Nganea 102: Yesu u a Tshila
Musadzi uyo ndi Maria Magdalena, khonani ya Yesu. Vhanna vho ambaraho zwiambaro zwitshena ndi vharuṅwa. Nnḓu ṱhukhu ine Maria a khou sedza ngomu hayo ndi fhethu he mutumbu wa Yesu wa vha wo vhewa musi o fa. I vhidzwa tshalo. Fhedzi mutumbu wo vha u si tsheeho! Wo vha wo dzhiiwa nga nnyi? Kha ri vhone.
Yesu o no fa, vhotshifhe vha ri kha Pilato: ‘Musi Yesu a tshi tshila o ri u ḓo vuswa nga murahu ha maḓuvha mararu. Ngauralo laya uri tshalo tshi lindwe. Ndi hone vhafunziwa vhawe vha sa ḓo kona u tswa mutumbu wawe vha ri o vuswa vhafuni!’ Pilato a vhudza vhotshifhe uri vha rume maswole a linde tshalo.
Fhedzi nga matshelonitsheloni nga ḓuvha ḽa vhuraru nga murahu Yesu o no fa muruṅwa wa Yehova a ḓa nga u ṱavhanya. A phigulusela tombo kule ha tshalo. Maswole a ofha lwe a si kone u sudzuluwa. Mafheleloni, musi a tshi sedza tshaloni, mutumbu wo vha u si tsheeho! Maṅwe a maswole a ya muḓini a vhudza vhotshifhe. Ni a ḓivha uri vhotshifhe vhavhi vha itani? Vha badela maswole uri a zwifhe. Vha vhudza maswole: ‘Ni ri vhafunziwa vhawe vho ḓa vhusiku, ro eḓela, vha tswa mutumbu.’
Zwenezwo, dziṅwe khonani dza Yesu dza vhasadzi dza dalela tshalo. Vha mangala hani u wana tshi si na tshithu! Nga u ṱavhanya vharuṅwa vhavhili vha bvelela. Vha vhudzisa: ‘Ndi ngani ni tshi ṱoḓa Yesu afha? O vuwa. Ṱavhanyani ni yo vhudza vhafunziwa vhawe.’ Nḓilani vhasadzi vha imiswa nga munna. O vha e Yesu! A ri: ‘Tshimbilani ni yo vhudza vhafunziwa vhanga.’
Musi vhasadzi vha tshi vhudza vhafunziwa uri Yesu u a tshila na uri vho mu vhona, vhafunziwa vha si tende. Petro na Yohane vha gidimela tshaloni uri vha ḓisedzele, fhedzi tsho vha tshi si na tshithu! Petro na Yohane vha tshi ṱuwa, Maria Magdalena a sala. Ndi ha musi a tshi sedza ngomu a vhona vharuṅwa vhavhili.
Ni a ḓivha uri ho vha ho itea mini kha mutumbu wa Yesu? Yehova o vha o ita uri u sa tsha vhonala. Yehova o vha o vusa Yesu nga muvhili muswa wa muya. Fhedzi u itela u sumbedza vhafunziwa vhawe uri u a tshila, Yesu o kona u ambara muvhili we vhathu vha vha vha tshi nga u vhona, samusi ri tshi ḓo zwi guda.
Mateo 27:62-66; 28:1-15; Luka 24:1-12; Yohane 20:1-12.
Mbudziso
- Musadzi a re kha tshifanyiso ndi nnyi, vhanna avha vhavhili ndi vhonnyi, nahone vha ngafhi?
- Ndi ngani Pilato o vhudza vhotshifhe uri vha rume maswole uri a ye u linda tshalo tsha Yesu?
- Muruṅwa o ita mini nga matsheloni-tsheloni a ḓuvha ḽa vhuraru nga murahu ha lufu lwa Yesu, fhedzi vhotshifhe vho ita mini?
- Ndi ngani vhaṅwe vhasadzi vho mangala musi vha tshi ya tshaloni tsha Yesu?
- Ndi ngani Petro na Yohane vho gidimela tshaloni tsha Yesu, nahone vho wana mini?
- Ho itea mini nga tshitumbu tsha Yesu, fhedzi o ita mini u itela u sumbedza vhafunziwa vhawe uri u khou tshila?
Mbudziso dzo engedzeaho
- Vhalani Mateo 27:62-66 na 28:1-15.
Nga tshifhinga tshe Yesu a vuwa ngatsho, ndi tshivhi tshifhio tshe vhotshifhe vhahulu, Vhafarisei, na vhanna vhahulwane vha tshi itela muyamukhethwa? (Mat. 12:24, 31, 32; 28:11-15)
- Vhalani Luka 24:1-12.
Mafhungo a mvuwo ya Yesu a sumbedza hani uri Yehova u dzhia vhasadzi vhe ṱhanzi dzi fulufhedzeaho? (Luka 24:4, 9, 10; Mat. 28:1-7)
- Vhalani Yohane 20:1-12.
Yohane 20:8, 9 i ri thusa hani u vhona ṱhoḓea ya u sa fhela mbilu arali ri sa pfesesi nga vhuḓalo vhuporofita ha Bivhili? (Mir. 4:18; Mat. 17:22, 23; Luka 24:5-8; Yoh. 16:12)
You May Also Like
TSHIINGAMO
U Fa Na U Vuswa Ha Yesu—Zwine Zwa Amba Zwone Kha Inwi
Ngoho dza rathi dza mutheo wa Bivhili dzi ṱalutshedza nḓila ine lufu lwa muthu muthihi lwa nga ita uri vhathu vhanzhi vha tshile.
