Ipfi Ḽe Ḽa Vha Ḽi Ḽa Ndeme Vhukuma!
“MUFUMAKADZI.” Heyi ndi nḓila ye nga zwiṅwe zwifhinga Yesu a vha a tshi i shumisa musi a tshi amba na muthu wa mbeu i sa fani na yawe. Sa tsumbo, musi a tshi fhodza muthu o holefhalaho, we a vha a tshi dzula o kotama lwa miṅwaha i ṱoḓaho u vha 18, o ri: “[Mufumakadzi] wo vhofhololwa kha vhulwadze hau.” (Luka 13:10-13) Yesu o vha a tshi amba na mme awe nga yeneyi nḓila, ho vha hu nḓila ya u sumbedza ṱhonifho zwifhingani zwa Bivhili. (Yohane 19:26; 20:13) Fhedzi ho vha hu na ḽiṅwe ipfi ḽi sumbedzaho u ṱhonifha ho engedzeaho.
Bivhili yo shumisa maipfi o khetheaho na a vhuthu musi i tshi ambela kha vhaṅwe vhafumakadzi. Yesu o shumisa eneo maipfi musi a tshi amba na mufumakadzi we a vha e na vhulwadze ha u shuluwa malofha lwa miṅwaha ya 12. Nḓila ye onoyo mufumakadzi a sendela ngayo tsini na Yesu yo vha i sa tshimbidzani na Mulayo wa Mudzimu ngauri wo vha u tshi amba uri muthu ane a vha kha honoho vhuimo ho ngo kuna. Vhaṅwe vhathu vho vha vha tshi amba uri onoyo mufumakadzi o vha a tshi fanela u dzula kule na vhathu nga nṱhani ha vhuimo hawe. (Lev. 15:19-27) Fhedzi o vha o hanganea. Nga zwenezwo, “o vha o no tambudzwa lunzhi nga dziṅanga, o no fhedza thundu yawe yoṱhe nahone a sa fholi, fhedzi vhulwadze ha ḓi ṋaṋa vhu tshi ya.”—Marko 5:25, 26.
Onoyo mufumakadzi o vhanyuludza vhukati ha gogo nahone a swika a kwama nguvho ya Yesu ya nga nnḓa. Vhulwadze hawe ha mbo ḓi fhola nga u ṱavhanya! Onoyo mufumakadzi o vha o fulufhela uri u ḓo shavha nga u bonya ha iṱo, fhedzi Yesu a vhudzisa uri: “Ndi nnyi o nkwamaho?” (Luka 8:45-47) Onoyo mufumakadzi o vha o tshuwa a tshi khou tetemela, a gwadama phanḓa ha Yesu “a mu vhudza ngoho yoṱhe.”—Marko 5:33.
U itela uri onoyo mufumakadzi a ḓipfe o vhofholowa, Yesu o amba nae nga vhuthu a ri: “Rudza mbilu ṅwana’nga!” (Mat. 9:22) U ya nga vhagudi vha Bivhili, ipfi ḽa Luheberu na Lugerika ḽine ḽa ri “ṅwana’nga” ḽi nga shumiswa kha u sumbedza “vhuthu na lufuno.” Yesu o mu khuthadza nga ho engedzeaho musi a tshi ri: “Lutendo lwau lwo u fhodza. Ṱuwa nga mulalo, nahone u fhole vhulwadze hau.”—Marko 5:34.
“Ṅwana’nga.” Heyi ndi nḓila ye Boasi munna o pfumaho wa ngei Isiraele a amba ngayo na Ruthe wa Mumoaba. Ruthe o vha a songo vhofholowa ngauri o vha a tshi khou ṱala ṱhalane kha tsimu ya munna ane a si mu ḓivhe. Boasi o ri: “Ṅwanaʹnga! U khou zwi pfa zwine nda amba.” Nga zwenezwo, a ṱuṱuwedza Ruthe uri a bvele phanḓa a tshi ṱala ṱhalane tsimuni yawe. Ruthe a gwadama phanḓa ha Boasi nahone a vhudzisa uri ndi ngani a tshi khou mu sumbedza vhuthu ngeno e mutsinda. Boasi o mu fhindula nga nḓila ya vhuthu musi a tshi ri: “Vho mbudza zwavhuḓi zwoṱhe zwe wa ita mazwale wau [Naomi wa tshilikadzi] . . . Yehova nga a U ite zwo eḓanaho zwe iwe wa zwi ita.”—Ruthe 2:8-12.
Ndi tsumbo yavhuḓi lungafhani ye Boasi na Yesu vha i vhetshela vhahulwane vha Vhakriste! Nga zwiṅwe zwifhinga, vhahulwane vhavhili vha nga ṱangana na wahashu wa tshisadzini ane a ṱoḓa thuso i bvaho Maṅwaloni na u ṱuṱuwedzwa. Musi vho no ṱoḓa vhulivhisi kha Yehova nga thabelo na u thetshelesa onoyo wahashu nga vhuronwane, vhahulwane vha ḓo kona u mu khuthadza zwi tshi bva Bivhilini.—Vharoma 15:4.