Ni a ḓivha uri uyu ṅwana muṱuku ndi nnyi? Ee, ndi Yesu. O vha a kha ḓi bva u bebelwa dangani. Danga ndi fhethu hune zwifuwo zwa dzudzwa hone. Maria u khou ladza Yesu mukungwani, hune ha vha fhethu hu faraho zwiḽiwa zwa dzimbongola na zwiṅwe zwifuwo uri zwi ḽe. Fhedzi ndi ngani Maria na Yosefa vhe afha na zwifuwo? Hafha a si fhethu ha u bebelwa ṅwana, ndi hone?

Hai, a si hone. Zwo itaho uri vha vhe afha ndi hezwi: Muvhusi wa Roma, Kesare Augusto, o ita mulayo wa uri muṅwe na muṅwe o vha o fanela u vhuelela muḓini we a bebelwa khawo uri dzina ḽawe ḽi ṅwalwe buguni. Zwino, Yosefa o vha o bebelwa afha Betlehema. Fhedzi musi ene na Maria vha tshi swika, ho vha hu si na vhudzulo havho. Ngauralo vha fanela u ḓa afha zwifuwoni. Nga ḽenelo ḓuvha Maria a beba Yesu! Yesu o vha o takala.

Ni a vha vhona vhalisa vha tshi khou ḓa u vhona Yesu? Vho vha vhe nnḓa vhusiku vha tshi khou lisa nngu dzavho, tshedza tshi penyaho tsha vha tanga. O vha e muruṅwa! Vhalisa vha ofha zwihulu. Fhedzi muruṅwa a ri: ‘Ni songo ofha! Ndo ni ḓisela mafhungo maḓifha. Ṋamusi, Betlehema, Kristo Murena o bebwa. U ḓo tshidza vhathu! Ni ḓo mu wana o putelwa nga miṅwenda o lala mukungwani.’ Nga u ṱavhanya vharuṅwa vhanzhi vha ḓa vha renda Mudzimu. Nga u ṱavhanya avha vhalisa vha ṱavhanya u ya u ṱoḓa Yesu, nahone zwino vho vha vho mu wana.

Ni a ḓivha uri ndi ngani Yesu o vha o khethea ngaurali? Ni a ḓivha uri o vha e nnyi vhukuma? Humbulani, mafhungoni a u thoma a bugu ino ro vhudzwa nga ha Murwa wa Yehova wa u thoma. Uyu Murwa o shuma na Yehova kha u ita maṱaḓulu na ḽifhasi na zwiṅwe zwoṱhe. Ee, o vha e ene we a vha e Yesu.

Ee, Yehova o bvisa vhutshilo ha Murwa wawe ṱaḓulu a vhu dzhenisa kha Maria. Nga u ṱavhanya ṅwana a thoma u aluwa ngomu hawe. Fhedzi uyu ṅwana o vha e Murwa wa Mudzimu. Mafheleloni Yesu a bebelwa afho dangani Betlehema. Ni a zwi vhonaha zwino uri ndi ngani vharuṅwa vho vha vho takala ngaurali u vhudza vhathu uri Yesu o vha o bebwa?

Luka 2:1-20.