Nga June 2022, muphuresidennde wa World Bank Group o vhiga uri “ikonomi ya shangoni i khomboni. Mitengo ya zwithu i khou gonya nga u ṱavhanya, ngeno vhathu vha na tshelede ṱhukhu-ṱhukhu.”

 International Monetary Fund i ri: “Mitengo ya peṱirolo na ya zwiḽiwa yo gonya nga u ṱavhanya, zwenezwi zwo kwama nga maanḓesa vhathu vhane vha vha mashangoni a shayaho.”

 Bivhili i ri thusa u pfesesa uri ndi ngani ri na thaidzo dza ikonomi, ri nga sedzana hani nadzo na uri hu na fhulufhelo ḽifhio ḽa u dzi lugisa lwa tshoṱhe.

•   Bivhili i ri vhudza uri ri khou tshila “maḓuvhani a vhufhelo.”—2 Timotheo 3:1.

•   Yesu o amba uri nga tshenetsho tshifhinga, “vhathu vha ḓo vhona zwi ofhisaho.” (Luka 21:11) Vhathu vha a ofha musi vha tshi vhona mitengo i tshi khou ḓi gonya i tshi ya. Vha a vhilaela nga vhumatshelo havho na uri vha ḓo ṱunḓela hani miṱa yavho.

•   Bugu ya Nzumbululo yo dzula yo amba uri nga tshenetsho tshifhinga tsha maḓuvha a vhufhelo, mitengo ya zwiḽiwa i ḓo gonya. “Nda pfa ipfi . . . ḽi tshi ri: Muelo muthihi wa mavhele ndi [muholo wa ḓuvha ḽithihi], mielo miraru ya luvhele ndi [muholo wa ḓuvha ḽithihi].”—Nzumbululo 6:6, Bivhili ya 1936.

 U itela uri ni gude zwo engedzeaho nga ha ‘maḓuvha a vhufhelo’ na nga ha vhuporofita vhu re kha bugu ya Nzumbululo, ṱalelani vidio ine ya ri Vhuimo Ha Shango Ho Shanduka U Bva Nga 1914 na thero ine ya ri “Vhaṋameli Vhaṋa Vha Dzibere—Ndi Vhonnyi?”

•   “Vha ḓo fhaṱa nnḓu vha dzula khadzo, vha ḓo ṱavha minḓirivhe vha ḽa mitshelo yayo. A vha nga fhaṱi ha dzula muṅwe, kana vha ṱavha ha ḽa vhaṅwe.”—Yesaya 65:21, 22.

•   “Hu ḓo vha na mavhele manzhi kha ḽifhasi; a ḓo ḓala a swika na ṱhodzini dza thavha.”—Phisalema 72:16.

•   “Yehova u ri: ‘Ndi ḓo takuwa nda dzhia vhukando ngauri vha tambulaho vha khou tsikeledzwa, ndi pfa vhashai vha tshi fhihamelwa.’”—Phisalema 12:5. a

 Hu si kale, Mudzimu u ḓo fhelisa thaidzo dzoṱhe dza ikonomi, hu si shangoni ḽithihi, fhedzi ḽifhasini ḽoṱhe. U itela u vhona uri u ḓo zwi ita hani, vhalani thero ine ya ri “Is a Fair Economic System Possible?”

 Na ṋamusi, Bivhili i nga ni thusa u vhona uri ni nga ita mini musi mitengo i tshi khou ḓi gonya. I nga ni thusa hani? I na nyeletshedzo i shumaho ya nḓila ine na nga shumisa ngayo tshelede yaṋu nga vhuṱali. (Mirero 23:4, 5; Muhuweleli 7:12) U itela uri ni gude zwo engedzeaho, vhalani thero ine ya ri “Protect Your Livelihood” na ine ya ri “How to Live on Less.”