Magin Duok ha Dios

Karuyag Niya nga Maglampos Kita

Josue 1:6-9

KARUYAG gud han mahigugmaon nga mga kag-anak nga maglampos an ira mga anak ngan magkaada mapulsanon ngan malipayon nga kinabuhi. Karuyag liwat ni Jehova nga aton langitnon nga Amay nga maglampos an iya mga anak dinhi ha tuna. Tungod kay pinalangga kita niya, ginsusumatan kita niya kon paonan-o magigin malampuson. Pananglitan, pansina an mga pulong nga iya ginyakan kan Josue, nga nakarekord ha Josue 1:6-9.

Imadyina an kahimtang, nga nakikita ha too. Han namatay hi Moises, hi Josue an nagin bag-o nga lider han Israel, nga minilyon an kadamu. An mga Israelita nangangandam pagsulod ha tuna nga iginsaad han Dios ha ira mga kaapoy-apoyan. May sagdon an Dios para kan Josue. Kon susundon ito ni Josue, mabulig ito ha iya nga maglampos. Pero ito nga sagdon diri la para ha kaopayan ni Josue. Pinaagi ha pag-aplikar hito, kita liwat magigin malampuson.—Roma 15:4.

Ginsidngan ni Jehova hi Josue nga magin maisugon ngan marig-on—diri la usa kondi tulo ka beses. (Bersikulo 6, 7, 9) Sigurado nga hi Josue kinahanglan magin maisugon ngan marig-on basi malampuson nga pangunahan an nasud ha pagsulod ha Tuna nga Iginsaad. Pero paonan-o hiya magkakaada hini nga mag-opay nga kalidad?

Mahimo hi Josue magin maisugon ngan marig-on ha bulig han giniyahan nga mga sinurat. “Sunda hin maopay an bug-os nga Balaud nga iginsugo ha imo ni Moises nga akon surugoon,” siring ni Jehova. (Bersikulo 7) Posible gud nga hi Josue may-ada han pipira la nga libro han Biblia nga iginsurat na hito nga panahon. a Pero basi maglampos, diri igo an basta pagkaada la han Pulong han Dios. Basi mapahimulosan ito, kinahanglan buhaton ni Josue an duha nga butang.

Siyahan, kinahanglan ni Josue regular nga basahon ngan pamalandungon an pulong han Dios. Ini an siring ni Jehova: “Kinahanglan basahon mo ini ha mahinay nga tingog ha adlaw ngan gab-i.” (Bersikulo 8) Usa nga reperensya an nasiring: “Ginsugo han Dios hi Josue nga hinumdoman an Iya Balaud pinaagi ha ‘pagyakan’ hito ha iya kalugaringon, ‘pagpamurubuot’ hito, o ‘paghinunahuna’ hito.” An pagbasa ngan pagpamalandong ha Pulong han Dios kada adlaw mabulig kan Josue nga maatubang an maabot nga mga problema.

Ikaduha, kinahanglan iaplikar ni Josue an iya mga nahibaroan tikang ha Pulong han Dios. Ginsidngan hiya ni Jehova: “[Sunda] hin maopay an ngatanan nga iginsurat dinhi; kay hito nga paagi magigin malampuson ka.” (Bersikulo 8) An kalamposan ni Josue nakadepende ha pagbuhat niya han kaburut-on han Dios. Kay ano? Kay pirme naglalampos an kaburut-on han Dios.—Isaias 55:10, 11.

Ginsunod ni Josue an sagdon ni Jehova. Tungod hito, nagkaada hiya malipayon ngan kontento nga kinabuhi sugad nga matinumanon nga magsiringba ni Jehova.—Josue 23:14; 24:15.

Karuyag mo ba magkaada malipayon nga kinabuhi pariho kan Josue? Karuyag ni Jehova nga maglampos ka. Pero diri igo an basta pagkaada la han iya Pulong, an Biblia. Ini an suhestyon han usa nga matinumanon nga Kristiano nga maiha na nga nag-aalagad: “Kuhaa iton nga mga pulong nga nakasurat dida ha Biblia ngan isulod ha imo kasingkasing.” Kon regular nga babasahon ngan papamalandungon mo an Pulong han Dios ngan iaaplikar an imo mga nahibabaroan, pariho kan Josue, “magigin malampuson ka.”

[Footnote]