Tito 1:1-16
1 Tikang kan Pablo nga uripon han Dios ngan apostol ni Jesu-Kristo uyon ha pagtoo han mga pinili han Dios ngan ha husto nga kahibaro ha kamatuoran, nga uyon ha debosyon ha Dios
2 ngan iginbasar ha paglaom nga kinabuhi nga waray kataposan nga maiha na nga iginsaad han Dios, nga diri makakagbuwa,
3 samtang ha iya itinanda nga mga panahon iginpahayag niya an iya pulong pinaagi han pagsangyaw nga igintapod ha akon, uyon ha sugo han aton Paratalwas, an Dios;
4 para kan Tito, nga totoo nga anak nga kapariho namon hin pagtoo:
Makarawat mo unta an diri-matupngan nga pagkabuotan ngan kamurayawan tikang ha Dios nga Amay ngan kan Kristo Jesus nga aton Paratalwas.
5 Ginbilin ko ikaw ha Creta basi tadungon mo an mga butang nga may depekto ngan magpili ka hin katigurangan ha tagsa nga syudad, sugad han akon instruksyon ha imo;
6 kon may lalaki nga waray akusasyon ha iya, usa la an asawa, an mga anak matinoohon ngan waray akusasyon nga nagkikinabuhi hin maraot o rebelyoso.
7 Kay sugad nga tinaporan han Dios, an paramangno kinahanglan waray akusasyon, diri nag-iinsister han iya karuyag, diri madagmit masina, diri parahubog, diri bayolente,* diri nagtitinguha nga makabentaha ha hakugnon ngan malimbong nga paagi,
8 lugod maabiabihon, mahigugmaon ha kaopayan, maopay an panhunahuna, matadong, maunungon, may pagpugong ha kalugaringon,
9 nasunod gud ha masasarigan nga pulong may kalabotan ha iya arte ha pagtutdo, basi may kapas hiya ha pag-aghat pinaagi han maopay* nga katutdoan ngan ha pagsaway ha mga nakontra.
10 Kay damu nga tawo an rebelyoso, paraistorya hin waray pulos, ngan paralimbong, labi na an mga nasuporta ha pagturi.
11 Kinahanglan itak-om an ira mga baba, kay padayon nga ginbubungkag hini mismo nga mga tawo an bug-os nga mga panimalay pinaagi ha pagtutdo hin mga butang nga diri angay igtutdo basi la makabentaha ha malimbong nga paagi.
12 An usa ha ira, nga ira mismo propeta, nagsiring: “An mga taga-Creta mga buwaon, magpintas nga ihalas nga mga hayop, mga hubya ngan malamon.”
13 Totoo ini nga pamatuod. Tungod hini istrikto nga sawaya hira, basi magin mahimsog hira ha pagtoo,
14 pinaagi ha diri paghatag hin atensyon ha susmatanon han mga Judio ngan ha mga sugo han mga tawo nga nagsasalikway han kamatuoran.
15 An ngatanan nga butang malimpyo ha limpyo nga mga tawo. Pero ha mga tawo nga mahugaw ngan waray pagtoo waray butang nga limpyo, kay an ira hunahuna ngan konsensya mahugaw.
16 Dayag nga nagpapahayag hira nga nakilala hira ha Dios, pero an ira mga buhat nagpapakita nga iginsasalikway nira hiya, kay mangil-ad hira ngan diri-masinugtanon ngan diri kwalipikado ha bisan ano nga maopay nga buhat.
