Chikalata Chandanda Chakwawula kwa Timoteyo 4:1-16
4 Nambope, maloŵe gagalembedwe mwakulongoleledwa ni Mlungu gakusasala mwakupikanika chenene kuti mundaŵi jamsogolo ŵandu ŵane chachileka chikulupi chawo. Jemanjaji chachipikanilaga ngani syaunami syakuwoneka mpela syakutyochela kwa Mlungu+ nambosoni chachipikanilaga yijiganyo ya yiŵanda.
2 Chachipikanilagasoni ngani syaunami+ kutyochela kwa ŵandu ŵakulambusya, ŵele mtima* wawo utesile liŵasi mpela kuti ŵawujochiche ni chisyano chamoto.
3 Ŵandu ŵeleŵa chachalekasyaga ŵane kulombela+ soni chachalekasyaga ŵandu kulya yakulya+ yaŵayipanganyisye Mlungu kuti ŵandu ŵakwete chikulupi+ soni ŵakumanyilila yayili yisyesyene alyeje+ ni kumyamichilaga Mlungu.
4 Chilichose chiŵapanganyisye Mlungu chili chambone,+ soni pangali chilichose chakuti mundu akalyaga+ naga akuchipochela mwakuyamichila.
5 Pakuŵa yakulyayo yikusaŵa yeswela ligongo lya maloŵe ga Mlungu soni lipopelo.
6 Naga mkwasalila ŵakulupilila achimjenu maloŵe gelega, chimchiŵa jwakutumichila jwambone jwa Klistu Yesu. Chimchilosyasoni kuti mwapochele maloŵe gakupeleka chikulupi soni ga chijiganyo chambone chamŵele mli mkuchikuya chenene.+
7 Nambo mŵambaleje ngani syaunami+ syakusanonyela kuŵecheta achakongwe ŵachikulile. Mmalomwakwe, mlijiganyeje ni chakulinga chakuti mŵe ŵakulipeleka kwa Mlungu.
8 Pakuŵa kutenda maseŵela gakulimbisya chilu kuli kwakupindulisya panandi, nambo kuŵa ŵakulipeleka kwa Mlungu kuli kwakupindulisya pa yindu yosope, ligongo kukusakamuchisya kuti mundu apochele upile wele Mlungu ŵasasile kuti chachipeleka, chinga mu umi awuno kapena wawukwikawo.+
9 Maloŵe gelegatu gali gakudalilichika soni gakwenela kugakulupilila ni mtima wosope.
10 Ni ligongo lyakwe tukukamula masengo mwakulimbichila+ soni tukulipeleka mnope ligongo tuŵisile chembecheyo chetu pa Mlungu jwaumi, jwali Mkulupusyo+ jwa ŵandu ŵa mtundu uliwose,+ mnopemnope ŵele ŵali ŵakulupichika.
11 Mpitilisye kwalamula wosope kuti akuyeje yindu yeleyi soni mwajiganyeje.
12 Mkakunda kuti jwalijose amdeleleje pakumwona kuti mli mwanache. Mmalomwakwe, mŵeje chisyasyo chambone kwa ŵandu ŵakulupichika pa kaŵechete kenu, mu yitendo yenu, pakwanonyela ŵane, mu chikulupi soni mu ndamo syenu syeswela.
13 Mpaka une pachinjiyika, mpitilisye kulipeleka pakuŵalanga pameso pa ŵandu,+ pakwadandawulila,* soni pakwajiganya.
14 Mkawuwonaga mtuka waŵampele Mlungu kuŵa mpela wangali masengo. Mwapochele mtuka welewu kupitila m’maloŵe gakulochesya pandaŵi jele achakulungwa ŵa mumpingo ŵaŵisile makono gawo pa mmwejo.+
15 Mganichisyeje mnope yindu yeleyi soni mlipelecheje mnope pakuyitenda yindu yeleyi kuti kwawula kwenu pasogolo kuwonechele kwa ŵandu wosope.
16 Mtendeje yiliyose yakomboleka kuti mŵe chisyasyo chambone soni kuti mŵe jwakwiganya jwambone.+ Mpitilisye kulipeleka pakutenda yindu yeleyi, ligongo naga mkutenda yindu yeleyi chimchilikulupusya mwasyene soni ŵele ŵakumpikanila mmwejo.+
Maloŵe Gamwiŵanda
^ Pelepa, maloŵe gatugopolele kuti “mtima” gakugopolela nganisyo syakumkumbusya mundu yambone soni yakusakala. Ŵane akusati “chikumbumtima.” Alole maloŵe gakuti “Mtima” pa mbali jakuti, Kugopolela kwa Maloŵe.
^ Kapena kuti “pakwalimbikasya.”
