Oosuwaa xayiyoogee miishshaa metuwaa xalla gidennan qofankka kahankka qohana danddayees. Hagaappe kaallidi odettida, aadhdhida eratettay deˈiyo Geeshsha Maxaafaa maarati nena maaddana danddayoosona.

•   Neeyyo siyettiyaabaa haraatussi yoota.

   Geeshsha Maxaafay yootiyoobaa: “[Tumu laggee] mule wodekka siiqees.”—Leemiso 17:17.

   Oosoy xayiyo wode neeni kayyottana, yiillotana, woykko shabbirettana danddayaasa, woykko kushe toho booxxidabadan qoppana danddayaasa. Neeyyo siyettiyaabaa ne so asaassinne ne mata laggetussi odikko neeni loˈˈobaa qoppanaadan eti maaddana danddayoosona. Eti neeni ooratta oosuwaa demmanawu maaddiya loˈˈo zoriyaa immanawukka danddayoosona.

•   Daro hirggiyoogaa agga.

   Geeshsha Maxaafay yootiyoobaa: “Wonttobau hirggoppite; aissi giikko, wonttoi bau hirggana.”—Maatiyoosa 6:34.

   Geeshsha Maxaafay nuuni kasetidi halchchanaadan minttettees. (Leemiso 21:5) Gidikkonne, sinttanaabawu bessiyaagaappe aaruwan hirggennaadankka zorees. Nuuni darotoo polettennan aggana danddayiyabawu hirggoos. Nuuni hachchi oottana bessiyaaban wudiyoogee loˈˈo.

   Ha wodiyan neeyyo siyettiya unˈˈuwaa genccanaadan maaddiya aadhdhida eratettay deˈiyo gujo zoriyaa Geeshsha Maxaafay yootees. Gujjada eranawu, “Unˈˈettiyoogaappe Woppaa Demma” giya huuphe yohuwaa nabbaba.

•   Neeni miishshaa goˈettiyo ogiyaa laamma.

   Geeshsha Maxaafay yootiyoobaa: “Taani . . . pacaanne palahaa tamaaraas.”—Piliphphisiyuusa 4:12.

   Ooratta hanotaara maayettada deˈa. Hegee neessi deˈiyaagaappe daro miishshaa kessennaadan miishshaa kessiyo ogiyaa laammiyoogaa gujjees. Koshshenna acuwan gelennaadan naagetta.—Leemiso 22:7.

   Ooratta hanotaara waata maayettada deˈanaakko gujo qofaa demmanawu, “Demmiyo Guutta Miishshan Deˈana Danddayiyo Ogiyaa” (Amaarattuwaa) giyaagaa nabbaba.

•   Ne wodiyaa akeekan goˈetta.

   Geeshsha Maxaafay yootiyoobaa: “Intteyyo de7iya wodiyaa go77i bainnasan xaissennan, . . hayyottidi de7ite.”—Qolasiyaasa 4:5.

   Oosuwaa baanawu moodettida prograamee deˈana xayikkonne, ne wodiyaa goˈettiyo loˈˈo maaraa kessa. Yaatiyoogee, ne deˈuwan issi issi hanotata laammanaadaaninne nebaa xeelliyaagan neeyyo loˈˈobay siyettanaadan maaddana.

•   Hanotaara maayetta.

   Geeshsha Maxaafay yootiyoobaa: “Minnidi oottidoban ubban go77ai de7ees.”—Leemiso 14:23.

   Kase ne oottiyoobaappe dummatiya oosuwaa oottanawu eeno ga. Laafabadan xeelliyo oosota woy kase oosuwan demmiyoogaappe guutta miishshaa demissiya oosota oottiyoogee koshshana danddayees.

•   Hidoota qanxxoppa.

   Geeshsha Maxaafay yootiyoobaa: “Maallado guuran gidinkka omarssan, ne zerettaa zeriyoogaa aggoppa; aissi giikko, [awugee loˈˈanaakko] neeni erakka.”—Eranchchaa 11:6.

   Oosuwaa koyiyoogaa aggoppa. Neeni oosuwaa koyaydda deˈiyoogaa haratussi yoota. Ne dabbotussi, ne eriyoogeetussi, kase nenaara oottidaageetussinne ne shoorotussi yoota. Oosuwaa demmanaadan maaddiyaageeta, oosuwaa xeelliyaagan kiya erissotanne oosuwaa dirijjitetu weyb saytteta xomoosa. Oosuwaa demmanaappe kase dumma dummasan oysha zaaruwaa oyshettana danddayiyo gishshawu, daro malkkachchaa gelissa.