“MUDZIMU ndi Muya,” vhathu a vha koni u mu vhona nga maṱo. (Yohane 4:24) Naho zwo ralo, Bivhili i amba uri vhaṅwe vhathu vho vhuya vha vhona Mudzimu nga maṱo. (Vhaheberu 11:27) Zwenezwo zwi konadzea hani? Naa zwa vhukuma ni nga kona u vhona “Mudzimu a sa vhonali”?—Vhakolosa 1:15.

Vhambedzani vhuimo hashu na ha muthu o bebwaho e bofu. Naa u vha hawe bofu zwi mu ita uri a si kone u pfesesa zwithu zwine zwa khou itea shangoni? Na khathihi. Muthu a sa vhoni u wana mafhungo nga nḓila dzo fhamba-fhambanaho dzine dza mu ita uri a kone u vhona vhathu, zwithu na zwine zwa khou itea henefho. Muṅwe munna wa bofu o ri: “Muthu ha vhoni nga maṱo. U vhona nga muhumbulo.”

Nga nḓila i fanaho, naho ni nga si kone u vhona Mudzimu nga maṱo aṋu a ṋama, ni nga shumisa “maṱo” aṋu a muhumbulo u itela u mu vhona. (Vhaefesa 1:18) Ṱhogomelani nḓila tharu dzine na nga zwi ita ngayo.

Muthu wa bofu kanzhi u na zwipfi zwo engedzeaho zwa u pfa na u kwama, zwi itaho uri a kone u pfesesa zwithu zwine a sa kone u zwi vhona. Nga hu fanaho, ni nga shumisa maṱo aṋu u itela u vhona zwithu zwo ni tangaho na u vhona Mudzimu a sa vhonali we a zwi sika. “Pfaneleo dzawe dzi sa vhonali, vhathu vha nga dzi vhona zwavhuḓi musi vha tshi sedza zwe a zwi sika u bva tshee shango ḽa sikwa.”—Vharoma 1:20.

Sa tsumbo, humbulani nga ha haya hashu. Ḽifhasi ḽo sikelwa riṋe nga nḓila yo khetheaho, hu si u sokou ri ri tshile khaḽo, fhedzi u itela uri ri ḓiphine nga vhutshilo. Zwi a ri takadza musi ri tshi pfa muya u fhefheḓaho, vhududo ha ḓuvha, muḓifho wa mutshelo kana u pfa zwiṋoni zwi tshi imba zwavhuḓi. Naa zwenezwi zwifhiwa a zwi dzumbululi u humbulela, u ṱhogomela na mafunda a Musiki washu?

Ni nga guda mini nga ha Mudzimu kha zwine na zwi vhona shangoni? Tsha u thoma, ḽiṱaḓulu ḽi dzumbulula maanḓa a Mudzimu. Vhuṱanzi ha saintsi ha zwenezwino a vhu ambi fhedzi uri fhethu hoṱhe hu khou ṱanḓavhuwa, fhedzi vhu dovha ha amba uri hu khou ṱanḓavhuwa nga luvhilo luhulwane vhukuma! Musi ni tshi sedza makoleni nga madekwana, ḓivhudziseni uri: Ndi nnyi muṋe wa enea maanḓa ane a ita uri fhethu hoṱhe hu ṱanḓavhuwe nga luvhilo lungafha? Bivhili i ri vhudza uri Musiki “maanḓa awe ndi mahulu.” (Yesaya 40:26) Tsiko ya Mudzimu i ri sumbedza uri ndi “Mu-kona-zwoṱhe”—ane a vha na “maanḓa” mahulu.—Yobo 37:23.

Muṅwe mme ane a vha na vhana vhavhili vha sa vhoni zwavhuḓi o ri: “U amba navho ndi iṅwe nḓila ya ndeme ine ya ita uri vha gude. Vha vhudzeni zwoṱhe zwine na zwi vhona na u zwi pfa nahone ni ḓilugiselele u dzula ni tshi ita zwenezwo. Ni maṱo avho.” Zwi fanaho na zwenezwo, naho “hu [si] na muthu we a vhuya a vhona Mudzimu,” Yesu, Murwa wa Mudzimu, “a re tsini-tsini na Khotsi ndi ene we a ri ṱalutshedza nga hae.” (Yohane 1:18) Sa tshivhumbiwa tsha Mudzimu tsha u thoma na Murwa wawe mubebwa e eṱhe, Yesu o vha “maṱo” ashu u itela uri ri vhone zwi re ṱaḓulu. Ndi ene fhedzi ane a nga ri vhudza nga ha Mudzimu a sa vhonali.

Ṱhogomelani zwithu zwi si gathi zwe Yesu we a fhedza miṅwaha minzhi na Khotsi awe a zwi amba nga ha Mudzimu:

• Mudzimu u shuma a sa neti. “Khotsi anga u kha ḓi shuma na zwino.”—Yohane 5:17.

• Mudzimu u ḓivha zwine ra zwi ṱoḓa. “Khotsi aṋu u a ḓivha zwine na ṱoḓa na musi ni sa athu mu humbela.”—Mateo 6:8.

•  Mudzimu u ri ṋea nga mafunda. “Khotsi aṋu a re ṱaḓulu . . . [u] ṱavhisela ḓuvha ḽawe vhavhi na vhavhuya na u nisela mvula vho lugaho na vha songo lugaho.”—Mateo 5:45.

• Mudzimu u ri dzhiela nṱha nga muthihi nga muthihi. “Naa zwiṋoni zwiṱuku zwivhili a zwi rengwi nga peni nthihi? Naho zwo ralo, a hu na na tshithihi tshazwo tshine tsha ḓo wela fhasi Khotsi aṋu a sa zwi ḓivhi. Fhedzi mavhudzi oṱhe a re ṱhohoni dzaṋu o vhalwa. Ngauralo, ni songo ofha: Inwi ni vha ndeme vhukuma u fhira zwiṋoni zwiṱuku zwinzhi.”—Mateo 10:29-31.

Vhathu vha sa vhoni vha pfesesa zwithu nga nḓila i sa fani na ya vhathu vhane vha vhona. Muthu o pofulaho a nga pfa murunzi hu si sa fhethu hu si na tshedza tsha ḓuvha, fhedzi sa fhethu hu rotholelaho hu si na vhududo ha ḓuvha. U fana na muthu a sa vhoni na luthihi, a nga si kone u vhona murunzi kana tshedza tsha ḓuvha, ri nga si kone u pfesesa Yehova nga riṋe vhaṋe. Nga zwenezwo, Yehova o ri ṋea muthu ane a sumbedza pfaneleo na vhumuthu hawe nga ho fhelelaho.

Onoyo muthu o vha e Yesu. (Vhafilipi 2:7) Yesu ho ngo sokou amba nga ha Khotsi awe, fhedzi o dovha a ri sumbedza zwine Mudzimu a vha zwone. Mufunziwa wa Yesu Filipo o humbela a ri: “Murena, ri sumbedze Khotsi.” Yesu a fhindula a ri: “A vhonaho nṋe u vhona na Khotsi.” (Yohane 14:8, 9) Ni nga “vhona” mini nga ha Khotsi kha zwe Yesu a zwi ita?

Yesu o vha e na lufuno, a tshi ḓiṱukufhadza nahone a tshi dzhenea. (Mateo 11:28-30) Vhumuthu hawe ho sendedza vhathu khae. Yesu o pfa vhuṱungu he vhaṅwe vha vhu pfa nahone a takala na vha takalaho. (Luka 10:17, 21; Yohane 11:32-35) Musi ni tshi khou vhala kana u pfa mafhungo a Bivhili nga ha Yesu, vhonani zwenezwo zwithu nga maṱo a muhumbulo nahone ni ite uri zwenezwo zwi vhe zwa vhukuma muhumbuloni waṋu. Arali na nga elekanya nga ha nḓila ye Yesu a shumisana ngayo na vhathu, ni ḓo kona u vhona zwavhuḓi vhumuthu ha Mudzimu nahone na sendela tsini nae.

Malugana na nḓila ine muthu o pofulaho a vhona ngayo zwithu, muṅwe muṅwali o ṅwala u ri: “U wana mafhungo nga zwiṱuku nga zwiṱuku fhethu ho fhamba-fhambanaho (zwi nga ho u kwama, munukho, u pfa na zwiṅwe-vho), nahone u fanela u zwi ṱanganyisa zwoṱhe zwa vha tshithu tshithihi.” Zwi ngaho zwenezwo, musi ni tshi vhona mishumo ya tsiko ya Mudzimu, vhalani nga zwe Yesu a zwi amba nga ha Khotsi awe, nahone ni ṱanḓavhudze nḓila ye Yesu a sumbedza ngayo pfaneleo dza Mudzimu, tshifanyiso tshavhuḓi tsha Yehova tshi ḓo bvelela. U ḓo vha muthu wa vhukuma kha inwi.

Yobo we a tshila tshifhingani tsho fhiraho o tshenzhela zwenezwo. Mathomoni o amba a “sa ṱalukanyi.” (Yobo 42:3) Fhedzi nga murahu ha u ṱolisisa nga vhuronwane tsiko, Yobo o sudzulusea uri: “U pfa nga nḓevhe ndo vha ndi tshi U pfa; zwino ndi hone maṱo anga ó U vhona.”—Yobo 42:5.

Zwenezwo zwi nga tou ralo na kha inwi. “U tshi ṱoḓa [Yehova], u ḓo U dzumbuluwela.” (1 Koronika 28:9) Ṱhanzi dza Yehova vha ḓo takalela u ni thusa u ṱoḓa na u wana Mudzimu a sa vhonali.