Nga Ḽavhuraru nga matsheloni, nga ḽa 5 September, 2012, ho ḓivhadzwa muṱani wa Bethele ngei United States na Canada uri ho engedzwa muraḓo muswa kha Tshigwada Tshi Langaho tsha Ṱhanzi Dza Yehova. U thoma nga ḽa 1 September, 2012, Mark Sanderson o thoma u vha muṅwe wa tshenetsho tshigwada.

Wahashu Sanderson o aluswa San Diego, California, ngei U.S.A., nga vhabebi vhawe vha Vhakriste nahone o lovhedzwa nga ḽa 9 February, 1975. O thoma u shuma sa muvulanḓila Saskatchewan ngei Canada nga ḽa 1 September, 1983. Nga December 1990, o ṱhaphudza kilasi ya vhusumbe Tshikoloni Tsha U Gudisa Vhuḓinḓa (zwino tshi vhidzwa Tshikolo Tsha Bivhili Tsha Vhahashu Vha Tshinnani Vha Songo Vhingaho) ngei United States. Wahashu Sanderson o vhewa uri a shume sa muvulanḓila o khetheaho tshiṱangadzimeni tsha Newfoundland ngei Canada nga April 1991. Nga murahu ha u shuma sa mufareli wa mulavhelesi wa ḽiisela, o vhidzwa uri a vhe tshipiḓa tsha muṱa wa Bethele ya Canada nga February 1997. Nga November 2000, o rumelwa davhini ḽa United States, he a shuma kha Muhasho wa Mafhungo a Vhuongelo nahone nga murahu a shuma Muhashoni wa Tshumelo.

Nga September 2008, Wahashu Sanderson o ya Tshikoloni tsha Miraḓo ya Komiti ya Davhi nahone nga murahu a vhewa sa muraḓo wa Komiti ya Davhi ya ngei Philippines. Nga September 2010, a rambiwa uri a humele ngei United States, he a shuma sa muthusi wa Komiti ya Tshumelo ya Tshigwada tshi Langaho.