“Magin mga magturutdo” kamo. (Heb. 5:12) Hunahunaa! Gin-aaghat kita ni Jehova​—an pinakamaopay nga Magturutdo ha uniberso—​nga tutdoan an iba mahitungod ha iya! An bisan ano nga toka ha pagtutdo han kamatuoran mahitungod kan Jehova​—ha pamilya, ha kongregasyon, o ha ministeryo—​usa nga presyoso nga pribilehiyo ngan mabug-at nga responsabilidad. Kondi, paonan-o kita maglalampos?

Makikita an baton hito ha mga pulong ni apostol Pablo ha iya surat kan Timoteo: “Padayon nga buhata an imo gimaopayi ha pagbasa ha publiko, ha pagsagdon, ngan ha pagtutdo.” Hi Pablo nagdugang: “Kon buhaton mo ini, matatalwas ka ngan an mga namamati ha imo.” (1 Tim. 4:13, 16) Nagtatalwas hin kinabuhi nga mensahe an kinahanglan mo isumat ha iba. Salit importante nga mangalimbasog ka nga pauswagon an imo pagbasa ngan pagtutdo. Ini nga brosyur gindisenyo basi buligan ka. Tagda an pipira nga bahin hini.

Waray iba nga magturutdo sugad kan Jehova. (Job 36:22) Bisan kon ini nga brosyur mabulig ha imo nga mapauswag an imo abilidad sugad nga magbarasa ngan magturutdo, ayaw hingalimti nga hi Jehova an Surok han aton mensahe ngan hiya an nagpapahirani han mga tawo ngada ha iya. (Juan 6:44) Salit, pag-ampo pirme para han baraan nga espiritu. Gamita pirme an Pulong han Dios. Ihatag an atensyon ngadto kan Jehova, diri ha imo kalugaringon. Buligi an imo mamarati nga makultibar an hilarom nga gugma para ha iya.

Gin-iimbitar ka nga itutdo an pinakaimportante nga mensahe para ha mga tawo. Nasarig kami nga samtang natapod ka ha “kusog nga iginhahatag han Dios,” maglalampos ka hini nga buruhaton.—1 Ped. 4:11.

An iyo igkasi-magturutdo,

Nagmamando nga Lawas han mga Saksi ni Jehova