HU NA mavhonele manzhi nga ha vhutshilo na lufu. Vhaṅwe vha vhona u nga vha ḓo bvela phanḓa vha tshi khou tshila musi vho fa, khamusi vhe kha tshiṅwe tshivhumbeo kana huṅwe fhethu. Vhaṅwe vha vhona u nga vha ḓo dovha vha bebwa uri vha tshile huṅwe fhethu. Vhaṅwe vha vhona u nga lufu ndi ambadzifhele.

Hu nga vha hu na zwine na zwi tenda nga ha enea mafhungo, zwi tshi ya nga nḓila ye na aluswa ngayo kana hune na bva hone. Samusi vhathu vhe na mavhonele a sa fani nga ha zwine zwa itea musi muthu a tshi fa, naa hu na muthu kana huṅwe fhethu hune ra nga wana hone phindulo ya vhukuma ine ra nga i fulufhela ya yeneyi mbudziso?

Lwa miṅwaha ya maḓana, vharangaphanḓa vha vhurereli vho gudisa pfunzothendwa ya uri muya wa muthu u bvela phanḓa u tshi tshila. Vhatevheli vha vhurereli vhunzhi—Vhakriste, Vhahindu, Vhayuda, Vhamuslim na vhaṅwe—vha tenda uri muya wa muthu u bvela phanḓa u tshi tshila, zwine zwa amba uri muya a u fi musi muvhili u tshi fa nahone u bvela phanḓa u tshi tshila huṅwe fhethu. Kha ḽiṅwe sia, Vhabudda vha tenda uri muthu u a bebwa lunzhi-lunzhi hune a swika kha vhuimo vhune a si tsha bebwa nahone u vha a si tsha pfa vhuṱungu, honoho vhuimo vhu vhidzwa Nirvana.

Nga nṱhani ha dzenedzo pfunzo, vhunzhi ha vhathu shangoni ḽoṱhe vha tenda uri lufu lu vulela vhathu tshibuli tsha u dovha vha tshila kha ḽiṅwe shango. Nga zwenezwo, kha vhanzhi, lufu ndi tshipiḓa tsha ndeme vhukuma tsha uri muthu a kone u dovha a tshila nahone kha vhenevho vhathu u fa zwi vhonala u nga ndi lufuno lwa Mudzimu. Fhedzi Bivhili i ri mini nga ha enea mafhungo? Ri humbela uri ni vhale thero i tevhelaho. Phindulo ya yeneyo mbudziso i nga ni mangadza.