Chikalata Chaŵili Chakwawula kwa Timoteyo 4:1-22
4 Klistu Yesu chachalamula* ŵandu ŵaumi soni ŵawe+ pandaŵi jachachiwonechela+ soni pachachilamulilaga+ mu Umwenye wakwe.+ Myoyo pameso pa Klistu Yesujo soni Mlungu, ngumlamula mwamachili mmwejo kuti,
2 Mlalichile maloŵe.+ Mgalalichile mwachitema mundaŵi jambone soni mundaŵi jakusawusya. Mwajamucheje ŵandu,+ mwakalamusyeje mwamachili, soni mwalimbikasyeje. Mtendeje yeleyi mwakuwusimana mtima soni mpelaga jwakwiganya mwalunda.+
3 Pakuŵa jikwika ndaŵi jele ŵandu ngasanonyelaga yijiganyo yisyesyene,*+ nambo pakuya yakusaka yawo, jemanjajo chachilipatila ŵakwiganya ŵane kuti agambeje kwajiganya yakusaka kupikana.*+
4 Ŵanduwo chachileka kupikanila yayili yisyesyene ni kutanda kupikanila ngani syaunami.
5 Nambo mmwejo mpitilisye kuŵa ŵaganisya chenene mu yindu yosope, mpilile yakupweteka,+ mpitilisye kulalichila ngani syambone,* soni mkwanilisye mbali syosope sya utumiki wenu.+
6 Pakuŵa une ndili mpela mbopesi ja chakumwa jakujikusula,+ soni ndaŵi jangu jakutyoka+ jiŵandichile.
7 Mbutile ngondo jambone,+ mbutwiche pa mpikisano mpaka kumbesi,+ soni nguyisye yindu yosope yatukusakulupilila.
8 Kutandila apano kwawula msogolo, asunjile une chisoti cha chilungamo.+ Ambuje, ŵali jwakulamula jwachilungamo,+ chachimba une chisoticho pa lisikulyo mpela mbote.*+ Ngasamba unepe, nambo chachapasoni wosope ŵakwembecheya ndaŵi ja kuwonechela kwa Ambujewo.
9 Mtende yiliyose yakomboleka kuti myiche kwa une mwachitema.
10 Pakuŵa Dema+ andesile une ligongo lyakunonyela yindu ya mundaŵi* ajino, mwamti apite ku Tesalonika. Kelesike atyosile apite ku Galatiya, soni Tito apite ku Dalamatiya.
11 Luka jika ni jwasigele ni une. Pakwika mumjigalesoni Maliko, ligongo jwalakwejo akusangamuchisya mnope une pa masengo gakutumichila Mlungu.
12 Nambo Tukiko+ namtumile ku Efeso.
13 Munjigalilesoni chakuwala changu chakutukutila chinachilesile ku Tolowa kumangwakwe Kalipo, nambosoni munjigalile mipukutu mnopemnope ja mapende jila.
14 Alekisanda jwakusyana yisyano ya kopa jula ŵandendele yindu yakupweteka mnope. Yehofa* chachimwuchisya jwalakwejo mwakamulana ni yakutenda yakwe.+
15 Mmwejosoni mkalamuche ni mundu jweleju, ligongo jwalakwe ŵalimbene mnope ni maloŵe gatwalalichile.
16 Panaliji mkulichenjela kandanda pa magambo gangu pangali juŵaliji kumbali jangu, nambo wosope ŵandisile. Nguŵenda kuti Mlungu akajimba magambo jemanjajo.
17 Nambope Ambuje ŵajimi pambali pangu ni kumba machili. Ŵatesile yeleyi kuti kupitila mwa une ngani syambone silalichidwe mwakwanila soni kuti ŵandu ŵamitundu josope asipikane.+ Nambosoni ŵangulupwisye mkamwa mwa lisimba.+
18 Ambujewo chachingulupusyasoni ku yakusakala ya mtundu uliwose soni chachisunga kuti ngatame mu Umwenye wawo wakwinani.+ Uchimbichimbi wosope ujawule kwa Ambujewo mpaka kalakala. Ame.
19 Mumbelechele moni kwa Pulisika ni Akula+ soni kwa wosope ŵa m’nyumba ja Onesifolo.+
20 Elasito+ ŵasigalile ku Kolinto, nambo Tulofimo+ namlesile ku Mileto ligongo ŵaliji mkulwala.
21 Mtende yiliyose yakomboleka kuti myiche akuno ndaŵi jakusisima mkanijitande.
Yubulo akumpa moni, nambosoni Pude, Lino, Kalaudiya soni achalongo achimjetu wosope nombenawo akumpa moni.
22 Ambuje aŵe ni mmwejo ligongo lya nganisyo syambone syamkwete. Umbone mtima wakwe wekulungwa uŵe ni jemanja wosope.
Maloŵe Gamwiŵanda
^ Kapena kuti “chachawelusya.”
^ Kapena kuti “yambone; yakupindulisya.”
^ Kapena kuti “agambeje kwajiganya yakwanonyelesya m’mawiwi mwawo.”
^ Mu Chigiliki ŵatiga, “mtendeje masengo ga jwakulalichila.”
^ Ŵane akusati “mboto.”
^ Alole mbali jakuti, Kugopolela kwa Maloŵe.
^ Alole Yakumbesi A5.
