An korapsyon ha gobyerno amo an pag-abuso han awtoridad para ha personal nga bentaha. Ito nga pag-abuso maiha na nga nahitatabo. Pananglitan, mababasa ha Biblia an usa nga balaud nga nagdidiri ha panhukip ha hudisyal nga mga kaso. Iginpapakita hito nga may-ada na korapsyon sobra 3,500 ka tuig na an naglabay. (Eksodo 23:8) Syempre, an korapsyon diri la kay pagkarawat hin hukip. Usahay, ginsasalingabot han korap nga mga opisyal han gobyerno an mga butang nga diri ira, mga serbisyo nga waray hira katungod, o nangangawat pa ngani hira hin pundo. Bangin gamiton liwat nira an ira katungdanan basi diri makatadunganon nga paboran an ira kasangkayan ngan mga paryente.

Bisan kon mahimo magkaada korapsyon ha bisan ano nga organisasyon han tawo, baga hin an korapsyon ha gobyerno an pinakagrabe. Sumala ha 2013 Global Corruption Barometer nga iginpublikar han Transparency International, gintatagad han mga tawo ha bug-os nga kalibotan nga an lima nga pinakakorap nga institusyon amo an politika, pulisya, mga opisyal han gobyerno, mga parahimo hin balaud, ngan hukmanan. Kitaon naton an pipira nga report mahitungod hini nga problema.

• APRIKA: Han 2013, mga 22,000 nga opisyal han gobyerno ha Sur Aprika an ginkasohan tungod han korapsyon.

• SUR AMERIKA: Han 2012, ha Brazil, 25 an napriso tungod han paggamit han pundo han gobyerno basi ipalit hin mga butos. Kaupod hito an naglabay nga chief of staff han presidente, an ikaduha nga may pinakahitaas nga awtoridad ha nasud.

• ASIA: Ha Seoul, Sur Korea, 502 an namatay han marumpag an usa nga department store han 1995. Sumala han imbistigasyon, ginhukipan an mga opisyal han syudad basi tugotan an mga kontratista nga gumamit hin diri maopay nga klase hin semento ngan talapason an patakaran han seguridad.

• EUROPA: “Diri gud katoohan an pagin kalyap han problema [an korapsyon ha Europa],” sumala kan Cecilia Malmström, an European Commission Home Affairs Commissioner. Hiya nagdugang: “An mga politiko baga hin diri gud nangangalimbasog ha pagwara han korapsyon.”

Nakagamot na gud an korapsyon ha gobyerno. Nagsurat hi Propesor Susan Rose-Ackerman, usa nga eksperto ha topiko kontra ha korapsyon, nga an reporma nagkikinahanglan hin “daku nga mga pagbag-o ha pamaagi han gobyerno.” Bisan kon baga hin waray na paglaom an sitwasyon, iginpapakita han Biblia nga diri la posible nga magkaada mas daku nga pagbag-o, kondi sigurado gud ito nga mahitatabo.