Hayqqidaageeti Paxa Deˈiyaageeta Maaddanau Danddayiyoonaa?

ARGGO bagga Afirkkan deˈiya Tambba giyo issi yelagau timirtte keettaa paacee matiis. * I loˈˈo markkiyaa demmanaadan hayqqida dabbotu maaduwaa oychana mala a aayyiyaa a minttettaasu. Sisiliyaa giyo haruuruwan Palermmo kataman xeetan qoodettiya asaa ahay daro wodiyaa takkanaadan melissidi gonggoluwan wottidoogaa daro asay yiidi beˈees. Xaliyan melissido ahay paxa deˈiyaageeta iitabaappe naagees giidi issoti issoti ammanoosona. Amarkkan Niyoorkken arggo baggan Lili Dele giyo kataman deˈiya moytilliyaa xeesiya keehi daro shareechotukko layttan layttan asay yees. He asati hayqqida dabbotuura woykko laggetuura gayttidi etappe maaduwaa demmana giidi yoosona.

Hayqqidaageeti paxa deˈiyaageeta maaddana danddayoosona giyo ammanoy alame yuushuwan hanno gakkanaukka deˈees. Ne qofayshin aybee? Neenikka hegaa mala ammanuwaa tamaaridaagaa woykko hegaadan ammaniya laggee deˈiyoogaa gidana danddayaasa. Nuuni siiqiyo hayqqida uraa laamotiyoogee wottin deˈiyaaba. SHareechoti he koshshaa polanau qaalaa geloosona. Issi shareechiyaa, “maaduwaa koyiyo wode ubban ayyaanati giigi uttidosona” yaagidoogee Taym giyo maxeetiyan kiyiis. Hegee tumee? Hayqqidaageeti paxa deˈiyaageeta tumuppe maaddana danddayiyoonaa? Geeshsha Maxaafay yootiyo qoncce zaaruwan neeni garamettennan aggakka.

Hayqqidaageeti Harasan Paxa Deˈiyoonaa?

Geeshsha Maxaafay hayqqidaageetu hanotaa qonccenne akeekanau metenna ogiyan yootees. Eranchchaa 9:5y: “Paxa de7⁠iya asati issitoo haiqqanau de7⁠iyoogaa eroosona; shin haiqqidaageeti aibanne erokkona” giyoogaa akeeka. Hayqqidaageeti qoppiyoobi woy etau siyettiyaabi deˈii? Paydo 6y he oyshaa: “Eta siiqoi, ixoinne qanaatee ubbai etaara issippe xayiichchiis. Hegaa gishshau, hagaappe hini baggan salo gufantton oosettiya yoho ubban etau merinaukka qaadi baawa” yaagidi zaarees. He shemppuwan paydo 10y, “neeni baanasan duufuwan [“SHiiˈooliyan,” NW] oosoi, woikko halchchoi, woikko eri, woikko aadhdhida eratetti baawa” giyoogaakka akeeka. Ha sohuwan goˈettido, “SHiiˈool” giya Ibraysxxe qaalay “asaa naatu ubbaa duufuwaa” malaatees. Geeshsha Maxaafay Yesuus Kiristtoosi hayqqidi takkido sohuwaa malaatanau, he qaalaara issi mala birshshettay deˈiyo “Heydes” giyo Giriiketto qaalaa goˈettees.—Oosuwaa 2:31.

Yesuusi paxa deˈiyo wode daro asaa maaddiis; shin i hayqqana bessiyoogaa erees. I duufuwan takkiyo wodetunkka asaa maaddana danddayiyoobadan qoppidee? Akkay. I ba hayquwaa aybanne oottana danddayenna qamman leemisiis. (Yohaannisa 9:4) Asay hayqqiyo wode, “hayquwan xoonettiyoogaa” Yesuusi loyttidi erees.—Isiyaasa 26:14, NW.

Hayquwaa hegaadan qonccissiya leemisuwaakka Yesuusi yootiis. A dabboy Alˈˈaazari hayqqido wode, Yesuusi hayquwaa xiskkuwan leemisiis. (Yohaannisa 11:11-13) Xiskkida asi nuna maaddees giidi qoppokko, gidennee? Xiskkida uri aynne erenna, oonanne maaddana danddayenna.

SHemppoy Hayqqennee?

Ashoy hayqqiyo wode shemppoy shaahettidi biya, ayfiyan beettennaba gidiyoogaa daroti tamaaridosona. Geeshsha Maxaafay hegaappe dummatiyaabaa tamaarissees. Geeshsha Maxaafan, Doomettaabaa maxaafay shemppoy aybakko nuuyyo qonccissees. Doomettaabaa 2:7y koyro  bitanee merettido wode, “paxa de7⁠iya asa [“shemppo,” NW]” gididoogaa yootees. Asi shemppo; meheenne doˈaykka shemppo. * (Doomettaabaa 1:20-25) Yaatiyo gishshau, asi, mehee woy doˈi hayqqiyo wode shemppoy hayqqees giyoogee bessiyaaba. Geeshsha Maxaafay hegaa qonccissees.—Hizqqeela 18:4.

Gidikkokka, ‘Asay yootiyo, hayqqida asatuura gayttido, eta cenggurssaa siyido woykko eta beˈido daro taarikiyaa xeelliyaagan woygana danddayettii?’ giidi issoti issoti oychana danddayoosona. Hegaa malabay daro biittan meeze gididabaa. He taarikee kayyottida dabbotu woy laggetuppe daroti hidootanaadaaninne hayqqidaageetuura gattana danddayoosona giyo shareechuwaa koyanaadan denttettees.

Hegaa mala taarikee tumee? Tuma gidikko, qommoora beˈido Geeshsha Maxaafaa qofaara phalqqettennee? Yesuus Kiristtoosi Xoossaa Qaalay tuma gidiyoogaa yootiis. (Yohaannisa 17:17) Tumay phalqqettenna. Hayqqidaageeti paxa deˈiyaageeta maaddana danddayoosona giyo qofaa nuuni waati xeellana bessiyaakko Geeshsha Maxaafay qoncce zoriyaa immees. Hayqqida asappe maado koyida issi uraabaa Geeshsha Maxaafay yootees. He taarikiyaa akeekan nabbabiyoogee tumaa qonccissees.

Issi Kawoy Hayqqida Uraappe Maado Oychiis

Sohoy Israaˈeelen huuphessa baggan ola dembbaana. Kawuwaa Saaˈoolinne a olanchati, wolqqaama gidida Pilisxxeema olanchatuura olettana hanoosona. Saaˈooli Pilisxxeematu kambbiyaa beˈido wode, a wozanay “keehippe dagammiis.” Kawuwaa Saaˈooli he wode tumu goynuwaa aggiis. Hegaappe denddidaagan, maaduwau i woossin Yihooway zaaribeenna. Saaˈooli maaduwau oona oychanee? Xoossay kiittin hananabaa yootiya Sameeli hayqqiis.—1 Sameela 28:3, 5, 6.

Saaˈooli Enddooren deˈiya shareecheeppe maaduwaa koyiis. I shareechiyaa ‘Sameela hayquwaappe denttanaadan’ oychiis. SHareechiyaa moytilliyaa xeesaasu. Sameela milatiya he moytillee, Pilisxxeemati xoonanaagaanne Saaˈoolinne a naati olan hayqqanaagaa au yootiis. (1 Sameela 28:7-19) Hegee woni hayquwaappe denddida Sameelee?

Ane qoppa. Issi uri hayqqiyo wode ‘biittau simmiyoogaa’ Geeshsha Maxaafay yootees. (Mazamure 146:4) SHareechuwaara gayttennaadan Xoossay diggiyoogaa Saaˈoolinne Sameeli eroosona. Saaˈooli kase shareechota biittaappe yedettiis!—Wogaabaa 19:31.

Ane akeeka. Ammanettida Sameeli he wodekka ayyaana meretadan deˈiyaaba gidikko, Xoossaa higgiyaa kanttidi shareechee baggaara Saaˈoolaara gayttanee? Yihooway Saaˈoola haasayissanau koyibeenna. SHareechoy hayqqida Sameela baggaara Ubbaa Danddayiya Xoossay Saaˈoola haasayissanaadan wolqqanttees giyoogaa malabaa oottana danddayii? CHii. Sameela geetettida hegee Xoossaassi ammanettida, hananabaa yootiyaagaa mule gidenna. Hegee hayqqida Sameela milatidi qonccida iita ayyaana.

Iita ayyaanati asaa naatu taarikiyaa doomettan Xoossaa haaruwan makkalida kiitanchata. (Doomettaa 6:1-4; Yihudaa 6) Iita ayyaanati asay paxa deˈiyo wode wochana danddayoosona; issi uri waati haasayiyaakkonne oottiyaakko,  qassi ay milatiyaakko eroosona. Geeshsha Maxaafay yootiyoobaa asay worddo gi qoppanaadan oottanau keehippe koyoosona. Iita ayyaanatuura mule gayttennaadan Geeshsha Maxaafay akeekissiyoogee garamissiyaabaa gidenna. (Zaarettido Wogaa 18:10-12) He iita ayyaanati ha wodiyankka hegaadan oottiiddi deˈoosona.

Siiqiyo hayqqidaageeta “beˈidoogaa” woykko eta cenggurssaa “siyidoogaa” daroti ayssi yootiyaakko haˈˈi akeekennan aggakka. He iita ayyaanati issi issitoo loˈˈo milatiyaabaa gidikkokka, eti asaa balettanau murttidosona. * (Efisoona 6:12) Qassi kaallidi deˈiyaagaakka qoppa: Yihooway nuussi qoppiya siiqo Xoossa. Hayqqidaageeti harasan paxa deˈiyaabanne bantta laggetanne bantta dabbota maaddana danddayiyaabaa gidikko, nuna siiqiya Medhidaagee hegaa digganee, qassi ‘tunaba’ gaanee? CHiikka! (1 PHeexiroosa 5:7) Yaatin, maado demmiyo ammanttiyaabi deˈii?

Paxa Deˈiyaageetanne Hayqqidaageeta Tumuppe Maaddiyaabaa

Qommoora beˈidoogaadan, hayqqidaageeti paxa deˈiyaageeta maaddana danddayennaagaa akeekida. Hegaa bollikka, hayqqidaageetuppe maado koyiyoogee keehi qohiyaaba; hegee Xoossaa higgiyaa kanttiyoobanne nuuni iita ayyaanatu kushiyan gelanaadan oottiyaaba gidiyo gishshau keehippe iita.

Geeshsha Maxaafay maaduwau kane gidida, nuna Medhida Yihoowakko xeellanaadan minttettees. I nuna hayquwaappekka ashshana danddayees. (Mazamure 33:19, 20) Ha wodiyan i nuna maaddanau koyees. Hegaa gishshau, shareechotuugaa mala worddo gidenna tumu hidootaa Yihooway immees.

Ha huuphe yohuwaa doomettan denttido Tambbi shareechotu wordduwaanne Yihooway nuussi yootiyo tumaa giddon deˈiya dummatettaa ba huuphe akeekiis. SHareechoti i hayqqida ba mayzzatuyyo yarshshana xayikko, timirtte keettaa paaciyan kunddanaagaa yootidosona. Tambbi Yihoowa Markkatuura Geeshsha Maxaafaa xannˈiyoogaa doommiis. I hayqqidaageetu hanotaabaa tumaanne hayqqida mayzza aawata milatidi qoncciyaageeti iita ayyaanata gidiyoogaa tamaariis. I shareechotu maaduwaa demmanaadan aayyiyaa a iisettidaba gidikkokka, Tambbi “Taani kunddiyaaba gidikko, laytti minna tamaarana” giidi ixxiis.

Wurssettan hanidabi aybee? I paaciyan hara naatu ubbaappe aadhiya markkiyaa demmiis! A aayyiyaa keehi garamettaasu; shareechotun ammaniyoogaa aggaasunne hegaa mala yarshshuwaabaa zaaretta denttabuukku. Nuuni “haiqqidaageeta paxa de7⁠iyaageetubaa” oychenna mala Yihooway yootidoogaa Tambbi eriis. (Isiyaasa 8:19) Xoossaa higgiyan ufayttiyaaba gidikko, au ubbabay injjetanaagaa Tambbi Geeshsha Maxaafaa xanaaˈiyoogan akeekiis.—Mazamure 1:1-3.

Hayqoy nuuppe shaakkido, nuuni siiqiyoogeetubaa shin woygana danddayettii? Etau hidooti baawee? Yihooway paxa deˈiya nuna maaddiyoogaappekka haray, duufuwan deˈiyaageetakka maaddanau qaalaa geliis. Hayqqidaageeti aynne oottennaagaa yooti simmidi, hananabaa yootiya Isiyaasi shemppo 26, paydo 19n: “Haiqqida ne asai paxana; . . . biittaa buhiyaa giddon de7⁠iyaageetoo, . . . beegottitenne ufaissau yexxite” yaagidoogaa akeeka. He hiraagay gujjidikka hayqqidaageeti denddanaagaa yootees.

Hagaa qoppa! Hayqqidi duufuwan deˈiya miilooniyan qoodettiya asay deˈuwau denddana! Ubba Geeshsha Maxaafay Yihooway hayqqidaageeta denttanau ‘laamotiyoogaa’ yootees. (Iyyooba 14:14, 15) Hegaa mala hidootay polettennaba milatii? Yesuus Kiristtoosi hayqqidaageeti Yihoowa xeelan paxa deˈiyoogaa qonccissiyoogan he hidootan keehi ammanettiyoogaa bessiis.—Luqaasa 20:37, 38.

Neessikka hegaa mala hidootay deˈanaadan koyay? * Geeshsha Maxaafaa eraa demmiyoogaa aggoppa. Neeni xannaˈiyo wode, paxa deˈiyaageetanne hayqqidaageeta Yihooway maaddana danddayiyoogaa, qassi i gelido qaalay “ammanettiyaagaanne tuma” gidiyoogaa ammanana.—Ajjuutaa 21:4, 5.

[Tohossa Qofaa]

[Sinttaa 8n dèiyaagaa]

Nuuni siiqiyo hayqqida uraa laamotiyoogee wottin deˈiyaaba

[Sinttaa 9n dèiya misiliyaa]

Hananabaa yootiya Sameeli hayquwaappe denddidi, Kawuwaa Saaˈoola haasayissidee?