Chikalata cha Yakobo 4:1-17
4 Ana ngondo soni kumenyana yayili pasikati penu yikutyochela kwapi? Ana ngayikutyochela ku yakumbila ya chilu chenu, yele yikulimbana kuti yilamulileje chilu chenu?*+
2 Jemanja mkusakumbila yindu, nambo ngamkusapochela kalikose. Mkusimwawulaga achimjenu soni mkusakumbila mwakulemwecheka yindu ya ŵane, nambo ngamkusapata chilichose. Nditu, jemanja mkutamila kumenyana soni kutenda ngondo.+ Jemanja nganimkola chilichose ligongo ngamkusaŵenda.
3 Nambosoni pamŵendile yindu ngamkusapochela ligongo mkusaŵenda ni chakulinga chakulemwecheka, pakuŵa mkusayiŵenda kuti mkwanilisyeje yakumbila yenu ya chilu.
4 Jemanja ŵandu ŵangakulupichika,* ana ngamkumanyilila kuti kukamulana ni chilambo kuli kuŵengana ni Mlungu? Myoyo jwalijose jwakusaka kukamulana ni chilambo nikuti akulitenda kuŵa mdani* jwa Mlungu.+
5 Ana kapena mkuganisya kuti yalikusasala lilemba lila yili yangali masengo, yakuti, “Mtima wakumbila mnope wawuli mwa m’weji ukusasaka uli upatile yindu yosope”?+
6 Nambope, umbone mtima wakusapeleka Mlungu uli wekulungwa. Ni ligongo lyakwe lilemba likusati, “Mlungu akusiŵakanaga ŵandu ŵakulikwesya,+ nambo akusalosya umbone mtima wakwe wekulungwa kwa ŵandu ŵakulinandiya.”+
7 Myoyo, mkunde kuti Mlungu amlongoleleje.+ Nambo mumkaneje Satana,+ soni jwalakwe chachimtila jemanja.+
8 Mumŵandichile Mlungu, soni jwalakwe chachimŵandichila jemanja.+ Mswejesye makono genu, jemanja ŵandu ŵakulemwa,+ soni mtyosye nganisyo syakusakala m’mitima jenu,+ jemanja ŵandu ŵakayichilakayichila.
9 Mlitendeleje chanasa soni mlileje mwakulidandawulila.+ Kusechelela kwenu kuŵe kulila, soni kusangalala kwenu kuŵe chanasa.
10 Mlinandiye pameso pa Yehofa,*+ soni jwalakwe chachimkwesya jemanja.+
11 Achalongo achimjangu, mleche kuŵecheta yakusakala pakwamba ya ŵane.+ Pakuŵa jwalijose jwakusaŵecheta yakusakala yakwamba mlongomjakwe kapena kumlamula* mlongomjakwejo, ni kuti akunyosya chilamusi soni akuchilamula chilamusicho. Sambano naga mkuchilamula chilamusi, nikuti nganimŵa jwakupikanila chilamusi nambo mli jwakulamula.
12 Pakuŵa apali jumpepe jwali Jwakupeleka Malamusi soni Jwakulamula,+ jwele jwakusakombola kukulupusya soni konanga.+ Sambano, ana mmwejo ŵani kuti mwalamuleje ŵane?+
13 Sambano mpikane jemanja ŵamkusaŵecheta kuti, “Lelo kapena malaŵi chitujawule ku msinda wamtiwamti soni chitukatame kweleko kwa chaka chamtundu. Kweleko chitukatendeje malonda soni chitukapate mbiya syejinji.”+
14 Nambotu jemanja ngamkumanyilila mwawuchiŵela umi wenu malaŵi.+ Pakuŵa mli mpela lipundugulu lyalikusawoneka kwa kandaŵi kamnono kaneko ni ngawonekasoni.+
15 Mmalomwakwe, mjileje kuti, “Naga Yehofa* akusaka,+ malaŵi tuchiŵa ni umi soni tuchitenda yamtiyamti.”
16 Nambotu jemanja mkusalikwesya soni mkusalilapilila. Kulilapilila kwamti myoyoko kuli kwakusakala.
17 Myoyo, naga jwine akumanyilila mwampaka atendele yindu yambone nambo ni ngayitendaga, jwalakwejo akulemwa.+
Maloŵe Gamwiŵanda
^ Mu Chigiliki ŵatiga, “yilamulileje yiŵalo yenu.”
^ Mu Chigiliki ŵatiga, “Jemanja ŵachikululu.”
^ Ŵane akusati “mmagongo.”
^ Alole Yakumbesi A5.
^ Kapena kuti “kum’welusya.”
^ Alole Yakumbesi A5.
