka atukamuchisye. Nombe najo mundu juŵalembile Salimo 73 yamtendechele yeleyi. Jwalakwe jwawonaga ŵandu ŵaŵakanaga kupikanila malamusi ga Mlungu yindu yili mkwajendela chenene. Mwamti yeleyi yamtendekasisye kayichila naga kumtumichila Mlungu kuli kwakamuchisya.—Sal. 73:​11-13.

17. Ana chichi champaka chitukamuchisye kuŵa paunasi wambone ni Yehofa?

¹⁷ Ana chichi chachamkamuchisye jwamasalimoju kuti achenje kaganisye kakwe? Jwalakwe jwaganichisyaga yampaka yatendechele ŵandu ŵalesile kumkulupilila Yehofa. (Sal. 73:​18, 19, 27) Jwaganichisyagasoni maumbone gagakusapagwa ligongo lya kumtumichila Yehofa. (Sal. 73:24) M’wejisoni mpaka tutende chenene kuganichisyaga yindu yambone yatutendele Yehofa. Ndaŵi sine mpaka tutende chenene kuliwusyaga mwawukaŵelele umi wetu yikaŵe kuti ngatukumtumichila Yehofa. Naga tukuganichisya maumbone gagakusapagwa patukumtumichila Yehofa, yichitukamuchisya kuti tupitilisye kuŵa ŵakulupichika. Mwamti mpela muyaŵelele ni jwamasalimo jula, m’wejisoni tuchiŵecheta kuti, “Nambo une, kukunonyela kuŵandikana ni Mlungu.”—Sal. 73:28.

18. Ligongo chichi ngatukusosekwa kutenda woga ni yindu yamsogolo?

¹⁸ Patukutama m’masiku gakumalisyaga chitusimaneje ni yakusawusya yejinji ligongo lyakuti tuli achikapolo ŵa “Mlungu jwaumi soni jwakuwona.” (1 Ates. 1:9) Nambope, Mlungu jwetu akusasamala ya m’weji mwamti chachitukamuchisya. Jwalakwe jwakombwele kwakamuchisya ŵakutumichila ŵakwe ŵakala, mwamti akusatukamuchisyasoni masiku agano. Pachangakaŵapa chitusimane ni yakusawusya yekulungwa. Nambo pandaŵiji ngasituŵa jika ligongo Yehofa chachiŵa ni m’weji. (Yes. 41:10) Myoyo, kwende wosopewe “tuŵe ŵakulimba mtima soni tuŵecheteje kuti, ‘Yehofa ali jwakungamuchisya, ngasindenda woga.’”—Aheb. 13:​5, 6.