Hizqqeela 21:1-32
21 Yihoowa qaalay hagaadan giiddi haranttuwa taakko yiis:
2 “Asa naꞌawu, ne somꞌꞌuwa Yerusalaamekko zaarada, geeshsha sohotu bolli awaajja, qassi Israaꞌeela biittaa bolli hiraagaa* yoota.
3 Israaꞌeela biittaa hagaadan ga: ‘Yihoowi hagaadan gees: “Hekko, taani ne bolli denddaas, qassi ta bisuwa A shoohuwappe kessada xillotakka iitatakka ne giddoppe xayssana.
4 Taani xillotanne iitata ne giddoppe xayssiyo gishshawu, ta bisoy ba shoohuwappe shodettidi tohossaappe huuphessaa gakkanaashin asaa* ubbaa bolli denddana.
5 Taani Yihoowi ta bisuwa A shoohuwappe shoddidoogaa asay ubbay erana. Qassi he bisoy guyye simmenna.”’
6 “Laa asa naꞌawu, neeni kokkoraydda* oola; ee, eta sinttan keehi azzanada oola.
7 Qassi eti nena, ‘Aybissi oolay?’ giikko, neeni, ‘Odettidabaa gaasuwana’ yaagana. Hegee yaanaagee attennaba, qassi wozana ubbay yashshan maashana, kushe ubbay goolattana,* asa* ubbay yibbaatananne gulbbata ubbay haattan* musana. ‘Hegee yaanaagee attennaba, hegee polettana,’ yaagees Ubbaa Haariya Goday Yihoowi.”
8 Yihoowa qaalay hagaadan giiddi haranttuwa taakko yiis:
9 “Asa naꞌawu, hagaadan gaada hiraagaa yoota: ‘Yihoowi hagaadan gees: “‘Bisuwa! Bisoy poshettiisinne* leefettiis.
10 He bisoy busakkidi woranaassi poshettiis; hegee wolqqanttaadan pholqqattanaadan leefettiis’ yaaga.”’”
“Nuuni ufayttana bessennee?”
“‘Hegee* mitta ubbaa xaasayiyogaadan ta naꞌaa haaruwa xamꞌꞌaa xaasayanee?
11 “‘Hegee leefettanaadaaninne woranawu kushiyan oyqqanaadan imettiis. Ha bisoy woriyagee oyqqanaadan poshettiisinne leefettiis.
12 “‘Asa naꞌawu, bisoy ta asaa bolli yiido gishshawu, waassanne zilaala; hegee Israaꞌeela gadaawatu ubbaa bolli yiis. Hageeti ta asaara issippe bisuwan kunddana. Hegaa gishshawu, azzanada ne wodiraa baqqa.
13 Ayssi giikko, ta asay yigettiis, qassi bisoy haaruwa xamꞌꞌaa xaasayikko hananabay aybee? I* xayana,’ yaagees Ubbaa Haariya Goday Yihoowi.
14 “Laa asa naꞌawu, ne kushiya baqqaydda hiraagaa yoota, heezzutoo, ‘Bisuwa!’ yaaga. Hegee eta dooddida, buttiyanne darota busakkiya bisuwa.
15 Eta wozanay yashshan maashana, qassi daroti bantta katamaa geliyosan kunddana; taani bisoy busakkanaadan oottana. Ee, bisoy wolqqanttaadan pholqqattees, qassi busakkanaassi leefettiis!
16 Ushachcha baggaaninne haddirssa baggan siifa!* Azazettidosaa awanne ne bisuwara ba!
17 Qassi taani ta kushiya baqqananne ta hanqquwappe gabbi gaana. Taani Yihoowi ta huuphen hegaa yootaas.”
18 Qassikka Yihoowa qaalay hagaadan giiddi haranttuwa taakko yiis:
19 “Laa asa naꞌawu, Baabiloone kawoy yiyo naaꞌꞌu ogeta malaata. Eti naaꞌꞌaykka issi biittaappe denddana, qassi naaꞌꞌu katamatukko ogee ballattiyosan malaataa* essa.
20 Neeni issi ogiya Ammonatu Rabba bolli yaana bisuwawu, qassi hara ogiya Yihudan deꞌiya gimbbettida Yerusalaame bolli yaana bisuwawu malaatana koshshees.
21 Ayssi giikko, Baabiloone kawoy ogee ballattidi naaꞌꞌawu shaahettiyosan kaayanawu eqqees. I zubbeta qaattees. I ba eeqata* zoriya oychchees; I tiriya yiggi xeellees.*
22 Gimbbiya laaliyo wolqqaama kaso malabata wottanawu, busakkanaadan yootanawu, olettanaadan gayranawu, gimbbiya laaliyo wolqqaama kaso malabata penggetukko zaaridi wottanawu, biittaa dooriyan dooddanawunne yuushshi aattidi diranawu eti Yerusalaame baana koshshiyogaa A ushachcha kushiya kaayoy bessiis.
23 Gidoppe attin, etayyo caaqqidaageetu* xeelan hegee worddo kaayo milatana. Shin I eta mooruwa hassayananne eta oyqqana.
24 “Hegaa gishshawu, Ubbaa Haariya Goday Yihoowi hagaadan gees: ‘Intte oottiyo ubbaban higgiya intte kanttiyogee qoncciya kiyanaadaaninne intte nagaray beettanaadan oottiyo wode intte mooroy hassayettanaadan oottideta. Haꞌꞌi intte hassayettido gishshawu, inttena wolqqan* efaana.’
25 “Shin woriya masunttaa masunxxida, Israaꞌeela biittaa iita gadaawawu, ne gallassay, hegeekka, neeni wurssetta qaxxayuwa qaxxayettiyo wodee gakkiis.
26 Ubbaa Haariya Goday Yihoowi hagaadan gees: ‘Huuphiyan xaaxidobaa digga, qassi kallachchaa dentta. Hegeeti hegaadan deꞌiigokkona. Ziqqi giidaagaa xoqqu ootta, qassi xoqqu giidaagaa ziqqi ootta.
27 Taani A baysa, baysa, baysa oottana. Hegee higgiyan ayyo bessiyogee yaana gakkanaashin oossinne imettenna, qassi taani hegaa awu immana.’
28 “Laa asa naꞌawu, hagaadan gaada hiraagaa yoota, ‘Ubbaa Haariya Goday Yihoowi Ammonatubaanne eta cashshaabaa hagaadan gees.’ Hagaadan ga: ‘Bisuwa! Bisoy busakkanaassi shodettiis; hegee maanawunne wolqqanttaadan pholqqattanawu leefettiis.
29 Worddo ajjuutatuuninne worddo kaayuwan nebaa yootidaba gidikkonne, eta gallassay, hegeekka, eti wurssetta qaxxayuwa qaxxayettiyo wodee gakkido iita asata, woridoogeeta,* dooridoogaa bolli neeni gujettana.
30 Bisuwa A shoohuwawu zaara. Ne merettido sohuwan, ne pulttido biittan taani ne bolli pirddana.
31 Taani ta yiilluwa ne bolli gussana. Suulliya ta hanqquwa tamaa ne bolli punnana, qassi meqetti baynna, xayssiya hiillanchchatuyyo taani nena aatta immana.
32 Neeni tamaa eettiyoba gidana; ne suuttay he biittan gukkana, qassi neeni naaꞌꞌantto hassayettakka; ayssi giikko, taani Yihoowi ta huuphen hegaa yootaas.’”
Footnotes
^ Woykko “Xoossay erissidobaa.”
^ Mise, “asho.”
^ Mise, “ne bunqqashee kokkorishin.”
^ Woykko “doccana.”
^ Mise, “ayyaana.”
^ Hegeekka, yayyidi sheeꞌido sheeshshan.
^ Woykko “qarattiisinne.”
^ Hegeekka, Yihoowa bisuwa.
^ Woykko “Haaruwa xamꞌꞌay.”
^ Woykko “qanxxa ola.”
^ Mise, “kushiya.”
^ Mise, “teraafimiya.”
^ Kaayo qommo.
^ Hegeekka, Yerusalaamen deꞌiyageeta.
^ Mise, “kushiyan.”
^ Mise, “woridoogeetu qooreta.”
