Chakwawula kwa Ahebeli 11:1-40
11 Chikulupi chikusagopolela kusimichisya kuti yindu yawukwembecheya yichitendekwa,+ soni kukola umboni wakuwonechela chenene wakuti yindu yangawukuyiwona yipali nditu.
2 Ligongo lyakuti ŵandu ŵakala* ŵakwete chikulupi chelechi, Mlungu ŵapele jemanjajo umboni wakwasimichisya kuti akusangalala nawo.
3 Ligongo lyakuti m’weji tukwete chikulupi, tukumanyilila kuti Mlungu paŵaŵechete, chindu chilichose* chatemi pamalo gakwe, myoyo yindu yatukuyiwonayi yapali kutyochela ku yindu yangawoneka.
4 Ligongo lyakuti Abele ŵakwete chikulupi, jwalakwe ŵapeleche kwa Mlungu mbopesi jambone mnope kupunda ja Kaini,+ mwamti ligongo lya chikulupi chelecho jwalakwe ŵapochele umboni wakuti ali jwakulungama, pakuŵa Mlungu ŵajitichisye* mbopesi jakwe.+ Atamose kuti jwalakwejo jwawile,+ nambo akuŵechetape kupitila mu chikulupi chakwecho.
5 Ligongo lyakuti Enoki+ ŵakwete chikulupi, ŵamsamisye ni chakulinga chakuti akawa chiwa chakupweteka, soni nganawoneka kulikose ligongo Mlungu ŵamsamisye jwalakwejo.+ Sonitu mkanamsamisye, jwalakwe ŵapochele umboni wakumsimichisya kuti ŵatesile yakumsangalasya Mlungu.
6 Kusala yisyene, mundu jwangali chikulupi nganaŵa akombwele kumsangalasya Mlungu, pakuŵa jwalijose jwakwika kwa Mlungu akusosekwa kukulupilila kuti jwalakwe apali nditu. Akusosekwa kukulupililasoni kuti jwalakwejo akusapeleka yindu yambone kwa ŵandu ŵakusamsosasosa ni mtima wosope.+
7 Ligongo lyakuti Nowa+ ŵakwete chikulupi, ŵalosisye kuti akusamjogopa Mlungu, mwamti ŵapanganyisye chombo+ kuti akulupusye liŵasa lyakwe. Ŵatesile yeleyi panyuma pakuti Mlungu amkalamwisye pakwamba ya yindu yayaliji mkaniyiwoneche.+ Ligongo lyakola chikulupi chelecho, jwalakwe ŵalosisye kuti chilambochi chili chakuŵajilwa kuchijonanga,+ soni Mlungu ŵam’weni kuŵa jwakulungama ligongo lya chikulupi chakwecho.
8 Ligongo lyakuti Abulahamu ŵakwete chikulupi,+ ŵapikanile Mlungu paŵamŵilasile kuti akopoche m’chilambo chakwe, mwamti ŵakopweche ni kwawula ku malo gagaliji gakuti chachipochela mpela chipanje chakwe. Jwalakwe ŵanyakwiche atamose kuti nganakumanyililaga kuŵajawulaga.+
9 Ligongo lyakola chikulupi, jwalakwe ŵatemi mpela mlendo+ m’chilambo chaŵasasile Mlungu kuti chachapa. Jwalakwe ŵatamaga m’matenti+ pampepe ni Isaki soni Yakobo, ŵelesoni Mlungu ŵasalile kuti chachapa chilambochi.+
10 Jwalakwe ŵaliji mkwembecheya msinda wakola fendeshoni* jisyesyene, msinda wele Mlungu ni juŵawulinganyisye soni kuwutaŵa.+
11 Ligongo lyakuti Sala nombenajo ŵakwete chikulupi, ŵapochele machili gakuŵeleka mwanache, atamose kuti ŵaliji ali apundile yaka yakuŵelechela,+ pakuŵa jwalakwe ŵam’weni juŵasasile yeleyi kuti ali jwakulupichika.*
12 Pa ligongo lyeleli, mundu jumo Abulahamu, juŵaliji mpela kuti awile,+ jwaŵeleche ŵanache.+ Jwalakwe jwaŵeleche ŵanache ŵajinji mpela ndondwa syakwinani, soni ŵaliji ŵangaŵalanjika mpela mchenga wa mungulugulu nyasa.+
13 Ŵandu wosopeŵa ŵawile ali akwete chikulupi, atamose kuti nganakuwona kukwanilichikwa kwa yindu yaŵasasile Mlungu kuti chachatendelayo.+ Nambo ŵakuweni kukwanilichikwa kwa yinduyi pakutalichila+ soni ŵayipochele. Jemanjaji ŵalosisye pameso pa wosope kuti ŵaliji achalendo soni ŵangatamilisya m’chilambocho.
14 Kwa ŵandu ŵakusaŵecheta m’litala lyeleli akusaŵa ali mkulosya kuti akusosasosa malo gawogawope gakutama.
15 Nambope yikaŵe kuti jemanjaji ŵatamilaga kuganichisya ya kumalo kuŵatyochele,+ yikaŵele yakomboleka kuwujila.
16 Nambo sambano ŵandu wosope akulingalinga kuti apate malo gambone mnope, malo gakwe gali gakwinani. Myoyo, Mlungu jwangatenda sooni jemanjaji pakusala kuti jwalakwejo ali Mlungu jwawo,+ pakuŵa jwalakwejo alinganyisye msinda kuti uŵe wa jemanjaji.+
17 Ligongo lyakuti Abulahamu ŵakwete chikulupi, paŵalinjidwe,+ yaŵele mpela ampeleche kala Isaki kuŵa mbopesi. Yisyene, mundu juŵajitichisye mwakusangalala yindu yiŵamsalile kuti chachimtendelayo, ŵaliji jwakoseka kumpeleka mwanache jwakwe jumo pejo.+
18 Yaŵele myoyo atamose kuti ŵaliji ali amsalile kala kuti, “Ŵandu wosope ŵachachikolanjikwa kuti ŵanache ŵenu chachityochela mwa Isaki.”+
19 Nambo jwalakwe ŵaganisisye ni kuyiwona kuti Mlungu mpaka akombole kumjimusya mwanachejo ku chiwa, mwamti ŵampochele nditu kutyochela ku chiwako m’litala lyakuwanichisya.+
20 Ligongo lyakuti Isaki nombenajo ŵakwete chikulupi, ŵampele upile Yakobo+ ni Esawu+ pakwasalila yindu yayaliji mkwika.
21 Ligongo lyakuti Yakobo ŵakwete chikulupi, ali asigele panandi kuwa+ ŵampele upile mwanache jwalijose jwa Yosefe,+ soni ŵamlambile Mlungu ali ajegamile simbo jakwe jakwendela.+
22 Ligongo lyakuti Yosefe ŵakwete chikulupi, ŵaŵechete ya kutyoka kwa ŵanache ŵa Isalayeli. Ŵaŵechete yeleyi chakumbesi kwa umi wakwe, soni ŵasasile* yachachisosekwa kutenda ni mawupa gakwe.*+
23 Ligongo lyakuti achinangolo ŵa Mose ŵakwete chikulupi, ŵakombwele kumsisa jwalakwejo kwa myesi jitatu ali agambile kupagwa.+ Ŵatesile yeleyi ligongo ŵayiweni kuti mwanachejo ŵaliji jwakusalala+ mwamti nganajogopa yaŵalamwile mwenye.+
24 Ligongo lyakuti Mose ŵakwete chikulupi, jwalakwe paŵakusile+ ŵakanile kumanyika mpela mwanache jwa mwanache jwamkongwe jwa Falawo.+
25 Jwalakwe ŵasagwile kuti alagasicheje pampepe ni ŵandu ŵa Mlungu mmalo mwakusangalala ni yindu yangatamilisya yaulemwa.
26 Jwalakwe ŵatesile yeleyi ligongo ŵayiweni kuti kulagasika kwakwe mpela Jwakusagulidwa* kuli mpela chipanje chapenani mnope kupunda chipanje cha ku Iguputo, pakuŵa jwalakwejo jwaliji mkulolechesya pa yindu yachachipochela.
27 Ligongo lyakola chikulupi, jwalakwejo ŵatyosile ku Iguputo,+ nambo ngaŵaga ligongo lyakogopa ukali wa mwenye,+ pakuŵa jwalakwe jwapitilisye kuŵa jwangatenganyika mpela kuti akumwona jwangawonekajo.+
28 Ligongo lyakola chikulupi, jwalakwe ŵatesile Pasika soni ŵapakesye nawo myasi pa mafelemu ga pamlango, ni chakulinga chakuti lilayika lya Mlungu likawulaga* ŵanache ŵawo ŵandanda kupagwa.+
29 Ligongo lyakuti ŵandu ŵa Mlunguwo ŵakwete chikulupi, ŵajombweche Nyasa Jechejewu mpela kuti akupita pamalo gejumu,+ nambo Aiguputo paŵalinjile kuti ajomboche, nyasajo jamisile wosope.+
30 Ligongo lya chikulupi cha ŵanduwo, mapupa ga msinda wa Yeliko gagwile panyuma pakuti ŵanduwo ajesile mwakuwusyungulila msindawo kwa masiku 7.+
31 Ligongo lyakuti Lahabi lihule lila ŵakwete chikulupi, nganajonasika yimpepe ni ŵandu ŵaŵaliji ŵangapikanila, ligongo jwalakwe ŵapochele mwamtendele ŵakusonda.+
32 Ana ngusosekwa kusalasoni yisyasyo yine? Pakuŵa ndaŵi jinondipile kuti mbitilisye kuŵecheta yakwamba Gidiyoni,+ Balaki,+ Samusoni,+ Yefita,+ Daudi,+ soni Samuyele+ ni ŵakulochesya ŵane.
33 Ligongo lyakola chikulupi, jemanjaji ŵagagomeche maumwenye,+ ŵatesile yachilungamo, ŵasalilidwe yindu yachachatendela,+ ŵawugele pakamwa pa masimba,+
34 ŵasimisye machili ga moto,*+ soni ŵakulupwiche ŵandu paŵasakaga kwawulaga ni upanga.*+ Ŵaliji ŵangali machili nambo ŵapochele machili,+ ŵaŵele ŵakulimbangana pa ngondo,+ soni ŵagagomeche magulu ga ngondo gagayiche kukwajimuchila.+
35 Achakongwe ŵapochele achalongo achimjawo ŵaŵajimwiche ku chiwa.+ Ŵalasile mnope mpaka kuwa soni nganakunda kuleka chikulupi chawo kuti ŵagopole. Ŵatesile yeleyi pakusaka kwimuka kwambone mnope.
36 Ŵane ŵalinjidwe mwakwanyosya soni kwakwapula, nambosoni kupunda pelepa, ŵayikene pakwataŵa+ ni kwaponya mundende.+
37 Ŵawuleje mwakwaponya maganga,+ ŵane ŵalinjidwe pakusaka kuti aleche chikulupi chawo, soni ŵane ŵakatile pasikati ni macheka. Ŵane ŵawile ni upanga,+ soni ŵane ŵawalaga mapende ga ngondolo soni ga mbusi.+ Ŵaliji ŵakulaga, ŵasimanaga ni yakusawusya,+ soni ŵandu ŵaliji mkwalagasya.+
38 Ŵandu ŵeleŵa ŵaliji ŵambone mnope mwamti nganaŵajilanaga ni chilambochi. Ŵaliji mkwendajenda ni kugonaga m’yipululu, m’matumbi, mu mbanga+ soni m’masimbo.
39 Ŵandu wosopeŵa, Mlungu ŵapele jemanjajo umboni wakwasimichisya kuti ŵatesile yakumsangalasya jwalakwejo ligongo lya chikulupi chawo. Nambope, jemanjajo nganakuwona kukwanilichikwa kwa yindu yaŵasasile Mlunguyo.
40 Yaliji myoyo ligongo lyakuti Mlungu ŵayiweni chilepe yindu yambone yakuti atupe m’weji+ chandanda, ni chakulinga chakuti jemanjajo akaŵa ŵamlama m’weji mkanituŵe kuŵa ŵamlama.
Maloŵe Gamwiŵanda
^ Kapena kuti “achinangolo ŵetu.”
^ Kapena kuti “ndaŵi.” Alole mbali jakuti, Kugopolela kwa Maloŵe.
^ Kapena kuti “ŵatendele umboni mwakwitichisya.”
^ Ŵane akusati “yilimbilimbi.”
^ Kapena kuti “jwakudalilichika.”
^ Kapena kuti “yachachisosekwa kutenda pakumsika m’malembe.”
^ Kapena kuti “ŵalamwile.”
^ Mu Chigiliki ŵatiga, “Klistu.”
^ Mu Chigiliki ŵatiga, “likakwaya.”
^ Kapena kuti “nganapya ni moto.”
^ Upanga ukusawoneka mpela chipula chekulungwa chakutema kosekose.
