Tito 2:1-15
2 Pero ikaw, magpadayon ka ha pagyakan uyon ha maopay* nga katutdoan.
2 An edaran nga kalalakin-an sadang magin kontrolado an paggawi, seryoso, maopay an panhunahuna, mahimsog an pagtoo, mahigugmaon, ngan mapailubon.
3 Sugad man an edaran nga kababayin-an sadang magin dungganon an paggawi, diri parapakaraot, diri uripon han bino, ngan magturutdo han kaopayan;
4 basi mabuligan nira an burobata nga kababayin-an nga makapamurubuot utro nga higugmaon an ira bana ngan an ira mga anak,
5 magin maopay an panhunahuna, putli, nanginginano han mga buruhaton ha balay, maopay an pamatasan, ngan nagpapasakop ha ira bana, basi an pulong han Dios diri pagyaknan hin maraot.
6 Sugad man, padayon nga aghata an burobata nga kalalakin-an nga magin maopay an panhunahuna.
7 Ipakita nga susbaranan ka ha maopay nga mga buhat ha ngatanan nga paagi. Seryoso gud nga itutdo kon ano an putli,
8 nga nagamit hin maopay nga mga pulong nga diri mapapakaraot, basi maalohan an mga nakontra, kay waray hira maraot nga masisiring mahitungod ha aton.
9 An mga uripon sadang magpasakop ha ira mga agaron ha ngatanan nga kahimtang, ngan mangalimbasog nga lipayon hira, diri mabaton-baton,
10 diri nangangawat ha ira, lugod nagpapakita nga bug-os nga matataporan hira, basi ha ngatanan nga paagi maghatag hira hin kadayawan ha katutdoan han aton Paratalwas, an Dios.
11 Kay iginpakita han Dios an iya diri-matupngan nga pagkabuotan nga naghahatag hin katalwasan ha ngatanan nga klase hin tawo.
12 Nagtututdo ito ha aton nga isalikway an pagin diri-diosnon ngan an kalibotanon nga mga hingyap, ngan magkinabuhi nga may maopay nga panhunahuna ngan pagkamatadong ngan debosyon ha Dios samtang adi kita hini nga sistema,
13 ngan ginhuhulat an makalilipay nga paglaom ngan an mahimayaon nga pagpakita han harangdon nga Dios ngan han aton Paratalwas, hi Kristo Jesus,
14 nga naghatag han iya kalugaringon para ha aton basi talwason kita ha ngatanan nga klase hin pagkamatinalapason ngan limpyohan kita basi magin iya kalugaringon nga katawohan nga espesyal nga panag-iya, nga aktibo ha mag-opay nga buhat.
15 Padayon nga isumat ini nga mga butang ngan magsagdon ngan magsaway ka nga may bug-os nga awtoridad. Ayaw pabay-i nga minuson ka han bisan hin-o.
Mga footnote
^ O “makapahimsog.”
