Hizqqeela 39:1-29
39 “Laa asa naꞌawu, Googa bolli hiraagaa* yoota; awu hagaadan ga: ‘Ubbaa Haariya Goday Yihoowi hagaadan gees: “Googaa, Meshekanne Tubala waanna gadaawawu,* taani ne bolli denddaas.
2 Taani nena guyye zaarananne huuphessa bagga haahosaappe kessada Israaꞌeela deretukko laaggada ehaana.
3 Taani ne haddirssa kushiyappe ne wonddafiya shoca olana, qassi ne ushachcha kushiyappe ne zubbeti kunddanaadan oottana.
4 Neeni, ne olanchchati ubbaynne ne miyyiyan eqqana asati Israaꞌeela deretu bolli kunddana. Taani nena asho miya kafo qommo ubbaassinne woraa doꞌatussi quma ootta immana.”’
5 “‘Neeni kayye* biittan kunddana; ayssi giikko, taani ta huuphen hegaa yootaas,’ yaagees Ubbaa Haariya Goday Yihoowi.
6 “‘Taani Maagooga bollinne haruurotun hirggennan deꞌiyageetu bolli tamaa yeddana; yaatin taani Yihoowa gidiyogaa eti erana.
7 Taani ta asaa Israaꞌeela giddon ta geeshsha sunttay erettanaadan oottana, qassi ta geeshsha sunttay naaꞌꞌantto tooshettennaadan diggana; yaatin taani Israaꞌeelan Geeshsha Xoossaa Yihoowa gidiyogaa dereti erana.’
8 “‘Ee, hageeti yaana, qassi hanana,’ yaagees Ubbaa Haariya Goday Yihoowi. ‘Taani yootido gallassay hagaa.
9 Israaꞌeela katamatun deꞌiyageeti kiyidi guutta gonddalletuuninne* gita gonddalletun, wonddafetuuninne zubetun, koxetuuninne* tooratun, ee, ola miishshatun tamaa eettana. Qassi eti hegeetun laappun layttawu tamaa eettana.
10 Eti ola miishshatun tamaa eettiyo gishshawu, gadeppe woy woratuppe eettiyo mittaa mixana koshshenna.’
“‘Eti banttabaa ekkidaageetubaa ekkana, qassi banttabaa bonqqidaageetubaa bonqqana,’ yaagees Ubbaa Haariya Goday Yihoowi.
11 “‘He gallassi taani Googayyo Israaꞌeelan, abbaappe arshsho baggan deꞌiya, yaara kanttiyageetu wombban moogo sohuwa immana, qassi he sohoy yaara kanttiyageetu ogiya gorddana. Eti Googanne A guyte asa ubbaa mooganay yaana, qassi eti he sohuwa Hamon-Googa Wombbaa* giidi xeegana.
12 Israaꞌeela keettay biittaa geeshshanawu eta moogiyogee laappun aginaa wurssana.
13 Biittaa asay ubbay eta moogiyo oosuwa minnidi oottana, qassi he oosoy taani tawu bonchchuwa ehiyo gallassi eti hayttatanaadan oottana,’ yaagees Ubbaa Haariya Goday Yihoowi.
14 “‘Biittaa geeshshanaassi, ubbatoo biittan ubbasaa yuuyanawunne biittan attida anhata mooganawu asay doorettana. Eti laappun aginawu koyana.
15 Biittan ubbasaa yuuyiyaageeti asa meqetta beꞌiyo wode, eti A matan malaataa wottana. Hegaappe guyyiyan, mooganawu doorettidaageeti he meqettaa Hamon-Googa Wombban moogana.
16 Hegaa bollikka, yan Hamona* giyo katamay deꞌana. Qassi eti biittaa geeshshana.’
17 “Laa asa naꞌawu, Ubbaa Haariya Goday Yihoowi hagaadan gees: ‘Kafo qommo ubbawunne woraa doꞌa ubbawu hagaadan ga: “Issippe shiiqidi haa yiite. Taani Israaꞌeela deretu bolli intteyyo giigissiyo ta gita imotaakko yuuyi aadhdhidi shiiqite. Intte ashuwa maananne suuttaa uyana.
18 Intte wolqqaamatu ashuwa maananne saꞌaa gadaawatu suuttaa uyana; eti dorssa orggeta, dorssa marata, deeshshatanne mirggota; eti ubbay Bashanan deꞌiya modhdho meheta.
19 Taani intteyyo giigissada immiyobaappe modhdhuwa intte yorattidi maananne mattottana gakkanaashin suuttaa uyana.”’
20 “‘Intte ta masoofiyappe paratu, para gaareta laaggiyageetu, wolqqaamatunne ubba qommo olanchchatu ashuwa kallana,’ yaagees Ubbaa Haariya Goday Yihoowi.
21 “‘Taani deretu giddon ta gitatettaa bessana, qassi taani eta giddon polido pirddaanne bessido wolqqaa* dereti ubbay beꞌana.
22 Israaꞌeela keettay taani eta Xoossaa Yihoowa gidiyogaa he gallassaappe doommidi erana.
23 Israaꞌeela keettay tawu ammanettibeenna gishshawunne bantta balaa gaasuwan omooddettidi biidoogaa dereti erana. Yaanin taani ta somꞌꞌuwa etappe genttaasinne eta morkketuyyo eta aatta immaas, qassi eti ubbay bisuwan kunddidosona.
24 Eta tunatettaanne eti higgiya kanttidoogaa gaasuwan etawu bessiyabaa oottaas, qassi ta somꞌꞌuwa etappe genttaas.’
25 “Hegaa gishshawu, Ubbaa Haariya Goday Yihoowi hagaadan gees: ‘Taani Yaaqooba keettaappe omooddettidaageeta eta biittawu zaarana, qassi Israaꞌeela keettaa kumettawu qarettana;* yaatada ta geeshsha sunttaa mintta naagana.*
26 Eti taayyo ammanettennan ixxido ubbabaa gaasuwan kawuyyi simmidi, yashissiya uri baynnan bantta biittan hirggennan deꞌana.
27 Taani deretu giddoppe eta guyye zaariyo wodenne eta morkketu biittatuppe eta shiishshiyo wode, daro dereti xeellishin taani geeshsha gidiyogaakka eta giddon bessana.’
28 “‘Taani eta omoodduwan deretu giddo yeddiyo wodenne etappe issuwanne ashshennan, guyyeppe eta biitti zaariyo wode, taani eta Xoossaa Yihoowa gidiyogaa eti erana.
29 Taani ta somꞌꞌuwa naaꞌꞌantto etappe genttikke; ayssi giikko, Israaꞌeela keettaa bolli taani ta ayyaanaa gussana,’ yaagees Ubbaa Haariya Goday Yihoowi.”
Footnotes
^ Woykko “Xoossay erissidobaa.”
^ Woykko “waanna daannawu.”
^ Woykko “baysa.”
^ Darotoo zubbiya dukkiyageeti oyqqiyoba.
^ Woykko geella, “philxxo milatiya ola miishshatun.”
^ Woykko “Googa Guytetu Wombbaa.”
^ Birshshettay “Guyteta.”
^ Mise, “kushiya.”
^ Woykko “kumettaa maarana.” Qonccissuwa xeella.
^ Mise, “geeshsha sunttawu mishettana.”
