Naa Ni Nga Ita Zwo Engedzeaho U Itela U Sevha Vhaṅwe?
Filimu yavhuḓi ine ya pfi A Trip Down Market Street yo kwama vhaṱaleli nga nṱhani ha uri i sumbedza zwithu zwine zwa itea ḓuvha ḽiṅwe na ḽiṅwe sa zwe zwa itea ngei San Francisco, kha ḽa U.S.A., mathomoni a ḓana ḽa vhu-20 ḽa miṅwaha. Vhaiti vha dzifilimu vho vhea khamera phanḓa ha goloi ine ya tshimbidzwa nga muḓagasi nahone vha i sedzisa nḓilani i re henefho fhethu. Vhabvumbedzwa vha re kha yeneyo filimu vha katela gariki dzine dza kokodzwa nga dzibere, goloi dza kale, vharengi, khathihi na vharengisi vha dzigurannda vha tshi khou ita mishumo yavho ya ḓuvha ḽiṅwe na ḽiṅwe.
Zwine zwa ita uri yeneyi filimu i ṋaṋe u ṱungufhadza ndi uri i nga kha ḓi vha yo itwa nga April 1906, nga phanḓanyana ha mudzinginyo na mulilo zwi re na khombo zwe zwa vhulaha vhathu vhanzhi-vhanzhi nahone zwa ṱoḓa u lozwa tshenetsho tshipiḓa tsha ḓorobo nga ḽa 18 April. Khamusi vhaṅwe vha vhathu vhe vha sumbedzwa kha yeneyi filimu vho vha vho salelwa nga maḓuvha a si gathi a u tshila. Scott Miles ane a vha muḓuhulu wa muṅwe wa vhaiti vha dzifilimu u ri: “Ndi sokou vhona vhathu henefho, nahone a vha vhuyi vha ḓivha zwine zwa ḓo itea. Zwi a ṱungufhadza vhukuma.”
Zwi songo lavhelelwa, mudzinginyo wa 1906 na mulilo zwo tshinyadza tshipiḓa tshihulwane tsha ḓorobo ya San Francisco
Zwenezwo zwi a fana na misini yashu. Ri a pfela vhuṱungu vhahura vhashu. Vha bvela phanḓa na mishumo yavho ya ḓuvha ḽiṅwe na ḽiṅwe vha sa vhuyi vha ṱhogomela makhaulambilu a re tsini—u fheliswa ha ano maitele a zwithu na matshilele avho. Naho zwo ralo, u fhambana na mudzinginyo wa shango u songo lavhelelwaho, hu kha ḓi vha na tshibuli tsha u sevha vhahura vhashu nga ha ḓuvha ḽa Yehova ḽa khaṱulo. Zwi nga kha ḓi itea uri ni fhedza tshifhinga vhege iṅwe na iṅwe ni vhuḓinḓani ha nnḓu nga nnḓu, fhedzi naa ni nga ita zwo engedzeaho u itela u sevha vhaṅwe?
YESU O VHA A TSHI HUWELELA TSHIFHINGA TSHOṰHE
Tsumbo ya Yesu i a swayea vhukuma nga nṱhani ha uri o vha a tshi huwelela tshifhinga tshoṱhe. O vha a tshi huwelela kha muṅwe na muṅwe we a ṱangana nae, hu sa londwi uri ndi muthelisi ane a mu fhira nḓilani kana mufumakadzi we a ṱangana nae musi o awela masiari. (Luka 19:1-5; Yoh. 4:5-10, 21-24) Na musi hu tshifhinga tshawe tsha u awela, Yesu o vha a tshi litsha mishumo yawe nga u ḓifunela u itela u funza vhaṅwe. U pfela vhahura vhawe vhuṱungu zwo mu ita uri a si ṱanziele u itela u sokou ḓadzisa mulayo. (Marko 6:30-34) Muya wa Yesu wa u ṱavhanyisa zwithu u edziswa nga nḓila-ḓe ṋamusi?
VHA SHUMISA TSHIBULI TSHIṄWE NA TSHIṄWE
Melika u dzula fuletheni dzine zwa konḓa u dzhena khadzo. Vhunzhi ha vhahura vhawe ndi vhagudiswa vha bvaho mashangoni a sili vhane vha shumisa ṱhingothendeleki na vhe madzina avho a sa ṅwalwe hune ha dzhenwa ngaho tshifhaṱoni. U dzhiela nṱha tshibuli tshine a vha natsho tsha u thoma nyambedzano dza lwa muya na vhahiri fhethu hune ha dzhenwa ngaho na lifithini. U ri: “Ndi i dzhia sa tsimu yanga.” Melika u dzula o fara khandiso dza nyambo dzo fhamba-fhambanaho, nahone vhathu vhanzhi vha ṱanganedza zwibammbiri na dzimagazini. U dovha a livhisa ṱhogomelo yavho kha Web site ya jw.org. O no thoma pfunzo dza Bivhili dzo vhalaho.
Sonia na ene o fhaṱutshela u ṱanziela kha muthu muṅwe na muṅwe ane a nga kona u ṱanziela khae. U shuma kiliniki ya dokotela, nahone o ḓivhetshela tshipikwa tsha u ṱanziela nga vhuḓalo kha vhashumisani nae vhoṱhe. Tsha u thoma, o ḓiṋea tshifhinga tsha u guda ṱhoḓea na zwine zwa takalelwa nga muthu muṅwe na muṅwe. Nga murahu ha zwenezwo, o shumisa tshifhinga tshawe tsha u awela u itela u haseledza navho nga muthihi nga muthihi nga zwithu zwa lwa muya. Nga nṱhani ha zwenezwo, Sonia o kona u thoma pfunzo mbili dza Bivhili. U dovha hafhu a ḓiimisela u ya fhethu hune ha dzhenwa ngaho henefho vhuongeloni nga tshifhinga tsha u awela u itela u haseledza na vhe vha ḓa kiliniki.
SHUMISANI ZWIBULI ZWINE NA VHA NAZWO
Muṅwe we a ponyoka mudzinginyo wa 1906 o ri ndi “khombo khulwanesa ye ya vhuya ya wela muḓi.” Naho zwo ralo, hu si kale khombo dzoṱhe dza mupo dzi nga si tsha vha khulwane musi dzi tshi vhambedzwa na ḓuvha ḽa ndifhedzo ḽine ḽa ḓo ḓela vhoṱhe “vhane vha si ḓivhe Mudzimu.” (2 Vhathes. 1:8) Yehova u ṱoḓa uri vhathu vha shandule muhumbulo na mbilu nahone vha aravhe kha mulaedza wa u sevha une wa ḓiswa nga Dziṱhanzi.—2 Pet. 3:9; Nzumb. 14:6, 7.
Naa ni nga shumisa tshibuli tshiṅwe na tshiṅwe u itela u ṱanziela musi no farakanea nga mishumo yaṋu ya ḓuvha ḽiṅwe na ḽiṅwe?
Ni na ndugelo ya u bonyolosa vhathu maṱo uri vha vhone zwifhinga zwashu zwi lemelaho nahone ni vha thuse uri vha furalele mishumo ya tseḓa nahone vha ṱoḓe Yehova. (Tsef. 2:2, 3) Naa ni nga shumisa tshibuli tshiṅwe na tshiṅwe u itela u ṱanziela kha vhashumisani nga inwi, vhahura, na vhane na ṱangana navho musi no farakanea nga mishumo ya ḓuvha ḽiṅwe na ḽiṅwe? Naa ni ḓo ita zwo engedzeaho u itela u sevha vhaṅwe?
