1. Ndi ngani ‘muya mukhethwa wo ita uri Yesu a takale’? (Sedzani tshifanyiso tsha u thoma.)

LINGEDZANI u humbula nḓila ye zwa vha zwi tshi ḓo vha ngayo musi ni tshi vhona ‘muya mukhethwa u tshi ita uri Yesu a takale.’ Khamusi o vha a tshi khou mwethuwa nahone o takala vhukuma. Fhedzi ndi ngani? O vha a kha ḓi tou bva u rumela vhafunziwa vhawe vha 70 u huwelela mafhungo maḓifha a Muvhuso wa Mudzimu. Nga nṱhani ha uri ho vha hu na maswina manzhi a re na maanḓa a mafhungo maḓifha, o vha a tshi ṱoḓa u ḓivha nḓila ine vhafunziwa vhawe vha ḓo ita ngayo mushumo wavho. Eneo maswina a katela vhamaṅwalo na Vhafarisei vhe vha vha vho funzea nahone vho ṱalifha. Vho vha vha tshi ṱoḓa uri vhathu vha dzhie Yesu sa muvhaḓi nahone vha dzhie vhafunziwa vhawe sa “vhanna vha songo funzeaho na vho ḓoweleaho.” (Mishumo 4:13; Marko 6:3) Naho zwo ralo, musi vhafunziwa vha tshi vhuya mushumoni wavho, vho vha vhe na dakalo-fulu. Vho huwelela hu sa londwi u tovholwa na nga madimoni! Ndi ngani vho kona u dzula vho takala nahone vhe na tshivhindi?—Vhalani Luka 10:1, 17-21.

2. (a) Vhafunziwa vha Yesu vho vha vha tshi fana hani na vhana? (b) Ndi mini zwe zwa thusa vhafunziwa vha Yesu u pfesesa ngoho ya Bivhili yo dzikaho?

² Yesu o vhudza Yehova uri: “Ndi a u renda Khotsi phanḓa  ha vhathu vhoṱhe, Iwe Murena wa ḽiṱaḓulu na ḽifhasi, ngauri hezwi zwithu wo zwi dzumbela vhaṱali na vha ṱhalukanyo nahone wa zwi dzumbululela vhana. Ngauri yeneyo ndi nḓila ine iwe Khotsi wa i takalela.” (Mateo 11:25, 26) Ndi ngani Yesu o vhidza vhafunziwa vhawe vhana? Nga nṱhani ha uri vho vha vha sa fani na vhamaṅwalo na Vhafarisei vhe vha vha vho funzea vhukuma nahone vha tshi humbula u nga vho ṱalifha, vhafunziwa vha Yesu vho vha vho ḓiimisela u funzwa sa vhana. Vho guda u ḓiṱukufhadza, hu si u ḓikukumusa. (Mateo 18:1-4) Ngauri vho vha vha tshi ḓiṱukufhadza, Yehova o shumisa muya wawe mukhethwa u vha thusa u pfesesa ngoho ya Bivhili yo dzikaho. Fhedzi vharangaphanḓa vha vhurereli vha Vhayuda vha ḓikukumusaho vho dzula vho swingiswa nga Sathane na nga u ḓikukumusa havho.

3. Ri ḓo haseledza mini kha ino thero?

³ Yesu o vha o takala vhukuma! O vha o takalela u vhona nḓila ye Yehova a ḓivhadza ngayo ngoho ya Bivhili yo dzikaho kha vhathu vha ḓiṱukufhadzaho hu sa londwi uri vho funzea. Yeneyi nḓila ya u funza i takalelwa nga Mudzimu, nahone Mudzimu ha athu u shanduka. U sumbedza hani uri u kha ḓi takalela yeneyi nḓila ya u funza? Kha ino thero, ri ḓo guda nga ha nḓila ye Yehova a ḓivhadza ngayo ngoho ya Bivhili yo dzikaho kha vhathu vha ḓiṱukufhadzaho ṋamusi.

4. Tshiingamo tsho leludzwaho tsha Luisimane tsho vha tshishumiswa tshavhuḓi nga nḓila dzifhio?

⁴ Miṅwahani ya zwenezwino, ndangulo ya Mudzimu yo sumbedza ndeme ya u funza nga nḓila yo leluwaho na i pfalaho. Kha ri haseledze mbuno tharu. Ya u thoma, hu na Tshiingamo tsho leludzwaho tsha Luisimane. * (Sedzani ṱhaluso i re magumoni a siaṱari.) Ndi tshishumiswa tshavhuḓi tsho thusaho vhanzhi, u katela na vhe vha konḓelwa u vhala kana u pfesesa luambo. Miṱa i ṱhogomela uri vhana vhayo vha pfesesa khwine Tshiingamo tsho leludzwaho tsha Luisimane. Vhanzhi vho ṅwala marifhi a ndivhuho. Muṅwe wahashu wa tshisadzini o amba uri o vha a tshi ofha u fhindula kha Pfunzo ya Tshiingamo. Fhedzi zwino ha tsha ofha! Nga murahu ha u shumisa Tshiingamo tsho leludzwaho tsha Luisimane, o ṅwala uri: “Zwino ndi fhindula lunzhi, nahone ndo vhofholowa! Ndi livhuha Yehova na ndangulo.”

5. Vhaṅwe vho vhuyelwa hani nga New World Translation of the Holy Scriptures yo vusuluswaho?

⁵ Ya vhuvhili, hu na New World Translation of the Holy Scriptures yo vusuluswaho, yo bviswaho nga Luisimane kha muṱangano wa ṅwaha muṅwe na muṅwe nga ḽa 5 October 2013. * (Sedzani ṱhaluso i re magumoni a siaṱari.) Maṅwalo manzhi zwino a shumisa maipfi a si gathi, naho zwo ralo,  zwine a amba zwone a zwi athu u shanduka nahone zwi a pfesesea nga hu leluwaho. Sa tsumbo, maipfi a re kha Yobo 10:1 o fhungudzea u bva kha 27 u ya kha 19 na a re kha Mirero 8:6 o fhungudzea u bva kha 20 u ya kha 13 nga Luisimane. Dzenedzo ndimana dzoṱhe dzi a pfesesea kha ṱhalutshedzelo ntswa. Muṅwe wahashu wa tshinnani wa muḓodzwa a re na miṅwaha minzhi a tshi khou shumela Yehova nga u fulufhedzea, o ri: “Ndo vhala bugu ya Yobo kha ṱhalutshedzelo ntswa, nahone ndi pfa u nga ndi lwa u thoma ndi khou i pfesesa!” Vhanzhi vho amba zwi fanaho.

6. Ni ḓipfa hani nga ha mapfesesele ashu a pfalaho a Mateo 24:45-47?

⁶ Ya vhuraru, humbulani nga ha tshanduko dza zwenezwino dza nḓila ine ra pfesesa ngayo maṅwe maṅwalo. Sa tsumbo, mapfesesele a pfalaho a “mulanda a fulufhedzeaho na wa vhuṱali” o gandiswa kha Tshiingamo tsha ḽa 15 July 2013. (Mateo 24:45-47) Yeneyo thero yo ṱalutshedza uri mulanda a fulufhedzeaho ndi Tshigwada tshi Langaho. Nahone “vha nnḓu” ndi vhaḓodzwa na “dziṅwe nngu,” vhane vhoṱhe vha kanzwiwa nga mulanda a fulufhedzeaho. (Yohane 10:16) Ri ḓiphina nga u guda yeneyi ngoho nahone ri takalela u i gudisa vhaṅwe! Ndi dzifhio dziṅwe nḓila dzine Yehova a sumbedza uri u takalela pfunzo i leluwaho na i pfalaho?

7, 8. Ndi dzifhio dziṅwe tsumbo dza mafhungo a re Bivhilini dzi fanyiselaho zwiṅwe zwithu zwihulwane zwa tshifhingani tshi ḓaho?

⁷ Arali ni na miṅwaha minzhi ni tshi khou shumela Yehova, ni nga vha no ṱhogomela tshanduko kha nḓila ine khandiso dzashu dza ṱalutshedza ngayo maṅwe mafhungo a Bivhili. Tshifhingani tsho fhiraho, zwo vha zwo ḓowelea u amba uri maṅwe mafhungo a fanyisela zwiṅwe zwithu zwihulwane zwine zwa ḓo itea tshifhingani tshi ḓaho. Eneo mafhungo o vha a tshi fanyisela zwine zwa khou ambiwa na u ḓadzea ha zwine zwa khou fanyiswa. Naa hu na zwiitisi zwi pfalaho zwa u ṱalutshedza mafhungo a Bivhili nga yeneyi nḓila? Ee. Sa tsumbo, Yesu o amba nga ha “vhuṱolo ha muporofita Yona.” (Vhalani Mateo 12:39, 40.) Yesu o ṱalutshedza uri tshifhinga tshee Yona a tshi fhedza e thumbuni ya khovhe tshi fanyisela tshifhinga tshine a ḓo tshi fhedza e vhiḓani.

⁸ Hu na maṅwe mafhungo a Bivhili ane a fanyisela zwithu zwihulwane zwa tshifhingani tshi ḓaho. Muapostola Paulo o amba nga ha maṅwe a eneo mafhungo. Sa tsumbo, vhushaka ha Abrahamu, Hagara na Sara ho vha hu tshi fanyisela vhushaka ha Yehova na lushaka lwa Isiraele na tshipiḓa tsha ṱaḓulu tsha ndangulo ya Mudzimu. (Vhagalata 4:22-26) Nga nḓila i fanaho, nnḓu ya mulanga, thembele, Ḓuvha ḽa u Pfumelelwa, tshifhe muhulu na zwiṅwe zwipiḓa zwa Mulayo zwo vha zwi “murunzi wa zwithu zwavhuḓi zwine zwa khou ḓa.” (Vhaheberu 9:23-25; 10:1) U guda nga ha eneo mafhungo a Bivhili na zwine a  fanyisela zwone zwi khwaṱhisa lutendo lwashu. Naa zwenezwi zwi amba uri muthu muṅwe na muṅwe, tshiitea, na zwiṅwe zwithu zwo ambiwaho nga hazwo Bivhilini zwi fanyisela muṅwe muthu kana tshiṅwe tshithu?

9. Mafhungo a Bivhilini a Nabothe o ṱalutshedzwa hani tshifhingani tsho fhiraho?

⁹ Tshifhingani tsho fhiraho, khandiso dzashu dzo vha dzi tshi anzela u ṱalutshedza uri muthu, tshiitea, kana zwiṅwe zwithu zwo vha zwi tshi fanyisela muṅwe muthu kana tshiṅwe tshithu. Sa tsumbo, Mufumakadzi muvhi Isabele o ita uri Nabothe a vhulahwe u itela uri munna wawe Ahaba a dzhie tsimu ya miṱokola ya Nabothe. (1 Dzikhosi 21:1-16) Nga 1932, Tshiingamo tsho ṱalutshedza uri Ahaba na Isabele vho vha vha tshi fanyisela Sathane na tshigwada tshawe, na uri Nabothe o vha a tshi fanyisela Yesu, na uri lufu lwa Nabothe lwo vha lu tshi fanyisela u vhulahwa ha Yesu. Naho zwo ralo, nga 1961 bugu ine ya pfi “Let Your Name Be Sanctified” yo amba uri Nabothe u fanyisela vhaḓodzwa nahone Isabele u fanyisela ḽa Vhudzhagane. Zwiṅwe hafhu, u tovholwa ha Nabothe nga Isabele ho vha hu tshi fanyisela u tovholwa ha vhaḓodzwa maḓuvhani a vhufhelo. Yeneyo ṱhalutshedzo yo khwaṱhisa lutendo lwa vhathu vha Mudzimu lwa miṅwaha minzhi. Nga zwenezwo, ndi ngani ri tshi khou ṱalutshedza zwithu nga nḓila yo fhambanaho ṋamusi?

10. (a) Mulanda a fulufhedzeaho u sumbedza hani u vha na vhulondi musi a tshi ṱalutshedza maṅwe mafhungo a re Bivhilini? (b) Khandiso dzashu dzi livhisa ṱhogomelo nga ho engedzeaho kha mini musalauno?

 ¹⁰ Miṅwahani yo fhiraho, Yehova o thusa “mulanda a fulufhedzeaho na wa vhuṱali” uri a pfesese nga vhuḓalo kana a vhe na vhulondi. Nga nḓila-ḓe? Musi hu na tshiitisi tshi pfalaho tsha Maṅwalo tsha u ita nga u ralo, mulanda a fulufhedzeaho u shumisa vhuṱali musi a tshi amba mafhungo a re Bivhilini ane a fanyisela zwiṅwe zwithu zwihulwane. Dziṅwe ṱhalutshedzelo dza kale dza malugana na pfanyisedzo na u ḓadzea ha zwine zwa khou fanyiswa dzo vha dzi tshi konḓa u pfesesea, u dzi humbula na u dzi shumisa. Ngoho ndi ya uri musi hu tshi livhiswa ṱhogomelo vhukuma kha zwine mafhungo a Bivhili a nga vha a tshi khou lingedza u amba zwone, maitele na ngudo zwo vha zwi sa pfesesei. Nga zwenezwo, musalauno khandiso dzashu dzi livhisa ṱhogomelo nga ho engedzeaho kha zwithu zwo leluwaho, ngudo dzi shumaho nga ha lutendo, u konḓelela, u ḓikumedza kha Mudzimu na dziṅwe pfaneleo dza ndeme dzine ra nga dzi guda kha mafhungo a Bivhili. *—Sedzani ṱhaluso i re magumoni a siaṱari.

11. (a) Zwino ri pfesesa hani mafhungo a Nabothe, nahone tsumbo yawe i ri thusa hani? (b) Miṅwahani ya zwenezwino, ndi ngani khandiso dzashu dzi sa anzeli u shumisa pfanyisedzo kana u ḓadzea ha zwine zwa khou fanyiswa? (Sedzani “Mbudziso Dzi Bvaho Ha Vhavhali” kha ino khandiso.)

¹¹ Zwino, nḓila ine ra pfesesa ngayo mafhungo a Nabothe i a pfala nahone yo leluwa. U fa ha Nabothe zwo vha zwi sa khou fanyisela Yesu kana vhaḓodzwa. Nṱhani hazwo, o fa ngauri o vha o ḓiimisela u dzula a tshi fulufhedzea kha Mudzimu. O dzula a tshi fulufhedzea kha Mulayo wa Yehova hu sa londwi u tovholwa zwihulu, hu bvaho kha muvhusi a re na maanḓa. (Numeri 36:7; 1 Dzikhosi 21:3) Ndi tsumbo yavhuḓi lungafhani kha vhashumeli vhoṱhe vha Mudzimu ṋamusi vhane vha nga konḓelela u tovholwa hu fanaho. (Vhalani 2 Timotheo 3:12.) Vhakriste vhoṱhe vha nga pfesesa, u humbula, na u shumisa yeneyo ngudo nahone vha khwaṱhisa lutendo lwavho.

12. (a) A ro ngo fanela u phetha nga ḽifhio nga ha mafhungo a Bivhili? (b) Ndi ngani ri tshi kona u vha na ṱhalutshedzo i pfalaho ya zwithu zwo dzikaho? (Sedzani ṱhaluso i re magumoni a siaṱari.)

¹² Naa ri fanela u phetha nga ḽa uri mafhungo a Bivhili a na ngudo dzi shumaho nahone ha fanyiseli zwiṅwe zwithu? Hai. Fhedzi nṱhani ha u ṱalutshedza maṅwe mafhungo sa pfanyisedzo kana u ḓadzea ha zwine zwa khou fanyiswa, zwino khandiso dzashu dzi livhisa ṱhogomelo khulwane kha nḓila ine maṅwe mafhungo a Bivhili a tshimbidzana ngayo. Sa tsumbo, u fulufhedzea ha Nabothe hu sa londwi u tovholwa  na u vhulahwa hawe zwi ri humbudza u fulufhedzea ha Kristo na vhaḓodzwa. Naho zwo ralo, ri dovha ra humbudzwa na nga u fulufhedzea ha vhanzhi vha “dziṅwe nngu.” Ri kona u pfesesa nga vhuḓalo nḓila ine Yehova a ri gudisa ngayo nga nḓila i leluwaho. *—Sedzani ṱhaluso i re magumoni a siaṱari.

13. Ndi tsumbo dzifhio dzine dza sumbedza uri zwino ri ṱalutshedza zwiṅwe zwa zwifanyiso zwa Yesu nga hu leluwaho na nga nḓila i pfalaho?

¹³ Yesu Kristo o vha e Mufunzi muhulu we a vhuya a tshila. O vha a tshi takalela u shumisa zwifanyiso kana tsumbo u itela u gudisa. (Mateo 13:34) Zwifanyiso zwi a shuma ngauri zwi ṱalutshedza mafhungo a konḓaho nga nḓila i leluwaho ine ya nga ri ita uri ri humbule, nahone zwi nga kwama mbilu dzashu. Miṅwahani yo fhiraho, khandiso dzashu dzo ṱalutshedza zwifanyiso zwa Yesu nga nḓila i pfalaho na i leluwaho. Sa tsumbo, Tshiingamo tsha ḽa 15 July, 2008, tshi ri thusa u pfesesa nga ho engedzeaho zwifanyiso zwa Yesu, tsha mbiliso, thoro ya luṋonya na mambule. Zwino ri a kona u pfesesa uri zwenezwi zwifanyiso zwi khou ambela kha Muvhuso wa Mudzimu, we wa thusa vhathu vhanzhi u landula shango ḽivhi nahone vha vha vhafunziwa vha Kristo.

14. (a) Ro vha ri tshi ṱalutshedza hani tshifanyiso tsha Musamaria wa vhuthu? (b) Zwino ri pfesesa hani tshifanyiso tsha Yesu?

¹⁴ Ndi mini tshine tsha nga ri thusa u pfesesa mafhungo kana zwifanyiso zwe Yesu a amba nga hazwo nga vhuḓalo? Maṅwe a enea mafhungo ndi a pfanyisedzo kana vhuporofita. Maṅwe a ṋea ngudo i shumaho. Fhedzi ri nga ṱalula hani mafhungo a pfanyisedzo na a si a pfanyisedzo? Miṅwahani yo fhiraho, phindulo yo bvela khagala. Sa tsumbo, humbulani nḓila ye ra vha ri tshi ṱalutshedza ngayo tshifanyiso tsha Yesu tsha Musamaria wa vhuthu. (Luka 10:30-37) Nga 1924, Watch Tower yo amba uri Musamaria o vha a tshi fanyisela Yesu nahone nḓila i bvaho tshikwarani tsha Yerusalema i tshi ya Yeriko yo vha i tshi fanyisela vhuimo ha vhathu vhune ha khou ṋaṋa u bva tshifhingani tsha vhushandukwa ha ngei Edeni. Zwiṅwe hafhu, mbava dzi re nḓilani dzo vha dzi tshi fanyisela mabindu mahulwane na vhoramabindu vha vhupangwa, nahone tshifhe na Mulevi vha fanyisela ḽa Vhudzhagane. Fhedzi musalauno, khandiso dzashu dzi shumisa tshenetsho tshifanyiso u itela u humbudza Vhakriste vhoṱhe uri vha songo vha na tshiṱalula. Ri fanela u thusa vhathu vhoṱhe vhane vha ṱoḓa thuso, zwihuluhulu nga u vha thusa u guda ngoho nga ha Mudzimu. Zwi a ri takadza vhukuma u vhona nḓila ine Yehova a ita ngayo uri ngoho i pfesesee.

15. Ri ḓo haseledza mini kha thero i tevhelaho?

¹⁵ Kha thero yashu i tevhelaho ri ḓo haseledza nga ha tshifanyiso tsha Yesu tsha vhasidzana vha fumi. (Mateo 25:1-13) Yesu o vha a tshi ṱoḓa vhatevheli vhawe vha maḓuvhani a vhufhelo vha tshi pfesesa hani tshenetsho tshifanyiso tshi nyanyulaho? Naa muthu muṅwe na muṅwe, tshithu, kana tshiitea kha tshifanyiso zwi fanyisela muṅwe muthu kana zwithu zwihulwane zwa tshifhingani tshi ḓaho? Kana naa o vha a tshi khou ṱoḓa u ri ṋea ngudo dzi shumaho dzine dza ḓo ri thusa tshifhingani tsha maḓuvhani a vhufhelo? Kha ri ṱhogomele kha thero i tevhelaho.